పర్యాటక రంగాన్ని తీర్చిదిద్దుతా

బాపట్ల, జూన్ 23: దేశంలో పర్యాటకరంగాన్ని మరింత అభివృద్ధి చేసి జాతి గర్వించదగిన స్థాయికి తీసుకెళ్తానని కేంద్ర మంత్రి చిరంజీవి పేర్కొన్నారు. కేంద్ర పర్యాటక శాఖ ఆధ్వర్యంలో ఆదివారం రాత్రి గుంటూరు జిల్లా సూర్యలంక సముద్రతీరంలో నిర్వహించిన బీచ్ ఫెస్టివల్ వేదికపై చిరంజీవి పంచెకట్టుతో కనిపించి ప్రేక్షకులను, పర్యాటకులను, కాంగ్రెస్ పార్టీ శ్రేణులను అలరించారు. ఈ సందర్భంగా ఆయన మాట్లాడుతూ ప్రపంచ దేశాలన్నీ పర్యాటక రంగంపై ప్రత్యేక శ్రద్ధ వహిస్తున్నాయని, జి-20 దేశాల సదస్సులో కూడా ఈ రంగం విశిష్టతను చర్చించడం జరిగిందన్నారు. పర్యాటక రంగానికి బ్రాండ్ అంబాసిడర్‌గా ఉండి అభివృద్ధి చేయాలని ప్రధాని మన్మోహన్ సింగ్ తనపై ఎంతో నమ్మకముంచి ఈ శాఖను అప్పగించారని, ఈ శాఖ ద్వారా దేశ ఆదాయాన్ని, ప్రతిష్ఠను పెంచడానికి నిర్విరామంగా శ్రమిస్తున్నట్లు చెప్పారు. రాష్ట్రానికి పర్యాటకశాఖ నుండి వీలైనన్ని అధిక నిధులను మంజూరు చేస్తున్నట్లు, గడచిన ఆరు నెలల్లో రూ.221 కోట్ల నిధులతో వివిధ కార్యక్రమాలను నిర్వహించినట్లు చెప్పారు. వైజాగ్ బీచ్ వద్ద బీచ్ కారిడార్‌ను, కోనసీమ- భద్రాచలం, అరకులోయ, కొండపల్లి -ఇబ్రహీంపట్నం ప్రాంతాలను పర్యాటక కేంద్రాలుగా తీర్చిదిద్దేందుకు కృషి చేస్తున్నానన్నారు. రానున్న ఆరు నెలల్లో రాష్ట్రంలో రూ.500 కోట్ల మేరకు పర్యాటక శాఖ నుండి నిధులను విడుదల చేస్తానన్నారు. కాంగ్రెస్‌లోనే సామాజిక న్యాయం ఏ సామాజిక న్యాయం కోసం తను పరితపించానో అది కాంగ్రెస్ పార్టీలో ఉందని, ఈ విశ్వాసం నిజమైందనడానికి జెడి శీలం కేంద్ర మంత్రిగా నియమితులు కావడం పెద్ద ఉదాహరణ అని కేంద్రమంత్రి చిరంజీవి అన్నారు. బీచ్ ఫెస్టివల్స్‌ను భారీస్థాయిలో నిర్వహించడానికి కృషి చేసిన కేంద్రమంత్రి పనబాక లక్ష్మి, రాష్ట్ర పర్యాటక శాఖామంత్రి వట్టి వసంత్‌కుమార్, బాపట్ల ఎమ్మెల్యే గాదె వెంకటరెడ్డిని అభినందించారు. నక్సల్స్ పేరుతో దోపిడీ గొల్లప్రోలు, జూన్ 23: నక్సలైట్ల పేరుతో బెదిరించి రైస్ మిల్లు యజమాని నుంచి 6.3 లక్షల రూపాయలు దోచుకుపోయన ఉదంతం తూర్పుగోదావరి జిల్లా గొల్లప్రోలులో ఆదివారం చోటుచేసుకుంది. బాధితుడు పోలీసులకు తెలిపిన వివరాల ప్రకారం.. గొల్లప్రోలు పట్టణ శివారు చెందుర్తి సెంటర్ సమీపంలోని శ్రీ మహేశ్వరీ మోడరన్ రైస్ మిల్లు వద్దకు ఆదివారం ఉదయం నలుగురు ఆగంతకులు కారులో వచ్చారు. మిల్లు యజమాని గుండుబిల్లి పోలీసు (చిన్న)ను మాట్లాడే పనివుందని మిల్లు ఆఫీసు గదిలోకి తీసుకెళ్లారు. గది బయట ఇద్దరు కాపలా ఉండగా, మరో ఇద్దరు లోపలికి వెళ్లారు. తాము గణపతి దళానికి చెందిన నక్సలైట్లమని, ఆయుధాల కొనుగోలుకు రూ.