నరసన్నపేట, జూన్ 27: ప్రభుత్వ పాఠశాలల ఖ్యాతిని, ఉన్నతిని పరిరక్షించడమే కాకుండా వాటి స్థాయిని పెంచాలని కలెక్టర్ సౌరభ్‌గౌర్ సూచించారు. గురువారం మండలంలో సుందరాపురం జిల్లా పరిషత్ హైస్కూల్‌లో రాష్ట్రీయ మాధ్యమిక విద్యా అభియాన్ ఏర్పాటు చేసిన సమావేశానికి ఆయన ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ జిల్లాలో ఉన్న సుమారు 300 పాఠశాలలకు పైగా పాఠశాలల్లో విద్యార్థులను చేర్పించి ఉన్నత విద్యను అందించేందుకు తల్లిదండ్రులు సహాయ సహకారాలు అందించాలని కోరారు. ప్రస్తుతం కార్పొరేట్ స్కూళ్లలో పల్లలను చేర్పించేందుకు తల్లిదండ్రులు ఆసక్తి చూపడం దురదృష్టకరమని పేర్కొన్నారు. ప్రభుత్వ పాఠశాలల్లో విద్యార్థులు తమ చదువుల పట్ల ఆసక్తి చూపించడంతోపాటు ఉత్తమ ఫలితాలను సాధిస్తున్నారన్నారు. ఆ దిశగానే జిల్లాలో 53 జెడ్పీ హైస్కూల్‌లలో ఈ ఏడాది జరిగిన పదోతరగతి పరీక్షల్లో శతశాతం ఉత్తీర్ణత సాధించారన్నారు. ప్రభుత్వపాఠశాలల్లో ఉత్తమమైన విద్యను అందిస్తున్నారనడానికి ఇది నిదర్శనమన్నారు. దీనికి సంబంధించి ఉత్తమ ఫలితాలు సాధించిన 30 మంది పదోతరగతి విద్యార్థులకు ప్రతిభా పురస్కారాలు అందిస్తున్నామని చెప్పారు. ప్రభుత్వ పాఠశాలల్లో మెరుగైన వౌళిక సదుపాయాలు కల్పించేందుకు కృషిచేస్తున్నామని స్పష్టంచేసారు. గత ఏడాది 80 కోట్ల రూపాయలతో పాఠశాలల్లో అదనపు తరగతి భవనాలు నిర్మించామని, ఈ ఏడాది మరో 137 కోట్ల రూపాయలతో అదనపు తరగతి భవనాల నిర్మాణాలు చేపడుతున్నామన్నారు. అలాగే జిల్లాలో 18 మోడల్ స్కూల్స్ ఉన్నాయని, ఆయా పాఠశాలల్లో సుమారు 20 వేల మందికి పైగా విద్యార్థులకు ప్రవేశం కల్పించామని చెప్పారు. దీనికి సంబంధించి సిబిఎస్‌ఇ సిలబస్ ప్రకారం ఆంగ్లబోధనను కూడా అందిస్తున్నామని వెల్లడించారు. బాలికల వసతిగృహాల కోసం ఈ ఏడాది 2.50 కోట్ల రూపాయలు మంజూరయ్యాయన్నారు. ప్రభుత్వ పాఠశాలలో ప్రస్తుతం మూడున్నర లక్షల మంది విద్యార్థులు విద్యనభ్యసిస్తున్నారన్నారు. పదోతరగతిలో శతశాతం సాధించిన పాఠశాలలకు ‘విజయం’ పేరిట పతాకాన్ని అందించామన్నారు. అనంతరం విజయం పతాకాన్ని ఆయన ఆవిష్కరించారు. అలాగే తల్లిదండ్రులచే ఒప్పంద పత్రాలపై సంతకాలు చేయించారు. ప్రధానోపాధ్యాయుడు శ్రీనివాసరావుతోపాటు పాఠశాల ఉపాధ్యాయులను ఆయన సన్మానించారు. ఈ కార్యక్రమంలో డిప్యూటీ డి.ఇ.ఒ బలివాడ మల్లేశ్వరరావు తదితరులు పాల్గొన్నారు. ఆదర్శ విశ్వవిద్యాలయంగా తీర్చిదిద్దేందుకు కృషి *అంబేద్కర్ వర్సిటీ వ్యవస్థాపక దినోత్సవ ముగింపు సభలో కలెక్టర్ సౌరభ్‌గౌర్ ఎచ్చెర్ల, జూన్ 27: జిల్లాకు విద్యాఫలాలు అందిస్తున్న అంబేద్కర్ యూనివర్శిటీని మోడల్‌గా తీర్చిదిద్ది జాతీయ స్థాయిలో పేరు ప్రఖ్యాతలు సంపాదించేలా కృషిచేస్తానని కలెక్టర్ సౌరభ్‌గౌర్ పేర్కొన్నారు. ఐదేళ్లు పూర్తిచేసుకున్న సందర్భంగా యూనివర్శిటీలో నిర్వహిస్తున్న వ్యవస్థాపక దినోత్సవం కార్యక్రమం గురువారం ముగిసింది. ఈ కార్యక్రమానికి కలెక్టర్ ముఖ్యఅతిథిగా హాజరై మాట్లాడారు. పరిపాలనా దక్షత ఉన్న వైస్ ఛాన్సలర్ లజపతిరాయ్ వర్శిటీకి రావడం జిల్లా ప్రజల అదృష్టమన్నారు. సమర్ధవంతమైన సేవలందించేలా అనేక ప్రణాళికలతో ముందుకు సాగుతున్న వర్శిటీకి పూర్తి సహాయ సహకారాలందిస్తామన్నారు. విశ్వవిద్యాలయం డిగ్రీలిచ్చే కేంద్రంగా ఉండకూడదని, పరిశోధనలతో సమాజాభివృద్ధి ముందుకు సాగాలన్నారు. జిల్లాలో ఇప్పటికే పూరె్తైన ఆర్థిక గణన, జనగణనతోపాటు సామాజిక స్థితిగతులపై సేకరించిన వివరాల ఆధారంగా వర్శిటీ గ్రామీణ ప్రాంతాల్లో సేవలందించినట్లయితే ప్రభుత్వ పథకాలు సమర్ధవంతంగా అర్హులకు దక్కుతాయన్నారు. కార్యక్రమానికి అధ్యక్షత వహించిన విసి లజపతిరాయ్ మాట్లాడుతూ 20 సూత్రాలు పథకానికి ఇక్కడ విభాగాలను అనుసంధానం చేసి జిల్లా అభివృద్ధికి మరింత కృషిచేస్తామన్నారు. ఎమ్మెల్యే కృష్ణదాస్ మాట్లాడుతూ సమాజంలో రుగ్మతలను పారద్రోలేందుకు త్రికరణ శుద్ధితో వర్శిటీ అధ్యాపకులు, విద్యార్థులను భాగస్వాములను చేస్తూ కృషిచేయాలన్నారు. ఎమ్మెల్సీ పీరుకట్ల విశ్వప్రసాద్ మాజీ పార్లమెంటు సభ్యులు కణితి విశ్వనాధం మాట్లాడుతూ డిగ్రీలతో సరిపెట్టుకోకుండా ఉన్నత ఉద్యోగాలు పొందిననాడే వర్శిటీకి మంచి భవిష్యత్ ఉంటుందని స్పష్టంచేసారు. ఈ కార్యక్రమంలో డిసిఎంఎస్ చైర్మన్ గొండు కృష్ణమూర్తి, వైఎస్సార్ కాంగ్రెస్ పార్టీ జిల్లా కన్వీనర్ ధర్మాన పద్మప్రియ, యువజన విభాగం జిల్లా అధ్యక్షులు హనుమంతు కిరణ్‌కుమార్, రిజిస్ట్రార్ వి.కృష్ణమోహన్, ప్రిన్సిపాల్ ఎం.చంద్రయ్య, సిడిసి డీన్ జి.తులసీరావు తదితరులు పాల్గొన్నారు. ఈ సందర్భంగా భారతీ రమేష్ ఆలపించిన సినీగేయాలు పలువురిని ఆకట్టుకున్నాయి. అంబేద్కర్ ఖ్యాతిని ఇనుమడింపజేసేలా దుక్కు గురునాయుడు ఆలపించిన గేయం అలరించింది. గోల్డ్‌మెడల్‌కు విరాళాలు వర్సిటీలో అత్యధిక మార్కులు సాధించిన విద్యార్థులకు గోల్డ్‌మెడల్ అందించేందుకు కావాల్సిన మొత్తాన్ని విరాళాల రూపంలో సేకరించేందుకు వీసీ శ్రీకారం చుట్టారు. దీనిపై స్పందించిన ఎమ్మెల్యే కృష్ణదాస్ తన సోదరుడు వాసు పేరిట లక్ష రూపాయలు ప్రకటించారు. అలాగే డిసిఎంఎస్ చైర్మన్ గొండు కృష్ణమూర్తి, ఎమ్మెల్సీ పీరుకట్ల విశ్వప్రసాద్‌లు చెరో లక్ష రూపాయలు అందిస్తామని వెల్లడించారు. ఇదిలా ఉండగా వర్శిటీ అభివృద్ధికి విజయనగరం ఎంపి బొత్స ఝాన్సీలక్ష్మీ, ఎమ్మెల్యేలు మీసాల నీలకంఠంనాయుడు, కొర్ల భారతిలు ఐదు లక్షల రూపాయలు వంతున విరాళాలు అందిస్తామని ప్రకటించారు. అలాగే దివంగత కేంద్ర మాజీమంత్రి కింజరాపు ఎర్రన్నాయుడు తనయుడు రామ్మోహన్‌నాయుడు గోల్డ్‌మెడల్ కోసం ఇప్పటికే లక్ష రూపాయలు మొత్తాన్ని వీసీకి అందించేందుకు ముందుకు వచ్చిన తెలిసిందే. వస్తామనుకోలేదు సైన్యం ఆదుకుంది స్వస్థలాలకు చేరుకున్న చార్‌ధామ్ యాత్రికులు ఇంకా చేరాల్సింది 47మంది కవిటి/ఇచ్ఛాపురం/పాతశ్రీకాకుళం, జూన్ 27: ఉత్తరాఖండ్‌లో చార్‌ధామ్ యాత్రకు వెళ్లి వరదలకు చిక్కుకున్న యాత్రికులు బుధవారం అర్థరాత్రి క్షేమంగా తమ స్వస్థలాలకు చేరుకున్నారు. సుమారు వారం రోజుల పాటు బిక్కు బిక్కు మంటూ ప్రాణాలు అరచేతిలో పెట్టుకుని జీవించామని, తిరిగి స్వస్థలాలకు వస్తామనుకోలేదని వివరించారు. కాగా, తమ వారి వివరాలు తెలియక క్షణమొక యుగంలా గడిపిన వారి కుటుంబసభ్యులు వారి రాకతో ఊపిరిపీల్చుకున్నారు. గత నెల 29న కవిటి కొత్తూరుకు చెందిన దవలపు అప్పారావుతో పాటు నలుగురు కుటుంబసభ్యులు, కవిటికి చెందిన ఢిల్లేశ్వరమ్మ, రాజులమ్మ,శివశంకర్, జాడుపుడికి చెందిన మరో ముగ్గురు చార్‌ధామ్‌కు యాత్రకు వెళ్లారు. ఈ నెల 18 వరదల్లో చిక్కుకున్న వీరు అనంతరం ఆర్మీ శిబిరంలో తలదాచుకున్నారు. ఆర్మీ, టిడిపి సహాయంలో బుధవారం అర్ధరాత్రి వారంతా క్షేమంగా ఇంటికి చేరుకున్నారు. ఈ సందర్భంగా బాధితులు మాట్లాడుతూ వరద ప్రాంతానికి టిడిపి అధ్యక్షుడు చంద్రబాబు నాయుడు వచ్చి తమపై చూపిన అభిమానాన్ని మరువలేమన్నారు. ప్రభుత్వ, ప్రతిపక్షాలకు చెందిన నేతలు తమ ముందే కొట్లాటకు దిగడంతో కాస్తా భయపడ్డామని, కానీ తమ గ్రామ దేవత చింతామణి తల్లి ఆశీస్సులతో ఇళ్లకు చేరుకున్నామని తెలిపారు. బాధితులను పలు పార్టీలకు చెందిన నేతలు పరామర్శించారు. అవస్థలు పడి ఇంటికి చేరిన కేదారినాద్ యాత్రికులు ఇచ్ఛాపురం పట్టణం, మండలానికి చెందిన 11 మంది కేదారినాథ యాత్రికులు అష్టకష్టాలు పడి గురువారం తమ ఇళ్లకు చేరారు. తీవ్రమైన వరదలు కారణంగా తీవ్ర అవస్థలు పడ్డామని స్వగ్రామానికి చేరుకున్న్ల యాత్రికులు ముకుందరావు, వి.