గోపీరెడ్డి కథానాయకుడిగా సన్‌గ్రేస్ మూవీస్ పతాకంపై నిర్మిస్తున్న చిత్రం ‘స్టూడెంట్ స్టార్’. ఎ.రాజ్.కె.ఎస్ గోపి దర్శకత్వంలో శివకుమార్‌రెడ్డి ఎం. ఈ చిత్రాన్ని రూపొందిస్తున్నారు. శనివారం ఉదయం హైదరాబాద్ అన్నపూర్ణ స్టూడియోలో ఈ చిత్రానికి సంబంధించిన తొలి సన్నివేశాన్ని చిత్రీకరించారు. దర్శకుడు దాసరి నారాయణరావు క్లాప్ ఇచ్చి, తొలి సన్నివేశానికి గౌరవ దర్శకత్వం చేశారు. సుకుమార్ స్విచాన్ చేశారు. ఈ సందర్భంగా ఏర్పాటుచేసిన పాత్రికేయుల సమావేశంలో చిత్ర కథానాయకుడు, దర్శకుడు మాట్లాడుతూ డిఫరెంట్ కథతో ఈ చిత్రాన్ని నిర్మిస్తున్నామని, నెల్లూరులో మే 5నుండి షూటింగ్ ప్రారంభిస్తామని తెలిపారు. ఈ తరం విద్యార్థులు ఎలా వుంటున్నారు? వారి అభిప్రాయాలు చివరికి ఏ తీరాలకు వెళుతున్నాయి అనే అంశంతో లవ్, యాక్షన్, ఎంటర్‌టైనర్‌గా ఈ చిత్రాన్ని నిర్మిస్తున్నామని ఆయన వివరించారు. ఈ కార్యక్రమంలో నిర్మాత శివకుమార్‌రెడ్డి కిషోర్, రాము, పి.సి.రెడ్డి తదితరులు పాల్గొన్నారు.