విజయనగరం, ఆగస్టు 1: జిల్లాలో సమైక్యాంధ్ర ఉద్యమ సెగ రగులుతొంది. గురువారం ఉద్యోగ సంఘాల జెఎసి, జాక్టో ఉపాధ్యాయ సంఘాలు కలసి మంత్రి బొత్స సత్యనారాయణ తన పదవికి రాజీనామా చేయాలని డిమాండ్ చేశారు. పెద్దఎత్తున ఉద్యోగ, ఉపాధ్యాయ, విద్యార్థి సంఘాలు మంత్రి బొత్స సత్యనారాయణ ఇళ్లు ముట్టడికి యత్నించారు. అయితే అప్పటికే పోలీసులు వలయాకారంగా చుట్టుముట్టడంతో ఆందోళనకారులను పోలీసులు అడ్డుకున్నారు. ముందర సత్యలాడ్జి సమీపంలో విద్యార్థి, ఉపాధ్యాయ సంఘాలు ర్యాలీగా మంత్రి బొత్స ఇంటి వెనుకవైపు ద్వారా వెళ్లడానికి ప్రయత్నించారు. అక్కడ పోలీసులు అడ్డుకోవడంతో మెయిన్‌రోడ్డుపైకి వచ్చారు. అక్కడ కూడా పోలీసులు లోపలికి ప్రవేశించకుండా అడ్డుకోవడంతో చివరకు అక్కడ రోడ్డుపైనే బైఠాయించి దాదాపు రెండు గంటలపాటు నినాదాలు చేశారు. మంత్రి బొత్స రాజీనామా చేయాలి, సమైక్యాంధ్రను కొనసాగించాలని పెద్ద ఎత్తున నినాదాలు చేశారు. ఈ ఉద్యమానికి నాయకత్వం వహించిన నేతలు మామిడి అప్పలనాయుడు మాట్లాడుతూ రాష్ట్రాన్ని సమైక్యంగానే ఉంచాలని డిమాండ్ చేశారు. రాజకీయ లబ్ధికోసం రాష్ట్రాన్ని ముక్కలు చేసి నాశనం చేయాలనుకోవడం దురదృష్టకరమన్నారు. రాష్ట్ర విభజనను రాష్ట్ర ప్రజల అభిప్రాయం మేరకు చేయాలే తప్ప, సీట్ల కోసం .. ఓట్ల కోసం చేయడం అన్యాయమని అన్నారు. రాష్ట్రాన్ని ముక్కలు చేసి ఇవ్వమని అడగడానికి కెసిఆర్, కోదండరామ్‌లు ఎవ్వరని ఆయన ప్రశ్నించారు. కెసిఆర్, కోదండరామ్‌లు తెలుగుజాతి ద్రోహులని మండిపడ్డారు. సీమాంధ్ర ప్రజాప్రతినిధులు, మంత్రులు, ఎంపీలు, ఎమ్మెల్యేలు ఇప్పటికైనా తమ పదవులకు రాజీనామా చేసి సమైక్యాంధ్ర ఉద్యమానికి ముందుకు రావాలని ఆయన పిలుపునిచ్చారు. సమైక్యాంధ్ర ఉద్యమం కొనసాగించే వరకు ఈ పోరాటం కొనసాగిస్తామని అన్నారు. మరో నేత స్పార్క్ సొసైటీ అధ్యక్షుడు పద్మనాభం మాట్లాడుతూ సమైక్యాంధ్ర ఉద్యమం కోసం అందరు కలసికట్టుగా ముందుకు రావాలన్నారు. సమైక్యాంధ్ర విడిపోతే సీమాంధ్ర ప్రజలు పెద్ద ఎత్తున నష్టపోయే ప్రమాదం ఉందన్నారు. అందువల్ల సమైక్యాంధ్ర కోసం ఉద్యోగ, ఉపాధ్యాయ, కార్మిక వర్గాలు కలసికట్టుగా ముందుకు వచ్చి పోరాటంలో పాలుపంచుకోవాలని కోరారు. పిఆర్‌టియు జిల్లా అధ్యక్షుడు బూడి వెంకట్రావు మాట్లాడుతూ సమైక్యాంధ్ర కోసం ఏ పోరాటానికైనా తాము సిద్ధమేనని స్పష్టం చేశారు.
