ఆది, శాన్వి జంటగా మాక్స్ ఇండియా ప్రొడక్షన్స్, ఆర్.జె. కంబైన్స్ పతాకంపై నిర్మిస్తున్న చిత్రం ‘లవ్‌లీ’. బి.జయ దర్శకత్వంలో బి.ఎ.రాజు ఈ చిత్రాన్ని నిర్మించారు. ప్రస్తుతం ఈ చిత్రం పోస్ట్‌ప్రొడక్షన్ కార్యక్రమంలో భాగంగా డబ్బింగ్, ఎడిటింగ్, సిజిఇ జరుపుకుంటోంది. ఈ సందర్భంగా ఏర్పాటుచేసిన పాత్రికేయుల సమావేశంలో నిర్మాత బి.ఎ.రాజు మాట్లాడుతూ- ‘లవ్‌లీ’ చిత్రం అన్ని వర్గాల ప్రేక్షకులను ఆకట్టుకునేలా కలర్‌ఫుల్‌గా ముస్తాబవుతోందని, దర్శకురాలు అందరికీ నచ్చేలా వందశాతం న్యాయం చేసిందని, ఈ వారంలోనే పాటలను విడుదల చేసి, 23న ఉగాది కానుకగా చిత్రాన్ని విడుదల చేస్తున్నామని, ఓ మంచి హిట్ చిత్రాన్ని నిర్మించామన్న నమ్మకంతో ఉన్నామని తెలిపారు. చిత్ర దర్శకురాలు జయ.బి మాట్లాడుతూ- ‘లవ్‌లీ’ చిత్రంలో పాటలను చూసిన నిర్మాత కె.అచ్చిరెడ్డి శంకర్ తీసిన పాటల్లా ఉన్నాయని మెచ్చుకోవడం ఆనందంగా వుందని, ఈ కథ ఆదికి యాప్ట్ అయ్యే కథ అని, అలాగే హీరోయిన్ శాన్వి కూడా పక్కింటి అమ్మాయిలా చక్కగా కనిపిస్తుందని, ఉగాదికి విడుదలవుతున్న ఈ చిత్రం మాక్స్ ఇండియా ప్రొడక్షన్స్ వారికి మరో హిట్ చిత్రంగా నిలుస్తుందన్న ఆశాభావాన్ని వ్యక్తంచేశారు. ఈ కార్యక్రమంలో నిర్మాత కె.అచ్చిరెడ్డి, కథానాయకుడు ఆది పాల్గొన్నారు. రాజేంద్రప్రసాద్, వెనె్నల కిషోర్, చిన్మయి, ఆంచల్, హర్షవర్ధన్, సత్యకృష్ణన్, రాహుల్‌దేవ్, ధన్‌రాజ్, ఎవిఎస్, శ్రీనివాస్, తదితరులు నటిస్తున్న ఈ చిత్రానికి సంగీతం: అనూప్ రూబెన్స్, నిర్మాత: బి.ఎ.రాజు, కథ, స్క్రీన్‌ప్లే, దర్శకత్వం: జయ.బి.