నూతన కథానాయకుడు భాను, మధురిమ జంటగా శ్రీ కనకదుర్గ ప్రొడక్షన్స్ పతాకంపై ‘101 ఎ’ చిత్రం ప్రారంభమైంది. శుక్రవారం ఉదయం రామానాయుడు స్టూడియోలో ప్రారంభ సన్నివేశంపై తమ్మారెడ్డి భరద్వాజ క్లాప్ ఇవ్వగా విజయేందర్‌రెడ్డి కెమెరా స్విచ్చాన్‌చేశారు. ఎన్.శంకర్ తొలి సన్నివేశానికి గౌరవ దర్శకత్వం వహించారు. జె.ఎస్.కుమార్ దర్శకత్వంలో రవిచావన్, కుమార్ జె.ఎస్ ఈ సినిమాను రూపొందిస్తున్నారు. పూజా కార్యక్రమాల అనంతరం ఏర్పాటుచేసిన పాత్రికేయుల సమావేశంలో దర్శకుడు జె.ఎస్.కుమార్ మాట్లాడుతూ, నేటి యువతీ యువకుల్లో డేటింగ్ అనేది ఓ ఫ్యాషన్‌గా మారిందని, యువతను ఆకర్షించే పదంగా ప్రస్తుతం అందరి నోళ్లల్లో నానుతున్న డేటింగ్ కథాంశంతో ఈ సినిమా రూపొందిస్తున్నామని తెలిపారు. డేటింగ్ కోసం ఊరిచివర ఉన్న ఓ ఫామ్‌హౌస్‌కు వెళ్లిన జంట అక్కడ ఎటువంటి సమస్యలను ఎదుర్కొన్నారనే పాయింట్‌తో థ్రిల్లింగ్‌గా ఈ చిత్రం నిర్మిస్తున్నామని అన్నారు. ఈనెల 15నుండి రెగ్యులర్ షూటింగ్ ప్రారంభించి, మూడు షెడ్యూల్స్‌లో సినిమా పూర్తిచేస్తామని, ఏప్రిల్- మేలో విడుదల చేయడానికి సన్నాహాలు చేస్తున్నామని నిర్మాత రవిచావన్ తెలిపారు. ఈ కార్యక్రమంలో ఎన్.ప్రసన్నకుమార్ తదితరులు పాల్గొన్నారు. రావురమేష్, అపూర్వ, షఫి, శ్రీలలిత, తిలక్, స్ఫూర్తి తదితరులు నటిస్తున్న ఈ చిత్రానికి సంగీతం: శ్రీవెంకట్, కెమెరా: శివకృష్ణ.వై, నిర్మాతలు: రవిచావన్, కుమార్ జె.ఎస్, కథ, మాటలు, స్క్రీన్‌ప్లే, దర్శకత్వం: జె.ఎస్.కుమార్.