విష్ణు దర్శకత్వంలో జంపా క్రియేషన్స్ పతాకంపై నిర్మిస్తున్న చిత్రం ‘పానీపూరి’. సూర్యతేజ, హర్షికా పూంచా జంటగా నటిస్తున్న ఈ చిత్రాన్ని ప్రదీప్ కుమార్ జంపా నిర్మిస్తున్నారు. ఈ చిత్రానికి సంబంధించిన చివరి షెడ్యూల్ హైదరాబాద్ మణికొండ పరిసర ప్రాంతాల్లో షూటింగ్ జరుగుతోంది. ఈ సందర్భంగా ఏర్పాటుచేసిన పాత్రికేయుల సమావేశంలో దర్శకుడు విష్ణు మాట్లాడుతూ- కుటుంబ విలువలతోకూడిన కథనంతో చిన్నపాటి సందేశం ఉండేలా రూపొందిస్తున్న ఈ చిత్రం ప్రారంభం నుండి చివరివరకూ వినోదాత్మకంగా సాగుతుందని తెలిపారు. సోలో హీరోగా తాను చేస్తున్న తొలి చిత్రం ఇదేనని, గతంలో చాలా సినిమాలు చేసినా, ఈ సినిమాతో మంచి గుర్తింపు వస్తుందని, సీనియర్ నటీనటులతో నటించడం సంతోషంగా ఉందని హీరో సూర్యతేజ తెలిపారు. సినిమాకి కథే ప్రాణంగా ఉంటుందని, దర్శకుడు మంచి విజన్‌తో వినోదమే ప్రధానంగా ఈ చిత్రాన్ని రూపొందిస్తున్నారని, పాటలు మినహా షూటింగ్ పూర్తిచేశామని, రెండు పాటలను విదేశాల్లో చిత్రీకరించడానికి సన్నాహాలు చేస్తున్నామని నిర్మాత ప్రదీప్‌కుమార్ తెలిపారు. కార్యక్రమంలో సుమన్, నరేష్, హర్షిక పూంచా తదితరులు పాల్గొన్నారు. మేల్కొటె, సుధ, సుప్రీత్, ప్రభాస్ శ్రీను, శివారెడ్డి తదితరులు నటిస్తున్న ఈ చిత్రానికి కెమెరా:పి.సి.ఖన్నా, సంగీతం:సునీల్ కశ్యప్, ఎడిటింగ్:ఉద్ధవ్, కథ, స్క్రీన్‌ప్లే:కె.బ్రహ్మారెడ్డి, నిర్మాత:ప్రదీప్‌కుమార్ జంపా, దర్శకత్వం:విష్ణు.
(చిత్రం) పానీపూరి