న్యూఢిల్లీ, జూలై 5: వచ్చే శుక్రవారం జరిగే కాంగ్రెస్ కోర్ కమిటీ సమావేశంలో ప్రత్యేక తెలంగాణ రాష్ట్రం ఏర్పాటు వివాదంపై తుది నిర్ణయం తీసుకునే అవకాశాలు కనిపిస్తున్నాయి. ప్రధాన మంత్రి డాక్టర్ మన్మోహన్ సింగ్ నివాసంలో శుక్రవారం సాయంత్రం ఐదున్నర గంటల నుండి దాదాపు గంటంబావుపాటు జరిగిన కోర్ కమిటీ సమావేశంలో తెలంగాణ అంశంపై ప్రాథమిక చర్చలు జరిగినట్లు తెలుస్తోంది. ఏఐసిసి ప్రధాన కార్యదర్శి, రాష్ట్ర వ్యవహారాల ఇన్‌చార్జ్ దిగ్విజయ్ సింగ్ శుక్రవారం ఉదయం తనకు అందజేసిన వివరాలను హోం శాఖ మంత్రి సుశీల్‌కుమార్ షిండే కాంగ్రెస్ కోర్ కమిటీ సమావేశం ముందు పెట్టారని సమాచారం. రాష్ట్రాన్ని సమైక్యంగా ఉంచటం లేదా రాష్ట్ర విభజన చేపట్టి ప్రత్యేక తెలంగాణ రాష్ట్రాన్ని ఏర్పాటు చేసేందుకు ముఖ్యమంత్రి నల్లారి కిరణ్‌కుమార్ రెడ్డి, ఉప ముఖ్యమంత్రి దామోదర్ రాజనరసింహ, పిసిసి అధ్యక్షుడు బొత్సా సత్యనారాయణ తయారు చేసే రోడ్ మ్యాప్‌లపై వచ్చేవారం చర్చ జరగవచ్చునని తెలిసింది. కాగా, వచ్చేవారం జరిగే కాంగ్రెస్ కోర్ కమిటీ సమావేశానికి పార్టీ ఉపాధ్యక్షుడు రాహుల్ గాంధీ, దిగ్విజయ్ సింగ్‌తోపాటు కిరణ్‌కుమార్ రెడ్డి, దామోదర్ రాజనరసింహ, బొత్స సత్యనారాయణలను ఆహ్వానిస్తారు.
తెలంగాణపై ప్రాథమిక చర్చలు జరిపిన కోర్ కమిటీ
english title:
c
Date:
Saturday, July 6, 2013