నీటి కాలుష్యంతో - కామాక్షిపురం వాసులు ఆస్పత్రులపాలు

బంటుమిల్లి, ఏప్రిల్ 17: బంటుమిల్లి మండలం పెదతుమ్మిడి శివారు కామాక్షిపురంలో పలువురు వాంతులు, విరోచనాలతో ప్రైవేటు, ప్రభుత్వాసుపత్రుల్లో చికిత్స పొందుతున్నారు. వారం రోజులుగా గ్రామంలో పలువురు అస్వస్థతకు గురవుతున్నారు. బుధవారం 10మంది వాంతులు, విరోచనాలతో బాధపడుతూ పెదతుమ్మిడి గ్రామంలోని ప్రైవేటు ఆసుపత్రిలో, బందరు, గుడివాడ, ముదినేపల్లి ఆసుపత్రుల్లో కూడా చికిత్స పొందుతున్నారు. గ్రామంలో ఈ పరిస్థితిని అధికారుల దృష్టికి తీసుకెళ్ళినా వైద్యాధికారులు స్పందించలేదని గ్రామస్థులు వాపోయారు. బోయిన నాంచారమ్మ, నాగ ఫణీంద్ర, మీగడ నాగేశ్వరరమ్మ, నాగమణి, గంగమ్మ తదితరులు వాంతులు, విరోచనాలకు గురయ్యారు. దీనిపై తెలుగుదేశం పార్టీ ఉపాధ్యక్షులు బొల్లా వెంకన్న తదితరులు బంటుమిల్లి, చినపాండ్రాక వైద్యాధికారుల దృష్టికి తీసుకెళ్ళగా డా. భార్గవి, చక్రధర్ పరిస్థితిని సమీక్షించి తుమ్మిడి గ్రామ పంచాయతీలో బుధవారం సాయంత్రం వైద్య శిబిరం ఏర్పాటు చేసి చికిత్సలు అందిస్తున్నారు. బావుల్లోని నీరు కలుషితం కావటం వల్లే ఈ పరిస్థితి ఏర్పడిందని గ్రామస్థులు పేర్కొన్నారు.

నీటి చౌర్యానికి పాల్పడితే క్రిమినల్ కేసులు
కలిదిండి, ఏప్రిల్ 17: మంచినీటి అవసరాల కోసం కాకుండా కాలువల ద్వారా అక్రమంగా నీటిని మళ్ళిస్తే క్రిమినల్ కేసులు పెడతామని గుడివాడ డిఎల్‌పివో వరప్రసాద్ హెచ్చరించారు. గురవాయిపాలెం, మట్టగుంట, భాస్కరరావుపేట, మూలలంక, పెదలంక గ్రామాల్లో అధికారుల బృందం బుధవారం తనిఖీలు నిర్వహించారు. నీటిని తాగునీటి చెరువులకు మాత్రమే ఉపయోగించాలని, మంచినీటి చౌర్యానికి పాల్పడితే కఠిన చర్యలు తప్పవన్నారు. తహశీల్దార్ క్షీరసాగర్, ఎండివో రామకృష్ణ నాయక్, కార్యదర్శులు కోటేశ్వరరావు, నరసింహ, విఆర్‌ఓ గంగాధర్, ఇరిగేషన్ అధికారులు పాల్గొన్నారు.

చేపల చెరువులకు అక్రమంగా
నీటి మళ్ళింపు
* పట్టించుకోని అధికారులు
కృత్తివెన్ను, ఏప్రిల్ 17: తాగే అవసరాల కోసం విడుదల చేసిన నీటిని అక్రమంగా చేపల చెరువులకు ఆయిల్ ఇంజన్‌ల ద్వారా తోడుతున్నా అధికారులు చోద్యం చూస్తున్నారని నిడమర్రు పంచాయతీ పోడు గ్రామస్థులు ఆరోపిస్తున్నారు. పోడు గ్రామంలో ఉన్న మంచినీటి చెరువుకు నీరు పెట్టేందుకు గ్రామస్థులు పనిచేస్తుండగా బుధవారం చిన్నగొల్లపాలెం పంట కాలువ పరిధి పోడు అడ్డరోడ్డు నుండి గరిశపూడి వరకు ఇంజన్‌లతో చేపల చెరువులకు అక్రమంగా నీటిని తోడుతున్నట్లు తెలుసుకుని అధికారులకు ఫిర్యాదు చేశారు. అయినా వారు పట్టించుకోవటం లేదని గ్రామస్థులు వాపోయారు.

