నర్సీపట్నం, ఏప్రిల్ 17: తెలుగుదేశం అధినేత చంద్రబాబునాయుడు వస్తున్నా మీ కోసం పాదయాత్రకు నర్సీపట్నంలో జనం నీరాజనాలు పలికారు. పాదయాత్రగా వస్తున్న బాబుకు పార్టీ నాయకులు, కార్యకర్తలు, మహిళలు ఎదురేగి ఘనస్వాగతం పలికారు. మండలం బలిఘట్టం వద్ద బస చేసిన చంద్రబాబు బుధవారం మధ్యాహ్నం 12:30 గంటలకు మాడుగుల,చోడవరం నియోకవర్గాల కార్యకర్తలతో సమీక్షా సమావేశం నిర్వహించారు. అనంతరం విజయనగరం జిల్లా నుండి వచ్చిన పార్టీ నాయకులతో కార్యకలాపాలపై సమీక్ష జరిపారు. ఈసమీక్షలో ఎమ్మెల్యేలు అశోక్‌గజపతిరాజు, పడాల అరుణ, కె.లలితకుమారి, పతివాడ నారాయణస్వామి, మాజీ ఎమ్మెల్యే శోభాహైమావతి పాల్గొన్నారు. అనంతరం సాయంత్రం నాలుగు గంటలకు చంద్రబాబు పాదయాత్ర చేపట్టారు. బలిఘట్టం నుండి ప్రారంభమైన పాదయాత్రకు ప్రజలు బ్రహ్మరథం పట్టారు. వందలాది మంది బాబు అడుగులో అడుగు వేసుకుంటూ వెంట నడిచారు. నర్సీపట్నంలో బాబుకు అపూర్వస్వాగతం లభించింది. మహిళలు హారతు లు పట్టారు. నర్సీపట్నం అబీద్ సెంటర్ పసుపు మయంగా మారింది. పసుపు జెండాలు అలంకరించారు. మరో రెండు రోజుల్లో చంద్రబాబు 63వ జన్మదినోత్సవాన్ని జరుపుకోనున్న సందర్భంగా తెలుగు యువత నాయకుడు చింతకాయల విజయ్‌బాబు ఆధ్వర్యంలో 63 బెలూన్లను ఆకాశంలో ఎగురవేశారు. నర్సీపట్నం పొలిమేర్ల నుండి రోడ్లు జనంతో కిక్కిరిసిపోయాయి. ట్రాఫిక్‌ను వేరే రూట్లకు మళ్ళించాల్సి వచ్చింది. అబీద్‌సెంటర్‌లో జరిగిన బహిరంగ సభలో చంద్రబాబు ప్రసంగానికి ప్రజల నుండి విశేష స్పందన లభించింది. వై ఎ స్సార్ సి.పి. అధినేత జగన్‌ను తీహార్ జైల్‌కు పంపించాలని, మద్యం బెల్ట్‌షాపులను ఎత్తివేయాలని చంద్రబాబుకు సూచించారు. జగన్ తీహార్‌జైల్‌కు వెళ్ళే రోజులు దగ్గర్లోనే ఉన్నాయని చంద్రబాబు పేర్కొనడంతో జనం కేరింతలు కొట్టారు. అబీద్ సెంటర్‌లో సుమారు రెండు గంటల పాటు చంద్రబాబు రాష్టస్థ్రాయిలో ప్రజలు ఎదుర్కొంటున్న సమస్యలతోపాటు స్థానిక సమస్యలను ప్రస్తావించారు. నర్సీపట్నంను శాటిలైట్ టౌన్ గా అభివృద్ధి చేస్తామని, ట్రాఫిక్‌ను నిరోధించేందుకు రింగ్‌రోడ్డును నిర్మాణం చేస్తామని హామీ ఇచ్చారు. దేశం ప్రభుత్వ హయాంలో అయ్యన్నపాత్రుడు నాయకత్వంలో నర్సీపట్నం అన్ని రంగాల్లోనూ అభివృద్ధి చెందిందన్నారు.మళ్ళీ అధికారంలోకి వస్తే నర్సీపట్నాన్ని సుందరనగరంగా తీర్చిదిద్దుతామని హర్షధ్వానాల మధ్య ప్రకటించారు. అనంతరం శ్రీకన్య జంక్షన్, పెదబొడ్డేపల్లి జంక్షన్‌లవద్ద బాబు ప్రసంగించారు. బలిఘట్టం నుండి బాబు రాత్రి మకాం ఉండే సుబ్బారాయుడుపాలెం వరకు సుమారు ఏడు కిలో మీటర్లు పాదయాత్ర పూర్తి చేశారు. నర్సీపట్నం నియోజకవర్గంలో నాలుగు రో జుల పాటు జరిగిన పాదయాత్ర సుమారు 30 కిలోమీటర్లు సాగింది. బుధవారం పాదయాత్ర ప్రారంభం మొదలుకుని చివరి వరకు ఉత్సాహంగా సాగింది. చంద్రబాబు లేని ఓపికను తెచ్చుకుని ఉత్సాహంగా ముందుకు నడిచారు.
కడపాలెంలో భారీ అగ్ని ప్రమాదం
* వంద పూరిళ్లు దగ్ధం * రూ. 50 లక్షల ఆస్తి నష్టం
అచ్యుతాపురం, ఏప్రిల్ 17: మండలంలో పూడిమడక శివారు కడపాలెంలో బుధవారం మధ్యాహ్నం జరిగిన భారీ అగ్నిప్రమాదంలో సుమారు వంద పూరిళ్లు దగ్ధమై సుమారు 50 లక్షల ఆస్తినష్టం సంభవించింది. ఈ ప్రమాదంలో బాధితులు కట్టుబట్టలతో నిరాశ్రయులుగా మిగిలారు. గ్రామానికి చెందిన ఎరుపల్లి దేము డు ఇంటినుండి నిప్పురవ్వలు ఎగిరిపడి మంటలు వ్యాపించాయి. ఈ మంటలకు సముద్రపు గాలి తోడుకావడంతో గ్రామమంతా వ్యాపించి పూరిగుడిసెలన్నీ అగ్నికి ఆహుతయ్యాయి. క్షణాల్లో గ్రామమంతా అగ్ని కి ఆహుతైంది. విలువైన వలలు, వంట సామాగ్రి, తిం డిగింజలు, బట్టలు మంటల్లో కాలిబూడిదయ్యాయి. ఈ ప్రమాదంలో గ్రామానికి చెందిన ఎరుపల్లి బంగారమ్మకు తీవ్రగాయాలయ్యాయి. ఆమెను 108 అంబులె న్స్‌లో ఎన్టీఆర్ ఆసుపత్రికి తరలించారు. సుమారు 150 మత్స్యకార కుటుంబాలు కట్టుబట్టలతో నిరాశ్రయులుగా మిగిలారు. యలమంచిలి, అనకాపల్లి, నక్కపల్లి, ఎన్టిపిసిల అగ్నిమాపక సిబ్బంది మంటలను అదుపుచేసినప్పటికీ ఫలితం లేకపోయింది. అధికారులు, రెవెన్యూ సిబ్బంది ఆస్తినష్టాన్ని అంచనా వేస్తున్నారు. ఎమ్మెల్యే కన్నబాబురాజు,ఆర్డీవో వసంతరాయుడు బాధితులను పరామర్శించారు. ఎస్‌ఐ సిహెచ్ నర్సింగరావు సిబ్బందితో కలసి మంటలను అదుపుచేస్తూ బాధితులకు సహాయ సహకారాలు అందిచారు. తహశీల్దార్ సీతారామారావు, ఎంపిడివో మంజుల వాణి బాధితుల వివరాల సేకరణ చేపట్టారు.
