‘బలుపు’ చూపిస్తాడా?

తన వరస పరాజయాలతో మాస్‌రాజా రవితేజ బెంబేలెత్తిపోతున్నాడు. ‘వీర’ నుండి నిన్న మొన్నటి ‘దరువు’ వరకు అన్నీ ఫ్లాపులే కావడం విశేషం. ఇప్పుడు హిట్టు అనేది రవితేజకు తప్పని సరైంది. ఇక తన ‘బలుపు’ చూపించక తప్పదన్న నిర్ణయానికొచ్చాడు రవితేజ. ఇప్పుడు అదే పనిలో వున్నాడు. హిట్టు లభించకపోతే ఇక ఇతడి ఆట కట్టే అంటున్నారు సినీ వర్గాలు. గోపీచంద్ మలినేని దర్శకత్వం వహిస్తున్న ‘బలుపు’ షూటింగ్ ప్రస్తుతం హైదరాబాద్‌లో శరవేగంగా జరుగుతోంది. ఈ చిత్రంలో రవితేజ ప్రేక్షకులకు ఎంటర్‌టైన్‌మెంట్‌ని అందించబోతున్నాడట. ప్రసాద్ వి, పొట్లూరి నిర్మిస్తున్న ఈ చిత్రానికి సంబంధించి రవితేజ ఎంతో ఆసక్తిని కనబరుస్తున్నారట. ప్రత్యేక శ్రద్ధ వహించి ఎంతో కష్టపడుతున్నాడని యూనిట్ వర్గాలు చెప్పుకుంటున్నాయి. ఈ చిత్రం పాటలను మే 1న విడుదల చేయడానికి సన్నాహాలు చేసుకుంటున్నారు. మరో పక్క నిర్మాణానంతర పనుల స్పీడును సైతం పెంచారు. అన్ని పనులు పూర్తి చేసి అదే నెల 24న చిత్రాన్ని ప్రేక్షకుల ముందుకు తీసుకురావడానికి రంగం సిద్ధం చేసుకున్నారు. ఈ చిత్రంలో రవితేజకు జోడీగా శృతిహాసన్, అంజలి నటిస్తున్నారు. ఈ ఇద్దరు భామలతో రవితేజ పండించే వినోదం అందర్నీ ఆకట్టుకునే స్థాయిలో వుంటుందని దర్శక, నిర్మాతలు చెబుతున్నారు. చూద్దాం..ఈ సినిమాతోనైనా రవితేజ తన ‘బలుపు’ను చూపిస్తాడో..లేదో!!