అడుగడుగునా జల్లెడ

ఆత్మకూరు, జూన్ 13: చట్టాన్ని ఎవరు అతిక్రమించిన చర్యలు తప్పవని ఆత్మకూరు సిఐ కిషోర్‌కుమార్ అన్నారు. ఆత్మకూరు పోలీస్‌స్టేషన్‌లో గురువారం ఏర్పాటుచేసిన విలేఖరుల సమావేశంలో ఆయన మాట్లాడుతూ రాజకీయ జెఎసి తలపెట్టిన చలో అసెంబ్లీ ముట్టడికి ప్రభుత్వ అనుమతి లేనందున గ్రామాలలోని విద్యార్థులు, యువకులు, టిఆర్‌ఎస్, బిజెపి, టి-జెఎసి, విద్యార్థి జెఎసి నాయకులు, కార్యకర్తలు హైదరాబాద్‌కు తరలివెళ్లరాదని అన్నారు. ఇందుకోసం వాహనాలు సమకుర్చినా, తరలివెళ్లినా నేరంగా పరిగణించి కఠినచర్యలు తీసుకుంటామని హెచ్చరించారు. అందులో భాగంగా బైండోవర్లు చేస్తున్నట్లు తెలిపారు. విద్యార్థులు, యువకులు ప్రభుత్వ నిబంధనలకు విరుద్ధంగా ప్రవర్తిస్తే కేసులు నమోదు చేస్తామని, దీంతో వారి భవిష్యత్తు ప్రశ్నార్థకంగా మారుతుందని తెలిపారు. ఇది గమనించి ప్రతిఒక్కరు పోలీసులకు సహకరించాలని కోరారు. మండలంలోని పులుకుర్తి, కొగిలివాయి, ముస్త్యాలపల్లి, ఓగ్లాపూర్, దామెర గ్రామాలకు చెందిన టిఆర్‌ఎస్ నాయకులు దామెరుప్పుల శంకర్, దాడి మల్లయ్య, పలుకల విజేందర్‌రెడ్డిలతోపాటు 36మందిని తహశీల్దార్ కారం యాదగిరి ముందు హాజరుపరచి బైండోవర్ చేసినట్లు తెలిపారు. అనంతరం ఎస్సై క్రాంతికుమార్ మాట్లాడుతూ ప్రభుత్వ నిబంధనలు పాటించకుండా పెద్దసంఖ్యలో అసెంబ్లీ ముట్టడికి తరలివెళ్లాలని చూస్తే ఎవరిని వదిలిపెట్టేది లేదని హెచ్చరించారు. ఈ సమావేశంలో పోలీస్ సిబ్బంది పాల్గొన్నారు.
సంగెం మండలంలో...
సంగెం: చలో అసెంబ్లీ కార్యక్రమాన్ని దృష్టిలో పెట్టుకుని సంగెం మండలంలోని వివిధ గ్రామాలకు చెందిన టిఆర్‌ఎస్ పార్టీ నాయకులను 31మందిని సంగెం పోలీసులు అరెస్టు చేశారు. టిఆర్‌ఎస్ పార్టీ మండల నాయకుడు రౌతు లక్ష్మయ్యతోపాటు మరో 30మందిని అరెస్టుచేసి తహశీల్దార్ బిక్షం ముందు బైండోవర్ చేసినట్లు పేర్కొన్నారు.
మంగపేటలో...
మంగపేట: మండల కేంద్రంలోని తెలంగాణ సెంటర్ వద్ద గురువారం సమావేశమైన టిఆర్‌ఎస్ నాయకులను మంగపేట ఎస్సై విజ్ఞాన్‌రావు అరెస్టుచేసి స్థానిక తహశీల్దార్ ఎదుట బైండోవర్ చేశారు. ఎస్సై వివరాల ప్రకారం.. టిఆర్‌ఎస్ గ్రామశాఖ అధ్యక్షుడు కొమరగిరి కేశవరావు ఆధ్వర్యంలో 32 మంది టిఆర్‌ఎస్ పార్టీ నాయకులు, జెఎసి నాయకులు సమావేశమై ‘చలో అసెంబ్లీ’ కార్యక్రమానికి తరలివెళ్లేందుకు సన్నద్ధం అవుతుండగా ముందు జాగ్రత్త చర్యల్లో భాగంగా వీరిని అరెస్టుచేసి తహశీల్దార్ కనకరాజు ఎదుట బైండోవర్ చేసినట్లు ఎస్సై వివరించారు.
జఫర్‌గఢ్ మండలంలో...
జఫర్‌గడ్: రాజకీయ జెఎసి తలపెట్టిన అసెంబ్లీ ముట్టడి కార్యక్రమానికి టిఆర్‌ఎస్ నాయకులు, కార్యకర్తలు తరలివెళ్లకుండా జఫర్‌గడ్ మండలంలో రెండవరోజు అరెస్టుల పరంపర కొనసాగుతోంది. గురువారం మండలంలోని ఓగ్లాపూర్, తీగారం, తమ్మెడపెల్లి (జి), హిమ్మత్‌నగర్ గ్రామాలకు చెందిన 34మంది టిఆర్‌ఎస్ నాయకులను కార్యకర్తలను తెల్లవారుజామునే అరెస్టుచేసి తహశీల్దార్ ముందు బైండోవర్ చేశారు.
నర్సంపేటలో...