జిల్లాలో బంద్ ప్రశాంతం
సమైక్యాంధ్ర ఉద్యమానికి మద్దతుగా రెండో రోజు జిల్లాలో చేపట్టిన బంద్ ప్రశాంతంగా జరిగింది. గురువారం పట్టణంలో సమైక్యాంధ్ర జెఎసి, జాక్టో, విద్యార్థి సంఘాల ఆధ్వర్యంలో మంత్రి బొత్స సత్యనారాయణ ఇంటిని ముట్టడించడానికి యత్నించారు. మంత్రి బొత్స ఇంటి చుట్టూ పోలీసులు పహారా ఏర్పాటు చేయడంతో సమైకాంధ్రవాదులు ముట్టడికి ప్రయత్నించి చివరకు అక్కడే బైఠాయించి దాదాపు రెండు గంటలపాటు నినాదాలు చేశారు. కెసిఆర్ డౌన్.. డౌన్, మంత్రి బొత్స రాజీనామా చేయాలని డిమాండ్ చేశారు. విజయనగరం ఆర్టీసీ డిపో కార్మికులు సమైక్యాంధ్రకు మద్దతుగా బంద్ చేపట్టడంతో డిపో బస్సులను నిలిపివేశారు. సీతానగరంలో ఎన్‌సిఎస్ షుగర్స్ యాజమాన్యం, కార్మికులు సమైక్యాంధ్రకు మద్దతుగా జాతీయ రహదారిపై బైఠాయించి తమ మద్దతు తెలిపారు. ఎస్.కోటలో జిల్లా గ్రంధాలయ సంస్థ చైర్మన్ ఇందుకూరి రఘురాజు నేతృత్వంలో ర్యాలీ నిర్వహించారు. జొన్నాడలో ఇంజనీరింగ్ కళాశాల విద్యార్థులు జాతీయ రహదారిపై బైఠాయించి మానవహారం చేపట్టారు.
‘రాష్ట్ర చరిత్రలో జూలై 30 చీకటి రోజు’
విజయనగరం , ఆగస్టు 1: ఆంధ్రప్రదేశ్ రాష్ట్ర చరిత్రలో జూలై 30తేదీ చీకటిరోజుగా మిగిలిపోతోందని జిల్లా తెలుగుదేశం పార్టీ అధ్యక్షుడు ద్వారపురెడ్డి జగదీష్ అన్నారు. గురువారం ఇక్కడ అశోక్ బంగ్లాలో ఏర్పాటుచేసిన విలేఖరుల సమావేశంలో ఆయన మాట్లాడుతూ తెలుగుజాతిలో చిచ్చుపెట్టి కాంగ్రెస్‌పార్టీ అధిష్ఠానం తెలుగుజాతిని, రాష్టవ్రిభజన ప్రక్రియకు శ్రీకారం చుట్టిందన్నారు. సామాజిక, ఆర్థికపరిస్థితులను పరిగణనలోకి తీసుకోకుండా రాజకీయకోణంలో ఆలోచించి రాజకీయ ప్రయోజనాల కోసం రాష్ట్రాన్ని విభజించాలని నిర్ణయించడం దారుణమన్నారు. రాహుల్‌గాంధీని ప్రధానిమంత్రి చేయాలనే పదవీకాంక్షతో రాష్ట్రాన్ని ముక్కలు చేయాలని కుట్రపన్నారని ఆయన ఆరోపించారు. తెలుగుప్రజలకు యుపిఎ చైర్‌పర్సన్ ఒకశాపంగా మారారని విమర్శించారు. ఒక సిద్ధాంతపరంగా రాష్టవ్రిభజనకు చర్యలు చేపట్టలేదని, శ్రీకృష్ణ కమిటీనివేదికను ఎందుకు బయటపెట్టలేదని ఆయన ప్రశ్నించారు. రాజకీయ లబ్ధికోసం రాష్ట్రాన్ని ముక్కలు చేశారని ఆరోపించారు. కాంగ్రెస్‌పార్టీ అధిష్టానం రాష్ట్రాన్ని విభజిస్తే, స్థానిక కాంగ్రెస్‌నేతలు రాష్ట్రాన్ని సమైక్యంగా ఉంచాలంటూ నిరసన వ్యక్తం చేయడం దేయ్యాలు, వేదాలు వల్లించినవిధంగా ఉందన్నారు. రాష్ట్రాన్ని విభజించిన కాంగ్రెస్ నాయకులు చరిత్రలో చరిత్రహీనులుగా మిగిలిపోతారని ఆయన విమర్శించారు. రాష్ట్ర విభజనకు నిరసనగా శుక్రవారం జిల్లావ్యాప్తంగా బంద్ చేపడతామని ఆయన పేర్కొన్నారు. ఈ సమావేశంలో పార్టీ నాయకులు ఐవిపిరాజు, కనకల మురళీమోహన్, సువ్వాడ రవిశేఖర్, సైలాడ త్రినాధరావు, ప్రసాదుల రామకృష్ణ, మద్దాల ముత్యాలరావు, కర్రోతు వెంకట నరసింగరావుతదితరులు పాల్గొన్నారు.
అగ్ని బాధితులను
పరామర్శించిన కలెక్టర్
భోగాపురం, ఆగస్టు 1 : మండలం కొండ్రాజుపాలెం గ్రామంలో అగ్ని ప్రమాదం జరిగి 125 కుటుంబాలు నిరాశ్రయులయ్యారు. అగ్నిబాధితులను గురువారం కలక్టర్ కాంతిలాల్ దండే, మాజీ ఎమ్మెల్యే పతివాడ నారాయణస్వామినాయుడు, పరామర్శించారు. కలెక్టర్ మాట్లాడుతూ ప్రభుత్వ పరంగా అన్ని విధాలా సహాయ సహకారాలు అందే విధంగా చర్యలు చేపట్టడం జరుగుతుందని అలాగే ఇల్లు కోల్పోయిన పక్కా గృహాలు వచ్చేలా కృషి చేస్తామని తెలిపారు. కొండ్రజుపాలెం గ్రామంలో అగ్ని ప్రమాదం సంభవించి 125 కుటుంబాల సర్వం కోల్పోయి నిరాశ్రయలై విషయం విదితమే. అయితే వీరికి గురువారం తహశీల్దార్ యు. రాజ్యలక్ష్మి సమక్షంలో ప్రభుత్వం తరపు నుంచి 15 వేల రూపాయల చొప్పున ఆర్ధిక సహాయం అందజేశారు. అలాగే అగ్ని ప్రమాదంలో కొటా కార్డులు కోల్పోయిన కుటుంబానికి సిహెచ్‌డిటి మషిలామణి ఆదేశాలు మేరకు బియ్యం, పప్పు దినుసులు, పంపిణీ చేశారు
రాష్ట్ర విభజనను నిరసిస్తూ మానవహారం
విజయనగరం , ఆగస్టు 1: ఓట్లు, సీట్లు కోసం రాష్ట్రాన్ని విభజించడం కాంగ్రెస్‌పార్టీకి తగదని సమైక్యాంధ్ర జెఎసి జిల్లా కన్వీనర్ మామిడి అప్పలనాయుడు అన్నారు. రాష్ట్ర విభజనను నిరసనగా పట్టణంలో అనేకచోట్ల నిరసన కార్యక్రమాలను చేపట్టారు. స్థానిక ఆర్టీసీ కాంప్లెక్స్ వద్ద విద్యార్థులతో, యువకులతో పెద్దఎత్తున మానవహారం నిర్వహించి నిరసన వ్యక్తం చేశారు. రాష్ట్రాన్ని ముక్కలు చేసే అధికారం కాంగ్రెస్‌నాయకులు ఎవరు ఇచ్చారని ఆయన ప్రశ్నించారు. రాష్ట్రాన్ని విభజించి తెలుగువారిలో చిచ్చుపెట్టడటం సరైన పద్ధతి కాదన్నారు. ప్రజల నుంచి నిరసన వ్యక్తమవుతుంటే, ఎం.పి.లు, ఎమ్మెల్యేలు, ఎమ్మెల్సీలు పదవులకు రాజీనామా చేయకుండా పదవుల్లో కొనసాగడం దారుణమన్నారు. రాష్ట్రాన్ని విభజన ప్రకటనను వెనక్కి తీసుకోకపోతే సీమాంధ్రలో కాంగ్రెస్‌ను భూస్థాపితం చేస్తామని ఆయన హెచ్చరించారు. ఈ కార్యక్రమంలో సమైక్యాంధ్ర జెఎసి ప్రతినిధులు అబ్దుల్వ్రూఫ్ తదితరులు పాల్గొన్నారు.
