సీతానగరం, జనవరి 7: ఏళ్లతరబడి గ్రామాల్లో నెలకొన్న సమస్యలను పరిష్కరించని ప్రభుత్వ కార్యక్రమాలు ఎందుకని జానుముళ్లవలస గ్రామానికి చెందిన యువత ఆవేదన వ్యక్తం చేశారు. ఈమేరకు జానుముళ్లవలస గ్రామంలో సోమవారం జరిగిన జన్మభూమి కార్యక్రమంలో గ్రామానికి చెందిన యువత, జనసేన కార్యకర్తలు సమస్యలపై అధికారులను నిలదీశారు. ఈసందర్భంగా మాజీ సైనికుడు వెంకటినాయుడు, జనసేన కార్యకర్తలు వెంకటేష్, తిరుపతి, ధనుంజయ్, శరత్‌లు మాట్లాడుతూ గ్రామంలో మంచినీటి సమస్యను పరిష్కరించాలని పలు సమావేశాల్లో ఫిర్యాదుచేసినప్పటికీ అధికారులు పట్టించుకోలేదన్నారు. పంట పొలాలకు సాగునీరు లేక తీవ్ర ఇబ్బందులు పడుతున్నామన్నారు. పలు పర్యాయాలు సమస్యలపై ఫిర్యాదుచేసిన వాటి పరిష్కారంలో అధికారులు నిర్లక్ష్యం వ్యవహరిస్తున్నారన్నారు. ఈమేరకు సమస్యల పరిష్కారానికే జన్మభూమి కార్యక్రమాన్ని ప్రభుత్వం నిర్వహిస్తుందని అధికారులు తెలిపారు. అదేవిధంగా గాదెలవలస, అంటిపేట, చినబోగిలి గ్రామాల్లో అధికారులు పాల్గొన్నారు.
రైతు జట్టుసేవలు అభినందనీయం
బాడంగి, జనవరి 7: సేంద్రీయ ఎరువుల వినియోగంతో మేలురకమైన కూరగాయలు, బెల్లం ఉత్పత్తులను తయారుచేస్తున్న రైతు జట్టు ఉత్పత్తి సంఘం సేవలు అభినందనీయమని నాబార్డు సీజీఎం సురేష్‌కుమార్ అన్నారు. మండలం ఎత్తుఖానా సమీపంలో ఉన్న దీక్షామహిళా వెల్ఫేర్ సొసైటీ ఆధ్వర్యంలో నిర్వహిస్తున్న రైతు జట్టు ఉత్పత్తుల సంఘం సమావేశాన్ని సోమవారం నిర్వహించారు. ఈసందర్భంగా ఆయన మాట్లాడుతూ ప్రజల ఆరోగ్యంతో ముడిపడి ఉన్న వ్యవసాయ సాగుపై రైతులకు అవగాహన కల్పిస్తు సేంద్రీయ ఎరువులను వినియోగించి సాగుచేస్తున్న కూరగాయలను పండించడం అభినందనీయమన్నారు. అదేవిధంగా సేంద్రీయ ఎరువులతో బెల్లం ఉత్పత్తులను సాగుచేస్తున్నారన్నారు. రసాయని ఎరువుల వినియోగించి తగ్గించేలా రైతులను చైతన్యవంతులను చేయాల్సిన ఆవస్యకత వ్యవసాయ సిబ్బందిపై ఉందన్నారు. దీక్షావెల్ఫేర్ సొసైటీ ముందుకు వచ్చి ఈప్రక్రియలో ముందుకు సాగిందన్నారు. అనంతరం వివిధ పరిమాణాల్లో తయారుచేసిన బెల్లం ఉత్పత్తులు, కూరగాయలను పరిశీలించారు. ఈయన వెంట ఏజీఎం హరీష్, శాస్తవ్రేత్తలు మదులత, శ్రీదేవి, జయశ్రీ, సొసైటీ అధ్యక్షురాలు శాంతికుమారి, ఈశ్వరరావు, రైతులు, తదితరులు పాల్గొన్నారు.