ఎవరిని ఉద్దరించడానికి బాబు పాదయాత్ర?
* మంత్రి బాలరాజు విమర్శ
పాడేరు, ఏప్రిల్ 17: తెలుగుదేశం పార్టీ అధినేత చంద్రబాబు వస్తున్నా మీకోసం పేరిట నిర్వహిస్తున్న పాదయాత్ర ఎవరిని ఉద్దరించడానికని రాష్ట్ర గిరిజన సంక్షేమ శాఖ మంత్రి పసుపులేటి బాలరాజు ప్రశ్నించారు. మండలం గొండెలి, డి.గొందూరు గ్రామాల్లో బుధవారం ఇందిరమ్మ కలలు కార్యక్రమాల్లో ఆయన అమ్మహస్తం పథకాన్ని ప్రారంభించారు. గ్రామసభల్లో మంత్రి మాట్లాడుతూ చంద్రబాబు చేస్తున్న పాదయాత్రపై విమర్శలు గుప్పించారు. అధికారంలో ఉన్న ప్పుడు ప్రజలకు ఏం చేయలేని చంద్రబాబు పాదయాత్ర నిర్వహిస్తూ ఏదో చేస్తానంటూ హామీలు గుప్పిస్తుండడం విడ్డూరంగా ఉందన్నారు. టిడిపి పాలనలో గిరిజనులకు ఒరిగిందీ ఏదీ లేదని ఆయన విమర్శించారు. గిరిజనుల సంక్షేమాన్ని చంద్రబాబు ప్రభుత్వం పూర్తిగా విస్మరించిందని ఆయన ఎద్దేవాచేశారు. ఈ ప్రాంతం నుంచి గతంలో మంత్రులుగా పనిచేసిన వారు మన్యం అభివృద్ధిని పట్టించుకోలేదన్నారు. కాంగ్రెస్ ప్రభుత్వం అధికారంలోకి వచ్చిన తరువాత గత నాలుగేళ్ళ కాలంలోనే గిరిజనాభివృద్ధికి పెద్దపీట వేశామని ఆయన చెప్పుకున్నారు. గిరిజన, హరిజన వర్గాల అభ్యున్నతిని దృష్టిలో పెట్టుకుని కిరణ్‌కుమార్‌రెడ్డి ప్రభుత్వం ఎస్సీ, ఎస్టీ సబ్‌ప్లాన్‌ను అమలులోకి తీసుకువచ్చి చట్టబద్ధత కల్పించిందన్నారు. తమ ప్రభుత్వం ప్రవేశపెట్టిన అమ్మహస్తం పేదలకు వరమన్నారు. రాయితీపై నిత్యావసర వస్తువులను అందచేసి పేద ప్రజల సంక్షేమానికి తమ ప్రభుత్వం మరో అవకాశం కల్పించిందన్నారు. అనంతరం పాడేరులో 25 లక్షల రూపాయల వ్యయంతో నిర్మించిన స్ర్తిశక్తి భవనాన్ని బాలరాజు ప్రారంభించి, 64 లక్షల 17 వేలతో చేపట్టనున్న పశువుల ఆసుపత్రి భవనానికి, పాడేరు నుంచి సప్పిపుట్టు గ్రామానికి 3 కోట్ల 36 లక్షలతో నిర్మించే తారురోడ్డు నిర్మాణానికి శంకుస్థాపన చేశారు. ఈ కార్యక్రమంలో పాడేరు ఐ.టి.డి.ఎ. నూతన ప్రాజెక్టు అధికారి వై. నరసింగరావు, ఆర్డీవో ఎం.గణపతిరావు, పాడేరు ఎగ్జిక్యూటివ్ ఇంజనీర్లు ఎం.ఆర్.జి. నాయుడు, బి.అప్పలనాయుడు, కాంగ్రెస్ నాయకులు పాల్గొన్నారు.
చేతకాకపోతే మన్యం వీడి వెళ్లండి
* గిరిజన మంత్రి బాలరాజు హెచ్చరిక
పాడేరు, ఏప్రిల్ 17: గిరిజన ప్రాంతంలో ప్రభుత్వ పథకాలను సమర్థంగా అమలు చేయలేకపోతున్న అధికారులు మన్యం విడిచిపెట్టి వెళ్లిపోవాలంటూ గిరిజన సంక్షేమ శాఖామంత్రి పసుపులేటి బాలరాజు తీవ్ర ంగా హెచ్చరించారు. పి.ఎం.ఆర్.సి. కార్యాలయంలో వివిధ శాఖల అధికారులతో బుధవారం రాత్రి సమావేశంలో మన్యంలో అభివృద్ధి, సంక్షేమ కార్యక్రమాల అమలును సమీక్షించారు. గిరిజన సంక్షేమం, పిఆర్ శాఖల ఇంజనీరింగ్ అధికారులు బాధ్యతారాహిత్యం గా పనిచేస్తున్నారని ఆగ్రహం వ్యక్తంచేశారు. ఏజెన్సీలో అభివృద్ధి నిర్మాణ పనులకు కోట్లాది రూపాయలను మంజూరు చేస్తూ అనేక పనులను తీసుకువస్తుంటే వాటిని సకాలంలో పూర్తి చేయడంలో ఇంజనీరింగ్ అధికారులు నిర్లక్ష్యంగా వ్యవహరిస్తున్నారని ఆగ్రహం చెందారు. మన్యంలో అభివృద్ధి కుంటుపడి ప్రభుత్వానికి చెడ్డపేరు వచ్చేలా తయారైందని ఆయన ఆక్షేపించారు. ఇటువంటి అధికారులు మన్యంలో పనిచేసే దానికంటే వేరే ప్రాంతానికి వెళ్లిపోవడమే మంచిదని అన్నారు. హైదరాబాద్‌లో ఇంజనీరింగ్ అధికారులకు ఉన్న పలుకుబడిని వినియోగించుకుని ఏజెన్సీ నుంచి వెళ్లిపోవడం ఉత్తమమని ఆయన సలహా ఇచ్చారు. ఇందిరాక్రాంతి పథం అధికారుల పనితీరు పట్ల మం త్రి తీవ్ర అసంతృప్తి వ్యక్తం చేశారు.
