న్యాల్‌కల్, జహీరాబాద్‌, మే 9: హిందూ ధర్మ పరిరక్షణకోసం కుంభమేళాలు దేశవ్యాప్తంగా నిర్వహిస్తున్నారని రవిశంకర్ గురుజీ అన్నారు. దక్షిణ భారత దేశంలోలనే మంజీరా కుంభమేళా నిర్వహించడం అభినందనీయమని కాశీనాథ్ బాబా సేవలను కొనియాడారు. మంజీరా కుంభమేళాలో ఆయన గురువారం పాల్గొన్నారు. ఈ సందర్భంగా నిర్వహించిన సభలో ఆయన ప్రవచిస్తూ మంజీరానదిలో స్నానం చేసినవారికి నదులు, సముద్రాల్లో స్నానం చేసినంత పుణ్యం లభిస్తుందన్నారు. మొన్నటి వరకు జరిగిన అలహాబాద్ కుంభమేళాలో 10కోట్ల మంది ప్రజలు పాల్గొన్నారన్నారు. మహారాష్ట్ర ,కర్ణాటకనుంచి వచ్చిన మంజీరానీరే మంజీరా కుంభమేళా అన్నారు. గంగా, యమున, సరస్వతి నదులు ఇక్కడ కలువడం చాలా సంతోషకరమన్నారు. ఇక్కడ స్నానాలు చేసిన భక్తుల పాపాలు తొలగిపోతాయని, రోగాలు నయమవుతాయన్నారు. దేశవ్యాప్తంగా ఎంతోమంది సాధువులు, సంతులు తరలివచ్చి మంజీరా నదిలో స్నానాలుచేశారన్నారు. వాటిలో భక్తులు స్నానాలుచేస్తే పాపాలు తొలగిపోతాయన్నారు. సాధువులు ఎక్కడ ఉంటారో అక్కడ మంజీరానీరు తీర్థమవుతుందన్నారు. అందరూ మంచిమార్గంలో నడుచుకోవాలన్నారు. ధర్మో రక్షతి: రక్షితహా: అన్న నానుడిని నిత్యజీవితంలో అనుసరించాలన్నారు. ప్రపంచంలో హిందూ ధర్మాన్ని విస్తరింప జేస్తున్నామన్నారు. భగవంతునిపై విశ్వాసం ఉంటేనే ఏదైనా సాధించగలుగుతామన్నారు. ప్రస్తుత పరిస్థితుల్లో ప్రతి ఒక్కరు డబ్బుకే ప్రాధాన్యతనిస్తున్నారన్నారు. ఇది మంచిపరిణామం కాదన్నారు. మనుషులు అనేక రోగాలకు గురౌతున్నారన్నారు. అందరు సుఖసంతోషాలతో ఉండాలని ఆకాంక్షించారు. పంచవటి పీఠాధిపతి కాశీనాథ్ బాబా మాట్లాడుతూ 84వేల కోట్ల జీవరాసుల్లో మనిషి జీవితమే ఉత్తమమైనదన్నారు. భగవంతుని కృపకు పాత్రులు కావాలన్నారు. ప్రపంచ దేశాల్లో హిందూధర్మాన్ని ఆచరిస్తున్నాన్నారు. 2010లో మంజీరా కుంభమేళాలో ఎంతో వైభవంగా నిర్వహించామన్నారు. అప్పుడు రామ్‌దేవ్‌బాబా వచ్చి హిందూ ధర్మపరిరక్షణకోసం, సంపూర్ణారోగ్యంకోసం తీసుకోవాల్సిన చర్యలను వివరించారు. 