శ్రావణ్, మోనాల్ గుజ్జర్ హీరో హీరోయిన్లుగా ఆర్.ఆర్.మూవీస్, లైమ్ లైట్ సినిమా సంయుక్త నిర్మాణంలో రూపొందుతున్న చిత్రం ‘ఓ కాలేజ్ స్టోరీ’. టి.ప్రభాకర్ దర్శకత్వంలో రూపొందిన ఈ చిత్రం షూటింగ్ మొత్తం పూర్తి చేసుకుని నిర్మాణానంతర పనులను సైతం ముగించుకుంది. అన్ని పనులు పూర్తయిన ఈ చిత్రాన్ని ఈనెల 13న విడుదల చేయడానికి సన్నాహాలు చేస్తున్నారు. ఈ సందర్భంగా దర్శకుడు టి.ప్రభాకర్ చిత్ర విశేషాలను వివరిస్తూ-‘‘ విద్యార్థుల జీవితాలను ఆవిష్కరిస్తూ, కాలేజీల్లో జరుగుతున్న వివిధ సంఘటనలను విపులంగా చూపుతూ ఈ చిత్రాన్ని రూపొందించాం. కాలేజీ జీవితం అనగానే కేవలం ప్రేమలు, పెళ్లిళ్లు కాదు. జీవితగమనాన్ని నిర్ధేశించే కీలకమైన పునాది. కాలేజ్‌లో జరుగుతున్న పరిణామాలు, కెరీర్ పరంగా వారు ఎదుర్కొంటున్న ఒత్తిడి, అక్కడ జరిగే ర్యాగింగ్ దాని పర్యవసానం వంటి అంశాలను ఈ చిత్రంలో ఆవిష్కరిస్తున్నాం. ఈ చిత్రంలో ఊహించిన కొన్ని సన్నివేశాలు కాకతాళీయంగా సమాజంలో జరుగుతున్నాయి. అందుకే ఈ చిత్రం రెగ్యులర్ చిత్రాలకు భిన్నంగా ఉంటుంది. తెలుగుతో పాటు తమిళంలో కూడా ఏకకాలంలో నిర్మించడం జరిగింది. ఈ చిత్రం పాటలకు మంచి స్పందన లభించింది. సంగీతం, సాహిత్యపరంగా ఆ ఈచిత్రం అందర్నీ అలరిస్తుందన్న నమ్మకం వుంది’’అని చెప్పారు. నిర్మాత టి.రాజారెడ్డి మాట్లాడుతూ-‘‘తెలుగు, తమిళ భాషల్లో ఏక కాలంలో నిర్మిస్తున్న ఈ చిత్రం విద్యార్థులనే కాదు, వారి తల్లిదండ్రులను కూడా ఆకట్టుకుంది’’ అని చెప్పారు. ఈ చిత్రంలో ఇతర పాత్రల్లో విజయభాస్కర్, ఆర్తిపురి, నవీన్, అనుజ్‌రామ్, నవభారత్ బాలాజీ, గోపాల్ శ్యాం, ఆనంద్‌కుమార్, మంజులారాథోడ్, శైలజ, మీనాసింగ్ తదితరులు నటిస్తున్న ఈ చిత్రానికి మాటలు: ఖాజాపాష.ఎస్, ఎడిటింగ్: ప్రవీణ్, కెమెరా: ఆర్.కె.శానాపతి, సమర్పణ: విహాన్, సంగీతం, దర్శకత్వం: టి.ప్రభాకర్.