సావిత్రి, దేశమ్మ, శేషమ్మ, వరలక్ష్మి, డి.లీలమ్మ, డి.ఉమా, బొడ్డకాళికి చెందిన సాయి కనకమ్మ, రత్నాలు తెలిపారు. కేదారినాద్ నుండి తిరిగి వస్తుండగా వరద తీవ్రత పెరిగిందని, దీంతో అక్కడ లాడ్జిలో వారం రోజుల పాటు తలదాచుకున్నామని వారు వివరించారు. మిలట్రీ, టిడిపి నాయకుల సహకారంతో హెలికాప్టర్, బస్సులు, విమానాల ద్వారా విశాఖపట్నానికి చేరి, అక్కడ నుండి స్వగ్రామానికి చేరుకున్నట్లు చెప్పారు. చేరాల్సింది 47 మంది యాత్రికులు చార్‌ధామ్ యాత్రకు వెళ్లిన సిక్కోలు వాసులు ఇంకా 47 మంది చేరాల్సి ఉందని అధికారులు చెబుతున్నారు. ఇప్పటివరకు అందిన వివరాల మేరకు పలాస, లావేరు, పోలాకి, సంతబొమ్మాళి, టెక్కలి, కోటబొమ్మాళి, నరసన్నపేటలకు చెందిన 28 మంది రెడ్డిట్రావెల్స్‌లో మరో నాలుగురోజుల్లో జిల్లాకు చేరుకోనున్నారు. వీరు ప్రస్తుతం కాశీలో ఇతర పుణ్యక్షేత్రాలను సందర్శిస్తున్నారు. అలాగే పాలకొండ, నరసన్నపేట, శ్రీకాకుళాలకు చెందిన 17 మంది డొమెస్టిక్ ట్రావెల్స్‌లో ప్రస్తుతం ఒడిశాకు చేరుకున్నారు. వీరు శనివారానికి సిక్కోలుకు చేరుకుంటారు. ఇదిలా ఉండగా విజయలక్ష్మీ ట్రావెల్స్‌లో బయలుదేరిన శ్రీకాకుళం పట్టణానికి చెదిన ఇద్దరు చార్‌ధామ్ యాత్రను ముగించుకుని ప్రస్తుతం గుజరాత్‌లో ఉన్నట్లు సమాచారం. వీరు జూలై ఐదవ తేదీన జిల్లాకు చేరుకోనున్నట్లు తెలిసింది. ‘గజ’ వణుకు ఏజెన్సీలో తిష్ట వేసిన ఏనుగులు ధ్వంసమవుతున్న పంటలు, తోటలు ఖరీఫ్‌పై గిరిజనులు వెనుకడుగు ఆర్థికంగా నష్టపోయామంటూ గిరిపుత్రులు ఆవేదన సీతంపేట,జూన్ 27:ఒడిశా రాష్ట్రం నుండి విజయనగరం జిల్లా మీదుగా సీతంపేట ఏజెన్సీలో ప్రవేశించిన గజరాజులు గిరిజనుల బతుకులపై కోలుకొలేని దెబ్బతీస్తున్నాయి. ఏనుగులు ఈ ప్రాంతానికి వచ్చి సుమారుగా ఐదేళ్లు గడుస్తున్నప్పటికి సమస్యకు ప్రభుత్వం శాశ్వత పరిష్కారం చూపడంలో విఫలం చెందిందనే చెప్పాలి. ఏనుగులను తరలించడంలో ప్రభుత్వం విఫలంకావడంతో ఆ ప్రభావం గిరిజనుల జీవనంపై పడింది. కాయ, కష్టం, కొండపోడు వ్యవసాయం చేస్తే కాని బతుకు సాగని పరిస్థితిలో ఉండే గిరిపుత్రులకు ఏనుగులు సవాల్‌గా నిలిచాయి. చెమటోడ్చి పండించే పంటలను గజరాజులు ధ్వంసంచేస్తున్నాయి. వాణిజ్య పంటలైన జీడి, మామిడి, అరటి, పనస తోటలను కూడా సర్వనాశనం చేసి గిరిజనులను కోలుకోలేని స్థితిలోకి నెట్టుతున్నాయి. గత ఐదేళ్లుగా ఇదే పరిస్థితి పునరావృతం కావడంతో గిరిజనులు నిస్సాహాయ స్థితిలో కొట్టుమిట్టాడుతున్నారు. గడచిన రెండు నెలలుగా పులిపుట్టి, హడ్డుబంగి పంచాయతీల పరిధి ముకుందాపురం, కె గుమ్మడ, ఆనపకాయలగూడ, ఇప్పగూడ, వెంపలగూడ, పులిపుట్టి గ్రామాల సమీపంలో సంచరిస్తున్న ఏనుగులు పంటల పై దాడి చేసి గిరిజనులకు తీవ్ర నష్టాన్ని మిగిల్చాయి. పంటలకు నష్టపరిహారం చెల్లించాలని గిరిజనులు డిమాండ్ చేస్తున్నప్పటికీ వారి మొర అరణ్య రోదనగానే మిగిలింది. అంతే కాకుండా తరచూ తమ గ్రామాల సమీపంలో సంచరిస్తున్న ఏనుగుల నుండి తమకు రక్షణ కల్పించేందుకు సోలార్‌లైట్లు ఏర్పాటు చేయాలని పదే పదే కోరితే ఎట్టకేలకు సోలార్‌లైట్లను పంపిణి చేసారని పులిపుట్టి పంచాయతీ మాజీ సర్పంచ్ సవరతోట మొఖలింగం తెలిపారు. ఖరీఫ్‌పై గజరాజుల ప్రభావం ఏజెన్సీలో గిరిజనులు పండించే పంటల్లో ప్రధానమైనది పంట వరి. ఈ ఖరీఫ్ సీజన్‌లో దుక్కులు దున్ని,నాట్లు వేసే పరిస్థితి ఉంది. అయితే ఏనుగుల భయంతో గిరిజనులు ఈ ఏడాది వరినాట్లు వేసేందుకు భయపడుతున్నారు.అప్పులు చేసి వరి పంట పండించినప్పటికీ ఏనుగులు పంటను ఎక్కడ నాశనం చేస్తాయోనని గిరిజనులు ఆందోళన చెందుతున్నారు.గతంలో ఏనుగులు కొండ ఎగువభాగాన సంచరించేవని అయితే గడచిన మూడు నెలలుగా సీతంపేట ఏజెన్సీలో స్వైరవిహారం చేస్తు పంటలను నాశనం చేస్తున్నాయని గిరిజనులు ఆవేదన వ్యక్తం చేస్తున్నారు. చెందుతున్నారు.ఏనుగుల సమస్యకు ప్రభుత్వం శాశ్వత పరిష్కారం చూపి తమ మనుగడను కాపాడాలని గిరిజనులు కోరుతున్నారు. ఏనుగుల సంచారానికి అనుకూల ప్రదేశం విశాలమైన అటవీప్రాంతం, తినేందుకు నచ్చిన పంటలు, తాగేందుకు ఊటజలాలు, గెడ్డలు కారణంగా ఈ ప్రాంతంలో గజరాజులు తిష్టవేశాయి. వీటికి తోడు భీకరమైన పొదలు, కొండ ప్రాంతం గజరాజుల సంచారానికి అనుకూలంగా ఈ ప్రాంతం మారింది. ఏనుగుల కారిడార్‌కు ప్రతిపాదన సీతంపేట, పాలకొండ, వీరఘట్టం మండలాల్లో సంచరిస్తున్న ఏనుగులను ఈ ప్రాంతంలోనే ఉంచి, ఏనుగుల కారిడార్ ఏర్పాటుకు సంబంధించి అటవీశాఖ ప్రతిపాదనలు సిద్ధం చేసింది.అయితే దీని పై గిరిజనుల నుండి తీవ్ర వ్యతిరేకత రావడంతో ఆ ప్రతిపాదనను తాత్కాలికంగా విరమించుకున్నారు.అయితే ఏనుగులను ఈ ప్రాంతం నుండి తరలించకపోతే గిరిజనుల జీవనం రానున్న రోజుల్లో ప్రశ్నార్ధకంగా మారే అవకాశం ఉంది. చార్‌ధామ్ యాత్రికులను ఆదుకోవడమే ధ్యేయం * టిడిపి నేత రామ్మోహన్‌నాయుడు నరసన్నపేట, జూన్ 27: ఉత్తరాఖండ్‌లో విపత్తుకు సంబంధించి రాష్ట్రానికి చెందిన యాత్రికులను ప్రభుత్వం ఆదుకోవాలని తెలుగుదేశం పార్టీ పార్లమెంటరీ నియోజకవర్గ ఇన్‌చార్జి కింజరాపు రామ్మోహన్‌నాయుడు డిమాండ్ చేశారు. ఉత్తరాఖండ్ నుండి తిరుగుముఖం పట్టిన మండలంలో కరగాం గ్రామ వాసులను ఆయన గురువారం పరామర్శించారు. ఈ సందర్భంగా ఆయన మాట్లాడుతూ వేలాది మంది ఆంధ్రావాసులు ఉత్తరాఖాండ్‌లో పలు ప్రాంతాల్లోనేటివరకు చిక్కుకుని ఉన్నారన్నారు. సంఘటన జరిగిన పదిరోజులైనా ప్రభుత్వం మాత్రం పూర్తిస్థాయిలో ఎటువంటి చర్యలు తీసుకోకపోవడం విచారకరమన్నారు. తమ పార్టీ తరపున సేవ చేసేందుకు యాత్రికులను ఆదుకునేందుకు ప్రయత్నం చేస్తుంటే కొంతమంది కాంగ్రెస్ నాయకులు వాటిని అడ్డుకుని వారి నీచ సంస్కృతిని చాటుకున్నారని ఎద్దేవా చేశారు. ఏదిఏమైనా చంద్రబాబు ఆధ్వర్యంలో యాత్రికులను రక్షించేందుకు తమవంతు కృషిచేస్తున్నామన్నారు. ఈ కార్యక్రమంలో బగ్గు రమణమూర్తి, బలగ నాగేశ్వరరావు, చింతు పాపారావు తదితరులు పాల్గొన్నారు. యాత్రికులను ఆదుకోవాలి శ్రీకాకుళం: కేంద్ర, రాష్ట్ర ప్రభుత్వాలు చార్‌ధామ్ యాత్రికులను ఆదుకోవాలని భారతస్వాభిమాన్ ట్రస్టు అధ్యక్షుడు శ్రీనివాసానంద సరస్వతీ ప్రభుత్వాన్ని కోరారు. ఎన్‌జిఒ హోమ్‌లో గురువారం ఏర్పాటు చేసిన విలేఖరుల సమావేశంలో ఆయన మాట్లాడారు. ఆంధ్రా యాత్రికుల కోసం రాష్ట్ర ప్రభుత్వం తక్షణ చర్యలు చేపట్టాలన్నారు. వరదలలో చిక్కుకున్న కొంతమంది తెలుగువారు జాడ కానరాలేదని పేర్కొన్నారు. అన్ని రాష్ట్రాల ముఖ్యమంత్రులు స్పందించి సహాయక చర్యలు చేపట్టినప్పటికీ ఆంధ్రప్రదేశ్ ముఖ్యమంత్రి మాత్రం నిమ్మకునీరెత్తినట్లు వ్యవహరిస్తున్నారన్నారు. ఎ.పి.