2013లో కూడా అదేతరహాలో కుంభమేళాను ఏర్పాటు చేయడం జరిగిందన్నారు. మంజీరానది మహారాష్ట్ర బీడ్ జిల్లా పడౌడి తాలుకాలోని బాలాపూర్ కొండల్లో జన్మించిందన్నారు. అక్కడినుంచి అనేక ప్రాంతాలగుండా పంచవటి క్షేత్రంచేరుతుందన్నారు. ఇక్కడినంచి నిజామాబాద్ జిల్లాగుండా ప్రవహించి నిజామాబాద్‌లోని బాసరవద్ద గోదావరిలో కలుస్తాయన్నారు. అన్ని మతాల సారాంశం దేవుడొక్కడేనన్నారు. హిందూ ధర్మ పరిరక్షణకోసం కుంభమేళా నిర్వహిస్తున్నామన్నారు. దేశవ్యాప్తంగా వివిధ ప్రాంతాలనుంచి వచ్చిన సాధువులు కుంభమేళాలో స్నానాలు చేశారన్నారు. ఈ నదిలో స్నానాలు చేసిన భక్తుల సర్వపాపాలు, రోగాలు తొలుగుతాయన్నారు. శివకుమార్ మహారాజ్ మాట్లాడుతూ గత 14 సంవత్సరాలుగా బీదర్ మఠంలో ఓం నమశివాయ అఖండ నామ స్మరణ చేస్తున్నామన్నారు. మంజీరా పురశ్కరాలు నిర్వహిస్తున్న కాశీనాథ్‌బాబాకు ఆయన అభినందనలు తెలిపారు. ఈ సభలో వివిధ ప్రాంతానుంచి వచ్చిన సాధువులు, భక్తులు పెద్ద సంఖ్యలో పాల్గొన్నారు.
కేంద్రం మెడలు వంచి తెలంగాణ సాధిద్దాం
*మెదక్ ఎంపి విజయశాంతి
గజ్వేల్, మే 9: సమైక్యవాద పార్టీలకు బుద్దిచెబితేనే తెలంగాణ రాష్ట్రం సిద్ధిస్తుందని మెదక్ పార్లమెంటు సభ్యురాలు విజయశాంతి పేర్కొన్నారు. గురువారం నియోజకవర్గ పరిధిలోని లక్ష్మక్కపల్లి, ముట్రాజ్‌పల్లి, గిరి పల్లి, గజ్వేల్, పిడిచెడ్, అహ్మదీపూర్ తదితర గ్రామాలలో వివిధ అభివృద్ధి పనులను ప్రారంభించిన సందర్భంగా ఆమె ప్రసంగించారు. ప్రత్యేక రాష్ట్ర సాధనతోనే ఇక్కడి సమస్యలకు పరిష్కారం లభించనుండగా, ఇక్కడి వనరులు దోచుకెళ్తున్న సీమాంధ్ర పాలకులు, పెట్టుబడి దారులను నిల దీయాల్సిన అవసరం ఉందన్నారు. కాగా ఆమరుల త్యాగాల పునాదులపై జరుగుతున్న ఉద్యమం వృథాకాదని, అయితే వారి మృతదేహాలపై ప్రమాణాలు చేసిన నేతలు పదవులు పట్టుకొని వేలాడుతుండడం సిగ్గుచేటని నిలదీశారు. అలాగే తెలంగాణ ఏర్పాటుకు హామీ ఇచ్చిన సోనియాగాంధీ పార్లమెంటులో బిల్లుపెట్టి ఆమోదింపజేయాలని ఆమె డిమాండ్ చేశారు. తెలంగాణ సాధన కోసమే టీఆర్‌ఎస్ ఆవిర్భవించగా, అన్ని వర్గాలు అండగా నిలిచి లక్ష్యాన్ని నెరవేర్చుకుందామని చెప్పారు. గ్రామీణ ప్రాంతాల్లో త్రాగునీటి సమస్యను దృష్టిలో ఉంచుకొని నిధులు కెటాయిస్తుండగా, గజ్వేల్ నియోజకవర్గానికి ఇప్పటికే వివిధ పథకాల క్రింద రూ,2కోట్లు కెటాయించినట్లు స్పష్టం చేశారు. ముఖ్యంగా విజయశాంతి పర్యటనలో మహిళల నుండి మంచి స్పందన లభించగా, గజ్వేల్ హౌజింగ్ బోర్డు కాలనీలో ఎంపిని ఘనంగా సన్మానించారు. అలాగే గిరిపల్లిలో ఎంపి విజయ శాంతి బోనం ఎత్తుకోగా, ఆయా గ్రామాలలో తరలివచ్చిన పార్టీ శ్రేణు లు ఘనంగా స్వాగతం పలికారు. నేతలు కొట్టాల యాదగిరి, ఆకుల దేవేందర్, చందు తదితరులు పాల్గొన్నారు.
