ధీరజ్, పద్మినీ నటీనటులుగా ఆశారామ్ క్రియేషన్స్ బ్యానర్‌పై దీపక్ న్యాతి దర్శక నిర్మాతగా రూ పొందుతున్న చిత్రం ‘విచక్షణ’. దివ్య సమర్పకురాలు. జగన్నాథ్ సెంధి సంగీతాన్ని అందించిన ఈ చిత్రం పాటలను ప్రసాద్ ల్యాబ్‌లో ఆదిత్యా మూజిక్ ద్వారా విడుదల చేశారు. తెలంగాణ ఫిలిం ఛాంబర్ అధ్యక్షులు విజయేంద్రరెడ్డి ఆడియో సీడీలను ఆవిష్కరించి, తొలి సీడీని రమేష్ పుప్పాల అందజేశారు. అనంతరం దర్శకుడు దీపక్ న్యాతి మాట్లాడుతూ- 30 ఏళ్లుగా దర్శకత్వశాఖలో అనుభవం ఉంది. ఆ ధైర్యంతోనే తొలి ప్రయత్నంగా ఈ చిత్రం తీశాను. సమాజంలో చెడును తొలగించడానికి అవినీతిపై యువత చేసే పోరాటమే ‘విచక్షణ’ చిత్రం. చక్కని సందేశంతోపాటు, యాక్షన్, కామెడీ, లవ్ అన్నీ ఉన్నాయి. అంతా కొత్తవారితో చేస్తున్న చిత్రమిది. సంగీత దర్శకుడు ఆరు చక్కని పాటలిచ్చారు. అవుట్‌పుట్ కూడా బాగా వచ్చింది. ప్రేక్షకుల్ని ఆకట్టుకునే చిత్రమవుతుంది. సినిమా తీసుకున్న ఏ డిస్ట్రిబ్యూటర్ కూడా నష్టపోరని నమ్మకంగా చెప్పగలను అని అన్నారు. హీరో ధీరజ్ మాట్లాడుతూ- చక్కని కథకు మంచి టీమ్‌తో పనిచేశాను. తప్పకుండా ప్రేక్షకాదరణ పొందుతుందని అన్నారు. హీరోయిన్ పద్మినీ మాట్లాడుతూ విచక్షణాయుతంగా ఉండే చిత్రమిది. లవ్, కామెడీ, యాక్షన్, మెసేజ్ అన్నీ ఉన్న చిత్రంతో కథానాయికగా పరిచయమవుతున్నందుకు ఆనందంగా ఉంది అని తెలిపారు. ఈ కార్యక్రమంలో తమ్మారెడ్డి భరద్వాజ, ప్రసన్నకుమార్, విజయేంద్రరెడ్డి, అల్లాణిశ్రీ్ధర్ తదితరులతోపాటు చిత్ర యూనిట్ సభ్యులు పాల్గొన్నారు. ఉషారాణి, జయలక్ష్మి, రహుల్, నందేశ్వర్‌గౌడ్ తదితరులు నటిస్తున్న ఈ చిత్రానికి కెమెరా:డి.కె.నాగరాజ్, సంగీతం: జగన్నాధ్ సెంధి, ఎడిటర్: మోహన్ రామారావు, సహ నిర్మాత :రాజేంద్ర.