్భవన్‌లో బుధవారం జరిగిన సంఘటనలో రాష్ట్ర గౌరవాన్ని కాంగ్రెస్ నాయకులు మంటగలిపారన్నారు. ప్రజల కోసం ఏ పార్టీ సాయం చేస్తే వారిని స్వాగతించాలే తప్ప విమర్శలు మానుకోవాలన్నారు. కాంగ్రెస్ నేతలు బేస్ క్యాంపులకు ఎవరైనా వెళ్లారా అని ప్రశ్నించారు. వైఎస్సార్ కాంగ్రెస్ పార్టీ నాయకుడు ఎన్ని ధనుంజయ్‌రావు, బిజెపి రాష్ట్ర కార్యవర్గ సభ్యురాలు శవ్వాన ఉమామహేశ్వరిలు మాట్లాడుతూ కేంద్ర, రాష్ట్ర ప్రభుత్వాలు యాత్రికులను ఆదుకోవాలని డిమాండ్ చేశారు. వైఎస్సార్‌సీపీ తరపున వైద్య బృందాలు ఏర్పాటు చేశామని, సొంత ప్రయోజనాలకు పాటుపడలేదన్నారు. కాంగ్రెస్ చర్యలను తీవ్రంగా ప్రతిఘటించారు. ఈ సమావేశంలో సూరి చంద్రశేఖర్, శిమ్మ వెంకట్రావు, అప్పలరాజు తదితరులు ఉన్నారు. స్థూల ఆదాయంపై క్షేత్ర పరిశీలన * ఆరవ ఆర్థిక గణన పూర్తి * జిల్లా గణాంక శాఖాధికారి లక్ష్మణరావు నరసన్నపేట, జూన్ 27: జిల్లాలో రాష్ట్ర స్థూల ఆదాయం కోసం క్షేత్ర పరిశీలనను చేపడుతున్నామని జిల్లా గణాంక శాఖాధికారి లక్ష్మణరావు తెలిపారు. గురువారం తహశీల్దార్ కార్యాలయానికి విచ్చేసిన ఆయన విలేఖరులతో మాట్లాడారు. ప్రభుత్వ ఆదేశాల మేరకు ప్రతీ ఒక్క ఆదాయ వనరుల నుండి స్థూల ఆదాయం ఏ మేరకు ఉంటుందోనన్న దానిపై పరిశీలన చేస్తున్నామన్నారు. దీనికి సంబంధించి కోఆపరేటివ్, కంపెనీల చట్టం, కార్మిక చట్టం, చిన్నతరహా పరిశ్రమలకు సంబంధించి జిల్లాలో వివరాలు సేకరిస్తున్నామని చెప్పారు. వీటి వివరాలు వచ్చిన తరువాత కేంద్రానికి నివేదిక పంపిస్తామన్నారు. అలాగే ఆరవ ఆర్థిక గణనకు సంబంధించి క్షేత్రస్థాయిలో పరిశీలన పూరె్తైందని, దీనిపై కోడింగ్, పరిశీలన చేయాల్సి ఉందని వెల్లడించారు. ఈ ఏడాది అనుకున్న మేరకు అధిక వర్షపాతం నమోదవుతుందని 19 శాతం మేర అధికంగా ఈనెలలో వర్షాలు పడ్డాయని తెలిపారు. 23 మండలాల్లో అధిక వర్షపాతం నమోదు కాగా 12 మండలాల్లో సాధారణ వర్షపాతం నమోదైందన్నారు. జిల్లాలో సహాయ గణాంకాధికారుల పోస్టులు 20 ఖాళీగా ఉన్నాయని, ప్రస్తుతం 13 మంది విధులు నిర్వహిస్తున్నారన్నారు. ఈయన వెంట డిప్టూటీ ఎస్.ఒ వెంకటరమణ, తహశీల్దార్ ఎం.వి.రమణ, ఎ.ఎస్.ఒ రమణమూర్తిలు పాల్గొన్నారు. పిజి సెమిస్టర్ ఫలితాలు విడుదల ఎచ్చెర్ల, జూన్ 27: పి.జి. మొదట సెమిస్టర్ ఫలితాలను అంబేద్కర్ యూనివర్శిటీ వైస్ ఛాన్సలర్ హనుమంతు లజపతిరాయ్ గురువారం విడుదల చేశారు. ఆయన ఛాంబర్‌లో ఎం.బి.ఏ, ఎం.సి.ఏ, ఎల్.ఎల్.బి, కోర్సులకు సంబంధించిన సెమిస్టరీ ఫలితాల సీడీని విడుదల చేసారు. ఎం.బి.ఏ కోర్సుకు సంబంధించి 54 మంది పరీక్షకు హాజరు కాగా 44 మంది ఉత్తీర్ణులై 84.48 శాతం సాధించారు. ఎం.సి.ఏ కోర్సుకు తొమ్మిది మంది హాజరు కాగా ఏడుగురు పాసై 78.78 శాతం ఉత్తీర్ణులయ్యారు. ఎల్.ఎల్.బి మూడవ సంవత్సరం పరీక్షలో 43 మంది హాజరు కాగా 23 మంది ఉత్తీర్ణులై 58.14 శాతం సాధించారు. ఎల్.ఎల్.బి ఐదవ సంవత్సరం ఏడుగురు పరీక్షకు హాజరు కాగా ఒక్కరే పాసై 14.29 శాతం ఉత్తీర్ణులయ్యారు. ఈ కార్యక్రమంలో రిజిస్ట్రార్ వి.కృష్ణమోహన్, కంట్రోలర్ ఆఫ్ ఎగ్జామినర్ చిరంజీవులు ఉన్నారు. రిమ్స్‌లో మొక్కలు నాటే కార్యక్రమం * ప్రారంభించిన మాజీ మంత్రి ధర్మాన శ్రీకాకుళం, జూన్ 27: మొక్కలు పెంచడం ద్వారా పర్యావరణాన్ని కాపాడినవారమవుతామని మాజీ మంత్రి ధర్మాన ప్రసాదరావు పేర్కొన్నారు. గురువారం ఇక్కడి రాజీవ్‌గాంధీ ఇనిస్టిట్యూట్ ఆఫ్ మెడికల్ సైన్స్ (రిమ్స్)లో జిల్లా కలెక్టర్ సౌరభ్‌గౌర్‌తో కలిసి మొక్కలునాటే కార్యక్రంలో ఆయన పాల్గొన్నారు. ఈ సందర్భంగా మాట్లాడుతూ పట్టణంలో, వివిధ సంస్థల్లో మొక్కలు ఉంటే జీవం ఉట్టుపడుతూ సుందరంగా అగుపిస్తుందన్నారు. రిమ్స్‌లో 15 వందల మొక్కలు నాటే కార్యక్రమానికి కలెక్టర్, రిమ్స్ డైరెక్టర్ చర్యలు తీసుకోవడం అభినందనీయమన్నారు. మొక్కలు నాటే కార్యక్రమంలో రిమ్స్ అందరికీ ఆదర్శప్రాయం కావాలని ఆకాంక్షించారు. అలాగే వైద్య కళాశాలకు అనుబంధంగా నర్శింగ్ కళాశాల మంజూరైనందున, త్వరలోనే నర్శింగ్ కళాశాల ఏర్పాటు కానుందన్నారు. . రిమ్స్‌లో నాటిన మొక్కలను విద్యార్ధులు పరిరక్షించుకోవాలని, తద్వారా పచ్చదనాన్ని పెంపొందించుకోవాలని సూచించారు. మొక్కలకు అవసరమైన సుమారు 73 ట్రీ గార్డులను ట్రైమాక్స్ సంస్థ రిమ్స్‌కు అందజేసింది. కార్యక్రమంలో రిమ్స్ డైరెక్టర్ టి.జయరాజ్, సూపరింటెండెంటు ఆర్.అరవింద్, డాక్టర్ సంపత్‌కుమార్, డాక్టర్ తిరుపతిరావు, ఏఆర్‌ఎంవో అప్పలనాయుడు, డిసిసి అధ్యక్షుడు నర్తు నరేంద్రయాదవ్, పురపాలక సంఘం మాజీ చైర్మెన్ ఎం.వి.పద్మావతి, చల్లా అలివేలుమంగ, తదితరులు పాల్గొన్నారు. ఆడపిల్ల పుడితే భయపడనవసరం లేదు మంత్రి కోండ్రు మురళీమోహన్ వంగర, జూన్ 27: మండలంలో కొత్తపేట, శ్రీహరిపురం, బాగెంపేట, నీలాయిపేట, పట్టువర్థనం, మడ్డువలస, శివ్వాం, వంగర, వాణి ,మగ్గూరు, సంగాం గ్రామాల్లో మంత్రి కోండ్రు మురళీమోహన్ గురువారం పర్యటించారు. దేవకి వాడ పంచాయతీలో ఆయన మాట్లాడుతూ ప్రభుత్వం బంగారుతల్లి పథకం ఆడపిల్లలకోసం ప్రవేశపెట్టిందని, ఇకపై ఆడపిల్ల పుట్టినా భయపడాల్సిన పనిలేదన్నారు. అమ్మాయి పుట్టిన వెంటనే 3500రూపాయలు, ఇంటర్ వరకు చదివితే 50వేలు, డిగ్రీ వరకు చదివితే ఒక లక్ష రూపాయలు ప్రభుత్వం అందజేస్తుందని తెలిపారు. దేవకివాడ గ్రామస్థులు ఇళ్ళ స్థలాలు, కింజంగినుండి దేవకి వాడ , బాగెంపేట నుండి కొత్తపేట వరకు రహదారి సౌకర్యం కల్పించాలని, ప్రాజెక్టులో నీటి మట్టం 64మీటర్ల లెవల్ ఉండే విధంగా చూడాలని మంత్రిని స్థానికులు కోరారు. మూడు గ్రామాలకు నూతనంగా సిసి రహదారులు, డ్రైనేజిలు నిర్మించి మోడల్ గ్రామాలుగా తీర్చిదిద్దుతామని ఆయన హామీ ఇచ్చారు. అలాగే మడ్డువలస, బాగెంపేట గ్రామాల్లో సిసి రహదారులను ప్రారంభించారు. ఈ కార్యక్రమంలో ఆర్డీ ఒ బి.దయానిధి, బొత్స వాసునాయుడు, బొక్కేల సత్యంనాయుడు, కర్రి గోవిందరావు, డిసిసిబి వైస్ చైర్మన్ ధర్మారావు తదితరులు పాల్గొన్నారు.

విశాఖపట్నం, జూన్ 27: ముంచుకొస్తున్న స్థానిక సంస్థల ఎన్నికలు విపక్ష తెలుగుదేశం పార్టీలో కదలికను తెస్తున్నాయి. మరో పక్షం రోజుల్లో స్థానిక సంస్థల ఎన్నికలకు సంబంధించి నోటిఫికేషన్ వెలువడే అవకాశాలు కన్పిస్తున్నాయి. ఇప్పటికే పంచాయతీ ఎన్నికలకు సంబంధించి రిజర్వేషన్ల ప్రక్రియను ప్రభుత్వం పూర్తి చేసింది. ఉత్తరఖండ్ ఉపద్రవం నేపధ్యంలో కొంతమేర సమయం తీసుకున్నప్పటికీ త్వరలోనే స్థానిక సంస్థలకు ఎన్నికలు నిర్వహించాలని ప్రభుత్వం భావిస్తోంది. సాధారణ ఎన్నికలకు సన్నాహకంగా భావించే స్థానిక ఎన్నికల్లో పైచేయి సాధించాలని అన్ని రాజకీయ పార్టీలు సన్నద్ధ మవుతున్నాయి. ఈనేపధ్యంలో తొలుత పంచాయతీ, తర్వాత మండల, జిల్లా పరిషత్‌లకు జరిగే ఎన్నికల్లో అత్యధిక స్థానాలు కైవసం చేసుకునేందుకు పార్టీలు వ్యూహాలను సిద్ధం చేసుకుంటున్నాయి. స్థానిక సంస్థల ఎన్నికలకు సంబంధించి తెలుగుదేశం పార్టీ ఇప్పటికే విజయావకాశాలను భేరీజు వేసుకుంటోంది. తెలుగుదేశం పార్టీ అధినేత చంద్రబాబు నాయుడు జిల్లాలవో జరిపిన పాదయాత్ర ఉపకరిస్తుందని అంచనావేస్తున్నారు. గ్రామీణ ప్రాంతాల్లో అధినేత పాదయాత్రకు పెద్ద ఎత్తున స్పందన రావడం, ఇదే సమయంలో అధికార కాంగ్రెస్‌పై ప్రజల్లో వ్యతిరేకత