కానిస్టేబుల్‌కు రెండేళ్ల జైలు
* మెదక్ జిల్లా జడ్జి తీర్పు
మెదక్, మే 9: పోలీస్ కానిస్టేబుల్ రామాంజనేయులుకు రెండు సంవత్సరాలు కఠిన కారాగార శిక్ష, 20 వేల జరిమాన విధిస్తూ జిల్లా జడ్జి రజిని గురువారం సంచలన తీర్పు ఇచ్చారు. కొల్చారం పోలీస్‌స్టేషన్‌లో కానిస్టేబుల్‌గా ఉంటూ మెదక్ సబ్ జైల్‌లో అటాచ్‌మెంట్ గార్డుగా డ్యూటీలో ఉన్న రామాంజనేయులు పిసి నెం.1157 పాత కక్షలు పునష్కరించుకుని మెదక్ సర్కిల్ ఇన్స్‌పెక్టర్ ఎ.విజయ్‌కుమార్‌ను కులం పేరుతో దుర్భాషలడాడు. దీంతో సిఐ ఎ.విజయ్‌కుమార్ మెదక్ పోలీస్‌స్టేషన్‌లో ఫిర్యాదు చేశారు. అప్పటి ఎస్సై మహేశ్ కేసు నమోదు చేసి, అప్పటి డిఎస్పీ మొగిలికి కేసు పరిశోధనకై కేసు ఫైల్ అప్పగించారు. డిఎస్పీ మొగిలి విచారణ జరిపి నేర నిరూపణ చేసి రామాంజనేయులును అరెస్టు చేసి రిమాండ్‌కు పంపారు. కోర్డులో చార్జీషీట్ దాఖలు చేశారు. అప్పటి నుండి కేసు సంగారెడ్డి కోర్టులో సాక్షుల విచారణ సాక్ష్య నిరూపణ జరిపింది. ఈ కేసుపై పబ్లిక్ ప్రాసిక్యూటర్ జాస్మిన్ ప్రాసిక్యూషన్ తరపున వాదన చేశారు. దరిమిల శుక్రవారం నాడు జిల్లా జడ్జి రజిని వాదోపవాదల పరిశీలన చేసిన అనంతరం రామాంజనేయులుకు 2 సంవత్సరాల కఠిన కారాగార శిక్ష, 20 వేల జరిమాన విధిస్తూ తీర్పునిచ్చారు. 20 వేల రూపాయలను ఫిర్యాదు దారుడు విజయ్‌కుమార్‌కు చెల్లించాలని కూడా జిల్లా జడ్జి తీర్చునిచ్చారు. ఈ సమాచారాన్ని మెదక్ టౌన్ పిఎస్ తరపున సిఐ ఎల్.విజయ్‌కుమార్ పత్రికలకు విడుదల చేశారు.
