విజయవాడ , జూలై 30: త్వరలో దక్షిణమధ్య రైల్వే విజయవాడ డివిజన్ హెడ్‌క్వార్టర్స్ అయిన విజయవాడ పరిధిలో లక్షలాది రూపాయలను మున్సిపాలిటీకి చెల్లించాల్సి ఉంది. దీనిపై గణాంకాలు సాగుతున్నాయి. అసలు విషయంలోకి వస్తే గత ఆరేడు నెలల క్రితం రైల్వేశాఖకు సుప్రీంకోర్టు కొన్ని అంశాలతో కూడిన ఆదేశాలను జారీచేసింది. ఇందులో ప్రాపర్టీ ట్యాక్స్ (ఆదాయపు పన్ను) కిందకు వచ్చే ప్రాంతాలకు చెందిన రైల్వేశాఖ ఆయా ప్రాంతంలోని మున్సిపాలిటీ ఆదాయపు పన్ను చెల్లించాలంటూ ఆదేశిస్తూ సుప్రీంకోర్టు ఆదేశాలను జారీచేసింది. అందులో విజయవాడ డివిజన్ కూడా ఉంది. విజయవాడ డివిజన్ పరిధిలో మున్సిపాలిటీలు, కార్పొరేషన్లు ఉన్నాయి. వీటన్నింటితో పోల్చుకుంటే విజయవాడ డివిజన్ కోట్ల రూపాయల్లో పన్ను చెల్లించవలసి ఉంది. ఒక్క విజయవాడ డివిజన్ హెడ్ క్వార్టర్స్ అయిన విజయవాడ మున్సిపల్ కార్పొరేషన్ పరిధిలో చూస్తే లక్షలాది రూపాయలు అక్షరాలా చెల్లించవలసి ఉంది. దీనికి చెందిన గణాంకాలను డివిజనల్ రైల్వే మేనేజర్ కార్యాలయంలోని డివిజనల్ అకౌంట్స్ విభాగానికి చెందినవారు లెక్కలు వేయడం ప్రారంభించారు. సుప్రీంకోర్టు ఇచ్చిన అంశాల్లో ఏ తరహా పన్ను వేయాలనే దాని ప్రకారం లెక్కలు కడుతున్నారు. అయితే రైల్వే మంత్రిత్వపు శాఖ సుప్రీంకోర్టును ఆదాయపు పన్ను కింద చెల్లించాలంటూ విధించారు. తమకు చెందిన కొంత స్థలాన్ని మున్సిపాలిటీకి చెందిన వారే అక్రమంగా వినియోగించుకుంటున్నారు. అంటే ఆక్రమణదారులు నుంచి వివిధ పన్నులు మున్సిపాలిటీలో వసూలు చేసుకుంటున్నారు. ఇంకా ప్రాపర్టీ ట్యాక్స్ పేరుతో రైల్వేశాఖపై వేసిన భారాన్ని తొలగించాలని కోరినట్లు విశ్వసనీయ సమాచారం. దానికి అక్కడ నుంచి రైల్వేశాఖ కోరినట్లు సరైన సమాధానం రాకపోవడంతో సుప్రీంకోర్టు ఇచ్చిన ఆదేశాల ప్రకారం లెక్కలు కట్టి మున్సిపాలిటీలకు చెల్లించేందుకు కావాల్సిన లెక్కలను తయారు చేస్తున్నారు. ప్రాపర్టీ ట్యాక్స్‌ను వెయ్యడానికి ప్రధాన కారణాలు రైల్వేశాఖకు చెందిన విభాగం మున్సిపాలిటీ ద్వారా విలీనం కావడం వలన అంటే రైల్వేక్వార్టర్స్ కాని, డిఆర్‌ఎం కార్యాలయాలు, వివిధ రైల్వేశాఖకు చెందిన కార్యాలయాలకు చెందిన రహదారులు మున్సిపాలిటీకి చెందిన రహదారుల్లో విలీనం కావడం రైలు, రైలు పట్టాలు పరిధి దాటి పోకుండా రైలుపట్టాలపైనే నడిచే విధంగా ఈ రహదారులు లేవు. బయట మున్సిపాలిటీకి చెందిన వాటిలో కలవడం, విద్యుత్ తీగలు వంటివి మున్సిపాలిటీకి చెందిన ప్రాంతాల మీదగా రావడం వంటి పలు అంశాల ఆధారంగా ఈ ప్రాపర్టీ ట్యాక్స్‌ని విధించారు. పన్ను చెల్లింపు విషయంలో కొంత సమయాన్ని కూడా సుప్రీంకోర్టు ఇవ్వడం వలన మున్సిపాలిటీలు రైల్వేశాఖ మీద పడకుండా ఉన్నాయి. ఇటీవల కాలంలో బస్సులకు చెందిన చార్జీలు పెరగడంతో రైళ్లలో ప్రయాణించే వారి సంఖ్య బాగా పెరగడంతో రైల్వేస్టేషన్‌లో ప్రయాణికుల సౌకర్యార్ధం కావాల్సిన వనరులు సమకూర్చడంతో ఆదాయంతో కూడిన ఖర్చు గణనీయంగా పెరిగింది. దీంతో రైల్వేశాఖలోనే కొన్ని స్టేషన్లలోని అభివృద్ధి పనులకు