అవీ.. ఇవీ.. అన్నీ..
----------------
సీతమ్మ వారు రావణ సంహారానంతరం అగ్నిపరీక్షకు గురైనదిగా భావింపబడుతున్న- నువారా ఇలియా కొండపై ఆమెకు గుడి కట్టించడానికి- మధ్యప్రదేశ్ ముఖ్యమంత్రి చౌహాన్ పూనుకోడాన్ని శ్రీలంకలోని ‘రావణశక్తి’ అనే బౌద్ధ తీవ్రవాద సంస్థ కన్వీనర్, ప్రఖ్యాత బౌద్ధ సన్యాసి శ్రీ ఇత్తేకండీ సద్థా తిస్సాథిరో తీవ్రంగా ఖండించాడు. ఆ కొండపై సీతాలయం నిర్మిస్తే ముందు ఇండియా- ఆ గుడి ముందు రావణబ్రహ్మ వి గ్రహ ప్రతిష్ఠకు దోహదించాలని ‘రావణశక్తి’ ప్రకటించింది. సీతమ్మ గడిపిన అశోకవనం, ఈ ‘పర్వత నగరం’, ‘కాంతినిలయం’ (నువారా ఇలియా)లను పవిత్ర తీర్థయాత్రాస్థలంగా భావించి హిందువులు వస్తూంటారు. ‘‘సీతమ్మ వాళ్లకి దేవుడైతే, రావణబ్రహ్మ మాకు దేవుడు’’ అన్నాడీ బౌద్ధ సన్యాసి. శ్రీలంకపై విదేశీ దండయాత్రను తొలిసారి ప్రతిఘటించిన మహనీయుడు, సీతమ్మను అపహరించినా ఆమెను తాకని మహావీరుడు రావణబ్రహ్మను- సింహళ దేశం పరమ పూజ్యుడిగా ఆరాధిస్తుంది. ఇక్కడి బౌద్ధ ఆలయాల్లో గణేశుడు, హనుమంతుడు, విష్ణుమూర్తి విగ్రహాలున్న ఉప దేవాలయాలు చాలానే వున్నాయి.
‘‘శ్రీరాముడు రావణ సార్వభౌముడ్ని ఓడించడానికి ఎనిమిది సంవత్సరాల కాలం పట్టింది. అటువంటి మహవీరుణ్ణీ, మహాపురుషుడ్నీ- శ్రీలంకలో జాతీయతా భావాన్ని పెంపొందించే ఉద్దేశంతోనే- మేము ప్రచారం చేస్తున్నాం. రావణ చక్రవర్తిని ఎవ్వరు కించపరిచినా సహించం’’ అని ఆ బౌద్ధమత తీవ్రవాద సంస్థ దయానంద ట్రస్టుకి వార్నింగ్ ఇచ్చింది. అంతేనా..? శ్రీలంక గవర్నమెంటు రావణబ్రహ్మ వైభవాన్ని గుర్తించి, ఆ వీరవర్యుడిని కీర్తించాలని కూడా శ్రీ సద్ధాతిస్సాథిరో వాదన!