ఖాళీ బిందెలతో మహిళల రాస్తారోకో
మెదక్, మే 9: మెదక్ గొల్కోండ బస్తి మెదక్‌హైదరాబాద్ రోడ్డుపై గురువారం ఉదయం 8 గంటలకు శాంతినగర్, గొల్కోండ, అంబేద్కర్ కాలనీకి చెందిన మహిళలు ఖాళీ బిందెలతో రాస్తారోకో చేశారు. ఈ ఆందోళన కార్యక్రమానికి ఎంఆర్‌పియస్ నాయకులు బాల్‌రాజు, కిషన్, రాజు, నర్సమ్మ, లక్ష్మీ, పోచమ్మ, దేవమ్మ నాయకత్వం వహించారు. మున్సిపల్ కమిషనర్‌కు వ్యతిరేకంగా నినాదాలు చేశారు. ఒక్క నీళ్ల ట్యాంకర్ కూడా రావడం లేదని నళ్లల్లో, నళ్లాలో నీళ్లు రావడం లేదని ఒక్క సారిగా మహిళలు కొపోద్రిత్తులై ఖాళీ బిందెలతో రోడ్డేక్కారు. మున్సిపల్ కమీషనర్ తమ వద్దకు వచ్చి మంచినీటిని పరిష్కరిస్తామని హామి ఇచ్చేంత వరకు రాస్తారోకో చేస్తామని మహిళలు రోడ్డుపై బైఠాయించారు. రస్తారోకోలో ఖాళీ బిందెలను ప్రదర్శించారు. త్రాగడానికి గుక్కెడు మంచినీళ్లు కూడా దొరకడం లేదు. స్నానాలు లేవు, బట్టలు ఉతకడం లేదు, కానీ నళ్ల బిల్లులు మాత్రం ముక్కుపిండి వాసుళ్లు చేస్తున్నారని మహిళలు వాపోయారు. నళ్లా బిల్లుల కోసం మా బస్తిలకు ఎలా వస్తారో చుస్తామన్నారు. నీళ్లు ఇవ్వకుండా నళ్లా బిల్లులు ఎందుకు కట్టాలని కూడా వారు ప్రశ్నించారు. ప్రజల సమస్యలు పట్టించుకోకుండా మున్సిపల్ అధికారులు ఎసిల కింద నిద్రబోతున్నారని ఆరోపించారు. మా వాడలకు వచ్చి మా బ్రతుకులు చుడండి అని మహిళలు నిందారోపణలు చేశారు. సుమారు 45 నిమిషాలు ధర్నా చేయడంతో ఇరు ప్రక్కల వాహానాలు భారీ ఎత్తున నిలిచిపోయాయి. పోలీసులు జోక్యం చేసుకుని ఆందోళన కారులను ప్రక్కకు తొలగించడంతో ట్రాఫిక్ అంతరాయం తొలగింది. అక్కడి నుండి మహిళలు అవే ఖాళీ బిందెలతో మున్సిపల్ కార్యాలయం ముందు ధర్నా చేశారు.
బయ్యారం గనులను ఆంధ్రాకు తరలించొద్దు
* కలెక్టరేట్ ముందు ధర్నాను విజయవంతం చేయాలి
* టిఆర్‌ఎస్ జిల్లా ఇన్‌చార్జ్ రాజయ్య
సంగారెడ్డిరూరల్,మే 9: బయ్యారం ఉక్కును ఆంధ్ర ప్రాంతానికి తరలించే ఆలోలచనలను విరమించుకోవాలని, ఈ ప్రతిపాదనలను రాష్ట్ర ముఖ్యమంత్రి వెంటనే రద్దు చేయాలని టిఆర్‌ఎస్ జిల్లా ఇన్‌చార్జి రాజయ్యయాదవ్ డిమాండ్ చేశారు.