కావాల్సిన నిధులు విడుదల కాకపోవడంతో పాటు రైల్వేశాఖలో కూడా 18 జోన్‌లలో జోన్‌ల వారీగా విభజించి విడుదల చేసే నిధుల్లో కావాల్సిన నిధులు లేకపోవడంతో రైల్వే బడ్జెట్ ప్రతిపాదనలోని అభివృద్ధి పనులు, కాని పరిశ్రమలకు కాని కావాల్సిన నిధులు లేక వెనుకబడిపోతున్నాయనే వార్తలు కథనాలుగా వస్తున్న సంగతి తెలిసిందే. ఇటువంటి సమయంలో మూలిగే నక్క మీద తాటికాయ పడ్డ చందంగా ప్రాపర్టీ ట్యాక్స్‌ని విధించడం రైల్వేశాఖకు తలకు మించిన భారంగా తయారైందనే విమర్శలు అధికారుల నుంచి వినిపిస్తున్నాయి. రైల్వేశాఖలో విధులు నిర్వహిస్తున్న సిబ్బందికి వారి వారి అవసరాల నిమిత్తం ప్రావిడెంట్ ఫండ్ (పిఎఫ్) లోను విషయంలో సరిపడ నిధులు లేవని చెప్పి వచ్చిన దరఖాస్తులను పక్కన పెట్టవలసి వచ్చిన సంగతిని గుట్టుచప్పుడు కాకుండా అకౌంట్స్ విభాగపు వారు రెండు మూడు రోజులు, వారం రోజులంటూ దాటేస్తున్న దుస్థితి ఇక్కడ నెలకొంది. ఏది ఏమైనా సుప్రీంకోర్టు ఇచ్చిన ఆదేశాలు కనుక వారు చేయవలసిన పనుల్లో డిఆర్‌ఎం ఆదేశానుసారం నిమగ్నమై ఉన్నారు. విజయవాడ డివిజన్‌లో కార్పొరేషన్లు విజయవాడ, నెల్లూరు, ఒంగోలు, చీరాల, కాకినాడ, సామర్లకోట, రాజమండ్రి ఉండగా మున్సిపాలిటీలు, గుడివాడ, భీమవరం, బాపట్ల, తెనాలి, మచిలీపట్నం, కావలి, తుని, అన్నవరం, అనకాపల్లి, బీమడోలు, తణుకు, నర్సాపూర్, పలు స్టేషన్లు ఉన్నాయి. పైన పేర్కొన్న ప్రాంతాలకు చెందిన లెక్కలు కూడా డివిజన్ హెడ్ క్వార్టర్స్‌లోనే అక్కడున్న పరిధికి చెందిన ప్లానింగ్ ప్రకారం లెక్కలు కట్టవలసి ఉంది. అయితే ఆయా ప్రాంతాల్లోని వివరాలను ఇంజనీరింగ్ విభాగం నుంచి తీసుకుని లెక్కలు కడుతున్నారు. అంతా పూర్తయిన తరువాత దక్షిణ మధ్య రైల్వే జనరల్ మేనేజర్‌తో పాటు అక్కడ ఉన్న ఎఫ్ అండ్ సిఏఓ (ఫైనాన్స్ అండ్ కాస్టింగ్ అకౌంట్స్) విభాగానికి లెక్కలు పంపించి అక్కడ నుంచి ఆయా ప్రాంతాలకు చెందిన మున్సిపాలిటీలకు చెల్లింపులు జరగనున్నాయి.
జిల్లా అంతటా ‘అవనిగడ్డ కోడ్’
విజయవాడ, జూలై 30: అవనిగడ్డ శాసనసభ నియోజకవర్గ ఉప ఎన్నిక సందర్భంగా ఎన్నికల ప్రవర్తనా నియమావళి జిల్లా అంతటా అమల్లోకి వచ్చింది. దీన్ని పర్యవేక్షించే నిమిత్తం రెవెన్యూ డివిజన్ స్థాయిలలో కమిటీలను ఏర్పాటు చేస్తే జిల్లా ఎన్నికల అధికారి, కలెక్టర్ డాక్టర్ బుద్ధప్రకాష్ ఎం. జ్యోతి ఉత్తర్వులు జారీచేసారు. జిల్లాస్థాయిలో జాయింట్ కలెక్టర్ ఉషాకుమారి, ఎస్‌పి జె. ప్రభాకరరావు తదితరులతో కమిటీ ఏర్పాటైంది. విజయవాడ డివిజన్‌కు సబ్ కలెక్టర్ హరిచందన చైర్మన్‌గా, డిసిపి కన్వీనర్‌గా, డివిజనల్ పంచాయతీ అధికారి సభ్యునిగా, ఉడా కార్యదర్శి అప్పారావు పరిశీలకునిగా వ్యవహరిస్తారు. విజయవాడ నగరపాలక సంస్థ పరిధిలో మున్సిపల్ కమిషనర్ చైర్మన్‌గాను, డిసిపి కన్వీనర్‌గానూ వ్యవహరిస్తారు. ఈ సందర్భంగా సబ్ కలెక్టర్ మాట్లాడుతూ ఎన్నికల కోడ్‌ను కట్టుదిట్టంగా అమలుపర్చటం జరుగుతుందని ఉల్లంఘించిన వారిపై చర్యలు తీసుకోవటంతో పాటు ఎన్నికల సంఘానికి ఫిర్యాదు చేస్తామని తెలిపారు.