ప్రభుత్వంపై ప్రజల్లో విశ్వాసం పోయింది: శంబంగి
బొబ్బిలి, జనవరి 7: రాష్ట్ర ప్రభుత్వంపై ప్రజల్లో విశ్వాసం పోయిందని, ముఖ్యమంత్రి చంద్రబాబునాయుడు బూటకపు ప్రకటనలకు విసుగుచెంది తగిన గుణపాఠం చెప్పేందుకు సిద్ధంగా ఉన్నారని వైసీపీ నియోజకవర్గం సమన్వయకర్త శంబంగి వెంకటచినప్పలనాయుడు అన్నారు. జగన్‌పాదయాత్రకు మద్ధతుగా సోమవారం సంఘీభావ పాదయాత్రను నిర్వహించారు. ఈసందర్భంగా ఆయన మాట్లాడుతూ ఎన్నికల్లో ఇచ్చిన హామీలను నెరవేర్చడంలోప్రభుత్వం పూర్తిగా విఫలం చెందిందన్నారు. నిరుద్యోగులు, యువతీయువకులు, సామాన్య ప్రజలను మభ్యపెట్టి పదవిలోకి వచ్చిన బాబు పాలన పట్ల ప్రజలు విశ్వాసం కోల్పోయారన్నారు. జగన్ వస్తేనే రాష్ట్రం అన్నివిధాలా మెరుగవుతుందన్న అభిప్రాయానికి ప్రజలు వచ్చారని, అందుకు జగన్‌కు బ్రహ్మరథం పడుతున్నారని స్పష్టం చేశారు. ఈయనతోపాటు వైకాపా నాయకులు రాంసుధీర్, ఇంటి గోపాలరావు, సావు కృష్ణమూర్తినాయుడు, విస్సు, అప్పలనాయుడు, సత్యనారాయణ, శంబంగి వేణుగోపాలరావు, తదితరులు పాల్గొన్నారు.
కార్పోరేటీకరణ సంస్కరణలకు వ్యతిరేకంగా పోరాటాలు చేయాలి
బొబ్బిలి, జనవరి 7: కేంద్ర, రాష్ట్ర ప్రభుత్వాలు విద్యారంగంలో కార్పోరేటీకరణకు చేస్తున్న సంస్కరణలకు వ్యతిరేకంగా ఉపాధ్యాయ సంఘాలన్నీ సార్వత్రిక సమ్మెలో పాల్గొని సత్తా నిరూపించాలని ఏపీటీఎఫ్ జిల్లా ప్రధాన కార్యదర్శి జెసి రాజు పిలుపునిచ్చారు. ఏపీటీఎఫ్ కార్యాలయంలో 6మండలాల నాయకులు, కార్యకర్తల సమావేశం సోమవారం జరిగింది. ఈసందర్భంగా ఆయన మాట్లాడుతూ ప్రభుత్వాలు అనుసరిస్తున్న విధానాల వలన దేశ ఆర్థిక పరిస్థితితోపాటు వివిధ వ్యవస్థలు నిర్వీర్యం అవుతున్నాయన్నారు. అలాగే సీపీఎస్‌ను రద్దుచేయాలని, ఒప్పందం, పొరుగు సేవల విధానంలో ఉద్యోగులు పొందే విధానాన్ని రద్దుచేయాలని, ప్రభుత్వ పాఠశాలలను బలోపేతం చేయాలని డిమాండ్ చేశారు. ఈమేరకు మంగళ, బుధవారాలలో నిర్వహించనున్న సార్వత్రిక సమ్మెకు ప్రతీ ఒక్కరూ చేయూతనందించి విజయవంతం చేయాలన్నారు. ఈసమావేశంలో ఆ కమిటీ సభ్యులు బలరాంనాయుడు, వెంకటరమణ, ధనుంజయనాయుడు, తదితరులు పాల్గొన్నారు.