ప్రశ్నించేతత్వం అలవర్చుకోండి
* విద్యార్థులకు చుక్కా రామయ్య సూచన
తిరువూరు, ఏప్రిల్ 17: విద్యార్థులు ప్రశ్నించేతత్వం అలవర్చుకోవాలని ప్రముఖ విద్యావేత్త, మాజీ ఎమ్మెల్సీ, సేఫ్ ఐఐటి వ్యవస్థాపకులు చుక్కా రామయ్య అన్నారు. బుధవారం ఆయన రాజుపేటలో విజన్ హైస్కూల్‌ను సందర్శించారు. ఈసందర్భంగా విద్యార్థులనుద్దేశించి మాట్లాడుతూ పాఠ్యాంశాలను బట్టీ పట్టడం కాకుండా జ్ఞానం, సామాజిక స్పృహతో భవిష్యత్ ప్రణాళికను రూపొందించుకుని దాని ప్రకారం నడుచుకోవాలన్నారు. విద్యార్థుల్లో ప్రశ్నించే తత్వం పెంపొందించేందుకు ఉపాధ్యాయులు తమవంతు శ్రద్ధ వహించాలన్నారు. ఆయన విద్యార్థులతో పలు అంశాలపై ముచ్చటించారు. వారి సందేహాలను నివృత్తి చేశారు. పాఠశాల యాజమాన్యం రామయ్యను దుశ్శాలువా, జ్ఞాపికలతో ఘనంగా సన్మానించారు. ప్రధానోపాధ్యాయుడు ఎ శ్రీనివాసరావు, చైర్మన్ సంకా శ్రీనివాసరావు, వైస్ చైర్మన్ బొడ్డు శ్రీనివాసరావు, తదితరులు పాల్గొన్నారు.
* ఒకేఒక్క డైలాగ్‌తో ముగిసిన షర్మిల పాదయాత్ర
కంచికచర్ల/ వీరులపాడు, ఏప్రిల్ 17: వైఎస్‌ఆర్‌సిపి నాయకురాలు షర్మి ల పాదయాత్ర బుధవారం వీరులపా డు మండలంలో కొనసాగింది. జి కొం డూరు మండలం దుగ్గిరాలపాడులో రాత్రి బస చేసిన షర్మిల బుధవారం ఉదయం వీరులపాడు మండలం జి మాధవరం గ్రామంలోకి ప్రవేశించారు. ఈ మండల నాయకులు సరిహద్దుల వరకూ వెళ్లి షర్మిలను ఆహ్వానించకపోవడంతో పాదయాత్ర పేలవంగా జరిగింది. మాధవరంలో కూడా ఆమె చేయి ఊపుకుంటూ పాదయాత్ర కొనసాగించారేతప్ప నోరువిప్పి మాట్లాడలేదు. మధ్యలో తిమ్మాపురం గ్రామ ప్రజలు తమకు మంచినీటి సౌకర్యం కల్పించాలని కోరగా ‘రాజన్న రాజ్యం వస్తుంది మీకోరికలు తీరుతాయి’.. అన్న ఒక్కమాట మాత్రం మాట్లాడారు. పరుగులాంటి నడకకే ప్రాముఖ్యం ఇచ్చారు తప్ప ప్రజల్లోకి చొరవగా దూసుకువెళ్లే ప్రయత్నం చేయలేదు. ఒకవైపు పోలీసులు, మరోవైపు ఆమె భద్రతా సిబ్బంది సామాన్యులను షర్మిల దరిచేరకుండా అడ్డుకున్నారు. ఉదయం 11గంటలకే యాత్ర ముగించుకొని పెద్దాపురం ఊరిబయట ఏర్పాటు చేసిన టెంట్‌లోకి ఆమె వెళ్లిపోయారు. తిరిగి సాయంత్రం 4గంటల తరువాత పాదయాత్ర ప్రారంభించిన షర్మిల పెద్దాపురం సెంటర్‌లో నాయకులు మాట్లాడే ఏర్పాట్లు చేసినప్పటికీ ఆగకుండా జయంతి వెళ్లారు. అక్కడక్కడ ఆగి మాట్లాడతారని ప్రజలు ఎదురుచూసినప్పటికీ నిరాశే మిగిలింది. సాయంత్రం 5.30గంటల సమయంలో జయంతి కాలనీకి ఆమె చేరుకున్నారు. బుధవారం ఉదయం వీరులపాడు మండలంలో ప్రవేశించినప్పటి నుండి సాయంత్రం వరకూ ఆమె నోటి నుండి ఒకే ఒక్క మాట రావడం, వేగంగా నడిచి వెళ్లడం కార్యకర్తల్లో నిరుత్సాహాన్ని కలిగించింది.

