దాదాపు 25 సంవత్సరాల తరువాత తెలుగులో నిర్మాణమవుతున్న భారీ మల్టీ స్టారర్ చిత్రంగా రూపుదిద్దుకుంటున్న ‘సీతమ్మ వాకిట్లో సిరిమల్లెచెట్టు’ చిత్రానికి సంబంధించిన పాటలు ఈ నెల 15న విడుదల కానున్నాయి. వెంకటేష్, మహేష్‌బాబు తొలి కాంబినేషన్‌లో శ్రీ వెంకటేశ్వర క్రియేషన్స్ పతాకంపై శ్రీకాంత్ అడ్డాల దర్శకత్వంలో నిర్మిస్తున్నారు. రెండు పాటలు మినహా షూటింగ్ మొత్తం పూర్తిచేశారు. ఈ సందర్భంగా చిత్ర నిర్మాత దిల్ రాజు మాట్లాడుతూ- ఆర్‌ఎఫ్‌సిలో భద్రాచల దేవాలయ సెట్లో సన్నివేశాలన్నీ పూర్తిచేశామని, కుటుంబ కథ నేపథ్యంలో అందరికీ నచ్చే విధంగా రూపొందిన ఈ చిత్రంలోని పాటలను ఈ నెల 15న విడుదల చేయనున్నామని, చిత్రాన్ని జనవరి 14న సంక్రాంతి కానుకగా ప్రేక్షకుల ముందుకు తీసుకురావాలని సన్నాహాలు చేస్తున్నామని తెలిపారు.
సమంత, అంజలి, ప్రకాష్‌రాజ్, జయసుధ, రోహిణి హట్టంగడి, అభినయ, కోట శ్రీనివాసరావు, వేణుమాధవ్, తనికెళ్ల భరణి, బ్రహ్మానందం, రావు రమేష్, ఆహుతి ప్రసాద్, రవిబాబు, రాజా రవీందర్, రజిత, శ్రీనివాసరెడ్డి, ప్రభాస్ శ్రీను, బ్రహ్మాజీ, హేమంత్, మురళీమోహన్ తదితరులు నటిస్తున్న ఈ చిత్రానికి సంగీతం:మిక్కీ జె.మేయర్, కెమెరా:కె.వి.గుహన్, ఎడిటింగ్:మార్తాండ్ కె.వెంకటేష్, నిర్మాత:దిల్ రాజు, కథ, మాటలు, స్క్రీన్‌ప్లే, దర్శకత్వం:శ్రీకాంత్ అడ్డాల.