నిలిచిపోయిన ఆర్టీసీ బస్సులు.. రూ. 8 లక్షలు నష్టం
విజయనగరం , ఆగస్టు 1: రాష్ట్ర విభజనకు వ్యతిరేకంగా, సమైక్యాంధ్రకు మద్దతుగా ఇక్కడి డిపోలో కార్మికులు గురువారం బంద్ పాటించారు. ఎంప్లాయిస్ యూనియన్, నేషనల్ మజ్దూర్ యూనియన్ బంద్‌కు సంఘీభావాన్ని ప్రకటించారు. రెండు యూనియన్‌లకు చెందిన కార్మికులు బంద్‌లో స్వచ్చంధంగా పాల్గొనడంతో డిపోలో బస్సులు నిలిచిపోయాయి. విజయనగరం డిపోలో 124 షెడ్యూల్స్ ఉండగా, ఉదయం ఏడున్నర గంటలలోపువరకు 24 బస్సులు తిరిగాయి. ఆతర్వాత ఆ బస్సులు కూడా తిరగలేదు. ఈ కారణంగా 8లక్షల రూపాయల మేరకు డిపో ఆదాయానికి గండి పడింది. మిగతా డిపోలకు చెందిన బస్సులు తిరగడంతో ప్రయాణికుల రాకపోకలకు ఎటువంటి ఇబ్బందులు కలగలేదు. ఉదయం అయిదు గంటలకు సమైక్యాంధ్ర ఉద్యమకారులు ఆర్టీసీ కాంప్లెక్స్‌కు చేరుకుని బస్సులను కదలనీయకుండా అడ్డుకున్నారు. ఈ సందర్భంగా ఎంప్లాయిస్ యూనియన్ జోనల్ సహాయ కార్యదర్శి శ్రీనువాసరాజు మాట్లాడుతూ రాష్టవ్రిభజన వల్ల ఆర్టీసీ ఆదాయానికి భారీగా గండిపడుతుందన్నారు. రాష్ట్ర విభజన ప్రకటనను ఉపసంహరించుకోకపోతే ఆందోళన ఉధృతం చేస్తామని హెచ్చరించారు. బస్సులను విద్యార్థులు అడ్డుకోవడంతో ట్రాఫిక్ నిలిచిపోయింది.