నర్సంపేట: చలో అసెంబ్లీ కార్యక్రమం నేపథ్యంలో నర్సంపేట పట్టణంలో ఏడుగురు జెఎసి నాయకులను పోలీసులు తహశీల్దార్ రజనీరెడ్డి ఎదుట గురువారం బైండోవర్ చేశారు. బైండోవర్ అయిన వారిలో జెఎసి పట్టణ అధ్యక్షుడు తౌటిరెడ్డి క్రిష్ణారెడ్డి, కోకన్వీనర్లు నూకాల క్రిష్ణమూర్తి, పాక చక్రపాణి, కుసుమ ప్రభాకర్, నూకాల పద్మ, గాదె శైలజారెడ్డి, రామగోని వెంకటేశ్వర్లులు ఉన్నారు.
ఏటూరునాగారం మండలంలో...
ఏటూరునాగారం: మండలంలోని వివిధ విప్లవ గ్రూపులకు చెందిన మాజీ నక్సలైట్లను గురువారం బైండోవర్ చేసినట్లు ఎస్సై సంజీవరావు తెలిపారు. మండలంలోని వివిధ గ్రామాలకు చెందిన మాజీలను ‘చలో అసెంబ్లీ’ కార్యక్రమానికి వెళ్లకుండా ఉండేందుకు ముందస్తు చర్యల్లో భాగంగా బైండోవర్ చేసినట్లు పేర్కొన్నారు. భద్రతాచర్యల్లో భాగంగా ముందస్తుగా వారిని బైండోవర్ చేశామని అన్నారు.
మహబూబాబాద్‌లో...
మహబూబాబాద్: తెలంగాణ రాష్ట్ర ప్రకటన చేయాలనే డిమాండ్‌తో టి-జెఎసి ఇచ్చిన పిలుపుమేరకు చలో అసెంబ్లీ ముట్టడి కార్యక్రమానికి తెలంగాణ వాదులు వెళ్లకుండా పోలీసులు తమ నిఘాను గురువారం కూడా కొనసాగించారు. మహబూబాబాద్ రైల్వే మార్గం ద్వారా వెళ్లే వారిని అడ్డుకునేందుకు రైల్వే స్టేషన్‌లోనే ప్రత్యేక పోలీసు పికెట్ ఏర్పాటు చేసి, రైళ్లల్లో వెళ్లే అనుమానితులను అదుపులోకి తీసుకున్నారు. కాగా, హైదరాబాద్ ఆందోళనను విజయవంతం చేయడానికి వాహనంలో తరలివెళ్తున్న మహబూబాబాద్ సిపిఐ పట్టణ కార్యదర్శి బి. అజయ్ సారధి, మరి కొందరు నాయకులను పోలీసులు నిర్బంధించి అరెస్టు చేశారు. ఈ సందర్భంగా సిపిఐ నాయకులు మాట్లాడుతూ చలో అసెంబ్లీకి తరలివెళ్తున్న నాయకులను అక్రమంగా నిర్భందించి అరెస్టు చేయడం అప్రజాస్వామికం అన్నారు. ఇప్పటికైనా ప్రభుత్వం చలో అసెంబ్లీ ముట్టడి కార్యక్రమానికి అనుమతి ఇవ్వాలని ప్రభుత్వాన్ని హెచ్చరించారు. తెలంగాణ రాష్ట్ర ఏర్పాటుకు కాంగ్రెస్ ప్రభుత్వం పార్లమెంట్‌లో బిల్లు ప్రవేశపెట్టాలని డిమాండ్ చేశారు. ప్రత్యేక తెలంగాణ రాష్ట్రం ప్రకటించేంత వరకు సిపిఐ రాజీలేని పోరాటాలు చేస్తుందని హెచ్చరించారు. పోలీసులు అరెస్టు చేసిన వారిలో సిపిఐ మండల సహాయ కార్యదర్శి పెరుగుకుమార్, నాయకులు జన్నిభద్రం, ఎఐవైఎఫ్ నాయకుడు వీరవెల్లిరవి ఉన్నారు.
కురవిలో...
కురవి: తెలంగాణ ఉద్యమం ఆరు దశాబ్దాలుగా జరుగుతుందని, బైండోవర్‌లతో తెలంగాణ ఉద్యమాన్ని ఆపలేరని తెలంగాణ రాష్ట్ర సమితి రాష్ట్ర నాయకులు నూకల నరేష్ రెడ్డి అన్నారు. రాష్ట్ర రాజకీయ ఐకాస పిలుపు మేరకు ఈనెల 14న నిర్వహించే చలో అసెంబ్లీ కార్యక్రమాన్ని జయప్రదం చేస్తామని స్పష్టం చేశారు. గురువారం కురవి మండల కేంద్రంలోని స్థానిక తహశీల్దార్ కార్యలయంలో డిప్యూటి తహశీల్దార్ ఎదుట నూకల నరేష్‌రెడ్డితో పాటు 32మంది మరిపెడ మండల తెలంగాణ వాదులు బైండోవర్ అయ్యారు. ఈ సందర్భంగా ఆయన మాట్లాడుతూ శాంతియుతంగా చేయతలపెట్టిన చలో అసెంబ్లీకి ప్రభుత్వం అనుమతిని ఇచ్చేదిపోయి హింసాత్మకంగా మార్చే ఆలోచనలో ఉందని ధ్వజమెత్తారు. కిరణ్ కుమార్‌రెడ్డి ప్రజలు ఎన్నుకున్న ముఖ్యమంత్రి కాదని, కేవలం అధిష్ఠానం సీల్డ్ కవర్ ముఖ్యమంత్రి అని ఎద్దేవా చేశారు. రానున్న రోజుల్లో తెలంగాణ నాలుగున్నర కోట్ల ప్రజలు కాంగ్రెస్, టిడిపి, వైఎస్సార్ సిపి పార్టీలకు గుణపాఠం చెబుతారని హెచ్చరించారు.