స్పష్టంగా కన్పించడం తెదేపా వర్గాలను సంతోషానికి గురిచేస్తోంది. ఇక వైఎస్సార్ కాంగ్రెస్ పార్టీ తమ విజయావకాశాలను దెబ్బతీస్తుందని భావించినప్పటికీ ఆపార్టీలో కూడా అంతర్గత కుమ్ములాటలు తమకే లాభిస్తాయని తెదేపా అంచనావేస్తోంది. ఇదే సందర్భంలో కలసికట్టుగా పనిచేస్తే విజయం తధ్యమన్న భావన కన్పిస్తోంది. అయితే స్థానిక ఎన్నికల్లో రాజకీయంగా పరిస్థితి ఆశాజనకంగా ఉన్నప్పటికీ పోటీచేసే అభ్యర్థుల ఆర్థిక అవసరాలను కొంతమేరైనా భరించాలని సీనియర్‌లు సూచిస్తున్నారు. ఇదే సందర్భంలో పార్టీ తరపున రానున్న లోక్‌సభ, శాసనసభ ఎన్నికల్లో పోటీ చేసే అభ్యర్థులు స్థానిక ఎన్నికల్లో అభ్యర్థుల ఆర్థిక భారాన్ని భరించాలని అధినేతకు మొరపెట్టుకుంటున్నారు. ఇన్‌ఛార్జ్‌లుగా బాధ్యతలు నిర్వహిస్తున్న వారు స్థానిక ఎన్నికల్లో అభ్యర్థులను గెలిపించుకుంటే సాధారణ ఎన్నికల్లో అక్కరకు వస్తారని పేర్కొంటున్నారు. ఈ విషయాన్ని అధినేత దృష్టికి తీసుకువచ్చేందుకు కొంతమంది పార్టీ ప్రతినిధులు ఇప్పటికే లేఖలు రాసినట్టు తెలుస్తోంది. ఇన్‌ఛార్జ్‌లుగా నియోజకవర్గాల్లో చక్రం తిప్పుతున్న వారు ఎన్నికల సమయంలో సొంత నిధులు కొంతమేరైనా అభ్యర్థుల కోసం ఖర్చు చేయాలని లేనిపక్షంలో అధికార పార్టీని నిలువరించలేమన్నది వీరి భావన. ఇదిలా ఉండగా జిల్లాలో 15 అసెంబ్లీ సెగ్మెంట్లు ఉండగా, గ్రామీణ ప్రాంతంలోనే తొమ్మిది నియోజకవర్గాలున్నాయి. గ్రామీణ విశాఖలో పాయకరావుపేట, అనకాపల్లి, పాడేరు, భీమునిపట్నం నియోజకవర్గాలకు ఇప్పటికీ ఇన్‌ఛార్జ్‌లు లేరు. వీటిలో కొన్ని నియోజకవర్గాలకు కమిటీలను నియమించారు. వీరిలో కూడా కొంతమేర సమన్వయం తక్కువగానే ఉంది. ఈ అంశాలన్నీ క్రోఢీకరిస్తూ అధినేత దృష్టికి తీసుకెళ్లినట్టు తెలుస్తోంది. ప్రస్తుతం ఉత్తరఖండ్ విపత్తు, బాధితులకు సహాయం అందించే విషయంలో బిజీగా ఉన్న అధినేత చంద్రబాబు, ఇకమీదట స్థానిక ఎన్నికలపై దృష్టిపెట్టనున్నట్టు పార్టీ ప్రతినిధులు పేర్కొంటున్నారు. నేడు సామూహిక అక్షరాభ్యాసాలు * కనకమహాలక్ష్మి అమ్మవారి దేవస్థానంలో ఏర్పాట్లు విశాఖపట్నం, జూన్ 27: శ్రీకనకమహాలక్ష్మి అమ్మవారి దేవస్థానంలో శుక్రవారం సామూహిక అక్షరాభ్యాసాలను నిర్వహించేందుకు ఏర్పాట్లు పూర్తయ్యాయని ఆలయ కార్యనిర్వాహణ అధికారి డి భ్రమరాంబ తెలిపారు. దేవాదాయ ధర్మాదాయ శాఖ, కనకమహాలక్ష్మి అమ్మవారి దేవస్థానం సంయుక్తంగా ఈకార్యక్రమాన్ని నిర్వహిస్తున్నట్టు ఆమె తెలిపారు. కార్యక్రమంలో భాగంగా అక్షరాభ్యాసం చేయించేందుకు పేర్లను నమోదు చేసుకున్న వారు ఉదయం 9 గంటలకు హాజరుకావాలన్నారు. అక్షరాభ్యాసానికి అవసరమయ్యే సామాగ్రి దేవస్థానం సమకూరుస్తుందని తెలిపారు. జిల్లాకో క్రీడా పాఠశాల * కేంద్రం యోచన విశాఖపట్నం, జూన్ 27: గ్రామీణ స్థాయిలో క్రీడలను ప్రోత్సహించే చర్యల్లో భాగంగా జిల్లాకో క్రీడా పాఠశాల ఏర్పాటు చేయాలని కేంద్ర ప్రభుత్వం యోచిస్తోంది. కేంద్ర ప్రభుత్వ ఆర్థిక సాయంతో ఏర్పాటయ్యే క్రీడా పాఠశాలకు సంబంధించి ఇప్పటికే ప్రతిపాదనలు పూర్తయ్యాయి. గ్రామీణ స్థాయి విద్యార్థుల్లో క్రీడల పట్ల ఆసక్తిగల వారిని గుర్తించడంతో పాటు వారు కోరుకునే క్రీడాంశాల్లో శిక్షణ ఇచ్చేందుకు ఉద్దేశించిన ఈ కార్యక్రమం త్వరలోనే ప్రారంభం కానుంది. కేంద్ర ప్రభుత్వం నిధులు సమకూర్చగా రాష్ట్ర ప్రభుత్వం తన వాటాగా కొంతమేర నిధులను వెచ్చించాల్సి ఉంటుంది. వీటి నిర్వహణపై ప్రస్తుతం రెండు ప్రతిపాదనలు ఉన్నాయి. కేంద్రం 80 శాతం, రాష్ట్రప్రభుత్వం 20 శాతం నిధులను నిర్వహణ నిమిత్తం వెచ్చించాల్సి ఉంటుంది. మరో ప్రతిపాదనలో కేంద్రం 60 శాతం, రాష్ట్రం 40 శాతం నిధులు వెచ్చించాలి. దీనికి సంబంధించి జిల్లా కలెక్టర్ కోఆర్డినేటర్‌గా వ్యవహరిస్తారు. ఇప్పటికే కేంద్ర ప్రభుత్వం పైకా పేరిట గ్రామీణ ప్రాంతాల్లోని పాఠశాల విద్యార్థులకు క్రీడా పోటీలను నిర్వహిస్తోంది. ప్రతి ఏటా పైకా క్రీడల పోటీలను పాఠశాల, మండల, డివిజన్, జిల్లా, రాష్ట్ర స్థాయిలో నిర్వహిస్తున్నారు. అయితే క్రీడా పోటీల నిర్వహణకే పరిమితం కాకుండా గ్రామీణ ప్రాంతాల్లో క్రీడాకారులను గుర్తించి వారికి శిక్షణను ఇవ్వడంతో పాటు జాతీయ, అంతర్జాతీయ స్థాయి స్థాయిలో రాణించే విధంగా వారిని ప్రోత్సహించడమే క్రీడా పాఠశాలల లక్ష్యం. జిల్లా క్రీడాభివృద్ధి అధికారి సారథ్యంలో క్రీడా పాఠశాల ఎంపిక జరుగుతుంది. ప్రతిపాదనలకు జిల్లా కలెక్టర్ ఆమోదముద్ర వేసిన తర్వాత పాఠశాల ఏర్పాటు ప్రక్రియ పూర్తవుతుంది. విశాఖ జిల్లాకు సంబంధించి క్రీడా పాఠశాల ఏర్పాటు ఏర్పాటు విషయమంలో సమగ్ర పథక నివేదిక (డిపిఆర్)ను సిద్ధం చేయాల్సిందిగా విశాఖ జిల్లా కలెక్టర్ శేషాద్రి, విశాఖ నగరాభివృద్ధి సంస్థ (వుడా) విసిని కోరారు. పాఠశాల ఎంపిక ప్రక్రియ పూర్తిచేసిన మీదట నివేదికను తయారు చేసేందుకు సిద్ధంగా ఉన్నామని విసి యువరాజ్ ఆంధ్రభూమి కి తెలిపారు. కాళ్లరిగిపోతున్నాయి * విడుదల కాని ఎమ్మెల్సీ ఎన్నికల నిధులు విశాఖపట్నం, జూన్ 27: ఎన్నికల తంతు పూర్తయి నెల్లు గడిచిపోయింది. గెలిచిన వారు ఎమ్మెల్సీలుగా అన్ని సదుపాయాలు అందుకుంటున్నారు. ఎన్నికల్లో విధులు నిర్వహించిన వారు, ఎన్నికలకు సంబంధించి వసతులు, సదుపాయాలు సమకూర్చిన వారు మాత్రం అలోలక్ష్మణా అంటూ అలమటిస్తున్నారు. ఈఏడాది ప్రారంభంలో ఉత్తరాంధ్ర ఉపాధ్యాయ నియోజకవర్గానికి ఎన్నిక నిర్వహించారు. నోటిఫికేషన్ వెలువడిన దగ్గర్నుంచి ఎన్నికల తంతు పూర్తయ్యే వరకూ వసతి, రవాణా, భోజన సదుపాయం వంటి వాటితో పాటు ఎన్నికల విధులు నిర్వహించిన సిబ్బందికి భత్యం చెల్లించాల్సి ఉంది. దాదాపు 25 లక్షల రూపాయల మేర ఎమ్మెల్సీ ఎన్నికల ఖర్చులు చెల్లింపులకు నోచుకోలేదు. ఎన్నికల విధులు నిర్వహించిన సిబ్బందికి జీతభత్యాలతో పాటు ఎన్నికల విధులకు సంబంధించి ప్రైవేటు ట్రాన్స్‌పోర్టు ఆపరేటర్లకు అద్దెలు, భోజనాలు సమకూర్చిన వారు ఇప్పటికీ చెల్లింపులకోసం కాళ్లరిగేలా తిరుగుతున్నారు. దీనికి సంబంధించి నిధులు విడులైనప్పటికీ ఖజానా నుంచి చెల్లింపులు మాత్రం జరగలేదు. నిధుల ఫ్రీజింగ్ వల్ల చెల్లింపులు జరగలేదని అధికార వర్గాలు పేర్కొంటున్నాయి. ఏదేమైనప్పటికీ ఎమ్మెల్సీ ఎన్నికల చెల్లింపుల విషయంలో అధికారులు చేస్తున్న తాత్సారం ఉద్యోగ వర్గాల్లో అసంతృప్తిని రేకెత్తిస్తోంది. జగనన్న వస్తేనే బాధల నుండి విముక్తి పాదయాత్రలో షర్మిల రావికమతం, జూన్ 27: ఎడాపెడా పన్నుల బారంతో అప్పులు ఊబిల్లో కూరుకుపోయిన ఆడ పడుచులకు జగనన్న రాకతోనే రుణ విముక్తులవుతారని స్వర్గీయ రాజశేఖరరెడ్డి కుమార్తె షర్మిల భరోసా ఇచ్చారు. మరో ప్రజాప్రస్ధానంలో భాగంగా మండలంలో కొత్తకోటలో గురువారం రాత్రి ఆమె కిక్కిరిసిన జన సందోహం మధ్య ప్రసంగించారు. ఐదేళ్ళ వై. ఎస్. పాలనతో ఒక్క రూపాయి కూడా పన్నులు భారం పెంచని సి. ఎం.