కూకట్‌పల్లిలో అంతర్జాతీయ మల్టిప్లెక్స్ థియేటర్ ప్రారంభం

కెపిహెచ్‌బి కాలనీ, డిసెంబర్ 4: కూకట్‌పల్లి హౌసింగ్‌బోర్డుకాలనీలో అంతర్జాతీయ మల్టిప్లెక్స్ థియేటర్ సినీ పోలీస్‌ను జెఎన్‌టియు రోడ్డులోని మంజీరా మాల్‌లో బుధవారం ప్రారంభించారు. ఈ కార్యక్రమానికి ముఖ్య అతిథులుగా సినీపోలీస్ స్ట్రాటజీ హెడ్ దేవాంగ్ సంపత్ హాజరయ్యారు. ఈ సందర్భంగా ఆయన మాట్లాడుతూ సినీ పోలీసు అనేది ప్రపంచంలోని 4వ అతిపెద్ద సినీథియేటర్ సర్క్యూట్ అని, 11 దేశాలలో 3300కు పైగా స్క్రీన్‌లను ఆపరేట్ చేస్తోందన్నారు. ఏటా 11.6 కోట్ల మంది ప్రేక్షకుల అవసరాలను తీరుస్తోందన్నారు. ప్రపంచవ్యాప్తంగా 20వేల మందికి పైగా ఈ సంస్థ ఉపాధి కల్పిస్తోందన్నారు. ఆంధ్రప్రదేశ్‌లోని కెపిహెచ్‌బి కాలనీలో ప్రారంభించిన తొలి మల్టిప్లెక్స్ థియేటర్ అని, రోజుకు 25 షోలకు పైగా నడుస్తాయన్నారు. బాలీవుడ్, హాలివుడ్, ప్రాంతీయ సినిమాలన్నింటినీ ప్రేక్షకుల డిమాండ్‌కు అనుగుణంగా ప్రదర్శిస్తామని తెలిపారు. ఈ కార్యక్రమంలో మంజీరా మాల్ డెవలప్‌ర్స్ గ్రూప్స్ సిఎండి జి.యోగానంద్ తదితరులు పాల్గొన్నారు.