రామ్, తమన్నా జంటగా స్రవంతి మూవీస్ పతాకంపై రూపొందించిన చిత్రం ‘ఎందుకంటే ప్రేమంట’. ఎ.కరుణాకరన్ దర్శకత్వంలో రవికిషోర్ ఈ చిత్రాన్ని నిర్మించారు. చిత్రానికి సంబంధించిన పాటలు విడుదలై మంచి ఆదరణ పొందిన నేపథ్యంలో ఆడియో సక్సెస్‌మీట్‌ను చిత్ర యూనిట్ ఏర్పాటుచేసింది. హైదరాబాద్ ప్రసాద్ ల్యాబ్‌లో జరిగిన ఈ కార్యక్రమంలో ముందుగా చిత్ర నిర్మాత రవికిషోర్ మాట్లాడుతూ ఏప్రిల్‌లో విడుదలైన పాటలు అందరికీ నచ్చాయని, ఇంత త్వరగా ఆడియో సక్సెస్ వేడుకలు జరుపుకోవడం ఆనందంగా వుందని, దీనంతటికీ కారణం సంగీత దర్శకుడు జి.వి.ప్రకాష్‌కుమార్ అని, చిత్రం కూడా అద్భుతంగా వచ్చిందనీ, అందరికీ నచ్చుతుందని, ముఖ్యంగా ‘నీ చూపులే శ్వాసగా’ పాట అందరికీ నచ్చుతుందని, అన్ని కార్యక్రమాలు పూర్తి చిత్రాన్ని ఈ నెల 8న విడుదల చేయడానికి సన్నాహాలు చేస్తున్నామని తెలిపారు. రామజోగయ్యశాస్ర్తీ మంచి పదాలు ఇవ్వడంతో తన సంగీతం అద్భుతంగా కుదిరిందని, అందరిలా ఈ చిత్రాన్ని చూడడానికి తాను కూడా ఎదురుచూస్తున్నానని, సంగీత దర్శకుడు జి.వి.ప్రకాష్‌కుమార్ తెలిపారు. ఈ కార్యక్రమంలో రామజోగయ్యశాస్ర్తీ, కథా నాయకుడు రామ్, కెమెరామెన్ ఐ.ఆండ్రూ, మురళి తదితరులు పాల్గొన్నారు.