జలుమూరు, డిసెంబర్ 19: గత మూడు రోజులుగా బంగాళాఖాతంలో ఏర్పడిన అల్పపీడన ప్రభావం వలన ఈదురుగాలులు, వర్షంతో జనాలు అనేక ఇబ్బందులు పడిన సంగతి తెల్సిందే. బుధవారం ఉదయం ఒక్కసారి ఉదయించిన సూర్యుని తేజస్సు చూసి ఆనందం వ్యక్తపరిచారు. గ్రామీణ ప్రాంత ప్రజలు కనీసం ఒంటిపై బట్టకూడా ఆరని పరిస్థితుల్లో సూర్యుని వెలుగుతో ప్రతీ కుటుంబం పలు పనులు చేపట్టారు.
అంటువ్యాధులు ప్రబలకుండా జాగ్రత్తలు పాటించండి
జలుమూరు, డిసెంబర్ 19: మండలం లింగాలవలస పంచాయతీ ఉసిరికిజ్వాల గ్రామంలో బుధవారం జలుమూరు ప్రాథమిక ఆరోగ్య కేంద్ర సిబ్బంది ప్రత్యేక ఉచిత వైద్య శిబిరాన్ని ఏర్పాటుచేశారు. ఈసందర్భంగా కమ్యూనిటీ హెల్త్ అధికారి వెంకటరావు మాట్లాడుతూ గడిచిన మూడురోజులు తుఫాన్ ప్రభావం వలన నీరు కలుషితమైందని, కలుషిత నీటిని వినియోగించకూడదని, ప్రతీ కుటుంబ సభ్యులు వేడి నీరు తాగాలని సూచించారు. ప్రస్తుతం ఎటువంటి వ్యాధులు సోకకుండా గ్రామంలో ప్రభుత్వ బావులను క్లోరినేషన్ చేయించారు. తదుపరి ప్రజలకు ఆరోగ్యసూత్రాలు, పలు సూచనలు అందజేశారు. ఉచిత మందులను సరఫరా చేశారు. ఈ కార్యక్రమంలో వైద్య పర్యవేక్షకులు చినరాజులు, వైద్య సిబ్బంది, ప్రజలు పాల్గొన్నారు.
గ్రంథాలయానికి కుర్చీలు వితరణ
పాతపట్నం, డిసెంబర్ 19:మండలం శాఖాగ్రంథాలయానికి శ్రీరామ్‌ప్రసాద్ సుమారు రూ.6వేలు విలువగల కుర్చీలను వితరణ చేశారు. తెలుగుయువత సదస్సులును నిర్వహిస్తున్న సందర్భంగా ఎంపీ రామ్మోహన్‌నాయుడు జన్మదిన వేడుకలలో భాగంగా ఈ వితరణ కార్యక్రమాన్ని చేపట్టామని వీరు తెలిపారు. ఈ సందర్భంగా పలువురు విద్యార్థులకు వివిధ రకాల పోటీలు నిర్వహించి గెలుపొందినవారికి బహుమతి ప్రధానం చేశారు. ఈ కార్యక్రమంలో తెలుగుయువత నాయకులు పైల బాబ్జితో పాటు రిటైర్డ్ హెచ్ ఎం పి.దాసునాయుడు మాస్టర్, శాఖా గ్రంథాలయాధికారి కాల్లరాజు, ప్రభుత్వ డిగ్రీకళాశాల అసిస్టెంట్ ప్రొఫెసర్ కొంచాల చక్రధర్ తదితరులు పాల్గొన్నారు.
హెల్త్ అసిస్టెంట్‌ను పాతపట్నంలోనే ఉంచాలి
పాతపట్నం, డిసెంబర్ 19: మండలం బైదులాపురం పి హెచ్‌సికి సంబంధించి పాతపట్నం, అత్యుతాపురం ఏరియా పరిథిలో గల హెల్త్ అసిస్టెంట్ లక్ష్మణరావును పాతపట్నంలోనే విధులును కొనసాగింపజేయాలని పాతపట్నం ప్రజలు, ఆశావర్కర్స్ కోరారు. లక్ష్మణరావుకు ఒత్తిడి మేరకు కొరసవాడ గ్రామానికి విధులకు పంపించారని పాతపట్నంలో ఎక్కువ శాతం స్కూల్లు, హాస్టల్స్ ఉన్నాయని వీటి అవసరం నిమిత్తం పురుష హెల్త్ అసిస్టెంట్ అవసరమని వీరు తెలిపారు. ఆశావర్కర్స్ హిళలు కావడంతో ఇక్కడ మగ హెల్త్ అసిస్టెంట్ ఎంతో అవసరమని వీరు ఈ సందర్భంగా తెలిపారు. అధికారులు సమస్యలను దృష్టిలోపెట్టుకొని పాతపట్నం విధులు నిర్వహించేలా చూడాలని కోరారు.
