పోలీస్ స్టేషన్ల కంప్యూటరీకరణ

హైదరాబాద్, జూన్ 23: పోలీస్ స్టేషన్లలో కమ్యూనికేషన్ వ్యవస్థను పటిష్టం చేయడానికి దాదాపు రూ. 100 కోట్లు ఖర్చు చేయడానికి పోలీస్ శాఖ వేగవంతం చేస్తోంది. రాష్ట్ర వ్యాప్తంగా 2200 పోలీస్ స్టేషన్లు పని చేస్తున్నాయి. రాష్ట్రంలో నేటికి పోలీస్ స్టేషన్లలోకంప్యూటర్లు లేని పరిస్థితి నెలకొంది. మారుమూల ప్రాంతాల్లో పోలీస్ స్టేషన్ల పాలనా పనితీరు ఇప్పటికీ అస్తవ్యస్థంగా ఉందని సంబంధిత అధికారులు చెప్పడం ఆశ్చర్యం. మారుతున్న పరిస్థితులకు అనుగుణంగా పోలీస్ స్టేష్టన్లలో ఆధునిక కమ్యూనికేషన్ విధానాన్ని తీసుకురావడానికి పోలీస్ ఉన్నతాధికారులు సన్నాహాలు చేస్తున్నారు. కొత్తగా చేపడుతున్న కంప్యూటర్ల వినియోగంతో క్షణాల్లో సమాచారం తెలుసుకోవచ్చునని అధికారులు గుర్తు చేస్తున్నారు. ఇక నేరుగా రాష్ట్రంలో ఎక్కడైనా పోలీస్ స్టేషన్ పరిధిలో చిన్న సంఘటన జరిగినా అందుకు సంబంధించిన సమాచారం డేటా నెట్‌వర్కతో తెలుసుకోవచ్చును. శ్రీకాకులం జిల్లా చింతపల్లి, కరీంనగర్ బీమదేవరపల్లి, అనంతపురం జిల్లా రొద్దం వంటి పోలీస్ స్టేషన్‌లో పని చేసే విధానం గురించి కంప్యూటలో చూడవచ్చునని అధికారులు చెబుతున్నారు. హైదరాబాద్‌తో పాటు విజయవాడ, విశాఖపట్నం, తిరుపతి, వరంగల్ మున్సిపల్ కార్పొరేషన్లలో పోలీస్ పనితీరును ఎప్పటికప్పుడు సమీక్షించుకోవచ్చు. బాధితుల ఫిర్యాదులు పోలీసులు తీసుకోలేదన్న విమర్శలు ఉన్నాయి. అలాగే నెలలు, ఏళ్ళు గడిచినా కేసుల అంశం తేల్చకుండా నాన్చుతున్నారన్న ఆరోపణలు బలంగా ఉన్నాయి. పోలీసుల పనితీరు, ప్రజలకు సంబంధించిన శాంతి భద్రతల విషయాలతో పాటు పోలీసులపై వస్తున్న ఫిర్యాదులపై కంప్యూటర్ల విధానంతో నూతన సంస్కరణలు చేపట్టవచ్చునని అధికారులు ఆశాభావం వ్యక్తం చేస్తున్నారు. రాష్ట్రంలో ఇప్పటికే 48 శాతం పోలీస్ స్టేషన్లలో కంప్యూటర్ విధానం పూర్తి చేశామని, మరో ఆరునెలల్లో అన్ని పోలీస్ స్టేష్టన్లలో కంప్యూటర్ల డేటాతో అనుసంధానం చేసే ప్రక్రియ విధానాన్ని పూర్తి చేస్తామని రాష్ట్ర డిజిపి దినేష్‌రెడ్డి తెలిపారు. మాజీ సైనికోద్యోగులకు రైల్వేలో ప్రత్యేక నియామకాలు ఆంధ్రభూమి బ్యూరో హైదరాబాద్, జూన్ 23: దక్షిణ మధ్య రైల్వే పరిధిలో మాజీ సైనికోద్యోగుల కోసం ప్రత్యేక నియామకాన్ని చేపడుతోంది. గ్రూప్ డి పోస్టుల్లో మూడు కేటగిరిలు ట్రాక్‌మెన్, హెల్పర్, పాయింట్‌మెన్ ఉద్యోగాలను భర్తీ చేసేందుకు చర్యలు తీసుకుంటోంది. ఈ విషయాన్ని రంగారెడ్డి జిల్లా సైనిక సంక్షేమ కార్యాలయం తెలిపింది. ఈ మూడు కేటగిరిల్లో 311 పోస్టులను రైల్వే భర్తీ చేయనుంది. కనీసం 15 ఏళ్లపాటు మిలటరీలో పని చేసి ఉండాలి. ఎస్‌సి, ఎస్‌టి, ఒబిసిలకు వయోపరిమితి తదితర అంశాల్లో నిబంధనలు వర్తిస్తాయి. జూలై 15లోగా ద.