శ్రీ లక్ష్మీపతి స్వామివారి కల్యాణ బ్రహ్మోత్సవాలకు ఏర్పాట్లు
కూచిపూడి, ఏప్రిల్ 17: ముక్కోటి దేవతలు కొలిచే శ్రీ లక్ష్మీపతి స్వామివారి కల్యాణ బ్రహ్మోత్సవాలకు పెదముత్తేవి గ్రామం సర్వాంగ సుందరంగా రూపుదిద్దుకుంది. పంచ లక్ష్మీనారాయణ క్షేత్రాలలో ఒకటిగా పేరొందిన పెదముత్తేవిలో శ్రీ లక్ష్మీపతిస్వామి స్వయంభూగా వెలసినట్లు పెద్దలు చెబుతారు. ప్రముఖ ఆధ్యాత్మిక కేంద్రంగా విరాజిల్లుతున్న పెదముత్తేవి గ్రామంలో ముత్తీవి వంశీయుల ఆరాధ్య దేవుడైన శ్రీ లక్ష్మీపతిస్వామి శంఖు, చక్ర, గద, అభయ హస్తాలతో శ్రీ లక్ష్మీదేవితో ఈ క్షేత్రానికి వేంచేశారని అంటారు. ముముక్షుజన మహాపీఠాధిపతులు, ఆలయ వ్యవస్థాపక ధర్మకర్త ముత్తీవి సీతారాం గురుదేవులు పర్యవేక్షణలో ఈ నెల 19న శ్రీరామనవమి మహోత్సవాలను, హనుమంత వాహనోత్సవాన్ని నిర్వహిస్తున్నట్లు ఆలయ పర్యవేక్షకులు తుర్లపాటి ఆనంద్ బుధవారం ఒక ప్రకటనలో తెలిపారు. 21న స్వామివారిని పెండ్లి కుమారునిగా, అమ్మవారిని పెండ్లి కుమార్తెగా అలంకరిస్తారు. ఈసందర్భంగా ముత్తీవి సీతారాం గురుదేవుల అనుగ్రహ భాషణ, విశ్వక్సేన పూజ, పుణ్యాహవచనం, అఖండ దీపారాధన, దీక్షా శ్రీకారం, కంకణధారణ, మృత్సంగ్రహణం, అంకురారోపణ, హోమాలు, భజన, ధ్వజారోహణ కార్యక్రమాలు నిర్వహిస్తున్నట్లు తెలిపారు. ఈ కల్యాణ బ్రహ్మోత్సవాల్లో పాల్గొని స్వామివారి కృపకు, గురుదేవుల ఆశీస్సులను అందుకోవాలని భక్తులను ఆనంద్ కోరారు.

ఎండవేడిమికి అల్లాడుతున్న జనం
కూచిపూడి, ఏప్రిల్ 17: వాతావరణంలో తేమశాతం ఒక్కసారిగా తగ్గిపోవటంతో ఉష్ణోగ్రతలు పెరిగాయి. మంగళవారం పడిన చినుకుల కారణంగా వేడిగాలులు వీచటంతో ప్రజలు తీవ్ర అస్వస్థతకు గురయ్యారు. ప్రైవేటు వైద్యశాలలు రోగులతో కిటకిటలాడాయి. కోళ్ళ పరిశ్రమ తీవ్ర ఒడిదుడుకులకు లోనైంది. బుధవారం 45.1 సెల్సియస్ (108.2 ఫారన్ హీట్) ఉష్ణోగ్రత నమోదైంది. గత 15రోజులుగా కేవలం 98, 96 ఫారన్ హీట్‌కే పరిమితమైన ఉష్ణోగ్రత ఒక్కసారిగా 108కి చేరటానికి వాతావరణంలో తేమ 23శాతానికి తగ్గటమే కారణమని వాతావరణ శాస్తవ్రేత్తలు పేర్కొంటున్నారు. ఉష్ణోగ్రతలతో పాటు వందలాది లేయర్ కోళ్ళు మృత్యువాతపడ్డాయి. అలాగే బ్రాయిలర్ కోళ్ళు కూడా అధిక సంఖ్యలో మృత్యువాతపడినా పెంపకందారులు బ్యాంక్ రుణాల కారణంగా చనిపోయిన కోళ్ళను గుట్టుచప్పుడు కాకుండా పారవేస్తున్నారు. పలువురు పెంపకందారులు ముందుజాగ్రత్త చర్యలు చేపట్టటంతో నష్టం నుండి బయటపడ్డారు.