గా వై. ఎస్. చరిత్రకెక్కారన్నారు. ప్రస్తుత కిరణ్‌కుమార్ పాలనలో గ్యాస్ , విద్యుత్ , ఎరువులు, నిత్యావసర వస్తువులతో పాటు ఆర్టీసి ఛార్జీలు సైతం ఎడాపెడా పెంచారని ఆమె విమర్శించారు. దీంతో అన్ని వర్గాల వారు అప్పుల ఊబిలో కూరుకుపోయారని ఆవేదన వ్యక్తం చేసారు. ఇటువంటి దుర్మార్గపు ప్రభుత్వంపై అవిశ్వాసం పెడితే చంద్రబాబు మద్దతుతో బయడి పడినందున మరో ఏడాది ఈ భారాలు ప్రజలు మోయక తప్పదని ఆమె తెలిపారు. వ్యవసాయం దండగన్న బాబుకు అధికారం ఇస్తే రైతులను పురుగుల్లా చూస్తారని జోస్యం చెప్పారు. ఫ్రస్తుత అస్తవ్యస్థ పాలనను గాడిలో పెడతానని గొప్పలు చెబుతున్న బాబు తన పాలనలో అన్ని వర్గాల వారిని విస్మరించారని, సంక్షేమ పధకాలు దండుగన్నారని గుర్తు చేసారు. మరో సారి బాబు అధికారంలోకి వస్తే రాష్ట్రం అదోగతి పాలవుతుందని ఆందోళన వ్యక్తం చేసారు. జగనన్న ముఖ్యమంత్రి అయిన పక్షంలో వై. ఎస్. సంక్షేమ పధకాలు సమర్ధవంతంగా అమలు చేయడంతో పాటు ప్రాధమిక విద్య నుండి డిగ్రీ స్థాయి విద్య వరకు నెలనెలా 500 నుంచి రెండువేల వరకు ఉపకార వేతనాలను మంజూరు చేస్తారని భరోసా ఇచ్చారు. పన్నులు భారం ఇక ఉండదని ఆమె హామీ ఇచ్చారు. మత్సవానిపాలెంలో రాత్రి బస కొత్తకోట, దొండపూడి మీదుగా మత్స్యవానిపాలెం చేరుకున్న షర్మిల ఇక్కడ తూనిక కేంద్రం వద్ద ఏర్పాటు చేసిన విడిదిలో బస చేసారు. కేంద్ర సర్వీసుకు కలెక్టర్ శేషాద్రి? విశాఖపట్నం, జూన్ 27: విశాఖ జిల్లా కలెక్టర్ వి.శేషాద్రి ఢిల్లీలో జరిగే ఇంటర్వ్యూకు గురువారం ఇక్కడి నుంచి బయలుదేరి వెళ్ళారు. ఇటీవల ఒకసారి వెళ్లాల్సి ఉన్నా, అది కాస్త వాయిదా పడింది. దీంతో మళ్ళీ ఇపుడు ఇంటర్వ్యూకు వెళ్ళే అవకాశం లభించింది. ఈ ఇంటర్వ్యూలో ఎంపిక అయితే కేంద్ర సేవల్లోకి ఈయన బదిలీ అవుతారు. కేంద్ర సేవల్లోకి వెళ్ళే అంశం గత ఏడాదికాలంగా పెండింగ్‌లో ఉంది. మొదటి నుంచి దీనికి వెళ్ళేందుకు కలెక్టర్ ఆసక్తి చూపుతున్నారు. అందువల్ల ఈ ఇంటర్వ్యూలో పాల్గొని శనివారం ఆయన తిరిగి విశాఖపట్నం చేరుకుంటారు. ఈ విధంగా కలెక్టర్ ఇంటర్వ్యూకు హాజరుకావడం రెవెన్యూ వర్గాల్లో చర్చనీయాంశమైంది. కేంద్ర సేవలకు వెళ్ళిపోతే కొత్త కలెక్టర్ ఎవరనేది ప్రశ్నగా మారింది. ఏడాది కూడా పూర్తికాకుండానే ఇక్కడ నుంచి బదిలీ చేస్తారా అనే సందేహాలు రెవెన్యూ వర్గాల నుంచి వ్యక్తమవుతున్నాయి. వచ్చిన కొద్దికాలంలోనే అనేక రకాలైన సంస్కరణలు తీసుకువచ్చిన కలెక్టర్ వి.శేషాద్రి జిల్లా ప్రజల మన్ననలు పొందగలిగారు. అన్నింటి కంటే ప్రధానంగా దాదాపు పది వేల ఎకరాల ప్రభుత్వ భూములను పరిరక్షించడం రెవెన్యూ చరిత్రలోనే ప్రథమం. ఎటువంటి సిఫారసులకు తలొగ్గకుండా ప్రభుత్వ నిబంధనలకనుగుణంగా వ్యవహరించిన కలెక్టర్ వంద రోజుల కార్యక్రమం ద్వారా పలు రకాల సమస్యల పరిష్కారించగలిగారు. నిత్యం ఎదుర్కొనే భూ సమస్యలు, జిల్లాలో తాగునీరు, ఏజేన్సీ ప్రాంతాల్లో సీజనల్ రోగాలను అరికట్టడం, పెద్దాసుపత్రిలో వౌలిక వసతులు మెరుగు, అక్రమాలకు చెక్ పెట్టే విధంగా తరచూ ఆకస్మీక తనిఖీలు, దీని అభివృద్ధి కోట్లాది రూపాయల నిధులు సాధించడం, ప్రతి సోమ,మంగళవారాల్లో ప్రజావాణి, డయల్ యువర్ ఆఫీసర్ కార్యక్రమాల ద్వారా అన్ని విభాగాల అధికారులతో సమీక్ష, ప్రజా సమస్యలపై వినతుల స్వీకరణ వంటివి చురుగ్గా నిర్వహిస్తున్న కలెక్టర్ జిల్లాలో ఇసుక అక్రమ రవాణాను అరికట్టగలిగారు. ఈ విధంగా పలు సంస్కరణలు తీసుకురాగలిగిన కలెక్టర్‌ను ప్రభుత్వం వదులుకోదనే వాదన రెవెన్యూ వర్గాల నుంచి వినిపిస్తోంది. ఏడాది పూర్తికాకుండానే బదిలీ చేస్తారా? అనే ఆలోచన వస్తోంది. పంచాయితీ ఎన్నికల నోటిఫికేషన్ విడుదలకు మరో అయిదు రోజులు పట్టే పరిస్థితులున్నాయి. ఇది విడుదలైతే కోడ్ వర్తిస్తున్నందున ఇక బదిలీ అయ్యే పరిస్థితి ఉండదని సంబంధిత వర్గాలు అంటున్నాయి. విశాఖ జిల్లా నుంచి 211 మంది యాత్రికులు * ఇళ్ళకు చేరిన 150 మంది * పుణ్యక్షేత్రాల సందర్శనలో 45 మంది క్షేమం విశాఖపట్నం, జూన్ 27: విశాఖ జిల్లా నుంచి ఉత్తరాఖండ్‌లో ఛార్‌దామ్‌కు వెళ్ళిన యాత్రికులు 211మంది ఉన్నట్టు జిల్లా యంత్రాంగం తేల్చింది. ఇందులో గత వారం రోజుల్లో 150 మంది యాత్రికులు తిరిగి ఇళ్ళకు చేరుకోగలిగారు. మరో 45 మంది యాత్రికులు క్షేమంగానే ఉన్నట్టు ఇక్కడి జిల్లా యంత్రాంగానికి సమాచారం అందింది. వీరంతా ప్రస్తుతం మరికొన్ని పుణ్యక్షేత్రాల సందర్శనలో ఉన్నట్టు తెలిసింది. మిగిలిన 16 మందిలో విశాఖకు చెందిన ఆరుగురు మృతి చెందగా, మరో పది మంది తప్పిపోగా, వీరిలో నలుగురి ఆచూకీ లభించింది. ఛారదామ్ వరదల్లో మృతి చెందిన కుటుంబాలకు లక్షన్నర వరకు ఎక్స్‌గ్రేషియాను ఇవ్వాలని నిర్ణయించగా, ఇందులో దారిద్య్రరేఖకు దిగువనున్న (బిపిఎల్) కుటుంబాలకు అపద్భుందు పథకం కింద మరో 50 వేల రూపాయలు అందజేయాలని జిల్లా యంత్రాంగం నిర్ణయించింది. ప్రభుత్వ ఆదేశాలపై నష్టపరిహారం వర్తింపు చేసేందుకు సంబంధితాధికారులు చర్యలు చేపట్టారు. కాగా ఛార్‌దామ్ వరదల్లో చిక్కుకున్న బాధితుల కుటుంబాలకు ఎప్పటికపుడు సమాచారం అందించేందుకుగాను కలెక్టరేట్‌లో హెల్ఫ్‌లైన్ సౌకర్యాన్ని కల్పించారు. ప్రతి ఇంటికి సంక్షేమ పథకం * మంత్రి గంటా శ్రీనివాసరావు నర్సీపట్నం,జూన్ 27: రాష్ట్ర ప్రభుత్వం అమలు చేస్తున్న పలు సంక్షేమ పధకాలు ప్రతీ ఇంటికి చేరాలనేదే ముఖ్యమంత్రి కిరణ్‌కుమార్‌రెడ్డి ధ్యేయమని రాష్ట్ర పెట్టుబడులు, వౌళిక వసతుల శాఖా మంత్రి గంటా శ్రీనివాసరావు అన్నారు. గురువారం ఆయన నియోజకవర్గంలోని మాకవరపాలెం, నర్సీపట్నం మండలాల్లో పర్యటించి పలు అభివృద్ధి పధకాలకు శంకుస్ధాపనలు, భూమి పూజలు ,ప్రారంభోత్సవాలు చేసారు. బూరుగుపాలెంలో పి.హెచ్.సి భవనాలను ప్రారంభించిన మంత్రి బూరుగుపాలెం - తూటిపాల మధ్య జాజిగెడ్డ వంతెనపై కోటి 20 లక్షలతో నిర్మించనున్న వంతెన నిర్మాణానికి భూమి పూజ చేసారు. కోటి 98 లక్షలతో చేపట్టే లచ్చన్నపాలెం, కుసర్లపూడి రోడ్డు పనులకు శంకుస్ధాపన చేసారు. అనంతరం వేములపూడిలో 4.5 కోట్లతో నిర్మించిన కస్తూరిభా గాంధీ బాలికా విద్యాలయాన్ని ప్రారంభించారు. ఈసందర్భంగా బూరుగుపాలెంలో జరిగిన బహిరంగ సభలో మంత్రి గంటా మాట్లాడుతూ ప్రజల అవసరాలను గుర్తిస్తూ వాటిని తీర్చేందుకు ముఖ్యమంత్రి పలు సంక్షేమ పధకాలను ప్రవేశపెడుతున్నారన్నారు. ఆడ పిల్లల కోసం బంగారుతల్లి పధకాన్ని ప్రవేశపెట్టి చట్టబద్దత కల్పించారన్నారు. ఎస్సీ, ఎస్టీ సబ్‌ఫ్లాన్, అమ్మహస్తం, ఇందిరమ్మ కలలు, పచ్చతోరణం వంటి పధకాలను అమలు చేస్తున్నట్లు వివరించారు. కుటుంబంలోని ప్రతీ వ్యక్తికి ప్రయోజనం చేకూర్చడమే ధ్యేయంగా పని చేస్తున్నట్లు పేర్కొన్నారు. సభకు అధ్యక్షత వహించిన స్థానిక ఎమ్మెల్యే బోళెం ముత్యాలపాప మాట్లాడుతూ ముఖ్యమంత్రి కిరణ్‌కుమార్‌రెడ్డి నర్సీపట్నం నియోజకవర్గంలో పర్యటించిన సందర్భంగా ఇచ్చిన హామీలన్నీ నిలబెట్టుకున్నారన్నారు. దీనిలో భాగంగానే వంతెన నిర్మాణాలను చేపడుతున్నామన్నారు. ఇది చేతల ప్రభుత్వమని గుర్తించాలని ప్రజలకు విజ్ఞప్తి చేసారు. ఈకార్యక్రమాల్లో యలమంచిలి ఎమ్మెల్యే కన్నబాబురాజు, గాజువాక ఎమ్మెల్యే చింతలపూడి వెంకటరామయ్య, ఎమ్మెల్సీ డి.వి. సూర్యనారాయణరాజు, డి.సి.సి.