మ.రైల్వే రిక్రూట్‌మెంట్ సెల్‌లో వివరాలు తెలుసుకోవచ్చని సైనిక సంక్షేమ కార్యాలయం తెలిపింది. ప్రమాదంలో అగ్నిమాపక శాఖ గాలికి పోయిన ఉప సంఘం సిఫార్సులు కానరాని స్థాయా సంఘం నిర్దేశాలు 89 నియోజకవర్గాల్లో ఫైర్‌స్టేషనే్ల లేవు ఆంధ్రభూమి బ్యూరో హైదరాబాద్, జూన్ 23: అరకొర బడ్జెట్, తగిన ప్రాధాన్యత ఇవ్వకుండా ప్రభుత్వం చేస్తున్న నిర్లక్ష్యం కారణంగా విపత్తులు, అగ్నిప్రమాదాల సమయంలో ఆదుకోవాల్సిన అగ్నిమాపక శాఖ ప్రమాదపుటంచుల్లో ఉంది. అవసరమైనప్పుడు ఆపద నుంచి ప్రజల్ని, ప్రజాఆస్తులను కాపాడాల్సిన ఈ శాఖ క్రమేణా నిస్తేజంగా మారుతోంది. 2007 నుంచి 2012 వరకు ఇప్పుడు ఉన్న ఫైర్ స్టేషన్లకు అదనంగా ఒక్క ఫైర్‌స్టేషన్ కూడా ఏర్పాటు చేయకపోవడం ఈ శాఖపై ప్రభుత్వం ఏ స్థాయిలో స్పందిస్తుందో స్పష్టమవుతోంది. భారీ అగ్నిప్రమాదం జరిగినప్పుడు అప్పటికప్పుడు వేగంగా స్పందించడం మినహా ముందస్తుగా యంత్రాంగం ఏర్పాట్లు లేకపోవడం వల్ల చాలా సందర్భాల్లో ప్రమాదంలో చిక్కుకున్న ప్రజల ఆస్తులు బుగ్గిపాలవుతున్నాయి. హైదరాబాద్ నగరంతో పాటు రాష్ట్రంలో చిన్న పెద్ద నగరాలు, పట్టణాలు, జనావాసాలు రోజు రోజుకీ విస్తరిస్తున్నాయి. పెరుగుతున్న జనాభా, నగర, పట్టణ జనాభాలకు అనుగుణంగా అగ్నిమాపక శాఖ తన పరిధిని విస్తరించడం లేదు. ఈ శాఖ పనితీరు మెరుగుపర్చేందుకు గతంలో నియమించిన మంత్రి వర్గ ఉపసంఘం ఇచ్చిన నివేదికను 2012 నవంబర్ వరకు అమలు చేయలేదు. ఈ శాఖకు బడ్జెట్ కేటాయింపులూ అరకొరగానే ఉంటున్నాయి. అంతేకాకుండా కేంద్ర ప్రభుత్వం నిర్దేశించిన విధంగా విపత్తుల ఉపశమన నిధి నుంచి విడుదల కావాల్సిన నిధులు అందని కారణంగా ఈ శాఖ ఆధునీకరణ ప్రక్రియ ఎక్కడ వేసిన గొంగళి అక్కడే అన్నట్లు ఉంది. మరో వైపు ఈ శాఖ వౌలిక వసతులను మెరుగు పర్చేందుకు ఉద్దేశించిన అగ్నిమాపక సలహా స్థాయి సంఘం నిర్దేశించిన ప్రమాణాలను పక్కన పడేసింది. ఈ శాఖపై సమగ్రంగా పరిశీలించిన కంప్ట్రోలర్ అండ్ ఆడిటర్ జనరల్ కూడా తీవ్ర అసంతృప్తి వ్యక్తం చేశారు. రాష్ట్రంలో ఉన్న 89 అసెంబ్లీ నియోకవర్గాల్లో ఒక్క ఫైర్ స్టేషన్ కూడా లేదంటే ఈ శాఖ ఏరకంగా అత్యవసర సమయంలో ప్రజలకు సేవలందిస్తుందనేది ప్రశ్నార్ధకంగా మారింది. కొత్త ఫైర్‌స్టేషన్లను ఏర్పాటు చేయాలని గతంలో ఇచ్చిన నివేదికను ప్రభుత్వం అసలు పట్టించుకోలేదు. వౌళిక వసతులను కల్పించేందుకు తీసుకున్న చర్యలు శూన్యం. కొన్ని ఫైర్ స్టేషన్లలో అగ్నిమాపక వాహనాలను నిలిపేందుకు వసతి లేదు. 