గురువారం ఐబిలో ఏర్పాటు చేసిన విలేఖరుల సమావేశంలో ఆయన మాట్లాడుతూ బయ్యారం ఉక్కును విశాఖ ఉక్కు కర్మాగారానికి తరలించి తీరుతామని ముఖ్యమంత్రి కిరణ్‌కుమార్‌రెడ్డి చేసిన వ్యాఖ్యలను నిరసిస్తూ కెసిఆర్ ఇచ్చిన పిలుపుమేరకు ఈ నెల 10న సంగారెడ్డి కలెక్టరేట్ ముందు ధర్నా కార్యక్రమాన్ని నిర్వహిస్తున్నట్లు తెలిపారు. ఈ ధర్నాలో అధిక సంఖ్యలో పాల్గొని విజయవంతం చేయాలని పార్టీ శ్రేణులు, తెలంగాణవాదులకు ఆయన పిలుపునిచ్చారు.ఈ ధర్నాతో ప్రభుత్వం స్పందించకుంటే ఈ నెల 14న మండల కేంద్రాల్లో ర్యాలీలు, ధర్నాలను నిర్వహిస్తామన్నారు. బయ్యారం నుండి ఒక్క మట్టి పెళ్లను కూడా తరలించకుండా ఉద్యమాన్ని ఉధృతం చేస్తామన్నారు. రాష్ట్ర ముఖ్యమంత్రికి ఆంధ్ర ప్రాజెక్టులపై ఉన్న శ్రద్ద్ధ, తెలంగాణ ప్రాజెక్టులపై లేదన్నారు. ఈ నెల 15నుండి జిల్లాలోని అన్ని నియోజకవర్గాల కార్యకర్తలకు శిక్షణ తరగతులను నిర్వహించడం జరుగుతుందన్నారు. ప్రతి నియోజకవర్గం నుండి పది వేల మంది కార్యకర్తలకు శిక్షణ ఇవ్వడం జరుగుతుందని, ఈ శిక్షణ ద్వారా కార్యకర్తలను వీరసైనికుల్లాగా తీర్చిదిద్దడమే లక్ష్యమన్నారు. ఈ సమావేశంలో సంగారెడ్డి నియోజకవర్గ ఇన్‌చార్జి చింత ప్రభాకర్, గాలి అనిల్‌కుమార్, జలాలోద్దీన్‌బాబా, విజయేందర్‌రెడ్డి, నరహరిరెడ్డి, దుర్గేష్, శ్రీకాంత్‌రెడ్డి, నర్సింహారెడ్డి తదితరులు పాల్గొన్నారు.
లోక్ అదాలత్‌లో వాహనాల కేసులను పరిష్కరించుకోవాలి
* జిల్లా జడ్జి రజని
సంగారెడ్డిరూరల్,మే 9: ఈ నెల 18న జిల్లా కోర్టులో నిర్వహించే లోక్ అదాలత్‌లో వాహనాలకు సంబంధించిన కేసులను పరిష్కరించుకోవాలని జిల్లా జడ్జి టి.రజని కక్షిదారులకు సూచించారు. గురువారం జిల్లా కోర్టులో సంబంధిత న్యాయవాదులు,యూనైటెడ్ ఇండియా ఇన్సూరెన్స్ కంపెనీ అధికారులతో ప్రత్యేక సమావేశాన్ని నిర్వహించారు. లోక్ అదాలత్‌లో ఎక్కువ మొత్తంలో కేసులను పరిష్కరించాలని జిల్లా జడ్జి న్యాయవాదులకు సూచించారు. వాహనాలకు సంబంధించిన కేసులను త్వరితగతిన పరిష్కరించేందుకు 18న లోక్‌అదాలత్ ఏర్పాటు చేయడం జరిగిందని, కక్షిదారులు ఈ అవకాశాన్ని సద్వినియోగం చేసుకొని తమ సమస్యలను పరిష్కరించుకోవాలని సూచించారు. ఈ సమావేశంలో జిల్లా న్యాయ సేవా అధికార సంస్థ సెక్రటరి వి.నిరంజన్‌రావు, సంబంధిత న్యాయవాదులు, ఇన్సూరెన్స్ కంపెనీ అధికారులు పాల్గొన్నారు.