ప్రభుత్వ పథకా లను గిరిజనులకు తెలియచేసి వారిలో అవగాహన కల్పించడంలో ఇందిరాక్రాంతి పథం అధికారులు విఫలమయ్యారన్నారు. నిరుద్యోగ యువతకు ఉపాధి అవకాశాలను కల్పించేందుకు ప్రభుత్వం పలు కార్యక్రమాలను అమలు చేస్తున్నా ఇవేమీ యువతకు తెలియడం లేదని, దీన్ని బట్టి ఇందిరాక్రాంతి పథం అధికారులు ఏం చేస్తున్నారంటూ ఆయన నిలదీశారు. అధికారులు ఇకనైనా పనితీరును మార్చుకుని చిత్తశుద్ధితో పనిచేయాలన్నారు. నిర్లక్ష్యంగా వ్యవహరించే వారిని ఇకపై ఉపేక్షించేది లేదని ఆయన హెచ్చరించారు. మన్యంలో పనిచేసే అధికారులు బాధ్యతతో వ్యవహరించి పనిచేయడం వారికే మంచిదని, లేకుండే తీవ్ర పరిణామాలు ఎదుర్కొవలసి వస్తోందని బాలరాజు హెచ్చరించారు. ఈ సమావేశంలో ఐ.టి.డి.ఎ. ఇన్‌చార్జి ప్రాజెక్టు అధికారి నరసింగరావు, ఆర్డీవో ఎం.గణపతిరావు పాల్గొన్నారు.
ఫీల్డ్ అసిస్టెంట్లకు ‘ఉపాధి’ పనుల తనిఖీలు తప్పనిసరి
* జిల్లా పరిషత్ సిఇఒ వెంకటరెడ్డి
చోడవరం, ఏప్రిల్ 17: ఫీల్డ్ అసిస్టెంట్లు ఉపాధి హామీ పనుల్లో హాజరుపట్టీని విధిగా తనిఖీలు జరిపి సకాలంలో కూలీలకు వేతనాలు అందించేలా చర్య లు చేపట్టాలని జిల్లా పరిషత్ సిఇఒ వెంకటరెడ్డి సూచించారు. బుధవారం మండలంలోని అడ్డూరు, దుడ్డుపాలెం గ్రామాల్లో ఉపాధి హామీ పథకం ద్వారా చేపట్టిన చెరువు పనులను ఆయన పరిశీలించారు. అనంతరం మండల పరిషత్ కార్యాలయ సమావేశ భవనంలో ఏడు మండలాల ఫీల్డ్ సిబ్బందితో ప్రత్యేక సమావేశం నిర్వహించారు. 2013-14 సంవత్సరానికి 447 కోట్ల రూ పాయల బడ్జెట్‌తో ఉపాధి హామీ పనుల ను జిల్లాలో నిర్వహించాలని లక్ష్యంగా పెట్టుకున్నామన్నారు. ఇందులో వేతనా ల కోసం 268 కోట్లు, ఆయా పనిముట్లు, పరికరాల ఏర్పాట్లకు 179 కోట్లు రూపాయలను కేటాయించామన్నారు. ఈ ప నుల కోసం రోజుకు రెండు లక్షల మంది కూలీలు పనిచేయాల్సి ఉందన్నారు. మంగళవారం నాటికి జిల్లాలో లక్షా 58,263మంది కూలీలు ఉపాధి హామీ పనులు చేస్తున్నారన్నారు. ఈ సంఖ్యను మరింతగా పెంచేందుకు ఫీల్డ్ సిబ్బంది కృషిచేయాల్సి ఉందన్నారు. ఫీల్డ్ అసిస్టెంట్లు లేనిచోట సీనియర్ మేట్లే ఆయా పనులు చేపట్టాల్సిఉందన్నారు. ఈ వారాంతానికి రెండు లక్షల మంది కూలీలు పనుల్లో హాజరయ్యేలా చర్య లు తీసుకోవాలన్నారు. ఈ సందర్భంగా విలేఖర్లతో ఆయన మాట్లాడుతూ వ్యక్తిగత మరుగుదొడ్ల నిర్మాణం వేగవంతం చేయాలని కార్యదర్శులకు ఆదేశాలు జారీచేశామన్నారు. మే నెలాఖరు నాటి కి మండలాల్లో ఎంపిక చేసిన గ్రామాల్లో వ్యక్తిగత మరుగుదొడ్లు పూర్తికావాల్సిఉందన్నారు. ఉపాధి హామీ పధకం ద్వా రా ఉద్యానవనాల పెంపకానికి 1454 ఎకరాలను జిల్లాలో గుర్తించామన్నారు. వీటిలో జూన్ నెలాఖరు నాటికి మొక్కలు నాటడం పూర్తిచేయాల్సి ఉందని ఆయన తెలిపారు.
‘మహా’ నష్టం
* ఆదాయాన్ని తీవ్రంగా కోల్పోతున్న జివిఎంసి
విశాఖపట్నం (జగదాంబ), ఏప్రిల్ 17: ‘‘దక్కిందే దక్కుదల’’ అన్న చందంగా మహావిశాఖ నగరపాలక సంస్థ (జివిఎంసి) వ్యవహరించడంతో అధికారికంగా వచ్చే ఆదాయాన్ని కూడా తీవ్రంగా నష్టపోతోంది. ఆస్తిపన్ను, కమర్షియల్ టాక్స్ తరువాత అతిపెద్ద ఆదాయ వనరుగా ఫైర్ (అగ్నిమాపక) విభాగం ద్వారా వచ్చే కోట్లాది రూపాయల ఆదాయాన్ని చేతులారా పోగొట్టుకుంటోంది. ఉన్నతాధికారుల పర్యవేక్షణ...సిబ్బంది కొరత....సంబంధిత అధికారుల నిర్లక్ష్యం...వెరసి మహావిశాఖ నగరపాలక సంస్థకు అంతా నష్టమే మిగులుతోంది. వివరాలు ఇలా...