85 ఫైర్ స్టేషన్లను తనిఖీ చేస్తే వాటిలో ఆరు ఫైర్ స్టేషన్లలో వాహనాలను నిలిపేందుకు స్థలం లేదని కాగ్ నివేదిక స్పష్టం చేసింది. అగ్నిమాపక వాహనాలు, రక్షణ వాహనాలు (రెస్క్యూవ్యాన్స్) వంటివి ఉన్నా అవి అవసరానికి సరిపడా లేవు. ఇప్పటికే కొనుగోలు చేసిన అత్యధిక పౌనఃపున్యంగల రేడియోసెట్లను అగ్నిమాపక శాఖ సక్రమంగా వినియోగించడం లేదని తెలుస్తోంది. అన్నింటికీ మించి కీలకమైన కొన్ని ఉద్యోగాలను భర్తీ చేయకపోవడంతో పనితీరు కుంటుపడుతోంది. వాహనాలు ఉంటే, సిబ్బంది ఉండరు, సిబ్బంది ఉంటే వాహనాలు లేని పరిస్థితి నెలకొంది. ఉన్న వారికి రోజు రోజుకీ వచ్చే మార్పులకు అనుగుణంగా శిక్షణ ఇవ్వాల్సి ఉండగా ఆ శాఖ ఉన్నతాధికారులు కాలక్షేపం చేస్తున్నారు. 2007 నుంచి 2012 మధ్య కాలంలో ఎలాంటి శిక్షణ ప్రణాళిక అమలు చేయలేదని స్పష్టమైంది. ఈ కాలంలో డెప్యూటేషన్‌పై తీసుకున్న 811 మంది హోంగార్డుల్లో ఏ ఒక్కరికీ శిక్షణ ఇవ్వలేదు. ఫైర్‌మెన్, డ్రైవర్, ఆపరేటర్ వంటి కీలకపోస్టుల్లో చాలా ఖాళీలు ఉన్నాయి. 2012-13లో రాష్ట్ర స్థాయి పోలీసు రిక్రూట్‌మెంట్ ద్వారా ఫైర్‌మెన్ పోస్టులను భర్తీ చేసేందుకు చర్యలు చేపట్టారు. పట్టణాలు, నగరాల్లో అగ్నిప్రమాదాలు జరిగినప్పుడు సమీపంలో ఉన్న వాహనాలు కాస్త అటో ఇటో ప్రమాద స్థలానికి చేరుకున్నా గ్రామీణప్రాంతాల్లో మాత్రం చాలా ఆలస్యంగా చేరుకుంటున్న సంఘటనలు ఉన్నాయి. పట్టణాలు, నగరాల్లో అయితే కాల్ వచ్చిన 30 నిమిషాల్లోనే ప్రమాదాన్ని అరికట్టడానికి హాజరైనట్లు రికార్డులు చెబుతున్నాయి. ప్రతి నియోజకవర్గంలో ఒక ఫైర్ స్టేషన్ అవసరమని మంత్రి వర్గ ఉపసంఘం చేసిన సూచన మేరకు ఏర్పాటైతే కనీసం త్వరగా క్షేత్ర స్థాయికి చేరుకునే అవకాశం ఉంటుందని అంటున్నారు. చార్‌ధామ్ మృతుల కుటుంబాలకు రూ. 