ప్రజారోగ్యమే ప్రభుత్వ లక్ష్యం
పోలాకి, డిసెంబర్ 19: మండలం గుప్పిడిపేట ప్రాథమిక ఆరోగ్య కేంద్రం పరిథిలో గల గ్రామాలలో పలకరింపు రెండవ విడత కార్యక్రమం నిర్వహించినట్లు డాక్టర్ బలగ మురళి తెలిపారు. ఈ సందర్భంగా ఆయన మాట్లాడుతూ పిహెచ్‌సి పరిథిలో ఉన్నటువంటి గ్రామాల్లో ప్రతీ ఇంటికి వెళ్లి పిల్లలకు వ్యాధి నిరోధక టీకాలు వేయించారో లేదో తెల్సుకోవడం, టిబి లక్షణాలు తెలియజేయడం, స్వైన్‌ఫ్లూ లక్షణాలు వివరించి వాటన్నింటిని గుర్తించి వాటి పట్ల నివేదికలు తయారుచేయడం జరుగుతుందని ఆయన అన్నారు. అలాగే చిన్నారిచూపు కార్యక్రమంలో భాగంగా పిహెచ్‌సి పరిథిలో గల స్కూల్స్ అన్నింటికి వెళ్లి విద్యార్థులకు కంటి పరీక్షలు నిర్వహించినట్లు, అందులో వచ్చిన లోపాలను గ్రహించి సంబంధిత కంటి వైద్యులు దగ్గరకు పంపించి మెరుగైన వైద్యసేవలు అందించడానికి ఇది ఒక చక్కని అవకాశమని ఆయన అన్నారు. అలాగే తుఫాన్ ప్రభావం వలన ఎవరికి ఏ ఇబ్బంది జరిగినా తక్షణమే నాకు గాని, సిబ్బందికి గాని తక్షణమే తెలియజేయాలని, అలా తెలియజేసినట్లయితే వెంటనే వైద్యసదుపాయం కల్పిస్తామన్నారు.
శత శాతం చెత్తనుండి సంపద కేంద్రాలు పూర్తిచేయాలి
* జెడ్పీ సిఈవో జి.నగేష్
నరసన్నపేట, డిసెంబర్ 19: జిల్లాలో స్వచ్ఛ్భారత్ కార్యక్రమంలో భాగంగా ఏర్పాటుచేస్తున్న చెత్తనుండి సంపద కేంద్రాలను తప్పనిసరిగా శతశాతం పూర్తయ్యే దిశగా ప్రతీ ఒక్కరు కృషి చేయాలని జిల్లా జెడ్పీ సి ఈవో జి.నగేష్ తెలిపారు. బుధవారం మండల కేంద్రంలోని స్థానిక మండల పరిషత్ కార్యాలయంలో ఏర్పాటుచేసిన నియోజకవర్గ స్థాయి అధికారులతో సమీక్ష సమావేశాన్ని నిర్వహించారు. ఈ సందర్భంగా మాట్లాడుతూ ప్రతీ పల్లె, గ్రామం పరిశుభ్రంగా ఉన్ననాడే ప్రతీ ఒక్కరికి సంపూర్ణ ఆరోగ్యాన్ని అందించగలుగాతమని వివరించారు. ఈ దిశగానే ప్రతీ పంచాయతీలో చెత్తనుండి సంపద కేంద్రాలను యుద్ధ ప్రాతిపదికన వాటి నిర్మాణాలు చేపడతున్నామని, అయితే వీటి నిర్మాణాలు మందకొడిగా సాగుతున్నాయని ఆగ్రహం వ్యక్తం చేశారు. రాష్ట్రంలో మన జిల్లా 13వ స్థానంలో ఉందని, ఇది మనజిల్లాకు ఎంతో అవమానకరమని ఆవేదన వ్యక్తం చేశారు. ఇప్పటికైనా అధికారులు తగు చర్యలు తీసుకొని స్పందించి ఈనెల 27వ తేదీలోగా శతశాతం పూర్తయ్యే దిశగా పనిచేయాలని ఆదేశించారు. లేనిపక్షంలో సంబంధిత అధికారులపై కఠిన చర్యలు తప్పవని హెచ్చరించారు. ఈ కార్యక్రమంలో చెత్తనుండి సంపద జిల్లా కో ఆర్డినేటర్ హేమసుందరరావు, డివిజనల్ పంచాయతీ అధికారి రామ్‌ప్రసాద్, పోలాకి, సారవకోట, జలుమూరు, నరసన్నపేట ఎంపీడీవోలు అలివేలుమంగమ్మ, జగదీశ్వరరావు, వాసుదేవరావు, విద్యాసాగర్, తహశీల్దార్‌లు మురళి కృష్ణ, ఈశ్వరమ్మ, ప్రవళ్లిక ప్రియ తదితరులు పాల్గొన్నారు.
