గతంలో ‘అలామొదలైంది’ చిత్రం నిర్మించిన శ్రీ రంజిత్ మూవీస్ పతాకంపై నిర్మిస్తున్న ‘అంతకుముందు.. ఆ తరువాత’ చిత్రానికి సంబంధించిన షూటింగ్ పూర్తికావస్తోంది. దామోదరప్రసాద్ నిర్మిస్తున్న ఈ చిత్రంలో సుమంత్ అశ్విన్, ఈషా జంటగా నటిస్తున్నారు. ఈ సందర్భంగా నిర్మాత మాట్లాడుతూ తమ గత చిత్రాల స్థాయిలోనే ఈ చిత్రం ఉంటుందని, దర్శకుడు చెప్పిన కథలో కొత్తదనం ఉండడంతో తెరపై దాన్ని సరికొత్తగా చూపించడానికి ప్రయత్నిస్తున్నారని, మే నెలాఖరులో విడుదల చేయడానికి సన్నాహాలు చేస్తున్నామని అన్నారు. నేటి యువత ప్రేమించడం, ఆ ప్రేమను నిలబెట్టుకోవడంలో ఎదురవుతున్న అయోమయాలు ఈ చిత్రంలో కనపడతాయని, అమ్మాయి అబ్బాయి వాళ్ళ ప్రేమను ప్రకటించుకున్న క్షణంనుంచి శాశ్వతంగా కలిసి బతకడానికి మధ్య ఓ విచిత్రమైన పరిస్థితి ఉంటుందని, ఆ సమయంలో వారు తీసుకున్న నిర్ణయం సరైనదేనా? తానెంచుకున్న వ్యక్తి సరైన వ్యక్తేనా అన్న అనుమానం, కంగారు, భయం కూడా కలుగుతుంటాయని, ఆ పరిస్థితిని తెలియజెప్పే ఓ ఉద్వేగమైన కథాంశంతో డ్రామా, రొమాన్స్, హాస్యం వంటి ఎలిమెంట్స్‌తో ఈ చిత్రాన్ని నిర్మిస్తున్నామని దర్శకుడు ఇంద్రగంటి మోహనకృష్ణ తెలిపారు. రవిబాబు, రావురమేష్, ఉప్పలపాటి నారాయణరావు, అవసరాల శ్రీనివాస్, తా.రమేష్, కళ్యాణిమాలిక్, పమ్మిసాయి, సోహైల్, కె.ఎల్.ప్రసాద్, రోహిణి, మధుబాల, ప్రగతి, ఝాన్సీ నటిస్తున్న ఈ చిత్రానికి పాటలు: సిరివెనె్నల, అనంత్‌శ్రీరామ్, సంగీతం: కళ్యాణి కోడూరి, కెమెరా: పి.జి.వింద, ఎడిటింగ్: మార్తాండ్ కె.వెంకటేష్, సహ నిర్మాతలు: వివేక్ కూచిభొట్ల, జగన్ మోహన్‌రెడ్డి వి. నిర్మాత: కె.ఎల్.దామోదర్‌ప్రసాద్, కథ, మాటలు, స్క్రీన్‌ప్లే, దర్శకత్వం: మోహనకృష్ణ ఇంద్రగంటి.