జూన్ 1 నుండి బడిబాట
సంగారెడ్డిరూరల్,మే 9: జూన్ 1వ తేదీ నుండి జిల్లాలో బడిబాట కార్యక్రమాన్ని నిర్వహించాలని రాష్ట్ర అకాడమిక్ మానిటరింగ్ అధికారి రాజ్యలక్ష్మి మండల విద్యాధికారులకు సూచించారు. గురువారం జెడ్పీ సమావేశ మందిరంలో మండల విద్యాధికారులతో సమావేశాన్ని నిర్వహించారు.ఈ సందర్భంగా రాష్ట్ర అకాడమిక్ మానిటరింగ్ అధికారి రాజ్యలక్ష్మి మాట్లాడుతూ జిల్లాలో బడిబాట కార్యక్రమం నిర్వహించేందుకు చర్యలు చేపట్టాలని సూచించారు. అదనపుజాయింట్ కలెక్టర్ మూర్తి మాట్లాడుతూ మండల విద్యాధికారులు, పాఠశాలల యాజమాన్య కమిటీలతో సమావేశాలు నిర్వహించి, పాఠశాలలు సక్రమంగా పని చేసే విధంగా చూడాలన్నారు. సమావేశంలో ఆర్‌విఎం సిఎంఓ ఎ.వెంకటరాములు, ఎఎంఓ ఎన్.సత్యనారాయణ, ఎఎల్‌ఎన్ సిఓ ప్రకాష్, ఫ్లాగ్ కోఆర్డినేటర్ శ్రీనివాస్, ఎఫ్‌ఎఓ బాలరాజ్, ఎఎన్‌ఓ విజయ్‌కుమార్, ఎపిఓ తాజోద్దీన్, పర్యవేక్షకులు బి.శంకర్ పాల్గొన్నారు.
నష్టపోయిన మత్స్యకారులను ఆదుకోవాలి
సంగారెడ్డిరూరల్, మే 9: జిల్లాలో ఇటీవల కురిసిన అకాల వర్షాలు, ఈదురు గాలులతో సింగూర్ పరివాహక ప్రాంతంలోని ఖాదీరాబాద్, పాలడుగు,మంతూర్ తదితర గ్రామాలలో వలలు, తెప్పలు నష్టపోయిన మత్స్యకారులను ఆదుకోవాలని ఆ సంఘం రాష్ట్ర కార్యదర్శి పి.బాలకృష్ణ ప్రభుత్వాన్ని డిమాండ్ చేశారు. అదే విధంగా రేగోడ్ మండలంలో పిడుగుపాటుకు మృతి చెందిన బాలిక కుటుంబానికి ఎక్స్‌గ్రేషియా చెల్లించాలని డిమాండ్ చేశారు. కార్యక్రమంలో సిఐటియు నాయకులు ఎండి సర్ధార్, వృత్తిసంఘాల నాయకులు జి.జయరాజ్, సామేల్, నర్సింలు, ఆగమయ్య, సంగయ్య, శ్రీరాం, శంకరయ్య తదితరులు పాల్గొన్నారు.
ఎసిబి వలలో ఎస్‌ఐ మురహరి
గజ్వేల్, మే 9: ఎసిబి వలలో బేగంపేట ఎస్‌ఐ మురహరి చిక్కిన సంఘటన గురువారం చోటుచేసుకుంది. ఈ సంఘటనకు సంబందించి నిజామాబాద్ ఎసిబి డిఎస్పీ సంజీవరావు అందించిన వివరాలిలా ఉన్నాయి. దౌల్తాబాద్ మండలం వీరానగర్‌కు చెందిన రాంలాల్, నర్సింలులు ఏప్రిల్ 15వ తేదీన ఉపాధిహామీ బిల్లుల విషయమై గొడవ పడగా, 16వ తేదీన బేగంపేట ఎస్‌ఐ మురహరికి ఇరువురు ఒకరిపైనొకరు ఫిర్యాదు చేసుకున్నారు. అయితే వారు గ్రామంలోనే పంచాయతీ నిర్వహించి రాజీపడగా, రూ,10వేలు ఇస్తే నే కేసు కట్టనని, లేని పక్షంలో జైలుకు పంపిస్తానని రాంలాల్‌ను ఎస్‌ఐ బెదిరించాడు. ఈక్రమంలో అతను రూ,5వేలు ఇస్తానని ఎస్‌ఐతో ఒప్పందం కుదుర్చుకొని ఎసిబి అధికారులను అశ్రయించాడు. దీంతో గురువారం రూ,5వేల నగదు బేగంపేట పోలీస్ స్టేషన్‌లో ఎస్‌ఐ మురహరికి అందజేస్తుండ గా, ఎసిబి అధికారులు వలపన్ని పట్టుకున్నారు. అనంతరం రూ,5వేలు స్వాధీనం చేసుకోవడంతోపాటు అరెస్టు చేసి రిమాండ్‌కు పంపిస్తున్నట్లు ఎసిబి డిఎస్పీ సంజీవరావు పేర్కొన్నారు. మెదక్, నిజామాబాద్ ఎసిబి సిఐలు శ్రీనివాస్‌రెడ్డి, వెంకటేశ్వర్లు, రఘునాథ్, ఎస్‌ఐ రశీద్‌అలి పాల్గొన్నారు. ప్రభుత్వ అధికారులు డబ్బుల కోసం వేధిస్తే తమకు సమాచారం అందించా లని, నిజామాబాద్ జిల్లాలో మంచి స్పందన వస్తున్నట్లు తెలిపారు.
