‘జననం’ ప్రారంభం

నూతన నిర్మాణ సంస్థ సాయి వెంకటేశ్వర క్రియేషన్స్ పతాకంపై ఎస్.ఎల్.మణిగంజి దర్శకత్వంలో నూతన నిర్మాత ఎం.ఎస్.రాజు నిర్మిస్తున్న ‘జననం’ చిత్రం ప్రారంభమైంది. హైదరాబాద్ రామానాయుడు స్టూడియోలో మంగళవారం ఉదయం డి.ఎస్.రావు క్లాప్ ఇవ్వగా బాబూమోహన్ కెమెరా స్విచ్చాన్ చేశారు. వి.సాగర్ తొలి సన్నివేశానికి గౌరవ దర్శకత్వం వహించారు. ఈ సందర్భంగా ఏర్పాటుచేసిన పాత్రికేయుల సమావేశంలో చిత్ర దర్శకుడు మాట్లాడుతూ ప్రేమ రెండు విధాలుగా ఎలా ఉంటుంది అనే కథాంశంతో ఈ చిత్రాన్ని నిర్మిస్తున్నామని, ప్రేమ త్యాగంతో కూడుకుని ఉండాలని చెబుతూ అమ్మ ప్రేమకు, ప్రియురాలి ప్రేమకు గల తేడాను కూడా వివరించే ప్రయత్నం చేస్తున్నామన్నారు. 12నుండి రెగ్యులర్ షూటింగ్ ప్రారంభించి పాటల చిత్రీకరణ చేస్తామని ఆయన అన్నారు. భువన్, ప్రియంత్, నితిన్ విడెమ్, గీతాభగత్, శ్రావణి, పావని, నరేష్, బాబూమోహన్, వైజాగ్ ప్రసాద్, మాధవి, తెలంగాణ శకుంతల, ఉత్తేజ్, అంబటి శ్రీను, ఫిష్ వెంకట్ తదితరులు నటించిన ఈ చిత్రానికి కెమెరా: ఎస్.ఎస్.తిరు, సంగీతం: తొగరాణి, ఎడిటింగ్: శివ, నిర్మాత: ఎం.ఎస్.రాజు, కథ, మాటలు, స్క్రీన్‌ప్లే, దర్శకత్వం: ఎస్.ఎల్.మణిగంజి.