చంద్రన్న క్రిస్మస్, సంక్రాంతి కానుకలు పంపిణీకి సిద్ధం
నరసన్నపేట, డిసెంబర్ 19: రాష్ట్ర ప్రభుత్వం ప్రతీ ఏడాది రేషన్ కార్డ్ వినియోగదారులకు ఉచితంగా అందజేస్తున్న చంద్రన్న కానుకలు పంపిణీ చేయుటకు సిద్ధం చేశారని రాష్ట్ర పౌరసరఫరాల శాఖ డైరెక్టర్ బలగ నాగేశ్వరరావు చెప్పారు. బుధవారం ఎమ్ ఎల్ ఎస్ కేంద్రం వద్ద డీలర్లుకు ఈమేరకు సరుకులను పంపిణీ చేశారు. ఈ సందర్భంగా ఆయన మాట్లాడుతూ రాష్ట్ర ప్రభుత్వం ఆర్థికంగా ఎన్నో కష్టాల్లో ఉన్నప్పటికి ఇచ్చిన మాట ప్రకారం క్రిస్మస్, చంద్రన్న కానుకలతో పాటు రంజాన్ కానుకలను కూడా శక్తివంచన లేకుండా పంపిణీ చేస్తుందని ఆయన స్పఫ్టం చేశారు. ప్రతీ ఒక్క వినియోగదారునికి తప్పనిసరిగా సరుకులు అందించే విధంగా చర్యలు చేపట్టాలని ఆయన కోరారు. ఈ సందర్భంగా పోలాకి, నరసన్నపేట మండలాలకు 45,341 మంది లబ్ధిదారులకు వీటిని అందజేస్తున్నామని, వీటిని సద్వినియోగం చేసుకోవాలని ఆయన కోరారు. ఎంపీటీసీ శకుంతల మాట్లాడుతూ ఒక సంచెతో పాటు కందిపప్పు అరకేజి, శనగపప్పు అరకేజి, బెల్లం అరకేజి, నెయ్యి 100గ్రాములు, అరలీటర్ నూనె, కేజీ అట్టాపిండిని అందజేస్తున్నట్లు తెలిపారు. ఈ కార్యక్రమంలో తహశీల్దార్ జె.రామారావు, ఎంపీటీసీలు కృష్ణ, ఎన్.్భరతి, రెవెన్యూ అధికారులు సరోజిని, హైమవతి, డీలర్లు పాల్గొన్నారు.
ఉపాధ్యాయుడు మృతి
సారవకోట, డిసెంబర్ 19: మండలంలోని బురుజువాడ ప్రాథమిక పాఠశాలలో ప్రధానోపాధ్యాయునిగా పనిచేస్తున్న చలపాక లక్ష్మీనారాయణ (53) అనారోగ్యంతో చికిత్స పొందుతూ మృతి చెందారు. మెదడుకు సంబంధించిన వ్యాధికి గురై కొన్ని రోజులుగా బెంగుళూర్‌లో ఒక ప్రైవేట్ ఆసుపత్రిలో శస్త్ర చికిత్సల అనంతరం చికిత్స పొందుతూ మంగళవారం రాత్రి మృతి చెందినట్లు అతని సోదరుడు సారవకోట మాజీ సర్పంచ్ చలపాక శ్రీనివాసరావు తెలిపారు. మృతునికి భార్య రోజారమణి, ఇద్దరు పిల్లలున్నారు. గురువారం సారవకోటలో అంత్యక్రియలు నిర్వహించనున్నట్లు శ్రీనివాసరావు స్పష్టం చేశారు. విషయం తెలుసుకున్న మండల విద్యాశాఖాధికారి ఎమ్.విరమణ మృతుని కుటుంబాన్ని పరామర్శించి ఓదార్చారు. ప్రభుత్వం నుండి రావలసిన సహాయాన్ని తక్షణమే అందజేస్తామని ఆయన హామీ ఇచ్చారు.