జివిఎంసి కీలకమైన విభాగంలో అత్యంత ప్రాధ్యానతను సంతరించుకున్న విభాగం ఫైర్ విభాగం. అయితే ఈ విభాగం అందరి దృష్టిలో అవసరానికి మాఅతమే ఉపయోగపడుతుంది అయినప్పటికీ ఆదాయంలో మాత్రం ప్రథమస్థానంలో ఉంటుంది. ఏటా జివిఎంసి పరిధిలో ఉన్న స్కూళ్ళు, ఆసుపత్రులు, హోటళ్ళు, కల్యాణమండపాలు, షాపింగ్‌మాల్స్ తదితర వాటి ద్వారా ఫైర్‌విభాగానికి కోట్లాది రూపాయలు ఎన్‌ఓసిల ద్వారా వస్తుంటుంది. అయితే సకాలంలో తనిఖీలు నిర్వహించాక రెన్యువల్ చేయించని వాటిపై చర్యలు తీసుకోక, నిబంధనలు పాటించకుండా చేపడుతున్న నిర్మాణాలపై దృష్టి లేకపోవడంతో ఆదాయాన్ని భారీగానే నష్టపోతోంది. దీంతో పాటు జివిఎంసిలో 2010 నుంచి ఆ శాఖకు సంబంధించి పూర్తిస్థాయిలో అధికారులు లేకపోవడం కూడా ఒక కారణమే. దీని కారణంగా గడిచిన మూడు సంవత్సరాల వ్యవధిలో సుమారుగా జివిఎంసి మూడుకోట్ల రూపాయల ఆదాయాన్ని చేజార్చుకుంది. నగర పరిధిలో ఉన్న 58 పెట్రోల్ బంక్‌లలో కేవలం మూడింటికే లైసెన్సులు, ఎన్‌ఓసిలు కలిగి ఉండడం, అలాగే 144 ప్రైవేట్ పాఠశాలలకు ఎన్‌ఓసిలు లేకపోవడం, దీంతో పాటు 94 కల్యాణమండపాలు ఉండడం గుర్తించిన జివిఎంసి అధికారులు వాటి ద్వారా ఆదాయాన్ని పొందేందుకు ఇప్పుడు పడరాని పాట్లు పడుతున్నారు. ఇప్పటికే ఆ నగరంలో అగ్నిమాపక పరికరాలు లేకుండా నిర్వహిస్తున్న హోటళ్లు, ఆసుపత్రులు, స్కూళ్లు తదితర వాటికి నోటీసులు ఇచ్చారే తప్ప ఏ మాత్రం చర్యలు చేపట్టకపోవడం గమనార్హం. మరో విషయం ఏమిటంటే జివిఎంసి ఇటీవలే నూతనంగా నియమించిన ఫైర్ ఆఫీసర్ ద్వారా నెలన్నర వ్యవధిలో జివిఎంసి ఫైర్ విభాగానికి సుమారు 40 లక్షల ఆదాయం తెచ్చినట్లు సమాచారం
వేధిస్తున్న సిబ్బంది కొరత:
జివిఎంసిలో గతంలో ఫైర్ విభాగానికి ఒక డిఎఫ్‌ఓ, ఇద్దరు ఎఎఫ్‌ఓలు, కానిస్టేబుల్స్ ఉండేవారు. 2010లో జరిగిన ఎసిబి దాడుల్లో ఇద్దరు అధికారులు దొరికిపోవడంతో ఆ శాఖ పూర్తిగా నిర్వీర్యం అయిపోయింది. దీంతో ఇటీవల రాష్టస్థ్రాయి అధికారి (ఆర్‌ఎఫ్‌ఓ)గా ఎస్‌వి.నరసింహం జివిఎంసిలో ఫైర్ ఆఫీసర్‌గా నియమించడం జరిగింది. ఆర్‌ఎఫ్‌ఓ స్థాయి అధికారులు ఒక డిఎఫ్‌ఓ, ఇద్దరు ఎడిఎఫ్‌ఓలు, 10 మంది సిబ్బంది ఉండాలి కాని జివిఎంసిలో మాత్రం ఒక అసిస్టెంట్, ఒక హోంగార్డ్, డేటా ఆపరేటర్ మాత్రమే పని చేస్తుండడం విశేషం. నగరంలో నిత్యం ఏదో ఒక చోట అగ్నిప్రమాదాలు జరుగుతుండడం, వాటిని ఆర్పేందుకు పూర్తిస్థాయిలో సిబ్బంది లేకపోవడంతో ఆదాయాన్ని కూడా రాబట్టుకోలేకపోతోంది. ఈ విషయమై జివిఎంసి కమిషనర్ ఎంవి.సత్యనారాయణ దృష్టిసారించి ఫైర్ విభాగానికి పూర్తిస్థాయిలో సిబ్బందిని నియమించి ఆదాయ వనరులను కాపాడాలని పలువురు కోరుతున్నారు.
కేంద్రంలో మూడో ప్రత్యామ్నాయం తప్పదు
* టిడిపియే చక్రం తిప్పుతుంది
* నర్సీపట్నం సభలో చంద్రబాబు నాయుడు
ఆంధ్రభూమి బ్యూరో
విశాఖపట్నం, ఏప్రిల్ 17: కేంద్రంలో కాంగ్రెస్ పార్టీ తిరిగి వచ్చే అవకాశం లేదని, అలాగే అధికారంలోకి వస్తామనుకుంటున్న బిజెపి ఆశలు కూడా అడియాశలవుతాయని, మూడో ప్రత్యామ్నాయానికే అవకాశాలు ఉన్నాయని టిడిపి అధినేత చంద్రబాబు నాయుడు అన్నారు. వస్తున్నా మీకోసం యాత్రలో భాగంగా విశాఖ జిల్లా నర్సీపట్నం అబిద్ సెంటర్‌లో బుధవారం రాత్రి జరిగిన బహిరంగ సభలో చంద్రబాబు మాట్లాడుతూ వచ్చే ఎన్నికల్లో అత్యధిక ఎంపి స్థానాలను సాధించుకుంటామని వైఎస్‌ఆర్ కాంగ్రెస్ నిన్న మొన్నటి వరకూ ఎగిరెగిరిపడిందని, ఇప్పుడు 12 స్థానాలతో సరిపెట్టుకోవలసిన పరిస్థితి ఏర్పడిందని సర్వేలు చెబుతున్నాయన్నారు. ఒకప్పుడు కేంద్రంలో టిడిపి చక్రం తిప్పిందని, మళ్లీ అదే పరిస్థితి రాబోతోందని ఆయన ధీమా వ్యక్తం చేశారు. 