తండ్రి గ్రాహం హిల్ గుర్తుకు రావడంతో ఫార్ములా వన్ రేస్ ప్రపంచ మాజీ చాంపియన్ డమోన్ హిల్ కన్నీళ్లు పెట్టుకున్నాడు. లె మాన్స్ రేస్, ఇండియానాపొలిస్ 500 రేస్‌లను సైతం గెల్చుకున్న అప్పటి ఫార్ములా వన్ డ్రైవర్ గ్రాహం రేస్‌కు వెళ్లిన ప్రతిసారీ తన కుమారుడు డమోన్‌ను వెంట తీసుకెళ్లేవాడు. చిన్నతనంలో తండ్రితో కలిసి కూర్చున్న ఫార్ములా వన్ కారును ఇటీవల లింకన్‌షైర్‌లోని బౌర్న్‌లో జరిగిన ఒక కార్యక్రమంలో పాల్గొన్న డమోన్ నడిపించాడు. ఆ సమయంలో తండ్రి గుర్తుకురావడంతో బిగ్గరగా రోదించాడు. డమోన్‌కు 15 ఏళ్ల వయసు ఉన్నప్పుడు గ్రాహం ఒక విమాన ప్రమాదంలో మృతి చెందాడు. ఫార్ములా వన్ రేస్‌ను వారసత్వంగా స్వీకరించిన డమోన్ అసాధారణ డ్రైవర్‌గా ఎదిగాడు. తండ్రి మాదిరిగానే ప్రపంచ చాంపియన్‌షిప్ కైవసం చేసుకున్నాడు. తనకు స్ఫూర్తినిచ్చిన తండ్రి గ్రాహం నడిపించిన కారునే నడిపిస్తూ 52 ఏళ్ల డమోన్ కన్నీళ్లు పెట్టుకోవడం అక్కడ ఉన్న ప్రతి ఒక్కరినీ కదిలించింది.