వర్షాలు లేక రైతుల ఆందోళన
గజపతినగరం, ఆగస్టు 1 : మండలంలో ఖరీఫ్‌లో సాగు చేసిన వాణిజ్య పంటలు తేమ లేక చనిపోతున్నాయి. ప్రధానమైన వరి పంట సాగుకు అవసరమైన మేరకు వర్షాలు కురవనందున నెల రోజుల కిందట పోసిన వరినారు ముదిరి పోతున్నందున దిగుబడులు గణనీయంగా తగ్గిపోతాయని రైతులు ఆందోళన చెందుతున్నారు. సహజంగా జూలై ప్రధమ వారంలో పోసిన వరినారును జూలై నెలాఖరున లేదా ఈనెల మొదటివారంలవో ఉభాల జరుపుతుంటారు. మే,జూన్ జూలై నెలలో సగటున ప్రారంభం నుండి ఇంత మే,జూన్, జూలై నెలలో సగుటున 360 మిల్లీ మీటర్ల వర్షం కురవాల్సి ఉండగా కేవలం 190 మిల్లీ మీటర్ల వర్షం కురవడంతో చెరువులలో చుక్క నీరు చేరలేదు. సగుటున మేలో 85.4 మిల్లీ మీటర్లు కాగా 13.4 మిల్లీ మీటర్ల 1 జూన్‌లోవ 136 మిల్లీ మీటర్లకు గాను 86.4 మీటర్లు, జూలైలో సగటు వర్షపాతం 139.1 మిల్లీ మీటర్ల కాగా 90 మిల్లీ మీటర్ల వర్షం కురిసింది. రైతులు మద్యకాలిక వరిరకాలకు చెందిన పంటను సాగు చేస్తుంటారు.నీరు లేని కారణంగా వ్యవసాయ బావులు కింద రైతులు కేవలం 5 నుంచి 10 శాతం వరి ఉభాలు జరిపారు. ఇప్పటికే వరినారు పోసి 30 రోజుల గడచింది. ముదిరిన వరినారు ఉభాలు జరపడం వలన దిగుబడులు తగ్గిపోతాయని ఆందోళన చెందుతున్నారు. ఈనెలలోనైనా ఆశాజనకంగా కురవకపోతే ప్రత్యాయ పంటలు సాగుకు ప్రభుత్వం ప్రణాళిక రూపొందించాలని కోరుతున్నారు.
సమైక్యాంధ్ర కోసం
జాతీయ రహదారిపై బైఠాయింపు
బొండపల్లి, ఆగస్టు 1: మండలంలోని అంబటివలస గ్రామం వద్ద సమైక్యాంధ్ర కోసం ఐదు గ్రామాల ప్రజలు జాతీయ రహదారిపై బైఠాయించారు. గురువారం అంబటివలస, బిల్లలవలస, నెలివాడ, గరుడుబిల్లి, రోళ్లవాక గ్రామాలకు చెందిన ప్రజలు, ఉపాధ్యాయులు, విద్యార్థులు బైఠాయించి నినాదాలతో నిరసన వ్యక్తం చేశారు. ఈ సందర్బంగా సర్పంచ్ సూరినాయుడు మాట్లాడుతూ రాజకీయ పార్టీల స్వలాభం కోసం రాష్ట్రాన్ని రెండు ముక్కలుగా చేయడం ఎంత వరకు సమంజసమని ఆయన ప్రశ్నించారు. అలాగే ఆయా గ్రామాలకు చెందిన ఉపాధ్యాయులు నల్లబ్యాడ్జీలు దరించి నిరసన వ్యక్తం చేశారు. 3న ఎమ్మెల్యే బొత్స అప్పలనర్సయ్య ఇంటిని ముట్టడించనున్నట్టు తెలిపారు. కార్యక్రమంలో సన్యాసప్పడు, విద్యార్థులు, ఉపాధ్యాయులు పాల్గొన్నారు.
‘ముఖ్యమంత్రి రాజీనామా చేయాలి
విజయనగరం, ఆగస్టు 1: సమైక్యాంధ్ర కోసం ముఖ్యమంత్రి కిరణ్‌కుమార్‌రెడ్డి, పిసిసి అధ్యక్షుడు బొత్స సత్యనారాయణ, టిడిపి నేత చంద్రబాబునాయుడు తమ పదవులకు రాజీనామా చేయాలని ఎపి రెవెన్యూ సర్వీసెస్ అసోసియేషన్ రాష్ట్ర నాయకుడు పేడాడ జనార్థనరావు డిమాండ్ చేశారు. సమైక్యాంధ్ర ఉద్యమాన్ని ముమ్మరం చేసేందుకు ముఖ్య నేతలు తమ పదవులకు రాజీనామా చేయాలని డిమాండ్ చేశారు. యూటీఎఫ్ నేత శివవర్మ మాట్లాడుతూ రాష్ట్రాన్ని దుర్మారంగా రెండుగా విడదీసారని ఆగ్రహం వ్యక్తం చేశారు. ఉత్తరాంధ్ర ప్రజలు దీనిని తీవ్రంగా ఖండిస్తున్నామని చెప్పారు. విద్య, వైద్య, విద్యుత్, ఇతర వౌలిక వసతులు కల్పించడంలో పూర్తిగా నష్టపోయే పరిస్థితి ఏర్పడిందన్నారు. రాష్ట్రాన్ని సమైక్యంగా ఉంచేవరకు ఈ పోరాటం కొనసాగుతుందన్నారు.