2014 ఎన్నికల్లో టిడిపి నూటికి నూరు శాతం అధికారంలోకి వస్తుందని బాబు జోస్యం చెప్పారు. రాష్ట్రంలో కాంగ్రెస్ పార్టీ పేద, మధ్య తరగతి ప్రజలను రాక్షసంగా హింసిస్తోందని చంద్రబాబు అన్నారు. ఈ వర్గాల ఆదాయం పెరగకపోయినా, పన్నుల పేరుతో వారి నడి విరుస్తోందని అన్నారు. చివరకు ఉపాధి హామీ పథకం కింద దొంగ లెక్కలు రాసి, డబ్బులు కొట్టేస్తున్నారని ఆయన విమర్శించారు. బెల్ట్ షాపులు పెట్టి ఏడాదికి 50 వేల కోట్ల రూపాయల మద్యాన్ని విక్రయించి, 20 వేల కోట్ల రూపాయలు ప్రజల నుంచి టాక్స్ రూపంలో వసూలు చేస్తున్నారని చంద్రబాబు విమర్శించారు. తన హయాంలో 20-30 వేల కోట్ల రూపాయలు అప్పులు తెచ్చి, అనేక అభివృద్ధి కార్యక్రమాలు చేపట్టానని, అయితే, అప్పుడు ప్రతిపక్షంలో ఉన్న కాంగ్రెస్ పార్టీ తనపై అనేక విమర్శలు చేసిందని ఆయన అన్నారు. ఇప్పుడు 1,80,000 కోట్ల రూపాయలు అప్పులు తెచ్చి, అభివృద్ధి కార్యక్రమాలు చేపట్టకపోగా, ఎవరికి వారు ఆ మొత్తాన్ని దిగమింగారని బాబు విమర్శించారు. గడచిన తొమ్మిదేళ్ళలో ఒక్కరికైనా ఒక్క సహాయమైనా అందిందా? అని ఆయన ప్రశ్నించారు. తన హయాంలో ప్రజల ఆస్తులకు ట్రస్టీగా వ్యవహరించానే తప్ప, ఏనాడూ ప్రజల ఆస్తులను కొల్లగొట్టలేదని చంద్రబాబు అన్నారు. కాంగ్రెస్ నాయకులు ఇందుకు విరుద్ధంగా వ్యవహరిస్తున్నారని ఆయన అన్నారు. జగన్ ఏ సిద్ధాంతం కోసం పార్టీని స్థాపించాడో చెప్పాలని ఆయన ప్రశ్నించారు. లేక ప్రజల కోసం పార్టీ పెట్టాడా? అని ఆయన ప్రశ్నించారు. కేవలం ముఖ్యమంత్రి కుర్చీ కోసం పార్టీని పెట్టాడని ఆయన అన్నారు. అవినీతిపై ప్రజల్లో చైతన్యం రావాలని బాబు విజ్ఞప్తి చేశారు. ప్రజలకు జరుగుతున్న మోసాన్ని వివరించేందుకే తాను ఈ పాదయాత్ర చేపట్టానని అన్నారు.
విశాఖ ఉక్కుకు ఎపిఎండిసి గనులు
* కాలుష్య రహితంగా ‘జింక్’ను తీర్చిదిద్దాలి
* ఇంటక్ జాతీయ అధ్యక్షుడు సంజీవరెడ్డి
ఆంధ్రభూమి బ్యూరో
విశాఖపట్నం, ఏప్రిల్ 17: విశాఖ స్టీల్ ప్లాంట్‌కు సొంత గనుల కేటాయింపు జరిగే వరకూ రాష్ట్ర ఖనిజాభివృద్ధి సంస్థ (ఎపిఎండిసి) ద్వారా ఐరన్‌ఓర్ సరఫరా చేసేందుకు ముఖ్యమంత్రి కిరణ్‌కుమార్ రెడ్డి అంగీకరించారని ఇంటక్ జాతీయ అధ్యక్షుడు గుర్రం సంజీవరెడ్డి స్పష్టం చేశారు. విశాఖలో బుధవారం ఏర్పాటు చేసిన విలేఖరుల సమావేశంలో ఆయన మాట్లాడుతూ జార్ఖండ్, ఛత్తీస్‌ఘడ్ రాష్ట్రాల్లోని ఐరన్‌ఓర్ గనులను స్టీల్‌ప్లాంట్‌కు కేటాయిస్తే మంచి ఫలితాలు ఉంటాయన్నారు. అలాగే విశాఖపట్నం పోర్టు ట్రస్టులో ప్రైవేటీకరణ పనులు జోరుగా సాగుతున్నాయని, వీటిని తక్షణమే నిలిపివేయాలని సూచించారు. ఐరన్‌ఓర్ హేండ్లింగ్ కాంప్లెక్స్‌ను పూర్తిగా పోర్టుయాజమాన్యమే నిర్వహించాలన్నారు. జింక్ కర్మాగారాన్ని కాలుష్య రహితంగా ఆధునీకరించి, తిరిగి ప్రారంభించాలని డిమాండ్ చేశారు. హిందుస్థాన్ షిప్‌యార్డుకు సంబందించి ఇప్పటికే 1100 కోట్ల రూపాయల మేర నష్టాల్లో కూరుకుపోయిందని, దీనికి యాజమాన్యం నిర్లక్ష్య ధోరణే కారణమని ఆయన ఆరోపించారు. యాజమాన్య ఏకపక్ష నిర్ణయాల కారణంగానే షిప్‌యార్డు నష్టాల్లో కూరుకుపోయిందన్నారు. కార్మిక సంఘాలతో చర్చించి కొత్తగా ఆర్డర్లు పొందాలని, తద్వారా నష్టాల నుంచి గట్టెక్కాలని సూచించారు. ఇక కేంద్ర ప్రభుత్వం లాభాలతో నడుస్తున్న కర్మాగారాల నుంచి పెట్టుబడులను ఉపసంహరించుకునే విధానానికి స్వస్తి చెప్పాలని డిమాండ్ చేశారు. ఇక కాంట్రాక్టు కార్మికులకు 10 వేల రూపాయల కనీస వేతనం అమలు చేయాలని, అసంఘటిత రంగం, వ్యవసాయ కార్మికులకు వేతనాలు, సంక్షేమ నిధి ఏర్పాటు అంశంపై చర్యలు తీసుకోవాలన్నారు.
