ఆమదాలవలస, జనవరి 10: గడిచిన నాలుగన్నరేళ్ల పాలనలో సుమారు రూ.226 కోట్లు ఖర్చుచేసి పట్టణాన్ని అభివృద్ధి చేశానని స్థానిక మున్సిపాల్టీ చైర్‌పర్సన్ తమ్మినేని గీత తెలిపారు. గురువారం పట్టణంలో గల వెంగళరావు కాలనీలో నిర్వహించిన జన్మభూమి- మా ఊరు గ్రామ సభలో మాట్లాడుతూ ఈ కాలనీలో పేద ప్రజల ఇళ్లు నిర్మాణాల నిమిత్తం ప్రభుత్వం రూ.2.35లక్షల రూపాలయను ఉచితంగా అందించిందని ఆమె తెలిపారు. డ్వాక్రా మహిళలకు రూ. 27లక్షలు, 93 గ్యాస్ కనెక్షన్‌లు, 147 తాగునీటి కుళాయి కనెక్షన్‌లు, 276 మందికి పెన్షన్‌లు మంజూరు చేశానని చైర్‌పర్సన్ గీత వివరించారు. రానున్న ఎన్నికల్లో పనిచేసే ప్రభుత్వానికి, ఆయా పార్టీ నాయకులను ప్రజలు విధిగా గెలిపించాలని చైర్‌పర్సన్ గీత కోరారు. ఈ కార్యక్రమంలో మున్సిపల్ కమీషనర్ బాలాజీ ప్రసాద్, వార్డ్ కౌన్సిలర్ రెడ్డి గౌరి, దేశం నాయకులు విద్యాసాగర్, బోర గోవిందరావు, రెడ్డి రాంబాబు తదితరులు పాల్గొన్నారు.
ప్రగతి, ప్రజాసేవే ఆశయం
మందస, జనవరి 10: అభివృద్ధి, సంక్షేమం రెండు కళ్లుగా రాష్ట్రాన్ని చంద్రబాబునాయుడు పాలిస్తుంటే ప్రగతి, ప్రజాసేవయే ఆశయంగా తాను పనిచేస్తున్నానని పలాస ఎమ్మెల్యే గౌతు శ్యామసుందరశివాజీ అన్నారు. గురువారం 6వ విడత జన్మభూమి-మా ఊరు కార్యక్రమంలో జిల్లుండలో ముఖ్యఅతిథిగా మాట్లాడారు. సీ ఎం చంద్రబాబునాయుడు 119 సంక్షేమ పథకాలు ప్రవేశపెట్టి ఆదరణ, చంద్రన్న పథకాలు నిరుద్యోగభృతి వంటివి కల్పించి ప్రజలకు ఆర్థికభరోసా కల్పించారన్నారు. ప్రతి పేదవాడికి ఆదుకునే లక్ష్యంగా టీడీపీ ప్రభుత్వం పనిచేస్తుందన్నారు. పలాస నియోజకవర్గంలో అభివృద్ధికి పెద్దపీట వేసామని, ప్రజల ఆదరాభిమానానికి అభివృద్ధి చేసి రుణం తీర్చుకుంటామన్నారు. పింఛన్లు,చంద్రన్నకానుకలను పంపిణీ చేసారు. ప్రజలు నుంచి అర్జీలను స్వీకరించారు. సొండిపూడి, భిన్నల, కొత్తపల్లిల్లో జన్మభూమి సభలు జరిగాయి. ఈ కార్యక్రమంలో ఎంపీపీ జయలక్ష్మి, జడ్పీటీసీ సవర కుమారి, ఎంపీడీవో రాజేశ్వరరావు, తహసీల్థార్ శ్యామసుందరావు, ఏ ఇలు శ్రీనివాస్, రాజేష్, పివో రంగలక్ష్మి, టీడీపీ నాయకులు తాతారావు, దుర్యోదన, లింగరాజు, దుర్వాసులు పాల్గొన్నారు.
సైబర్ నేరాలపై ప్రజలు అప్రమత్తంగా ఉండాలి
మందస, జనవరి 10: సైబర్ నేరాలు పట్ల ప్రజలకు అప్రమత్తం చేసే విధంగా విద్యార్థులు అవగాహన కల్పించాలని, సోషల్‌మీడియా జ్ఞాన సముపార్జన కోసం వినియోగించుకోవాలని మందస ఎస్ ఐ నాగరాజు అన్నారు. మందసలో గురువారం బాలిగాం ఆదిత్య డిగ్రీ కాలేజిల ఎన్ ఎస్ ఎస్ యూనిట్‌ల ఆధ్వర్యంలో జరిగిన సేవా శిబిరంలో మొక్కలు నాటడం, పర్యావరణం కాపాడడం ప్రతి ఒక్కరి బాధ్యత అని, వాహనదారులు రోడ్డు ప్రమాదాలకు గురికాకుండా హెల్మట్‌లు వాడుకోవాలన్నారు. విద్యార్థులు క్రమశిక్షణ, పట్టుదలతో విద్యను అభ్యసించి ఉన్నత శిఖరాలకు చేరుకోవాలన్నారు. ర్యాగింగ్‌కు పాల్పడితే జీవితం నాశనమవుతుందన్నారు. ప్రిన్సిపాల్ ప్రసాద్, ప్రవీణ్, పివోలు రవికుమార్, సోమేశ్వరరావు, టివి ఆర్ పాలిటెక్నికల్ కాలేజి ప్రిన్సిపాల్ నాగేశ్వరరావు పాల్గొన్నారు.