బి. చైర్మెన్ సుకుమారవర్మ, జిల్లా వైద్య ఆరోగ్యశాఖాధికారి డాక్టర్ శ్యామల, ఆర్డీవో వసంతరాయుడు, నియోజకవర్గం కాంగ్రెస్ పార్టీ ఇన్‌చార్జ్ బోళెం వెంకటరమణమూర్తి, పలువురు కాంగ్రెస్ నాయకులు, అధికారులు పాల్గొన్నారు. రూ.21 కోట్లతో మన్యంలో ఫైలట్ ప్రాజెక్టు అటవీ కన్జర్వేటర్ భరత్‌కుమార్ వెల్లడి అరకులోయ, జూన్ 27: మన్యంలో 21 కోట్ల రూపాయల నిధులతో గ్రీన్ ఇండియా మిషన్ ఫైలట్ ప్రాజెక్టు అమలుకు చర్యలు తీసుకుంటున్నట్టు విశాఖ సర్కిల్ అటవీశాఖ కన్జర్వేటర్ భరత్‌కుమార్ వెల్లడించారు. స్థానిక అటవీశాఖ అతిథిగృహంలో గురువారం విలేఖరుల సమావేశంలో ఆయన మాట్లాడుతూ పాడేరు డివిజన్ పరిధిలోని 23 వన సంరక్షణ సమితుల్లో ఈ ప్రాజెక్టు కింద పలు అభివృద్ధి పనులు చేపట్టనున్నామన్నారు. గిరిజన ప్రాంతంలో అటవీ అభివృద్ధి పనులు చేపట్టేందుకు కార్యచరణ ప్రణాళికను రూపొందించినట్టు చెప్పారు. మన్యం వ్యాప్తంగా పచ్చదనం వెల్లువిరిసేలా తీర్చదిద్దడమే గ్రీన్ ఇండియా మిషన్ ముఖ్య ఉద్దేశ్యమన్నారు. ఈ ప్రాజెక్టు అమలులో స్వచ్ఛంద సంస్థలను భాగస్వాములుగా చేయాలని నిర్ణయం తీసుకున్నట్టు ఆయన తెలిపారు. నదీ పరీవాహక ప్రాంతంలో ఎనిమిది కోట్ల రూపాయలతో రాష్ట్రీయ క్రిషి వికాస్ యోజన(ఆర్.కె.వి.వై.) ప్రాజెక్టు కింద వివిధ అభివృద్ధి పనులు చేపట్టనున్నట్టు చెప్పారు. సారవంతమైన భూసారాన్ని కాపాడేందుకు అరకులోయ, సీలేరు నదీ పరీవాహక ప్రాంతాల్లో భారీనిధులతో పనులు చేపడతామన్నారు. మొదటి ఏడాది ఐదు కోట్లు, రెండవ సంవత్సరం మూడు కోట్ల రూపాయల వంతున వెచ్చించాలని నిర్ణయం తీసుకున్నామన్నారు. విశాఖపట్నం, శ్రీకాకుళం, విజయనగరం జిల్లాల్లో మూడు పథకాల కింద నాలుగువేల ఎకరాల్లో ఎక్రోకార్పస్ మొక్కలు పెంచేందుకు చర్యలు తీసుకుంటున్నామన్నారు. సిల్వర్‌ఓక్ స్థానంలో ఈ సరికొత్త మేలురకం మొక్కల పెంపకానికి ప్రణాళికలు సిద్ధం చేసినట్టు తెలిపారు. పాడేరు డివిజన్‌లో పదిహేను వందల ఎకరాల్లో ఎక్రోకార్పస్ పెంచనున్నామన్నారు. ఇందుకు గానూ కాంఫ పథకం కింద 3.50 కోట్లు, 13వ ఫైనాల్స్ కింద ఒక కోటి, ఎఫ్.డి.ఎస్. కింద 50 లక్షలు చొప్పున ఖర్చు చేయనున్నట్టు తెలిపారు. ఏకో టూనిజం కింద గిరిసీమ పలు అభివృద్ధి పనులు చేపట్టేందుకు ప్రతిపాధనలు తయారు చేసి కేంద్ర ప్రభుత్వానికి పంపినట్టు ఆయన చెప్పారు. సమావేశంలో పాడేరు డి.ఆఫ్.ఒ. శాంతారాం, సబ్ డి.ఎఫ్.ఒ. జానకిరావు, రేంజ్ అధికారి పి.గంగరాజు, సెక్షన్ ఫారెస్టర్లు పాల్గొన్నారు. విశాఖకు మెట్రో రైలు ఏర్పాటుకు కృషి * రాజ్యసభ సభ్యులు డాక్టర్ టిఎస్సార్ విశాఖపట్నం, జూన్ 27: విశాఖలో భీమిలి, అనకాపల్లి విలీనానికి ఆమోదం లభించిన నేపధ్యంలో మెట్రోరైలు వ్యవస్థ ఏర్పాటుకు మరింత కృషి చేయనున్నట్టు రాజ్యసభ సభ్యులు డాక్టర్ టి.సుబ్బరామిరెడ్డి తెలిపారు. ఈ మేరకు ఆయన గురువారం ఓ ప్రకటన విడుదల చేశారు. విలీనంతో పట్టణాన్ని మరింత విస్తరించడానికి వీలుపడుతుందన్నారు. వౌలిక వసతుల కల్పనలో భాగంగా మెట్రోరైలు ఆవశ్యకత ఎంతైనా ఉందన్నారు. 20 లక్షలకు పైగా నగర జనాభా ఉన్న పరిస్థితుల్లో విలీనం ద్వారా పెరిగిన జనాభాకనుగుణంగా రవాణా సౌకర్యాలు పెంచాల్సి ఉందన్నారు. పారిశ్రామికంగా, పర్యాటకంగా అభివృద్ధి చెందుతోన్న విశాఖలో మెట్రో రైలు వ్యవస్థ ఏర్పాటు ద్వారా ఎంతో సౌలభ్యంగా ఉంటుందన్నారు. పరిశ్రమల్లో రెండు లక్షలు మందికి పైగా పనిచేస్తున్న దృష్ట్యా మెట్రో రైలు సాధనకు తన వంతుగా పూర్తిస్థాయిలో కృషి చేస్తారని, కేంద్ర పట్టణాభివృద్ధి మంత్రిత్వశాఖ ఉన్నతాధికారుల దృష్టికి ఈ విషయాన్ని తక్షణమే తీసుకువెళ్తున్నామన్నారు. విశాఖలో మెట్రో రైలు వ్యవస్థ ఏర్పటుకు సంబంధించి ఇప్పటికే తాను ఈ నెల 12వ తేదీన పట్టణాభివృద్ధి, వౌలిక సదుపాయాల మంత్రిత్వశాఖ సంయుక్త కార్యదర్శి ఎస్‌కె లోహియాకు లేఖ రాసినట్టు పేర్కొన్నారు. రైల్వేట్రాక్ మరమ్మతులతో రైళ్ళు రద్దు విశాఖపట్నం, జూన్ 27: ఈస్ట్‌కోస్ట్‌రైల్వే జోన్ పరిధిలో పలుచోట్ల రైల్వేట్రాక్‌కు సంబంధించి నిర్వహణ, మరమ్మతులు చేపడుతున్న కారణంగా వచ్చేనెల 6వ తేదీ నుంచి 22వరకు రెండు రైళ్ళను రద్దు చేస్తున్నట్టు వాల్తేరు డివిజన్ కమర్షియల్ విభాగం అధికారులు తెలిపారు. ఈ మేరకు గురువారం ఓ ప్రకటన విడుదల చేశారు. సంబల్‌పూర్-కోరాపుట్ (58301) మధ్య నడిచే రైలును, విశాఖ-రాయగడ-కోరాపుట్ మధ్య రైల్వే 58538, 58538నెంబర్ల రైలు ఈ తేదీల్లో రద్దుకానుంది. ఇవి కాకుండా విశాఖపట్నం-్భవనేశ్వర్ (18411) మధ్య నడిచే ఇంటర్‌సిటీ ఎక్స్‌ప్రెస్ ఖుర్ధా వరకే నడువనుంది. అక్కడి నుంచి తిరిగి బయలుదేరి విశాఖపట్నం వస్తుంది. ఆయా తేదీల్లో మార్పును గమనించి ప్రయాణికులు తమతో సహకరించాల్సిందిగా విజ్ఞప్తి చేశారు. రాష్ట్రాన్ని విభజిస్తే తీవ్ర పరిణామాలు * సమైక్యాంధ్ర విద్యార్థి జేఏసి విశాలాక్షినగర్, జూన్ 27: రాష్ట్రాన్ని ముక్కలు చేస్తే సమైక్యవాదులు చూస్తూ ఊరుకోరని సమైక్యాంధ్ర విద్యార్థి జెఏసి రాష్ట్ర కన్వీనర్ లగుడు గోవిందరావు హెచ్చరించారు. గురువారం ఆంధ్రవిశ్వవిద్యాలయం గాంధీ విగ్రహం వద్ద ప్లకార్డులతో నిరసన తెలిపారు. ఈ సందర్భంగా ఆయన మాట్లాడుతూ ఉద్యమ ముసుగులో రాష్ట్రాన్ని విడదీయాలని చూస్తే తీవ్ర పరిణామాలు తప్పవన్నారు. ప్రజాప్రతినిధులు రాష్ట్రం విడిపోకుండా సమైక్యంగా ఉండేందుకు కృషి చేయాలని కోరారు. ఈ నెల 29న 14 విశ్వవిద్యాలయాల్లో తెలంగాణ మంత్రుల దిష్టిబొమ్మలను దగ్ధం చేస్తామని హెచ్చరించారు. ఈ నెల 30న కాంగ్రెస్ రాష్ట్ర ఇన్‌చార్జ్ దిగ్విజయ్‌సింగ్‌కు వినతిపత్రం అందజేస్తామన్నారు. ఈ కార్యక్రమంలో రాష్ట్ర యువజన జెఏసి రాష్ట్ర చైర్మన్ ఆరేటి మహేష్, వికలాంగుల జెఏసి సురేశ్‌మీనన్, కో-కన్వీనర్లు ఆనంద్,నరేష్ సంతోష్,సందీప్‌లు పాల్గొన్నారు. ఎయుకు రూ.5 కోట్లతో పరిశోధనా ప్రాజెక్టు * డిసెంబర్‌లో స్నాతకోత్సవం విశాలాక్షినగర్, జూన్ 27: ఆంధ్రా విశ్వవిద్యాలయానికి ఐదు కోట్లతో పరిశోధనా ప్రాజెక్టు మంజూరైంది. ఈ మేరకు ఉత్తర్వులు వచ్చినట్లు వర్శిటీ ఉపకులపతి ఆచార్య జిఎస్‌ఎన్.రాజు తెలిపారు. గురువారం ఎయు సెనేట్ మందిరంలో ఏర్పాటు చేసిన విలేఖరుల సమావేవంలో ఆయన ఈ వివరాలు వెల్లడించారు. ఈ సందర్భంగా ఆయన మాట్లాడుతూ టిక్విన్ సహకారంతో వర్శిటీ ఇంజనీరింగ్ కళాశాలలో సెంటర్ ఫర్ ఎక్స్‌లెన్స్ ఇన్ ఇఎంఐ, ఇఎంసి కేంద్రాన్ని ఏర్పాటు చేస్తున్నామన్నారు. ఇంజనీరింగ్ కాలేజీ ప్రిన్సిపాల్‌గా పనిచేసినప్పుడు రూ.40 లక్షలతో పరిశోధనా కేంద్రం ప్రారంభమైందన్నారు. మూడేళ్ళ కాలపరిమితిలో ఐదుకోట్ల రూపాయల ప్రాజెక్టును నిర్వహిస్తామన్నారు. విసి రాజు పర్యవేక్షణలో ఎలక్ట్రోమేగ్నెటిక్ తరంగాలు, పరికరాలు తదితర అంశాల్లో పరిశోధనలు జరుగనున్నాయి. డిసెంబర్‌లో స్నాతకోత్సవం గత వారంలో వర్శిటీ విసి రాజు రాష్ట్ర గవర్నర్ నరసింహన్‌ను కలిసారు. దీనిపై విసి చర్చించారు. తేదీలు ఖరారు చేసి తెలుపాలని గవర్నర్ సూచించారు. దీనిపై సెనేట్ సమావేశంలో నిర్ణయం తీసుకోనున్నారు. సమీర్ పరిశోధన కేంద్రం రక్షణ సంబంధమైన రంగాలకు అవసరమైన పరిశోధనలు జరపడానికి మరో పరిశోధనా కేంద్రాన్ని ఏర్పాటు చేస్తున్నట్లు వర్శిటీ విసి ఆచార్య రాజు వెల్లడించారు. కేంద్ర ప్రభుత్వ సంస్థ సమీర్‌తో సంయుక్త పరిశోధనలు చేయనున్నారన్నారు. మరో పది కోట్ల రూపాయలతో పరిశోధనా కేంద్రాలు వర్శిటీలో ఏర్పాటు చేయనున్నామన్నారు. ఉద్యోగాల భర్తీకి కృషి వర్శిటీలో ఉద్యోగాల భర్తీకి కృషి చేస్తున్నట్లు ఎయు విసి రాజు తెలిపారు. బోధనా సిబ్బంది, వర్శిటీ ఆర్థిక పరిస్థ్థి, ఇతర అంశాలపై నగరానికి వచ్చిన సిఎం కిరణ్ వద్ద చర్చించినట్లు చెప్పారు. దీనికి సిఎం సానుకూలంగా స్పందించినట్లు వెల్లడించారు. వచ్చే నెలలో జరుగనున్న అంతర్జాతీయ సదస్సులో పాల్గొనడానికి కొరియా వెళ్ళనున్నట్లు పేర్కొన్నారు. కొరియా దేశంలోని విద్యావిధానం తీరుతెన్నులపై రాజు అధ్యయనం చేయనున్నారు. ఈ సమావేశంలో ఎయు రెక్టార్ ఆచార్య ఎవి.