భాగస్వామ్యం కోసం బయోకాన్ వేట

న్యూఢిల్లీ, జూన్ 5: సోరియాసిస్ నివారణకు తయారు చేసిన ‘అల్జుమాబ్’ బయోలాజికల్ మందు అభివృద్ధి, మార్కెటింగ్ భాగస్వామి కోసం వెదుకుతున్నట్లు బయోటెక్నాలజీ సంస్థ బయోకాన్ బుధవారం తెలియచేసింది. ఇంతవరకూ లేని వైవిధ్య భరితమైన ఈ మందు సోరియాసిస్ నివారణకు ప్రపంచవ్యాప్తంగా అందరికీ ఉపయోగపడుతుందని ఆ కంపెనీ చైర్మన్, ఎండి కిరణ్ మజుందార్ షా తెలిపారు. ఈ ఏడాది జనవరిలో ఈ మందు‘ఇథోలిజుమాబ్’(బ్రాండ్ నేమ్ అల్జుమాబ్) అమ్మకానికి డ్రగ్ కంట్రోలర్ జనరల్ ఆఫ్ ఇండియా నుంచి అనుమతి లభించిందని ఆమె వెల్లడించారు. ప్రస్తుతం ఈ మందును మనదేశం విడుదలకు సిద్ధమవుతున్నామని, భాగస్వామి లభించిన తర్వాత ప్రపంచ దేశాలలో విడుదల చేస్తామన్నారు. 2016 నాటికి 8 బిలియన్ డాలర్ల డిమాండ్ ఉంటుందని అంచనా వేస్తున్నట్లు ఆమె తెలిపారు.