5 లక్షల పరిహారం చెల్లించాలి దత్తాత్రేయ డిమాండ్ ఆంధ్రభూమి బ్యూరో హైదరాబాద్, జూన్ 23: ఉత్తరాఖండ్‌లో ప్రకృతి వైపరీత్యాలకు మరణించిన వారి కుటుంబాలకు ఐదు లక్షల రూపాయల చొప్పున నష్టపరిహారం చెల్లించాలని బిజెపి జాతీయ ఉపాధ్యక్షుడు బండారు దత్తాత్రేయ ప్రధాని మన్మోహన్ సింగ్‌ను కోరారు. ఈ మేరకు ఆయన లేఖ రాశారు. చార్‌ధామ్‌లోని బదరీనాథ్, కేదారినాథ్ దేవాలయల వద్ద నివాస సముదాయానికి కనివినీ ఎరుగని నష్టం వాటిల్లిందని, వందలాది మంది మరణించారని, భారతీయులకు పవిత్ర పుణ్య స్ధలాలైన ఈ రెండు క్షేత్రాల్లో దేవాలయాలు పునరుద్ధరించేందుకు మూడేళ్లు పడుతుందన్నారు. కాని ప్రకృతి వైపరీత్యాల తర్వాత పునరావాస చర్యలను చేపట్టడంలో కేంద్ర, రాష్ట్రప్రభుత్వాలు ఘోరంగా విఫలమయ్యాయన్నారు. ఉత్తరాఖండ్‌లోని కాంగ్రెస్ ప్రభుత్వం భక్తులకు కనీసం తాగునీటి సదుపాయాన్ని కల్పించడంలో కూడా విఫలమైందన్నారు. అక్కడి రాష్ట్ర ప్రభుత్వ యంత్రాంగం పని చేయడం లేదన్నారు. జాతీయ విపత్తు నివారణ కేంద్రాలు కూడా విఫలమయ్యాయన్నారు. ఈ తరహా విషాదాలను తట్టుకునేందుకు వీలుగా రాష్ట్ర ప్రభుత్వం సిద్ధం కాలేదని ఉత్తరాఖండ్ ముఖ్యమంత్రి విజయ బహుగుణ పేర్కొనడం దారుణమన్నారు. హిమాలయాల్లో ఈ తరహా విషాదం చరిత్రలో ఎప్పుడూ చోటు చేసుకోలేదన్నారు. 38 వేల చదరపు కి.మీ విస్తీర్ణంలోని ప్రాంతంలో కూడా పునరావాస చర్యలు తీసుకోవడంలో కేంద్రం ఘోర వైఫల్యం చెందిందన్నారు. జాతీయ విపత్తు నివారణ అథారిటీకి తగిన సిబ్బంది లేరన్నారు. కేంద్రప్రభుత్వం నిర్లక్ష్యానికి ఇది నిదర్శనమన్నారు. కేంద్రం ఈ అథారిటీకి ఎటువంటి నిధులు కేటాయించడం లేదన్నారు. రాష్ట్రానికి చెందిన వేలాదిమంది యాత్రికులు హిమాలయాల్లో చిక్కుకున్నారని, వీరిని సురక్షితంగా స్వరాష్ట్రానికి చేర్చేందుకు తగిన చర్యలు తీసుకోవాలన్నారు. ఏనుగుల సంఖ్య పెరిగింది: కాగ్ ఆంధ్రభూమి బ్యూరో హైదరాబాద్, జూన్ 23: రాష్ట్రంలో ఏనుగుల సంఖ్య పెరిగింది. జింకలు, సాంబార్‌లు, నల్ల దుప్పులు, అడవి పందులు, ఎలుగు బంట్లు, నక్కలు, తోడేళ్లు, పక్షుల సంఖ్యలో ఎటువంటి మార్పు లేదని కంప్ట్రోలర్ అండ్ ఆడిట్ జనరల్ అధికారులు సమర్పించిన నివేదికలో వెల్లడైంది. 2010 నుంచి 2012 వరకు ఐదు వన్యప్రాణి డివిజన్లు, ఒక పులుల సంరక్షణ ప్రాంతంలో నిర్వహించిన వన్యప్రాణి గణన రికార్డులను పరిశీలించినప్పుడు ఈ వివరాలు బహిర్గతమయ్యాయి. చిత్తూరు (పశ్చిమ) డివిజన్ కౌండిన్య వన్యప్రాణి సంరక్షణ డివిజన్‌లో ఏనుగుల రక్షణ ప్రాంతంలో నిర్వహించిన గణనలో 2007లో 9 ఏనుగులు ఉండగా, ప్రస్తుతం ఈ సంఖ్య 17కు పెరిగింది. వన్యప్రాణి సంరక్షణ చట్టం 1972 షెడ్యూల్-1 ప్రకారం అంతరించిపోయే ప్రమాదం ఉన్న ఒక జీవి బట్టమేక పిట్ట. ఇవి గతంలో ఆత్మకూరు వన్యప్రాణి నిర్వహణ డివిజన్ కింద వన్యప్రాణి సంరక్షణ కేంద్రంలో ఉండేవి. కాని ప్రస్తుతం దాదాపు కనుమరుగయ్యాయి. 