పోలీసుల నిఘా నీడలో తిప్పలవలస
డెంకాడ, ఆగస్టు 1 : పూసపాటిరేగ మండలం తిప్పలవలస గ్రామంలో మూడో రోజు గురువారం కూడా పోలీసు పహారా ఉండడంతో గ్రామంలో కర్ఫ్యు వాతావరణ నెలకొంది. ఎటవంటి అలజడులు జరగకుండా 37 మందితో గ్రామంలో పోలీసు బందోబస్తు నిర్వహిస్తున్నారు. స్థానికులు ఇళ్లలకు తాళాలు వేసి ఇతర ప్రాంతాలకు తరలిపోతున్నారు. అనుమానం ఉన్న వారిని పోలీసులు అదుపులోకి తీసుకుంటన్నారు. పాఠశాలలకు కూడా విద్యార్ధులు ఎవ్వరూ వెళ్లకుపోవడంతో ఉపాధ్యాయులు ఖాళీ గడపాల్సి వస్తుంది. గత నాలుగు రోజుల క్రింద జరిగిన అల్లర్లలో 50 మందిని పోలీసులు అదుపులోకి తీసుకున్నారు. మరలా గురువారం మరో నలుగురిని కూడా అదుపులోకి తీసుకుని రిమాండ్‌కు తరలించినట్లు ఎస్సై రామారావు తెలిపారు.
సమైక్యాంధ్రపై అశోక్ నోరు మెదపలేదేం?
విజయనగరం, ఆగస్టు 1: రాష్ట్ర విభజన అంశం డిల్లీ పెద్దలది, మా అభిప్రాయం తెలపకుండానే తీసుకున్న నిర్ణయమది అని ఎమ్మెల్సీ కోలగట్ల వీరభద్రస్వామి అన్నారు. గురువారం తన స్వగృహంలో ఏర్పాటు చేసిన విలేఖరుల సమావేశంలో ఆయన మాట్లాడుతూ రాష్ట్ర విభజనను వ్యతిరేకిస్తూ పట్టణంలో బంద్ పాటించిన విషయాన్ని ఆయన గుర్తు చేశారు. సమైక్యాంధ్రకు మద్దతుగా టిడిపి, బీజేపి, సిపిఎం, ఇతర పార్టీలు రాష్ట్ర విభజనపట్ల స్పందించలేదన్న విమర్శించారు. తన వ్యక్తిగత అభిప్రాయం మేరకు సమైక్యాంధ్రపై స్పందించినట్టు తెలిపారు. 2008లో టిడిపి నేత చంద్రబాబునాయుడు తెలంగాణా ఏర్పాటుపై తీర్మానం చేసిన ఏ విధంగా ఇపుడు రైలురోకో చేశారని ఆయన ప్రశ్నించారు. జిల్లా ప్రజలకు ధైర్యం చెప్పాల్సిన టిడిపి నేత ఆ బాధ్యతను మరచి హైదరాబాద్ ఎలా వెళ్లిపోయారని ఆయన ప్రశ్నించారు. దీనిపై జిల్లా ప్రజలకు సమాధానం చెప్పాలన్నారు. రాష్ట్ర ప్రజల సంక్షేమమే ముఖ్యమని, మమ్మల్ని రాజకీయంగా అప్రతిష్టపాలు చేయరాదని హితవు పలికారు.