నూతన తారలతో నందినీ ఫిలింస్ పతాకంపై నిర్మిస్తున్న చిత్రం ‘ప్రేమతో నువ్వు వస్తావని’. తోట కృష్ణ దర్శకత్వంలో ఎస్.వి.రావు ఈ చిత్రాన్ని నిర్మిస్తున్నారు. ప్రస్తుతం ఈ చిత్రం హైదరాబాద్ పరిసర ప్రాంతాలలో షూటింగ్ జరుపుకుంటోంది. సలీంపాండే, అర్చన, కృష్ణుడులపై పలు సన్నివేశాలను చిత్రీకరిస్తున్నారు. ఈ సందర్భంగా షూటింగ్ స్పాట్‌లో ఏర్పాటుచేసిన పాత్రికేయుల సమావేశంలో చిత్ర దర్శకుడు తోట కృష్ణ మాట్లాడుతూ పోలీస్ వ్యవస్థలో అవినీతి ఏ స్థాయిలో వుంది అనే అంశంతో ఈ చిత్రాన్ని నిర్మిస్తున్నామని, పోలీస్ కమీషనర్ దగ్గర వుండే డ్రైవర్ అవినీతితో కోట్లకు పడగెత్తిన అంశాన్ని ఈ చిత్రంలో చూపుతున్నామని, అర్చన డ్యూయల్ రోల్ చేస్తుండగా విలనీ షేడ్స్ వున్న హీరో పాత్రను సలీంపాండే చేస్తున్నారని, మొత్తం ఐదు పాటలు చిత్రంలో వుంటాయని వివరించారు. త్వరలో క్లైమాక్స్ చిత్రీకరణ ఉంటుందని దాంతో 80శాతం షూటింగ్ పూర్తవుతుందని నిర్మాత ఎస్.వి.రావు అన్నారు. జ్యోతి, జయప్రకాష్‌రెడ్డి, చంద్రమోహన్, జూ.రేలంగి, సుమన్‌శెట్టి, వైజాగ్ ప్రసాద్, రేఖారాణి తదితరులు నటిస్తున్న ఈ చిత్రానికి కెమెరా: శ్రీసాయి, నిర్మాత: ఎస్.వి.రావు, కథ, స్క్రీన్‌ప్లే, దర్శకత్వం: తోట కృష్ణ.