తిత్లీ పరిహారంపై అపోహాలు వద్దు: కలెక్టర్
సోంపేట, జనవరి 10: తిత్లీ పరిహారంపై అపోహాలు నమ్మవద్దు అని జిల్లా కలెక్టర్ ధనుంజయరెడ్డి బాధితులకు భరోసా ఇచ్చారు. అర్హులైన ప్రతి ఒక్కరికి ఇప్పటికే పరిహారం అందించడం జరిగిందని, ఇంకా 88 వేల మందికి ఇవ్వాల్సి ఉందని, పండుగలోపు సాధ్యమైనంతవరకు అందరికి పరిహారం అందేలా చర్యలు తీసుకుంటున్నట్లు తెలిపారు. పాలవలసలో ఎంపీటీసీ జానకమ్మ అధ్యక్షతన జరిగిన జన్మభూమి గ్రామసభలో ఆయన మాట్లాడారు. బాధితులు నుంచి వచ్చిన దరఖాస్తులన్నీ పరిశీలించామని, ఇప్పటిదాకా 3 లక్షల 81 వేల దరఖాస్తులు అందగా, వాటిలో 80 శాతం వరకు పరిహారం అందించడం జరిగిందని, మిగిలినవారికి పరిహారం అందిస్తామని, ఈ విషయంలో ఎవ్వరూ ఆందోళన చెందాల్సిన అవసరం లేదని భరోసా ఇచ్చారు. ఇంటింటికి నీటి కనెక్షన్‌లు ఇచ్చేందుకు పలాస, ఇచ్ఛాపురం నియోజకవర్గ పరిధిలో 510 కోట్ల రూపాయలు మంజూరయ్యాయని, ఈ కార్యక్రమం ఈ ఏడాదిలోపు పూర్తవుతుందన్నారు. గతంలో కన్నా 6వ విడత గ్రామసభల్లో ప్రజలు నుంచి వచ్చే దరఖాస్తులు తగ్గాయన్నారు. 16300 కొత్త పింఛన్లు మంజూరయ్యాయని, 14 లక్షల చెత్తసేకరణ డబ్బాలు అన్ని గ్రామాల్లోని ప్రజలకు అందిస్తామన్నారు. ప్రతి ఒక్కరూ మరుగుదొడ్లును నిర్మించుకోవాలని కోరారు. రైతులు కోసం మినీగోకులాలు జిల్లాలో 4500 మందికి మంజూరు చేసామన్నారు. అంతకుముందు అక్కడ ఏర్పాటు చేసిన స్టాల్స్‌ను పరిశీలించారు. రేషన్‌కార్డులు, చంద్రన్నకానుకలు, పింఛన్లును అందించారు. ఎంపీపీ శ్రీనివాసరావు, ప్రత్యేకాధికారి కరుణాకరరావు, ఎంపీడీవో ఈశ్వరమ్మ పాల్గొన్నారు.
పాఠశాలకు వాటర్‌ప్లాంట్ వితరణ
సోంపేట, జనవరి 10: మండలంలోని కర్తలపాలెం ఉన్నత పాఠశాలకు 20 వేల రూపాయలు విలువైన ఆర్‌వో వాటర్‌ప్లాంట్‌ను కొర్లాం ఎంపీటీసీ వెంకటరమణ ఆర్థికసహాయంతో ఏర్పాటు చేసారు. ఈ సందర్భంగా గ్రామస్తులు, పాఠశాల సిబ్బంది ఆయనను అభినందించారు.
దుస్తులు పంపిణీ
సోంపేట, జనవరి 10: జిల్లాలో క్రీడలకు 23 పాఠశాలలను ఎంపిక చేయగా, సోంపేట ఉన్నత పాఠశాల విద్యార్థులు ఖోఖో క్రీడకు ఎంపికైనారు. వారికి రాష్ట్ర స్పోర్ట్స్ అథారిటీ మంజూరుచేసిన 12 జతల క్రీడా దుస్తులను హెచ్ ఎం మల్లేశ్వరరావు, పి ఇటి తవిటయ్యల ఆధ్వర్యంలో అందజేసారు.