‘్ఫ్లరైడ్’ పట్ల అప్రమత్తంగా ఉండాలి
గజ్వేల్, మే 9: భయంకరమైన ఫ్లోరైడ్ నీటి పట్ల అప్రమత్తత అవసరమని కేంద్ర గ్రామీణాభివృద్ధి శాఖ ప్రత్యేక కార్యదర్శి, సీనియర్ ఐఎఎస్ అధికారి భామతి పేర్కొన్నారు. గురువారం గజ్వేల్‌లోని నీటి సరఫరా విభాగం డిప్యూటీ ఇఇ కార్యాలయం, నీటి శుద్ధి పరీక్షా కేంద్రాన్ని ఆమె ఆకస్మిక తనిఖీ చేసిన సందర్భంగా మాట్లాడారు. స్వచ్ఛమైన తాగునీటి కోసం కేంద్రం అవసరమైనన్ని నిధులు కీటాయిస్తుండగా, గ్రామీణులను కలుషిత నీటి పట్ల చైతన్యం చేయాలని కోరారు. అయితే నీటి నమూనా పరీక్షా కేంద్రాల నుండి వచ్చే నివేదికలను ప్రతిష్టాత్మకంగా తీసుకుంటుండ గా, గ్రామీణ నీటి సరఫరా విభాగం అధికారులు, సిబ్బంది గ్రామస్థాయి అధికారులకు చేరవేసి ప్రజల ఆరోగ్యంపై శ్రద్ధ కనబర్చాలని సూచించారు. నీటి పరీక్షలు నిరంతరం నిర్వహిస్తూ రోగాలు ప్రబలకుండా చూడవచ్చని, అయితే నీటి నాణ్యత తెలియని జనం వాటిని సేవిస్తూ వ్యాధుల భారిన పడుతున్నట్లు పేర్కొన్నారు. ముఖ్యంగా ఫ్లోరోసిన్‌తోపాటు ప్రమాద కర లక్షణాలు కలిగిన నీటిని దూరంగా ఉంచాలని, పైపులైన్ లీకేజీలపై దృష్టి పెట్టాలని కోరారు. జిల్లాలోని 7 నీటి నమూనా పరీక్షా కేంద్రాల పని తీరును కలెక్టర్ దినకర్‌బాబును ఆమె అడిగి తెలుసుకోగా, మంచి ఫలితాలు సాధిస్తూ వ్యాధులు ప్రబలకుండా చూస్తున్నట్లు కలెక్టర్ పేర్కొన్నారు. అనంతరం వివిధ అంశాలపై ఆర్‌డబ్ల్యుఎస్ అధికారులు, నీటి నమూనా పరీక్షాకేంద్రం సిబ్బందికి ఆమె సలహాలు, సూచనలు అందించారు. కార్యక్రమంలో ఆర్‌డబ్ల్యుఎస్ ఎస్‌ఇ విజయప్రకాష్, ఇఇ అంజనేయులు, డిప్యూటీ ఇఇ కమలాకర్, ఆర్డీఓ ముత్యంరెడ్డి, ఎంపిడిఓ కౌసల్యా దేవి, మున్సిపల్ కమిషనర్ సంతోష్‌కుమార్ తదితరులు పాల్గొన్నారు.