ప్రసాద్‌రావు, రిజిస్ట్రార్ ఆచార్య కట్టా రామ్మోహన్‌రావుతదితరులు పాల్గొన్నారు. సింహగిరి ప్రదక్షిణ ఏర్పాట్లపై సమావేశం సింహాచలం, జూన్ 27: శ్రీ వరాహలక్ష్మీనృసింహస్వామి వారి దేవస్థానంలో జూలై 21వ తేదీన సింహగిరి ప్రదక్షిణ, 22వ తేదీ ఆషాడపౌర్ణమి ఉత్సవ ఏర్పాట్లపై దేవస్థానం కార్యనిర్వాహణాధికారి కె.రామచంద్రమోహన్ గురువారం విభాగాధిపతులతో సమావేశం ఏర్పాటు చేసారు. ప్రతి ఏటా ఆషాడపౌర్ణమి పర్వదినాన్ని పురస్కరించుకొని చతుర్దశి రోజున వేలాది మంది భక్తులు సింహగిరి చుట్టూ ప్రదక్షిణ చేయడం సాంప్రదాయంగా వస్తోంది. ఈ నేపథ్యంలో భక్తుల సౌకర్యంపై అధికారులు సమావేశమై సుదీర్ఘంగా చర్చించారు. 21వ తేదీ సాయంత్రం 4 గంటలకు సింహాచలేశుని ధర్మప్రచార రథం ప్రదక్షిణకు బైలుదేరనుందని అధికారులు తెలిపారు. సింహగిరి చుట్టూ భక్తులు ప్రదక్షిణ చేసి సుమారు 32 కిమీ పొడవునా సుమారు 25 స్టాల్స్ ఏర్పాటు చేయాలని అధికారులు నిర్ణయించారు. ఈ స్టాల్స్‌లో ప్రాథమిక వైద్య సదుపాయం, తాగునీరు, ప్రసాదాలు ఏర్పాటు చేసే అంశంపై అధికారులు చర్చించారు. 22వ తేదీ పౌర్ణమిరోజు తెల్లవారుజామున మూడు గంటల నుండి ఆలయ ప్రదక్షిణను అనుమతి ఇవ్వాలని అధికారులు నిర్ణయించారు. సింహగిరి చుట్టూ ప్రదక్షిణ చేయలేని భక్తులు ఆలయాలలో ప్రదక్షిణ చేసేలా సన్నాహాలు చేస్తున్నారు. 21వ తేదీ ఉదయం కాలినడకన ప్రదక్షిణ ప్రారంభించే భక్తులు రాత్రంతా ప్రదక్షిణ చేస్తూ సింహాచలం రానున్న నేపథ్యంలో ఎటువంటి అవాంఛనీయ సంఘ్ఠనలు చోటు చేసుకోకుండా పోలీసు బందోబస్తు, 108 వాహన సేవలు అందుబాటులో ఉంచాలని అధికారులు నిర్ణయించారు. జోడుగుళ్ళపాలెం బీచ్ వద్ద ప్రత్యేక ఏర్పాట్లు చేయనున్నారు. ఈ సమావేశంలో ఇఇ శ్రీనివాసరాజు, ఎఇఇలు ఎంవి.కృష్ణమాచాచార్యులు, రాఘవకుమార్, ఆర్‌వివిఎస్.ప్రసాద్, డిఇ మల్లేశ్వరరావు తదితరులు పాల్గొన్నారు. బడుల్లో మోగిన ఎన్నికల గంట * రేపు పాఠశాల యాజమాన్య కమిటీ ఎన్నికలు విశాఖపట్నం , జూన్ 27: సర్కారు పాఠశాలల్లో ఓట్ల గంట మోగనుంది. ఈ నెల 29న పాఠశాల యాజమాన్య కమిటీలకు చైర్మన్, వైస్‌చైర్మన్‌లను ఎన్నుకోవాలని రాష్ట్ర విద్యాశాఖ ఆదేశాలు జారీ చేసింది. విద్యాపక్షోత్సవంలో భాగంగా ఈ కార్యక్రమం చేపడుతున్నారు. మరో నెల రోజుల్లో పంచాయతీ ఎన్నికలు జరుగనున్న నేపథ్యంలో ఈ నెలాఖరులో జరుగబోయే బడి ఓట్లు ఆయా ప్రాంతాలలో వేడి వాతావరణాన్ని సృష్టించనున్నాయి. కాస్త రాజకీయ రుచి మరిగిన విద్యార్థుల తల్లిదండ్రులు ఈ ఎన్నికలను ప్రతిష్ఠగా తీసుకోనున్నారు. ’ప్రజల చేతుల్లోకి పాఠశాల విద్య’ అన్న నినాదంతో సరిగ్గా 15 సంవత్సరాల అకితం అప్పటి ముఖ్యమంత్రి చంద్రబాబునాయుడు విద్యాకమిటీల పేరుతో సర్కారు పాఠశాలలకు రాజకీయ రంగు పులిమారు. 1997లో మొట్టమొదటిసారిగా జరిగిన పాఠశాల విద్యాకమిటీ ఎన్నికలు అప్పట్లో పెద్దదుమారం లేపాయి. రహస్య ఓటింగ్ కాకుండా చేతులెత్తే విధానం పెట్టడంతో పల్లెల్లో గొడవలు కూడా జరిగాయి. విద్యార్థులు తల్లిదండ్రులు వర్గాలుగా విడిపోయి గ్రామాల్లో వర్గపోరుకు దారితీసాయి. 2004లో కాంగ్రెస్ సర్కార్ రాగానే అప్పటి ముఖ్యమంత్రి వైఎస్.రాజశేఖర్‌రెడ్డి విద్యాకమిటీలను రద్దు చేశారు. ఆయన మరణానంతరం పాఠశాల యాజమాన్య కమిటీల పేరుతో 2011లో వీటికి కిరణ్ సర్కార్ ఎన్నికలు నిర్వహించింది. రెండేళ్ళ అనంతరం పాత నిబంధనలను కొద్దిమార్పుతో ఈ నెల 29న తాజాగా ఎన్నికలను నిర్వహించనున్నారు. గతానికి భిన్నంగా.... గతంలో పాఠశాల యాజమాన్యం కమిటీకి సర్పంచ్ చైర్మన్‌గా ఉండేవారు. వైస్‌చైర్మన్‌ను విద్యార్థుల తల్లిదండ్రులు ఎన్నుకునే వారు. కాని ఈసారి చైర్మన్, వైస్‌చైర్మన్‌లను సంబంధిత పాఠశాల విద్యార్థుల తల్లిదండ్రులే అయి ఉండాలి. చేతులెత్తడం లేదా రహస్య ఓటింగ్ ద్వారా ఎన్నుకోవచ్చని పాఠశాల విద్యాశాఖ తాజాగా జారీ చేసిన జిఓ నెంబర్ 41లో పేర్కొంది. ప్రాథమిక, ప్రాథమికోన్నత, ఉన్నత పాఠశాలల్లో జరుగబోయే ఈ ఎన్నికలలో విద్యార్థుల తల్లిదండ్రులు చైర్మన్, వైస్‌చైర్మన్‌లతో పాటు తరగతికి ముగ్గురు చొప్పున కమిటీ సభ్యులను ఎన్నుకోవాలి. వీరిలో మూడింట రెండు వంతులు మంది మహిళలు ఉండాలని నిబంధన పెట్టారు. అలాగే చైర్మన్, వైస్‌చైర్మన్‌లలో ఎవరో ఒకరు తప్పనిసరిగా మహిళై ఉండాలని నిబంధనలు స్పషంగా చెబుతున్నాయి. ఇలా ఏర్పడిన కమిటీకి ప్రధానోపాధ్యాయుడు మెంబర్ కన్వీనర్‌గా, వార్డు మెంబర్, అంగన్‌వాడీ కార్యకర్త, మహిళా సమాఖ్య సభ్యురాలు, ఆరోగ్య కార్యకర్తలు కో ఆప్షన్ మెంబర్లుగా ఉంటారు. కమిటీ కనుసన్నల్లోనే...మధ్యాహ్న భోజనం ఇక నుండి ప్రధానోపాధ్యాయుడు, కమిటీ చైర్మన్‌తో జాయింట్ బ్యాంక్ అకౌంట్ ఉంటుంది. నిధుల ఖర్చు కూడా ఇక నుండి కమిటీ పర్యవేక్షణలోనే జరగాల్సి ఉంటుంది. అలాగే మధ్యాహ్న భోజన నిర్వహణ సైతం కమిటీ కనుసన్నల్లోనే జరగాలి. మధ్యాహ్న భోజన ఏజెన్సీ వీరికి నచ్చకపోతే కమిటీ సమావేశం నిర్వహించి ఏ నిమిషంలోనైనా మార్చేయవచ్చు. ఆగమేఘాలపై... పంచాయతీ ఎన్నికలకు రేపో మాపో నోటిఫికేషన్ వెలువడనున్న నేపథ్యంలో ఆఘమేఘాలపై ఈ నెల 29వ తేదీన పాఠశాల యాజమాన్య కమిటీలకు రాష్ట్ర ప్రభుత్వం ఎన్నికలు నిర్వహిస్తోంది. పల్లెల్లో ఎన్నికల వేడిని రగిల్చి ఎక్కడ తాము బలహీనంగా ఉన్నామో అక్కడ ముందు జాగ్రత్త చర్యలు సిద్ధం చేసుకునేందుకు కాంగ్రెస్ ప్రభుత్వం ఈ ఎత్తుగడ వేసి ఉండవచ్చని పలువురు అభిప్రాయపడుతున్నారు. ఈ ఎన్నికలకు సంబంధించి వారం రోజుల క్రితం రాష్ట్ర ప్రభుత్వం జిఓ విడుదల చేసినా నేటికి ఆయా పాఠశాలలకు అందకపోవడం గమనార్హం. కనీస విద్యార్హత నిర్ణయించాలి ఎపిటిఎఫ్ యూనియన్ కమిటీ చైర్మన్ పోటీ చేయబోయే వ్యక్తికి కనీస విద్యార్సత నిర్ణయించాలి. అలాగే ఏకగ్రీవమైన కమిటీలకు ప్రోత్సాహక బహుమతులు అందజేయాలి. ఎంపికైన వ్యక్తులు తమ పరిధి దాటి బోధనా విషయంలో జోక్యం చేసుకోరాదని ఎపిటిఎఫ్ నాయకులు కోరుతున్నారు. ఎయులో వెహికల్ ఫ్రీ జోన్ విశాలాక్షినగర్, జూన్ 27: ఆంధ్రా యూనివర్శిటీ వెహికల్ ఫ్రీ జోన్‌కు విశేష స్పందన లభించింది. గురువారం ఎయు ఉపకులపతితో పాటు అధికారులు, ఆచార్యులు, సిబ్బంది, ఉద్యోగులు, విద్యార్థులు వెహికల్ ఫ్రీ జోన్ నిబంధన ప్రకారం విధులకు నడుచుకుని వచ్చారు. ఈ వాహన నిరోధక నిబంధన నిర్వహణ ఎన్‌ఎస్‌ఎస్ కో ఆర్డినేటర్ డాక్టర్ ఎన్‌ఎడి.పాల్ పర్యవేక్షణలో ఖచ్చితంగా జరిగింది. నెలలో ఒకరోజు వర్శిటీ వెహికల్ ఫ్రీ జోన్‌ను పాటిస్తూ పర్యావరణాన్ని కాపాడాలనే లక్ష్యంతో అందరి సహకారంతో ఎయు ఉపకులపతి ఆచార్య జిఎస్‌ఎన్.