జిల్లాలో పోలీసుల విస్తృత దాడులు
మచిలీపట్నం (కోనేరుసెంటర్), ఏప్రిల్ 17: జిల్లా పోలీసు సూపరింటెండెంట్ జె ప్రభాకరరావు ఆదేశం మేరకు బుధవారం జిల్లాలో పోలీసులు విస్తృత దాడులు నిర్వహించారు. బందరు డివిజన్‌లో దాడులు నిర్వహించి పత్రాలు సరిగ్గా లేని 38మంది వాహనదారులకు రూ.6,550 జరిమానా విధించారు.
గుడివాడ సబ్ డివిజన్ పరిధిలో 97 మంది వాహనదారులకు రూ.19,200 జరిమానా విధించారు. గుడివాడ తాలూకా పిఎస్ పరిధిలో పేకాట ఆడుతున్న 16మందిని అదుపులోకి తీసుకుని రూ.6,160ను స్వాధీనం చేసుకున్నారు. నందిగామ సబ్ డివిజన్ పరిధిలో 31 వాహనాలను తనిఖీ చేసి 2,370 జరిమానా విధించారు. నూజివీడు సబ్ డివిజన్‌లో 24మంది వాహనదారులకు రూ.2,950, అవనిగడ్డ డివిజన్‌లో 27 వాహనాలను తనిఖీ చేసి రూ.4,750 జరిమానా విధించారు.

సకల సద్గుణ సంపన్నుడు
శ్రీరామచంద్రమూర్తి
మచిలీపట్నం (కల్చరల్), ఏప్రిల్ 17: శ్రీరాముడు సకల సద్గుణ సంపన్నుడని నారద మహర్షి చెప్పాడని ప్రముఖ సాహితీవేత్త మద్దూరి రామమోహనరావు అన్నారు. స్థానిక బచ్చుపేట ప్రసన్నాంజనేయ స్వామి దేవస్థానంలో బుధవారం ఆధ్యాత్మిక ప్రవచనం చేశారు. రామాయణంలోని పాత్రల విశిష్టతను తెలుపుతూ నారద, వాల్మీకి మహర్షుల సంభాషణను వివరించారు. గుణశీలుడు, వీర్యవంతుడు, ధర్మజ్ఞుడు, సర్వభూతముల హితవును కోరేవాడు, మొదలగు లక్షణాలను కలిగి ఉన్నవారు ఎవరైనా ఉన్నారా అని వాల్మీకి మహర్షి నారదుని అడుగగా అట్టివాడు శ్రీరామచంద్రుడని నారదుడు తెలిపాడు. సోదాహరణంగా నారదుడు తెలిపిన విధానాన్ని రామమోహనరావు వివరించారు. కార్యక్రమంలో ఆలయ వ్యవస్థాపకులు డా. ధన్వంతరి ఆచార్య, పంచాయతిరాజ్ విశ్రాంత డెప్యూటీ కమిషనర్ ఎంఎస్ శాస్ర్తీ, ముక్తేవి రామకృష్ణ, వి పూర్ణచంద్రరావు, తదితరులు పాల్గొన్నారు.

రిజర్వేషన్లు కల్పించాలని కాపుల ధర్నా
అవనిగడ్డ, ఏప్రిల్ 17: కాపులకు రిజర్వేషన్‌లు అమలు చేయాలని కోరుతూ స్థానిక రాయల్ వెల్ఫేర్ అసోసియేషన్ ఆధ్వర్యంలో సభ్యులు బుధవారం అవనిగడ్డ, నాగాయలంక తహశీల్దార్ కార్యాలయాల వద్ద ధర్నా నిర్వహించారు. జనాభా దామాషా ప్రకారం కాపులకు రిజర్వేషన్‌లు అమలు చేయాలని, 1910-66 మధ్యకాలంలో అమలులో వుండిన కాపు రిజర్వేషన్‌లు పునరుద్ధరించాలి డిమాండ్ చేశారు. అంతకుముందు ప్రధాన వీధుల్లో అసోసియేషన్ సభ్యులు ప్రదర్శనలు నిర్వహించారు. ఈసందర్భంగా తహశీల్దార్‌లకు వినతిపత్రాలు అందజేశారు. అవనిగడ్డలో జరిగిన ధర్నాకు అప్పికట్ల సోములు, నాగాయలంకలో తోట శ్రీను, బీసాబత్తిన ప్రసాద్, రేబాక చంటి నాయకత్వం వహించారు.

కాపులను బిసి జాబితాలో చేర్చాలి
మచిలీపట్నం (కోనేరుసెంటర్), ఏప్రిల్ 17: రాష్ట్రంలో నిరుపేదలు అత్యధికంగా ఉన్న కాపులను బిసిలుగా గుర్తించి వారి అభివృద్ధికి ప్రభుత్వం కృషి చేయాలని ఆంధ్రప్రదేశ్ కాపునాడు కృష్ణా జిల్లా శాఖ ప్రభుత్వానికి విజ్ఞప్తి చేసింది.