సునీల్ కొత్త ప్రారంభం

పూలరంగడుగా అందరినీ ఆకట్టుకున్న సునీల్ మరోసారి హీరోగా మారాడు. తాను హీరోగా మొదటగా పరిచయమైన మెగా సూపర్ గుడ్ ఫిలిమ్స్ ద్వారా మరోసారి హీరోగా వస్తున్నాడు. ప్రొడక్షన్ నెం.11గా నిర్మిస్తున్న ఈ చిత్రంలో సునీల్ సరసన ఇషాచావ్లా నటిస్తోంది. దేవి ప్రసాద్ దర్శకత్వంలో ఎన్.వి.ప్రసాద్, పారాస్ జైన్‌లు చిత్రాన్ని నిర్మిస్తున్నారు. ముహూర్తపు సన్నివేశాన్ని హైదరాబాద్ రామానాయుడు స్టూడియోలో చిత్రీకరించారు. హీరో, హీరోయిన్లపై చిరంజీవి క్లాప్ ఇవ్వగా డి.సురేష్‌బాబు కెమెరా స్విచ్ ఆన్ చేశారు. అనంతరం జరిగిన పాత్రికేయుల సమావేశంలో సునీల్ మాట్లాడుతూ- తొలి అవకాశం ఇచ్చిన సంస్థలోనే మళ్లీ హీరోగా నటించడం ఆనందంగా ఉందని, తనకు నచ్చిన దర్శకుడు, నిర్మాతలతో పనిచేయడం ఉత్సాహాన్ని ఇస్తోందని, ‘తను వెడ్స్ మను’ చిత్రాన్ని తనకు అనుగుణంగా తీర్చిదిద్దినందుకు కృతజ్ఞతలు తెలియజేస్తున్నానని అన్నారు. చిత్ర దర్శకుడు దేవిప్రసాద్ మాట్లాడుతూ- పెద్ద సంస్థలో చేస్తున్నందుకు భయంతోపాటు బాధ్యతగా మెలిగి మంచి చిత్రాన్ని నిర్మిస్తానని, సునీల్‌కు యాఫ్ట్ అయ్యేలా ‘తను వెడ్స్ మను’ చిత్రాన్ని రీమేక్ చేస్తున్నానని, ఎంటర్‌టైన్‌మెంట్ ఎక్కడా మిస్‌కాకుండా ఉంటుందని వివరించారు. నిర్మాత ఎన్.వి.ప్రసాద్ మాట్లాడుతూ- ఎంటర్‌టైన్‌మెంట్‌తోనే సునీల్ మళ్లీ ప్రేక్షకుల వద్దకు రానున్నాడని, ప్రేక్షకులకు ఏం కావాలో అవన్నీ ఈ చిత్రంలో ఉంటాయని, ఏప్రిల్ నుండి రెగ్యులర్ షూటింగ్ ప్రారంభమవుతుందని తెలిపారు. ఈ కార్యక్రమంలో ఇషాచావ్లా, పారాస్‌జైన్, ఆర్.బి.చౌదరి తదితరులు పాల్గొన్నారు. అలీ, ధర్మవరపు, ఆహుతి ప్రసాద్, రఘుబాబు, ఎమ్మెస్ నారాయణ, తులసి, ఉషశ్రీ తదితరులు నటిస్తున్న ఈ చిత్రానికి కెమెరా: సమీర్‌రెడ్డి, ఎడిటింగ్: హరి అనుమోలు, నిర్మాతలు: ఎన్.వి.ప్రసాద్, పారాస్ జైన్, స్క్రీన్‌ప్లే, దర్శకత్వం: దేవిప్రసాద్.