విజయవాణి మూవీ మేకర్స్ పతాకంపై గూడూర్ గోపాల్ శెట్టి సమర్పణలో నిర్మిస్తున్న తొలి చిత్రానికి సంబంధించిన షూటింగ్ హైదరాబాద్ అన్నపూర్ణ స్టూడియోలో ప్రారంభమైంది. అనూజ్ సాల్వార్ కథానాయకుడిగా నటిస్తున్న ఈ చిత్రాన్ని దిన దర్శకత్వంలో కె.వి.రామిరెడ్డి, సుధీర్ వర్మ నిర్మిస్తున్నారు. ప్రారంభోత్సవ సన్నివేశంపై మంత్రి టి.జి.వెంకటేష్ క్లాప్ ఇవ్వగా, వేణు కెమెరా స్విచాన్ చేశారు. తొలి సన్నివేశానికి ఆర్.పి.పట్నాయక్ గౌరవ దర్శకత్వం వహించారు. ఈ సందర్భంగా ఏర్పాటుచేసిన పాత్రికేయుల సమావేశంలో నిర్మాత కె.వి.రామిరెడ్డి మాట్లాడుతూ- ఓ మంచి కథతో దర్శకుడు రావడంతో, యువతకు సందేశాత్మకంగా ఉండడంతో, సోషల్ రెస్పాన్స్ ప్రధానాంశంగా ఈ చిత్రాన్ని నిర్మిస్తున్నామని తెలిపారు. డిఫరెంట్ లవ్ స్టోరీగా నిర్మిస్తున్న ఈ చిత్రం సస్పెన్స్, లవ్ థ్రిల్లర్‌గా ఉంటుందని, నిజమైన ప్రేమ ఎలా ఉంటుంది, యువత నిజమైన ప్రేమలో ఉన్నారా? లేదా? అనే అంశాన్ని ఈ చిత్రం ద్వారా చర్చిస్తున్నామని, జూన్ 15నుండి రెగ్యులర్ షూటింగ్ ప్రారంభించి సింగిల్ షెడ్యూల్‌లో 35 రోజుల్లో చిత్రాన్ని పూర్తిచేస్తామని, పాటల చిత్రీకరణకు మలేసియా, బ్యాంకాక్ వెళ్ళనున్నామని చిత్ర దర్శకుడు దిన తెలిపారు. కార్యక్రమంలో సుధీర్ వర్మ, షఫి, అనూజ్ సాల్వార్, సాహిత్య ప్రకాష్ తదితరులు పాల్గొన్నారు. ఈ చిత్రానికి సంగీతం:రఘురామ్, ఫైట్స్:రామ్-లక్ష్మణ్, రచనా సహకారం:సాహిత్య ప్రకాష్, ప్రొడక్షన్ ఎగ్జిక్యూటివ్ ఎన్.శ్రీనివాసరావు, ఎగ్జిక్యూటివ్ ప్రొడ్యూసర్:గుంపుల రవికుమార్ రాజు, నిర్మాతలు:కె.వి.రామిరెడ్డి, సుధీర్ వర్మ, కథ, మాటలు, స్క్రీన్‌ప్లే, దర్శకత్వం:దిన.