శరవేగంతో ఆలయ పునఃనిర్మాణం
సారవకోట, డిసెంబర్ 19: ఆధ్యాత్మిక కేంద్రంగా అలరారుతున్న బుడితి గ్రామంలో పురాతనమైన రామలింగేశ్వర స్వామి ఆలయ పునః నిర్మాణ పనులు వేగవంతంగా కొనసాగుతున్నాయి. బుడితి బస్టాండ్ వద్ద గల ఈ ఆలయం శిథిలావస్థకు చేరుకుంది. ఇక్కడి ఆలయాన్ని ఆధునిక పద్ధతిలో పునఃనిర్మించవలసిన ఆవశ్యకతను స్థానికులు శాసనసభ్యుల దృష్టికి తెచ్చారు. దీనితో ఆలయాన్ని తొలుత దేవాదాయ పరిథిలోనికి బదలాయింపు చేసిన ఎమ్మెల్యే రమణమూర్తి ఆలయ పునఃనిర్మాణానికి రూ.40లక్షలును మంజూరు చేయించారు. కాకినాడకు చెందిన గుత్తేదారుడు పురాతన ఆలయాన్ని తొలగించి నూతన పద్ధతిలో వాస్తుమేరకు నిర్మాణం పనులను చేపట్టారు. శివరాత్రి నాటికి ఆలయ నిర్మాణపనులు పూర్తికావచ్చని భావిస్తున్నారు.
అభివృద్ధిపథానికి కంప్యూటర్ ఎంతో అవసరం
* జిల్లా కలెక్టర్ కె.్ధనంజయరెడ్డి
శ్రీకాకుళం (టౌన్), డిసెంబర్ 19: నేటి తరం అభివృద్ధి పథంలో పయనించాలంటే కంప్యూటర్ రంగం ఎంతో అవసరమని జిల్లా కలెక్టర్ కె.్ధనంజయరెడ్డి అన్నారు. స్థానిక ఎల్‌ఐసి ఆఫీస్ వద్ద గల కాకినాడ ఆదిత్య డిగ్రీ కళాశాలలో బుధవారం జస్ట్ 2కె18 కార్యక్రమం జరిగింది. ఈ కార్యక్రమానికి జిల్లా కలెక్టర్ ధనంజయరెడ్డి ముఖ్యఅతిథిగా పాల్గొన్నారు. ఈ సందర్భంగా ఆయన మాట్లాడుతూ ప్రతీ విద్యార్థికి కంప్యూటర్ విజ్ఞానం ఎంతో అవసరమని, ప్రతీ పరీక్షలోకూడా దాని ఆవశ్యకత ఎంతైనా ఉందని తెలిపారు. ఈ సందర్భంగా కళాశాల విద్యార్థులు పవర్‌పాయింట్ ప్రెజెంటేషన్, పోస్టర్ ప్రెజెంటేషన్, కంప్యూటర్ ఈవెంట్లను ప్రదర్శించారు. ఈ కార్యక్రమంలో కంప్యూటర్ విభాగ అధిపతి ప్రదీప్ ఆధ్వర్యంలో నిర్వహించడం జరిగింది. ఈ సందర్భంగా పోటీల్లో గెలిచిన విజేతలకు బహుమతులు అందజేశారు. ఈ కార్యక్రమంలో ఆదిత్య విద్యాసంస్థల చైర్మన్ ఎన్.శేషారెడ్డి, ప్రాంతీయ సంచాలకులు బి. ఎస్ చక్రవర్తి, ప్రిన్సిపాల్ ఎ.చంద్రశేఖర్, సెక్రటరీ ఎన్‌కె దీపక్‌రెడ్డి, అకడమిక్ కో ఆర్డినేటర్ డిఈవిల్ నాయుడు, అధ్యాపక సిబ్బంది, విద్యార్థులు పాల్గొన్నారు.
