వియ్యాలవారి విందు, ఎర్రదళం, సంక్రాంతి అల్లుడు వంటి పలు చిత్రాల్లో కథానాయకుడిగా నటించిన యాదాకృష్ణ మరో చిత్రంలో హీరోగా నటిస్తున్నారు. ఆయన జన్మదినోత్సవం సందర్భంగా ఏర్పాటుచేసిన పాత్రికేయుల సమావేశంలో మాట్లాడుతూ- దాదాపు 26 చిత్రాల్లో హీరోగా నటించిన తనకు సరైన గుర్తింపు రాలేదని, ఆర్థికంగా సామాజికంగా వెనుకబడినా ప్రయత్నం మాత్రం మానుకోకుండా నిరంతరం హీరోగా నటించే ప్రయత్నమే చేస్తున్నానని తెలిపారు. 1991లో హీరోగా పరిచయమైన తాను అప్పటినుంచి హీరోగానే కొనసాగుతున్నానని, తాజాగా మరో రెండు చిత్రాల్లో హీరోగా నటించడానికి ఒప్పుకున్నానని తెలిపారు. వెంకటకృష్ణ ఫిలింస్ పతాకంపై జె.జె.ప్రకాశరావు దర్శకత్వంలో మాయల రాజా - రాయల రాణి చిత్రంలో నటిస్తున్నానని, అలాగే మల్లికాంబ పిక్చర్స్ పతాకంపై శేఖర్ చంద్ర దర్శకత్వంలో ఆటగాడు చిత్రంలో కూడా కథానాయకుడిగా నటిస్తున్నానని, ఈ రెండు చిత్రాల షూటింగ్ వచ్చే సంవత్సరంలో పూర్తిచేసి విడుదల చేయడానికి సన్నాహాలు చేస్తున్నామని తెలిపారు. కార్యక్రమంలో తాజేష్, అలీబాబా, జె.జె. ప్రకాశరావు, సాయినాధ్, ఎల్.ఎన్.ఎస్.ప్రకాశరావు, శేఖర్ చంద్ర, వి.రంగస్వామి, వెంకట్రామన్ తదితరులు పాల్గొన్నారు.