2001లో వీటి సంఖ్య 98 ఉండగా, 2010లో కేవలం ఐదుకు పడిపోయాయి. భారతదేశంలో అతి పెద్ద నాగార్జునసాగర్, శ్రీశైలం పులుల రక్షిత కేంద్రంలో గడచిన 5 సంవత్సరాల్లో చెప్పుకోదగిన మార్పు లేదు. ఈదు సంవత్సరాల్లో 2007లో 76, 2008లో 85, 2009లో 80, 2010లో 85, 2011లో 79 పెద్దపులులు ఉన్నాయి. అయితే చిరుత పులుల సంఖ్య 2007లో 56 ఉండగా, వీటి సంఖ్య 2011కు 88కు పెరిగింది. వరంగల్ వన్యప్రాణి సంరక్షణలో డివిజన్‌లో పులుల సంఖ్య 2007లో రెండు ఉండగా, 2012లో సున్నాకి పడిపోయింది. చిరుతపులుల సంఖ్య 2007లో పది ఉండగా, 2012కు ఐదుకు పడిపోయిందని 2012లో సేకరించిన వన్యప్రాణి గణన తెలియచేసింది. జన్నారనం వన్యప్రాణి నిర్వహణ డివిజన్‌లో కవ్వల్ వన్యప్రాణి సంరక్షణ కేంద్రంలో పులుల సంఖ్య 2009 నుంచి స్ధిరంగా నాలుగు ఉంది. చిరుత పులుల సంఖ్య 2009లో 23 ఉండగా, 2011లో 21కు తగ్గింది. సిఎం పదవి కాదు.. ప్రత్యేక రాష్ట్రం కావాలి పాల్వాయి డిమాండ్ ఆంధ్రభూమి బ్యూరో హైదరాబాద్, జూన్ 23: తెలంగాణ ప్రాంతానికి ముఖ్యమంత్రి పదవి ముఖ్యం కాదు, ప్రత్యేక రాష్ట్రం కావడమే ప్రధానమని తెలంగాణ ప్రాంత కాంగ్రెస్ రాజ్యసభ సభ్యుడు పాల్వాయి గోవర్ధన్ రెడ్డి అన్నారు. ఇటీవల తాను ఢిల్లీలో పార్టీ రాష్ట్ర వ్యవహారాల ఇన్‌చార్జి దిగ్విజయ్ సింగ్‌ను కలిసి తెలంగాణ రాష్ట్ర విభజన తప్ప ఎటువంటి ప్యాకేజీలు అవసరం లేదని చెప్పినట్లు ఆయన ఆదివారం తనను కలిసిన విలేఖరులతో మాట్లాడుతూ చెప్పారు. తెలంగాణ రాష్రం ఏర్పాటు చేయకపోతే వచ్చే ఎన్నికల్లో తెలంగాణ ప్రాంతంలో పార్టీ పరిస్థితి అధ్వాన్నంగా ఉంటుందని చెప్పానని ఆయన తెలిపారు. ఇప్పటికే ఆంధ్ర ప్రాంతంలో పార్టీ పరిస్థితి ప్రశ్నార్థకంగా మారిందని, అటువంటి పరిస్థితి తెలంగాణకు రానీయకూడదని కోరానని అన్నారు. తెలంగాణ ప్రాంత సీనియర్ నాయకులు అందరూ సమావేశమయ్యారంటేనే పరిస్థితి అర్థం చేసుకోవాల్సిందిగా దిగ్విజయ్‌సింగ్‌కు వివరించానని ఆయన చెప్పారు. తెలంగాణ నిర్ణయం ప్రకటించడానికి హైదరాబాద్‌కు రావాల్సిందిగా దిగ్విజయ్‌ను కోరినట్లు పాల్వాయి తెలిపారు. డిఎస్‌తో జానా భేటీ ఇలాఉండగా పిసిసి మాజీ అధ్యక్షుడు డి. శ్రీనివాస్, రాష్ట్ర మంత్రి కె. జానారెడ్డి సమావేశమై మంతనాలు జరిపారు. ఇటీవల డిఎస్ ఢిల్లీకి వెళ్ళి ఎఐసిసి అధ్యక్షురాలు సోనియా గాంధీతో సమావేశమైన సంగతి తెలిసిందే. రాష్ట్రంలోని పరిస్థితులను