రైల్వేలో ప్రైవేటీకరణ విధానాలకు వ్యితిరేకం
* ఎన్‌ఎఫ్‌ఐఆర్ జాతీయ ప్రధాన కార్యదర్శి రాఘవయ్య
ఆంధ్రభూమి బ్యూరో
విశాఖపట్నం, ఏప్రిల్ 17: రైల్వే ప్రైవేటీకరణకు నేషనల్ ఫెడరేషన్ ఆఫ్ ఇండియన్ రైల్వే (ఎన్‌ఎఫ్‌ఐఆర్) వ్యతిరేకమని ఫెడరేషన్ జాతీయ ప్రధాన కార్యదర్శి ఎం రాఘవయ్య అన్నారు. రైల్వేలో కార్మిక గుర్తింపు ఎన్నికలను పురస్కరించుకుని ప్రచారం నిమిత్తం వచ్చిన ఆయన బుధవారం నాడిక్కడ విలేఖరులతో మాట్లాడారు. రైల్వేలను బతికించుకోవాల్సి బాధ్యత ప్రతికార్మికునిపై ఉందని అన్నారు. ప్రస్తుతం 90వేల కిలోమీటర్ల మేర ఉన్న రైల్వేలైన్లను రానున్న పదేళ్ళకాలంలో మరింత పెంచాల్సిన అవసరం ఎంతైనా ఉందన్నారు. రవాణా వ్యవస్థలో ఇది కేవలం 18.78 శాతం మాత్రమేనని, రానున్న కాలంలో దీన్ని 30శాతానికి పెంచుకుంటేనే భవిష్యత్ ఉంటుందన్నారు. అలాగే రైల్వేల పరంగా సరుకురవాణా కీలకమని, ఇందుకోసం ప్రత్యేక లైన్ల ఏర్పాటు అవసరాన్ని గుర్తించాలని ప్రభుత్వానికి ఆయన సూచించారు. 2023 నాటికి వాల్తేరు కేంద్రంగా రైల్వే జోన్ ఏర్పాటు సాధించి తీరుతామని రాఘవయ్య ఉద్ఘాటించారు. ఇక తూర్పుకోస్తా రైల్వే పనితీరు బాగుందని కొనియాడారు. అయితే డివిజన్ పరిధిలో కొన్ని సమస్యలున్నాయని, ఈవిషయం తనదృష్టికి వచ్చిందని అన్నారు. సిబ్బందికి పదోన్నతుల్లో వివక్షకు గురవుతున్నారని అన్నారు. కేడర్‌ను పునర్‌వ్యవస్థీకరించడం ద్వారా పదోన్నతులు అమలు చేసేందుకు అన్ని చర్యలు తీసుకుంటామన్నారు. కార్మికుల పక్షాన న్యాయపరంగా తమ యూనియన్ పోరాడుతుందని హామీ ఇచ్చారు. గతంలో రెండుసార్లు వేతన సంఘాలను సాధించామన్నారు. ఎన్నికల్లో గెలిపిస్తే కొత్త పెన్షన్ పథకాన్ని రద్దు చేయిస్తామని హామీ ఇచ్చారు. లోకోలో పనిగంటల పెరిగి భారం మోస్తున్న కార్మికులకు ఉపశమనం కల్పించడంతో పాటు కార్మికులకు పూర్తి న్యాయం చేసేందుకు అన్ని చర్యలు తీసుకుంటామన్నారు. అలాగే వచ్చే 90 రోజుల్లో రైల్వేలో పనిచేస్తున్న 14 లక్షల మంది కార్మికుల తల్లిదండ్రులకు రైల్వే ఆసుపత్రుల్లో ఉచిత వైద్య సదుపాయం అందించేందుకు అన్ని చర్యలు తీసుకుంటామని హామీ ఇచ్చారు. కొత్త పెన్షన్ పథకాన్ని కార్మికులు నెత్తిన రుద్దేందుకు కొన్ని కార్మిక సంఘాలు కుట్రలు పన్నుతున్నాయని ఆయన ఆరోపించారు. ప్రస్తుతం ఉద్యోగులుగా చేరిన కార్మికులకు భవిష్యత్‌లో ఎటువంటి అన్యాయం జరక్కుండా చూసేది ఎన్‌ఎఫ్‌ఐఆర్ ఒక్కటేనన్నారు. సమావేశంలో ఈస్ట్‌కోస్టు రైల్వే శ్రామిక కాంగ్రెస్ డివిజనల్ కోఆర్డినేటర్ విజె అజయ్‌కుమార్ తదితరులు పాల్గొన్నారు.
బాబు ఆరోగ్యం కోసం
22న మహా చండీయాగం
ఆంధ్రభూమి బ్యూరో
విశాఖపట్నం, ఏప్రిల్ 17: పార్టీకి పూర్వవైభవం తీసుకురావాలని అలుపెరగకుండా పాదయాత్ర చేస్తున్న తెలుగుదేశం పార్టీ అధినేత చంద్రబాబు నాయుడు సంపూర్ణ ఆరోగ్యంతో ఉండాలని కాంక్షిస్తూ మహా చండీయాగం నిర్వహించాలని నిర్ణయించారు. జిల్లాలో వస్తున్నా మీకోసం పాదయాత్ర కొనసాగిస్తున్న చంద్రబాబు యాత్ర ఎటువంటి ఆటంకంలేకుండా సాగాలని కోరతూ తెలుగుదేశం పార్టీ ఆధ్వర్యంలో ఈయాగాన్ని ఈ నెల 22న నిర్వహించనున్నట్టు నగర పార్టీ అధ్యక్షుడు వాసుపల్లి గణేష్‌కుమార్ తెలిపారు. పార్టీ కార్యాలయంలో బుధవారం ఏర్పాటు చేసిన విలేఖరుల సమావేశంలో ఆయన మాట్లాడుతూ వస్తున్నామీకోసం పాదయాత్ర ముగింపు సందర్భంగా బహిరంగ సభ జరిగే ఆంధ్రాయూనివర్శిటీ ఇంజనీరింగ్ కళాశాల గ్రౌండ్స్‌లోనే మహాచండీయాగం నిర్వహిస్తున్నట్టు తెలిపారు. వస్తున్నామీకోసం పాదయాత్ర ముగింపునకు చిహ్నంగా గాజువాడ సమీపంలో నిర్మిస్తున్న పైలాన్ చరిత్రలో చిరస్థాయిగా నిలిచిపోతుందన్నారు. ముగింపు సందర్భంగా గాజువాకలో పైలాన్ ఆవిష్కరణ అనంతరం బహిరంగసభ వేదిక ఎయుగ్రౌండ్స్‌కు భారీ ర్యాలీ నిర్వహిస్తున్నామని, సుమారు 10 వేల మంది కార్యకర్తలు ద్విచక్రవాహనాలతో ఈర్యాలీలో పాల్గొంటారని తెలిపారు. అలాగే గాజువాక నుంచి మద్దిలపాలెం వరకూ జాతీయ రహదారిపై తెలుగుదేశం జెండాలతో అలంకరించనున్నట్టు తెలిపారు. ర్యాలీ ఏర్పాట్లను పశ్చిమ నియోజకవర్గ ఇన్‌ఛార్జ్ గణబాబు, బహిరంగ వేదిక ఏర్పాట్లను నల్లూరి భాస్కరరావు పర్యవేక్షిస్తారని తెలిపారు. చారిత్రాత్మక పాదయాత్ర విశాఖలో ముగించడం అదృష్టంగా తెలుగుదేశం కార్యకర్తలు భావిస్తున్నారని తెలిపారు. ఇప్పటికే బాధ్యతలు అప్పగించిన కమిటీలు పనులను పర్యవేక్షిస్తున్నారని తెలిపారు.
