అతిగా ఆలోచిస్తే అవస్థలే..

సౌమ్యలో ఆలోచనలు పరిపరి విధాలుగా పో తున్నాయి. కాస్త రిలాక్సయి మళ్లీ ఆలోచించినా తృప్తి లభించలేదు. మనసులో కలిగిన ఒకే ఒక పాజిటివ్ ఆలోచనతో తన సమస్యకు పరిష్కారం లభించాక కుదుటపడింది.
విక్రాంత్ ఆలోచనలు తీవ్రస్థాయిలో పరుగెడుతున్నాయి. అనుకున్నదానికంటే ఎక్కువ విజయం సాధించాలనే ఆరాటంలో జరిగే నష్టం కూడా అతనికి తెలుసు. చివరకు అనంతమైన ఆలోచనలే అతనిని కిరాతకుడిగా మార్చేశాయి.
మంచి ఆలోచన ఓ విజయాన్ని అందిస్తే చెడ్డ ఆలోచన ఓ విధ్వంసానే్న సృష్టిస్తుంది. ఓ వేడి టీ తాగితే ఆలోచనలు తన్నుకొస్తాయంటారు కొం దరు. ఓ దమ్ము లాగితే బుర్ర పనిచేసి మంచి ఆలోచనలు వస్తాయని నమ్ముతారు మరికొందరు. ఆలోచనలు నిరంతరం పుట్టుకొస్తూనే వుంటాయి. వాటిలో మంచేదో, చెడేదో అనిపించేంతవరకూ ఆలోచించాల్సిందే. సౌమ్య ఓ మంచి ఆలోచన దగ్గర ఆగిపోవటం వల్ల విజయాన్ని సొంతం చేసుకుంది. విక్రాంత్ ఆలోచనా స్థాయి పెరగటం వలన విధ్వంసం చోటు జరిగింది. మానవ మస్తిష్కం నిత్యం ఆలోచనల మధ్య కొట్టుమిట్టాడుతూ వుంటుంది. విశ్రాంతి తీసుకునే సమయంలోనూ మనసు ఆలోచించటం వల్ల కలలు మనుషులను భయభ్రాంతులకు గురిచేస్తుంటాయి. ఏ మాత్రం తక్కువగా ఆలోచించినా ‘కాస్త బుర్ర పెట్టొచ్చుకదా!’ అని, ఎక్కువగా ఆలోచన చేస్తే ‘అతిగా ఆలోచించబట్టే’ అన్న నిందలూ తప్పవు. సాధారణ ఆలోచనలతో పనులు నెమ్మదించినా జీవితం సాఫీగా సాగిపోతుంది. ఆలోచనలు తీవ్రమైతే వాటికి తగ్గట్టుగా పరిగెత్తే సామర్థ్యం ఉందో? లేదో? చూసుకోవాలి. రోబోను సృష్టించడంలో సైంటిస్ట్ ఆలోచన మేధాశక్తికి తార్కణమైతే, అదే సైంటిస్ట్ రోబోకి ఆలోచనా శక్తిని కల్పించాలనుకోవడం తీవ్రస్థాయి ఆలోచనగా కనిపిస్తోంది. ఏది ఏమైనా ఆలోచన చేసేటపుడు లక్ష్యాన్ని, తీవ్రతను పరిగణనలోకి తీసుకోవడం ఉత్తమం. మంచి ఆలోచనలతోనే మానవ మనుగడ సాఫీగా సాగుతుంది. కనుక- ఆలోచించేటపుడు జరభద్రం సుమా!