గోరంట్ల, ఏప్రిల్ 15: మండల పరిధిలోని మిషన్‌తండా వద్ద జాతీయ రహదారిపై ఆదివారం జరిగిన రోడ్డు ప్రమాదంలో లక్ష్మమ్మ (60) మృతి చెందింది. లక్ష్మమ్మ పెనుకొండ మండల పరిధిలోని అమ్మవారిపల్లి నుండి ఆటోలో పాలసముద్రం వస్తుండగా మిషన్‌తండా సమీపంలో ఆటో రోడ్డుపై డివైడర్‌ను ఢీకొని బోల్తా పడింది. ఈ ప్రమాదంలో లక్ష్మమ్మ అక్కడికక్కడే మృతి చెందగా మరో ఇద్దరు తీవ్రంగా గాయపడ్డారు. గాయపడ్డవారిని అనంతపురం ప్రభుత్వాసుపత్రికి తరలించారు.
గుర్తుతెలియని
వాహనం ఢీకొని వ్యక్తి మృతి
కదిరి రూరల్, ఏప్రిల్ 15 : పట్టణ శివార్లలోని వెలుగు కార్యాలయం వద్ద గుర్తుతెలియని వాహనం ఢీకొని ఒడిసి మండలం బసప్పగారి పల్లికి చెందిన చల్లా ఆదినారాయణ (40) మృతి చెందాడు. కదిరి మండలం కుంట్లపల్లి వద్ద ఒక శుభకార్యానికి హాజరయ్యేందుకు వెలుగు కార్యాలయంవద్ద వున్న వీవర్స్ కాలనీకి వచ్చి రోడ్డు దాటుతుండగా ప్రమాదం జరిగింది. మృతినికి భార్య, ఒక కుమార్తె ఉన్నారు. ప్రమాదంపై పట్టణ పోలీసులు కేసు నమోదు చేసుకొని మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు.