నానీల్లో ప్రతిఫలించిన ‘పల్లె వైభవం’

ఏ శుభవేళ ఆచార్య ఎన్. గోపి ‘నానీ’ల ప్రక్రియ ప్రారంభించారో గానీ - ఈ కవితారూపం దినదినాభివృద్ధి చెందుతోంది. వందలాది కవులు వెలుగులోకి వచ్చారు. వస్తువైవిధ్యమూ విశేషమే. అటువంటి నానీ కవులలో పనసకర్ల ప్రకాశ్ ఒకరు. నగరీకరణ నలుదిక్కులా వ్యాపిస్తున్న రోజుల్లో ఈ కవి పల్లెవైపు కలాన్ని పయనింపజేశాడు. ‘‘పెళ్ళికొచ్చినవారు/ చెప్పారు పిల్లకంటే/ పల్లె బాగుందని’’ అనటంలో పల్లె ప్రాభవం వెల్లడి అవుతుంది. నేటి రాజకీయాలపై మంచి చురక ఇది- ‘‘ఇంకా ఎన్నాళ్ళీ/ చిల్లర దొంగతనాలు? ఇప్పుడైనా చేరండి/ రాజకీయాల్లో’’ ప్రకాశ్ లోక పరిశీలన ఉన్న కవి. ఆర్ద్ర హృదయం గల కవి కలంనుంచి వెలువడిన మరొక మంచి నానీ..... నూతి చుట్టూ/ ఎప్పుడూ చెమ్మే అమ్మకంటి పొరని/ అచ్చుగుద్దినట్టు’’ ఇటువంటి అనుభూతిని పంచే నానీలు చాలా ఉన్నాయి. అయితే ఈ కవి వీటితోనే సంతృప్తి చెందకుండా వచన కవితలు, దీర్ఘకవితలూ రాసి సత్తా నిరూపించుకోవాలి- ఆ స్థాయిగల కవికాబట్టి!