ఇక బహిరంగ సభకు భారీ ఎత్తున జనసమీకరణకు సన్నాహాలు చేస్తున్నట్టు వాసుపల్లి తెలిపారు. ఇదే అంశంపై అర్బన్ పరిధిలోని పార్టీ మాజీ కార్పొరేటర్లు, పార్టీ అధ్యక్ష, కార్యదర్శులతో బుధవారం ఆయన సమావేశమయ్యారు. బహిరంగ సభను విజయవంతం చేసేందుకు అవసరమైన అన్ని ఏర్పాట్లను పర్యవేక్షించాలని సూచించారు. ప్రతి వార్డు నుంచి పెద్ద సంఖ్యలో కార్యకర్తలను, అభిమానులును తరలించాలన్నారు. సమావేశంలో మాజీ కార్పొరేటర్లు నల్లూరి భాస్కరరావు, లేళ్ళ కోటేశ్వరరావు, గంధం శ్రీనివాసరావు,కె కన్నారావు, పి శ్రీను, సనపల సీతారామాంజనేయులు, పివి రెడ్డి తదితరులు పాల్గొన్నారు.
ముందస్తు ప్రణాళికతో అధిక దిగుబడులు
* వ్యవసాయశాఖ కమిషనర్ మధుసూదన రావు
విశాలాక్షినగర్, ఏప్రిల్ 17: ఖరీఫ్ సీజన్‌లో అత్యధిక దిగుబడులు సాధించేందుకు ముందస్తు ప్రణాళికలతో అధికారులు సిద్ధం కావాలని వ్యవసాయశాఖ కమిషనర్ కె మధుసూదన రావు సూచించారు. కోస్తాప్రాంత వ్యవసాయాధికారులతో ఇక్కడ బుధవారం నిర్వహించిన వర్క్‌షాప్‌లో ఆయన పాల్గొన్నారు. ఈసందర్భంగా మాట్లాడుతూ ఖరీఫ్ సీజన్‌కు ముందే వ్యవసాయ యాంత్రీకరణ పూర్తి చేయాలని సూచించారు. ఖరీఫ్ సీజన్‌కు అవసరమైన ఎరువులు, విత్తనాలు ముందుగానే సిద్ధం చేసుకోవాలని సూచించారు. ఖరీఫ్ ముందస్తు ప్రణాళికలో లోపాలను సరిచూసుకుని ముందుకు సాగాలన్నారు. గతేడాది విత్తనాలు, ఎరువుల పంపిణీలో తలెత్తన సమస్యలను దృష్టిలో ఉంచుకుని ఈసారి అటువంటి సంఘటనలు పునరావృతం కాకుండా చర్యలు తీసుకోవాలన్నారు. ఖరీఫ్ సీజన్‌కు సంబంధించి మేమాసాంతానికే అవసరమైన ఎరువులు, విత్తనాలు అందుబాటులో ఉంచుకోవాలన్నారు. సీడ్‌విలేజ్ కార్యక్రమాన్ని సక్రమంగా అమలు చేయాలని, విత్తనాలకు ఎటువంటి ఇబ్బందులు లేకుండా అన్ని చర్యలు తీసుకోవాలన్నారు. రైతులు సేంద్రీయ ఎరువులను వినియోగించేలా చైతన్య పరచాలని, పొలంబడి, ఆత్మ కార్యక్రమాల కింద రైతులకు పెద్ద ఎత్తున శిక్షణ కార్యక్రమాలు చేపట్టాలని సూచించారు. ప్రతిజిల్లాలోను 500 హెక్టార్ల విస్తీర్ణంలో భూచేతన కార్యక్రమాన్ని అమలు చేయాలని ఆదేశించారు. ఈకార్యక్రమాన్ని కట్టుదిట్టంగా అమలు చేసేందుకు ఇక్రిశాట్ సహకారంతో సుశిక్షితులైన మాస్టర్ బృందాలను అన్ని జిల్లాలకు పంపుతున్నామని, వారి సేవలను సద్వినియోగం చేసుకోవాలని సూచించారు. అలాగే స్థానికంగా మరికొంతమందికి శిక్షణను ఇప్పించడం ద్వారా కార్యక్రమాన్ని అంతటా విస్తరించాలన్నారు. ఎస్టీ,ఎస్సీ ఉపప్రణాళికకు చట్టబద్దత కల్పించిన నేపధ్యంలో వారికి కేటాయించిన నిధులతో ఇందిర జలప్రభ కార్యక్రమాన్ని అమలు చేసేందుకు వెచ్చించాలన్నారు. త్వరలోనే రైతులకు ఇన్‌పుట్ సబ్సిడీని ప్రభుత్వం విడుదల చేయనుందన్నారు. పంటల బీమా కార్యక్రమాన్ని రైతులంతా సద్వినియోగం చేసుకునే విధంగా వారిని చైతన్య పరచాలన్నారు. బుర అర్హకార్డులున్న కౌలు రైతులందరికీ బ్యాంకుల ద్వారా రుణాలు మంజూరు చేసేందుకు అన్ని చర్యలు తీసుకోవాలన్నారు. రాష్ట్ర వ్యాప్తంగా ఏప్రిల్ 22నుంచి మే 8 వరకూ రైతుచైతన్య యాత్రలను, మే 9 నుంచి13 వరకూ రైతు సదస్సులను నిర్వహించాలని ప్రభుత్వం ఇప్పటికే నిర్ణయించిందని, ఈకార్యక్రమాలు విజయవంతం అయ్యేందుకు అన్ని వ్యవసాయాధికారులు అన్ని చర్యలు తీసుకోవాలన్నారు. సమావేశంలో వ్యవసాయశాఖ సంయుక్త సంచాలకులు డి కూర్మారావు, ఎస్ మురళీకృష్ణ, లీలావతి, ప్రమీల, కృపాదాస్‌లతో పాటు అన్ని జిల్లాలకు చెందిన వ్యవసాయశాఖ ఉపసంచాలకులు పాల్గొన్నారు.
ఆమోదం పొందిన ప్రైవేటు లేఅవుట్‌ల వివరాలు వెబ్‌సైట్‌లో
* వుడా విసి యువరాజ్
ఆంధ్రభూమి బ్యూరో
విశాఖపట్నం, ఏప్రిల్ 17: విశాఖ నగరాభివృద్ధి సంస్థ అనుమతి పొందిన లేఅవట్‌ల వివరాలను వుడా వెబ్‌సైట్‌లో పొందుపరచి ప్రజలకు అందుబాటులో ఉంచాలని విసి యువరాజ్ నిర్ణయించారు. ఈమేరకు అధికారులకు ఖచ్చితమైన ఆదేశాలు జారీ చేశారు. ఇకపై ప్రతి 15రోజులకు ఒకసారి వుడా అనుమతి పొందిన ప్రైవేటు లేఅవుట్‌ల వివరాలను వెబ్‌సైట్‌లో పొందుపరచాలని బుధవారం అధికారులతో నిర్వహించిన సమావేశంలో ఆదేశించారు. ఇప్పటికే అనధికార లేఅవుట్‌లను గుర్తించడంతో పాటు చర్యలకు సంబంధించి ఒక ప్రత్యేక బృందాన్ని విసి నియమించారు. అలాగే ఎల్‌పి నెంబర్ పొంది కూడా వౌలిక సదుపాయాలు కల్పించని లేఅవుట్‌లను గుర్తించేందుకు క్షేత్రస్థాయి తనిఖీలు, పర్యవేక్షణలు జరపాలని ఆదేశించారు. డెవలపర్ నిర్ధేశించిన గడువు మేరకు వౌలిక వసతుల కల్పన, పచ్చదనం పెంపు వంటి అంశాలను పూర్తి చేయని పక్షంలో వుడా ఆధీనంలో ఉండే 15శాతం ప్లాట్‌ల తనఖాను విడుదల చేయకూడదని నిర్ణయించారు. నిర్ణీత గడువులోగా అభివృద్ధిని పూర్తి చేయని డెవలపర్‌లను గుర్తించి వారితో ప్రత్యేకంగా సమావేశాన్ని ఈనెల 24 నిర్వహించాలని నిర్ణయించారు. నిబంధనల మేరకు గడువులోగా అభివృద్ధిని పూర్తి చేయని వారిపై తీసుకోవాల్సిన చర్యలపై ఈసమావేశంలో చర్చించి నిర్ణయం తీసుకుంటారు.