సోనియా గాంధీకి వివరించిన విషయాల గురించి డిఎస్ ఆయనకు చెప్పినట్లు సమాచారం. ఈ నెల 30న నిజాం కళాశాల మైదానంలో తెలంగాణ కాంగ్రెస్ ప్రజాప్రతినిధులు నిర్వహించబోయే సమావేశం గురించి కూడా వారు చర్చించారు. సౌర విద్యుత్ ప్యానెల్స్ అమర్చండి ప్రాణహిత-చేవెళ్లపై స్థారుూ సంఘం సిఫార్సు ఆంధ్రభూమి బ్యూరో హైదరాబాద్, జూన్ 23: ప్రతిష్టాకరమైన డాక్టర్ అంబేద్కర్ ప్రాణహిత-చేవెళ్ల సుజల స్రవంతి సాగు నీటి ప్రాజెక్టు ఎత్తిపోతల పథకాన్ని నిర్వహించేందుకు సౌరశక్తి విద్యుత్‌ను ఉపయోగించుకునే దిశగా రాష్ట్ర ప్రభుత్వం ఆలోచించాలని విద్యుత్ రంగంపై ఏర్పాటైన శాసనసభ స్థారుూ సంఘం సిఫార్సు చేసింది. ఈ ప్రాజెక్టు ఎత్తిపోతల పథకంతో ముడిపడి ఉంది. దాదాపు రెండు వేల మెగావాట్ల సౌర విద్యుత్‌ను ఈ ప్రాజెక్టు కాల్వలపైన ప్యానెల్స్‌ను ఏర్పాటు చేసి ఉత్పత్తి చేయవచ్చు. స్ధారుూ సంఘం చైర్మన్ సి. నర్సారెడ్డి ఆధ్వర్యంలోని సభ్యులు ఈ నివేదికను సమర్పించారు. దీని వల్ల ప్రాజెక్టు కింద ఉన్న భూములకు ఎత్తిపోతల ద్వారా సాగునీటిని సరఫరా చేసేందుకు అవసరమైన విద్యుత్ లభిస్తుంది. నీటి ఆవిరిని అరికట్టవచ్చును. కాల్వలను సక్రమంగా ఉపయోగించుకోవచ్చును. ఎత్తిపోతలకు అవసరమైన విద్యుత్ లభిస్తుంది. రాష్ట్రంలో పెద్ద ఎత్తున ఎత్తిపోతల సాగునీటి ప్రాజెక్టులను చేపట్టారు. ఈ పథకాల నిర్వహణకు దాదాపు 7600 మెగావాట్ల విద్యుత్ అవసరమవుతుంది. మొత్తం పైన సాలీనా 14500 మిలియన్ యూనిట్ల విద్యుత్ లభ్యత ఉంటే తప్ప ఈ ఎత్తిపోతల పథకాలను నిర్వహణ కష్టమవుతుందని స్థారుూ సంఘం అభిప్రాయపడింది. దాదాపు విద్యుత్‌కే ఎనిమిదివేల కోట్ల రూపాయల ఖర్చవుతుంది. లేదా ఎకరానికిక 20 వేల రూపాయల చొప్పున వ్యయమవుతుంది. దీనికి అదనంగా అనేక ఖర్చులుంటాయి. రాష్ట్రంలో అన్ని వెనకబడిన ప్రాంతాల్లో ఎత్తిపోతల పథకాల నిర్వహణకు సమగ్రమైన ప్రణాళిక అవసరమని ఈ సంఘం అభిప్రాయపడింది. రాష్ట్రంలో ఇంధన సంరక్షణ సంఘం విసృతంగా విద్యుత్‌ను పొదుపుగా వినియోగించాలని ప్రచారం చేసేందుకు రాష్ట్రప్రభుత్వం కనీసం 50 లక్షల రూపాయల నిధులను కేటాయించాలని స్థారుూ సంఘం సిఫార్సు చేసింది. వినియోగదారులు సిఎల్‌ఎఫ్, ఎల్‌ఇడి , సోలార్ బల్బులు ఉపయోగించేందుకు ప్రోత్సహించాలి. సంప్రదాయేతర ఇంధన వనరులను ఉపదయోగించడన్ని ప్రోత్సహించాలి. ఇంధన పొదుపు కార్యక్రమాల్లో ఏపి ట్రాన్స్‌కో, డిస్కాంలు, జెన్కోకు భాగస్వామ్యం కల్పించాలని సిఫార్సు చేసింది.