పేరే కొంచెం టెంప్టింగ్‌గా లేదూ?! ఇక సినిమా ఎలా ఉంటుందో? అందునా- ఇమ్రాన్ హష్మీ. మొదట్నుంచీ ముద్దూ ముచ్చట అంటే బోలెడంత ఇష్టపడే అతగాడి సరసన నటించటానికి అమ్మాయిలు జంకుతున్నారు. కారణం లేకపోలేదు. అధాటున ‘స్క్రీన్’పై సీన్‌తో సంబంధం ఉన్నా లేకున్నా.. ముద్దు పెట్టేసుకుని మూతి తుడుచుకుంటాడన్న అపోహ ఒకటి ఉంది. దాంతో భయభయంగా సెట్స్‌పై గడపాల్సి వస్తుందని అడపాదడపా కొంతమంది వాపోయిన మాట వాస్తవం. తాజాగా ఈ ‘మిస్టర్ ఎక్స్’ ఎవర్ని వరించనుందా అని తెగ ఆసక్తిని వొలకబోసింది ఇండస్ట్రీ. ఐతే - అమీరా దస్తర్ ఆ మాటని అంగీకరించటం లేదు. ఇప్పట్లో చెప్పలేనంటోంది. కాస్త ఆలోచించుకోనివ్వండి. కానీ - మహేష్‌భట్ మాత్రం కన్‌ఫర్మ్ చేసేస్తున్నాడు. ఆడిషన్‌కి వచ్చినప్పుడు చూశా. మా సినిమాకి కథానాయిక దొరికేసింది అంటూ ముచ్చట పడుతున్నాడు. 1957లో నానాభాయ్ భట్ నిర్మించిన చిత్రానికి ఇది రీమేక్ అని ఒక పుకారు. అశోక్‌కుమార్ - నళినీ జయవంత్ నటించిన ఆ చిత్రం అప్పట్లో సంచలనం సృష్టించింది. జి.పి. సిప్సీ ఈ చిత్రాన్ని నిర్మించనున్నాడు. లాస్ ఏంజిల్స్ నుంచి టెక్నికల్ స్ట్ఫాని రప్పించి.. త్వరలోనే సెట్స్‌పైకి వెళ్లనున్నట్టు మహేష్ భట్ చెబుతున్నాడు. ఏది ఏమైతేనేం - అలనాటి సినిమా.. భారీ బడ్జెట్ - అమీరా దస్తర్ అందాలూ.. ఇక ఇమ్రాన్ హష్మీ.. సినిమాకి మంచి అంచనాల్ని తెచ్చిపెడుతున్నాయి హాట్‌హాట్‌గా.