‘చెరకు రైతుల సమస్యలు తీర్చాలి’
బొబ్బిలి, ఏప్రిల్ 17: ఎన్‌సిఎస్ యాజమాన్యం చెరకు రైతుల పట్ల నిర్లక్ష్యం చూపుతోందని, అందుకు తగిన మూల్యం చెల్లించకతప్పదని రైతు సంక్షేమసంఘం అధ్యక్షుడు వేమిరెడ్డి లక్ష్మునాయుడు ఆరోపించారు. బుధవారం చెరకు అభివృద్ధి కేంద్రం సూపర్‌వైజర్‌కు చెరకు రైతుల సమస్యలకు సంబంధించిన వినతిపత్రాన్ని అందించారు. అనంతరం విలేఖర్లతో మాట్లాడుతూ బిల్లుల చెల్లింపులో నిర్లక్ష్యంతోపాటు బ్రెజిల్ నుంచి ముడి పంచదారను దిగుమతి చేసుకుని కర్మాగారం ద్వారా ఆడించి విక్రయించుకోవడం దారుణమన్నారు. బిల్లులు చెల్లించాలని పలు పర్యాయాలు ఆందోళన చేస్తున్నప్పటికీ పట్టించుకోకపోవడం అన్యాయమన్నారు. అయినప్పటికీ ప్రజాప్రతినిదులు కనీసం నోరుమెదపడం లేదని ఆరోపించారు. ఇప్పటికైన ఫ్యాక్టరీ యాజమాన్యం స్పందించి చెరకు రైతుల సమస్యలను పరిష్కరించాలని లేనిపక్షంలో ఫ్యాక్టరీ వద్ద నిరవదిక దీక్షలు నిర్వహిస్తామని హెచ్చరించారు. ఈ కార్యక్రమంలో మోహనరావు, శ్రీనివాసరావు, లక్ష్మణరావు, తదితరులు పాల్గొన్నారు.
‘షాపుల్లో సిబ్బందికి నియామకపు లేఖలు’
4.సమావేశంలో మాట్లాడుతున్న లేబర్ ఆఫీసర్ విజయకుమార్‌రెడ్డి
పార్వతీపురం, ఏప్రిల్ 17: షాపుల్లో పనిచేసే వారికి కచ్చితంగా నియామకపు లేఖలు ఇవ్వాలని పార్వతీపురం కార్మికశాఖాధికారి సిహెచ్ విజయ్‌కుమార్‌రెడ్డి ఆదేశించారు. బుధవారం స్ధానిక కార్మికశాఖాధికారి కార్యాలయంలో దుకాణాల (వ్యాపార) ప్రతినిధులు, కార్మిక సంఘ నేతలతో ఏర్పాటు చేసిన సమావేశంలో మాట్లాడుతూ షాపుల్లో పనిచేసే వారికి నియామకపు ఉత్తర్వులు ఇవ్వకుంటే తమ కార్యాలయంలో ఫిర్యాదు చేస్తే వెంటనే నియామకపు లేఖలు ఇప్పించే చర్యలు తీసుకుంటామని ఆయన పేర్కొన్నారు. వ్యాపారాలు నిర్వహిస్తున్న దుకాణదారులు ఏర్పాటు చేస్తున్న బోర్డులు కచ్చితంగా తెలుగులోనే ఉండాలన్నారు. ఇతర భాషాల్లో బోర్డులున్నప్పటికీ మొదటి ప్రాధాన్యత తెలుగుకే ఇవ్వాలన్నారు. ప్రతి దుకాణ నిర్వాహకులు తమ షాపునకు రిజిస్ట్రేషన్ కచ్చితంగా చేయించుకోవాలని, అలాగే రిజిస్ట్రేషన్ నవీనీకరణ కూడా చేయించుకోవాలన్నారు. ఇలాంటి వాటికోసం ఈనెల 24న రాష్ట్ర వ్యాప్తంగా మెగా రిజిస్ట్రేషన్, రెన్యువల్ మేళాను నిర్వహిస్తున్నట్టు విజయ్‌కుమార్‌రెడ్డి తెలిపారు. రిజిస్ట్రేషన్లు, రెన్యువల్ చేయని షాపులపై మే నెలలో తమశాఖ పరంగా సర్వేచేస్తామన్నారు. అయితే రిజిస్ట్రేషన్లు, రెన్యువల్ చేయని షాపులు ఉంటే కచ్చితమైన చర్యలు తీసుకుంటామని కార్మికశాఖాధికారి హెచ్చరించారు. ఇదిలా ఉండగా భవన నిర్మాణ కార్మికుల కోసం కొత్తగా ఒక జీవోను విడుదల చేసిందని విజయకుమార్ రెడ్డి తెలిపారు. భవన నిర్మాణ కార్మికులు గతంలో పని చేసిన చోట ప్రమాదవశాత్తు మృత్యువాత పడితే ప్రమాద బీమా రూ.2లక్షలు చెల్లించేందుకు కార్మికశాఖ చర్యలు తీసుకునేదని, కొత్త నిబంధనలు ప్రకారం భవన నిర్మాణ కార్మికులు ప్రమాదావశాత్తు మృత్యువాత పడితే అలాంటి వారికి సైతం ప్రమాదబీమా వర్తించే వీలు కల్పించే చర్యలు కార్మికశాఖ చేపట్టిందన్నారు. ఈ సమావేశానికి కార్మికవర్గాల తరుపున సిటూ నాయకుడు బొత్స వెంకటరమణ, ఛాంబర్ ఆఫ్ కామర్స్ తరుపున పెంటపాటి కిరణ్, బట్టల వర్తక సంఘం తరుపున గోపాల