దోపిడీ దొంగల ముఠా అరెస్టు
విజయవాడ , జూలై 30: విజయవాడ డివిజన్ ప్రభుత్వ రైల్వే పోలీస్ పరిధిలో ఉన్న రాజమండ్రి జిఆర్‌పి వారు 40 లక్షల రూపాయల నగదుతో పాటు పావుకేజీపైన బంగారాన్ని స్వాధీనపర్చుకున్నారు. సేకరించిన వివరాల ప్రకారం బీహార్ ప్రాంతానికి చెందిన ఆరుగురు వ్యక్తులు కలిగిన ముఠాతోపాటు వారివద్ద వున్న 40 లక్షల రూపాయలు నగదుతో పాటు పావుకేజీ బంగారాన్ని రాత్రి సమయంలో రైళ్లలో గస్తీకి వెలుతున్న టీమ్ పట్టుకుంది. వెంటనే ఈ సమాచారాన్ని విజయవాడలో ఉన్న జిఆర్‌పి ఎస్‌పి డాక్టర్ శ్యామ్ ప్రసాదరావుకు అక్కడి సిఐ సమాచారాన్ని అందించారు. ఈ గ్యాంగ్‌ని పట్టుకోవడంలో ప్రతిభ కనపర్చిన సిబ్బందితోపాటు సిఐ కలిసి అదుపులోకి తీసుకున్న ఆరుగురితోపాటు వారి వద్ద నుంచి వసూలు చేసిన ధనంతోపాటు బంగారాన్ని తీసుకుని సికింద్రాబాద్‌లో ఉన్న జిఆర్‌పి ఐజి దగ్గరకు ఆదివారం రాత్రి బయలుదేరి వెళ్లారు. అక్కడ ఆయనకు చూపించి సోమవారం రాత్రి సికింద్రాబాద్ నుంచి విశాఖపట్నం వెళ్లే దురంతో సూపర్‌ఫాస్ట్ ఎక్స్‌ప్రెస్‌లో తిరిగి మంగళవారం ఉదయానికి రాజమండ్రికి చేరుకున్నారు. అనంతరం వీరి వెనుక ఇంకా ఏమైనా టీమ్ ఉందాని విచారించిన అనంతరం బుధ, గురువారాల్లో విజయవాడలోని రెండో మెట్రోపాలిటన్ రెండో రైల్వే మేజిస్ట్రేట్ ముందు హాజరుపరచనున్నట్లు విశ్వసనీయ సమాచారం. అయితే నగదు రూపంలో ఉన్న ధనం కాని బంగారం కాని ఇంకా ఎక్కువగానే ఈ ఆరుగురి వద్ద నుంచి స్వాధీనపర్చుకున్నట్లు సమాచారం.
‘ప్రపంచ వ్యాప్తంగా తెలుగువారికి బ్లాక్ డే’
విజయవాడ, జూలై 30: రాష్ట్ర విభజనపై కేంద్రం నిర్ణయం తీసుకోవడం ప్రపంచ వ్యాప్తంగానున్న తెలుగువారికి బ్లాక్ డేగా పరిగణించాల్సి ఉందని పొట్టి శ్రీరాములు ఆత్మత్యాగాన్ని గంగలో కలిపారని తెలుగుదేశం అర్బన్ ఉపాధ్యక్షుడు లుక్కా సాయిరాం గౌడ్ నేడొక ప్రకటనలో ధ్వజమెత్తారు. తెలంగాణా వాదం నీరసబడి 80 శాతం ప్రజలు సమైక్యంగా ఉందామనే ఆలోచనలో ఉంటే కాంగ్రెస్ పార్టీ కేవలం ఓట్లు సీట్లు కోసం కుతంత్రాలతో తెలుగు జాతిని చీల్చడానికి సన్నద్ధమైందన్నారు. సీమాంధ్రుల మనోభావాలను ఖాతరు చేయకుండా సోనియాగాంధీ తీసుకున్న ఏకపక్ష నిర్ణయం ఇది యని అన్నారు. చేతులు కాలాక ఆకులు పట్టుకున్న చందంగా మంత్రులు, కాంగ్రెస్ ఎంపిలు ఢిల్లీ చుట్టూ ప్రదక్షిణలు చేసి ఆంధ్ర ప్రాంత ప్రజలను మరోమారు మోసం చేసారన్నారు. ఆంధ్రలో ఒక్క సీటు కూడా రాదని గుర్తించిన బిజెపి విభజనకు మద్దతునిస్తే, కాంగ్రెస్ పార్టీ తెలంగాణాల్లో కొద్దిపాటి సీట్లకు కక్కుర్తిపడి నిర్ణయం తీసుకుందన్నారు.