లక్ష విరాళం ఇవ్వాలని డిమాండ్ చేశారు. తమ వ్యాపారం అంతంతమాత్రమేనని, అంత సొమ్ము తన వద్ద లేదని చిన్న తెలిపాడు. దీనితో ఆగ్రహించిన ఆగంతకులు తుపాకులు బయటకుతీశారు. చిన్నను నిర్భందించి బీరువాలో వెతికారు. అనంతరం అతనివద్ద ఉన్న బ్యాగ్ వెతకగా, అంతకు ముందు రోజు బ్యాంకు నుండి డ్రాచేసి తెచ్చిన రూ.6.3 లక్షల నగదు కనిపించింది. అరిస్తే కాల్చేస్తామంటూ బెదిరించి, నగదు తీసుకుని, కార్యాలయం గది బయట గడియ పెట్టి కారులో పరారయ్యారు. కొంత సేపటికే చిన్న కేకలు వేయడంతో విషయం బయటపడింది. పిఠాపురం సిఐ రాంబాబు ఆధ్వర్యంలో పిఠాపురం రూరల్ పోలీసులు సూర్యభాస్కరరావు, గొల్లప్రోలు ఎఎస్సై క్రిస్టియన్ సంఘటనా స్థలానికి చేరుకుని వివరాలు సేకరించారు. తిరుమలలో పున్నమి గరుడ సేవ తిరుపతి, జూన్ 23: ప్రతి నెలా పౌర్ణమిరోజున తిరుమలలో స్వామివారికి నిర్వహించే గరుడ సేవ ఆదివారం ఘనంగా నిర్వహించారు. ఈ సందర్భంగా శ్రీమలయప్పస్వామి సర్వాలంకార భూషితుడైన తిరువీధుల్లో ఊరేగుతూ భక్తులను దర్శనమిచ్చారు. దేదీప్యమానమైన విద్యుత్ వెలుగుల మధ్య స్వర్ణాలంకార భూషితుడై శ్రీస్వామివారి ఊరేగింపు భక్తులకు కనువిందు చేసింది. కాగా తిరుమలలో ఆదివారం రద్దీ విపరీతంగా ఉండడంతో ఆలయంలో స్వామి దర్శనం లభించనివారు తిరువీధుల్లో ఊరేగుతున్న మలయప్పస్వామిని దర్శించుకున్నారు. పది మంది కృష్ణా వాసుల గల్లంతు ఆంధ్రభూమి బ్యూరో విజయవాడ, జూన్ 23: ప్రముఖ యాత్ర స్థలాల సందర్శన నిమిత్తం కృష్ణా జిల్లా నుండి ఉత్తరాఖండ్‌కు వెళ్లిన వారిలో నేటికీ పది మంది యాత్రికుల ఆచూకీ తెలియక వారివారి కుటుంబ సభ్యులు నిద్రాహారాలు లేకుండా ఎదురుతెన్నులు చూస్తున్నారు. విజయవాడ నుంచి వెళ్లిన వారిలో తొలుత 10 మంది ఆచూకీ తెలియకపోగా క్రమేణ ఐదుగురి సమాచారం అందించింది. వీరిలో పొట్టిపోతుల అన్నపూర్ణ క్షేమంగా ఆదివారం భావాజీపేటలోని నివాస గృహానికి చేరింది. ఇక ఆవుల రంగారెడ్డి (66), భార్య వెంకటలక్ష్మి (55), బి వెంకట సుశీల (53), బి సంధ్యాలక్ష్మి (40), జి అనసూయ (45) ఆచూకీ తెలియాల్సి ఉంది. వీరిలో సంధ్యాలక్ష్మి భర్త చెన్నకేశవులు, అనసూయ భర్త జివి గుప్తా క్షేమంగా ఉన్నట్లు సమాచారం అందింది. ఆచూకీ తెలియనివారిలో ఇద్దరు నీటిలో కొట్టుకుపోయినట్లు ప్రత్యక్ష సాక్షులు చెబుతున్నారు. ఇదిలా ఉండగా తోట్లవల్లూరు మండలం పాములపాటివారి పాలెం, దేవరపల్లి, చాగంటిపాడు గ్రామాల నుంచి మొత్తం 19 మంది బయలుదేరి వెళ్లగా వీరిలో దేవరపల్లి గ్రామానికి చెందిన ఇద్దరు భీమవరపు నాగరత్తమ్మ, ఆరేపల్లి సరస్వతి మరణించినట్లు సమాచారం. మిగిలిన వారిలో ఐదుగురి ఆచూకీ తెలియరావటంలేదని కుటుంబ సభ్యులు చెబుతున్నారు. వారిలో పెద్దు సరోజిని (70), కరిపినేని రాజేంద్రప్రసాద్ (50), కరిపినేని నాగలక్ష్మి (45), ఎస్ సుశీల (52), కరిపినేని లక్ష్మి (40) ఉన్నారు. నూజివీడు డివిజన్ చాట్రాయి గ్రామం నుంచి వెళ్లిన వారిలో కూరగాయల వ్యాపారి సదటి సత్యనారాయణ (60) ఢిల్లీ సమీపంలో గుండెపోటుతో మరణించాడు. జిల్లా మొత్తంపై ఆచూకీ తెలియని పది మంది కోసం అధికారులు కేంద్ర, రాష్ట్ర ప్రభుత్వాలకు సమాచారం అందించి అనే్వషిస్తున్నారు.