రాజు ప్రవేశపెట్టారు. అప్పటి నుండి అందరూ సహకరిస్తున్నారు. ఉదయం క్రీడాకారులు మాత్రం వాహనాలపై చేరుకుని వ్యాయామం చేస్తూ కనిపించారు. అదే విధంగా విద్యార్థులు, సిబ్బంది ముందుగానే చేరుకుని తమ ద్విచక్ర వాహనాలను సెల్లార్లలో నిలిపివేసారు. రిజిస్ట్రార్ కార్యాలయం ఎదుట పార్కింగ్ స్థలంలో మూడు ద్విచక్ర వాహనాలు కన్పించడంతో అధికారులు ఖంగుతిన్నారు. ఉదయం పదిగంటలకు విధులకు చేరుకున్న ఉపకులపతి ఆచార్య రాజు ప్రధాన గేటు ఎదుట కారును ఆపి నడుచుకుంటూ తన ఛాంబర్‌కు చేరుకుని విధులు నిర్వర్తించారు. అదే విధంగా రెక్టార్ ఆచార్య ఎవి.ప్రసాదరావు, రిజిస్ట్రార్ కట్టా రామ్మోహన్‌రావు, ప్రిన్సిపాల్స్ వాహనాలను వర్శిటీ బైట విడిచి నడుచుకుంటూ వచ్చి విధులకు హాజరయ్యారు. మద్దిలపాలెం ఇంజనీరింగ్ గేటు నుంచి వాహనాలను అనుమతించకపోవడంతో ఆ మార్గం గుండా ప్రయాణించే వారు చుట్టూ తిరిగి ర్శిటీ, త్రీటౌన్, ఇతర ప్రభుత్వ కార్యాలయాలకు చేరుకోవడానికి నానా ఇబ్బందులు ఎదుర్కొన్నారు. ట్రాఫిక్ పోలీసులు ఎయు చుట్టూ ఉన్న అన్ని గేట్లను మూసివేసి పార్కింగ్‌ను రోడ్లకు ఇరువైపులా ఏర్పాటు చేసి వాహనాలను లొపలికి వెళ్ళకుండా క్రమబద్దీకరించారు. విక్టోరియా ఆసుపత్రిలో పారిశుద్ధ్యాన్ని మెరుగుపరచండి * జివిఎంసి కమిషనర్ విశాఖపట్నం, జూన్ 27: జివిఎంసి పరిధిలోని విక్టోరియా ఆసుపత్రిలో పారిశ్ధ్యు పరిస్థితిని మెరుగుపరిచేందుకు చర్యలు తీసుకోవాలని జివిఎంసి కమిషనర్ ఎంవి సత్యనారాయణ అధికారులను ఆదేశించారు. వార్డుల పర్యటనలో భాగంగా గురువారం ఆయన 23,24 వార్డులో పర్యటించారు. ఈసందర్భంగా విక్టోరియా ఆసుపత్రిలో పారిశుద్ధ్య పరిస్థితిని స్వయంగా పరిశీలించారు.

విజయనగరం, జూన్ 26: గ్రామ పంచాయతీ ఎన్నికలకు ఆశావహులు పెద్ద సంఖ్యలో పోటీపడుతుండటంతో ఈ దఫా ఏకగ్రీవాలు అంత తేలిగ్గా అయ్యే అవకాశాలు కన్పించడ లేదు. రాజకీయ పార్టీలు తమకు సంబంధం లేదంటూనే గ్రామ రాజకీయాల్లో కీలకపాత్ర పోషిస్తున్నారు. ఇప్పటికే సర్పంచ్ పదవులు దక్కించుకునేందుకు నేతలు వివిధ మార్గాల్లో ప్రజల మెప్పు పొందడానికి ప్రయత్నాలు సాగిస్తున్నారు. కొందరు లక్షల రూపాయలు ఖర్చు చేయగా, మరికొందరు వ్యక్తిగత అవసరాలను గుర్తించి వాటిని నెరవేర్చడం ద్వారా తమ గెలుపు ఖాయమన్న ధీమాలో ఉన్నారు. గ్రామ పంచాయతీలకు భారీగా వస్తున్న నిధులు, రాబోయే నిధులు, ప్రతి అంశానికి పంచాయతీ తీర్మానం అవసరాలు, ఉపాధి హామీ పథకం నిర్వహణలు ఇవన్నీ కూడా గ్రామ నేతల దృష్టిని ఆకర్షించాయి. అంతేగాకుండా అసెంబ్లీ ఎన్నికలకు కూడా గ్రామాల్లో పట్టు అవసరం ఉండటంతో అందరూ ఏకగ్రీవాలవైపు మొగ్గు చూపడం లేదు. వాటితోపాటు మండల పరిషత్, జిల్లా పరిషత్ ఎన్నికలు కూడా వచ్చే అవకాశాలు ఉండటంతో ఎవ్వరూ కూడా వెనక్కి తగ్గే అవకాశాలు కనబడటం లేదని గ్రామ స్థాయి నేతలు చెబుతున్నారు. కాగా, ఈ దఫా పోటీలోకి ప్రధాన పార్టీలతోపాటు వైకాపా కూడా పోటీ చేయనున్నట్టు సమాచారం. దీంతో మూడు పార్టీల నేతల మధ్య పోటీ ఉంటుందని భావిస్తున్నారు. కొన్ని గ్రామాల్లో ఏ అభ్యర్థులను రంగంలోకి దించితే బాగుంటుందనేది కూడా అంచనా వేస్తున్నారు. ఎస్సీ, ఎస్టీలకు రిజర్వేషన్ అయిన గ్రామాల్లో అభ్యర్థులకు ఖర్చు ఎవరు భరించాలన్నదీ చర్చనీయాంశంగా మారింది. రిజర్వేషన్లు అయిన గ్రామాల్లో ఎక్కువ శాతం బలమైన సామాజిక వర్గాలే ఆధిపత్యాన్ని ప్రదర్శిస్తున్నాయి. ఎన్నికైన సర్పంచులను తమ గుప్పెట్లో పెట్టుకొని తమ పనులను చేసుకుంటున్నారు. మహిళలకు రిజర్వేషన్ అయిన గ్రామాల్లో కూడా భర్తలు, కొడుకులు కాకపోతే తండ్రి ప్రధానంగా ఆధిపత్యాన్ని ప్రదర్శిస్తున్నారు. అవసరమైతే సమావేశాలకు వారే హాజరవుతున్న తీరు కూడా ఉంది. ఇదంతా బహిరంగ రహాస్యమే. కాగా, పోటీ లేకుండా రాజీలు పడితే భవిష్యత్ ఎన్నికల్లో పార్టీల పరిస్థితి ఆగమ్యగోచరంగా మారనుందనే అభిప్రాయం ఉంది. అందువల్ల గెలిచినా, ఓడినా తమ పార్టీకి గ్రామంలో ఒక నేత, ఒక వర్గం ఉండి తీరాలి కనుక పంచాయతీ ఎన్నికలను నేతలు తమ కనుసన్నల్లో నడపడానికి ప్రయత్నాలు కొనసాగిస్తున్నారు. తప్పుల్లేకుండా ఓటర్ల జాబితా విజయనగరం, జూన్ 27: ఓటర్ల జాబితాలో తప్పులు దొర్లకుండా చూడాలని రాష్ట్ర అదనపు ఎన్నికల అధికారి వెంకటేశ్వరరావు అన్నారు. గురువారం మినీ కానె్ఫరెన్స్ హాల్లో నియోజకవర్గాల వారీగా తహశీల్దార్లతో ఓటర్ల జాబితాల తయారీపై సమీక్ష జరిపారు. ఈ సందర్భంగా ఆయన మాట్లాడుతూ ఎన్నికల సిబ్బంది ఇంటింటికి వెళ్లి తనిఖీ చేసి తయారు చేసిన ఓటర్ల జాబితాలో తప్పులు లేకుండా చూడాలన్నారు. ఓటర్ల జాబితాను తయారు చేయడం ఎంత ముఖ్యమో, డేటాను ఆన్‌లైన్లో నమోదు చేయడం కూడా అంతే ముఖ్యమన్నారు. కళాశాలలు తెరవడంతో అక్కడకు వెళ్లి అర్హులైన ఓటర్లను చేర్పించాలన్నారు. దీనిపై స్పెషల్ డ్రైవ్ నిర్వహించాలన్నారు. ఓటర్ల జాబితా నుంచి పేర్లు తొలగించేటపుడు వారికి నోటీసులు జారీ చేయాలన్నారు. ఆ నోటీసులను రికార్డునందు పొందుపరచాలన్నారు. పాత ఓటర్లు ఒకటి, రెండు చోట్ల ఓటుహక్కు కలిగి ఉంటే వారు కోరుకున్న చోటనే ఓటును ఉంచాలన్నారు. సంవత్సరాల తరబడి ఓటు ఉన్న గ్రామంలో లేని వారిని మాత్రం తొలగించాలన్నారు. డేటా నమోదు కార్యక్రమం జూలై 10 కల్లా పూర్తి చేయాలన్నారు. వెరిఫికేషన్ చేసిన నివేదికలను పోలింగ్ స్టేషన్ల వారీగా ఫైల్ చేయాలన్నారు. 2009లో జరిగిన ఎన్నికల్లో విజయనగరం, సాలూరు నియోజక వర్గాల్లో అతి తక్కువ శాతం ఓట్లు పోలైయ్యాయని, ఓటు విలువపై అవగాహన కల్పించి ఓటింగ్ శాతం పెరిగేలా చూడాలన్నారు. ఈ సందర్భంగా సమస్యలు ఏమైనా ఉన్నాయా అని ఆయన తహశీల్దార్లను ప్రశ్నించారు. దీనికి తహశీల్దార్లు మాట్లాడుతూ బూత్ స్థాయి అధికారులకు వేతనాలు అందలేదని, ఇచ్చే వేతనాన్ని కూడా పెంచితే బాగుంటుందని తెలిపారు. బిఎల్‌ఒ వేతనాలకు ఆమోదం లభించిందని, వచ్చే నెలలో చెల్లించే వీలుందని అయితే వేతనాల పెంపు విషయం ఫైనాన్స్ శాఖ వద్ద ఉందన్నారు. డేటా ఎంట్రీ ఆపరేటర్లకు వేతనాలు చెల్లించడం లేదని తహశీల్దార్లు తెలపగా ఏజెన్సీల ద్వారా చెల్లించినట్టు ఆయన తెలిపారు. ఈ సమావేశంలో అదనపు జెసి యుసిజి నాగేశ్వరరావు, పార్వతీపురం ఆర్డీవొ వెంకటరావు, పలువురు తహశీల్దార్లు పాల్గొన్నారు. విశాఖ చేరుకున్న చార్‌ధామ్ యాత్రికులు గాజువాక, జూన్ 27: శివుని కటాక్షం వలనే పునర్జన్మ లభించిందని చార్‌ధామ్ యాత్రకి వెళ్లి తిరిగి గురువారం విశాఖపట్నం చేరుకున్న భక్తులు పేర్కొన్నారు. విజయనగరం, విశాఖపట్నం ప్రాంతానికి చెందిన భక్తుల తెలిపిన వివరాలు వారి మాటలోనే.. ప్రకృతి సృష్టించిన బీభత్సం భక్తులకు ప్రత్యక్ష నరకం చూపించింది. ఒక వైపు వర్షం..మరోవైపు ఆకటి..ఆపై ఎముకల కొరికే చలి ఎక్కడ ప్రాణాలు హరిస్తాయా అని భక్తుల్లో భయాందోళన. హోరున కురిసే వర్షానికి కొండ చెరియలు విరిగి పడుతున్నాయి. రాక పోకలు పూర్తిగా స్తంభించిపోయాయి. సమాచార వ్యవస్థ పూర్తిగా దెబ్బ తిన్నది. ఒక వైపు ఆకలి..మరో వైపు ప్రాణ భయంతో ఎనిమిది రోజులు పాటు ఉత్తరాఖండ్ రాష్ట్రం యమనోత్రి సమీపంలో జానికీ చెట్టు, హనుమంతుచెట్టు ప్రాంతాల్లో బిక్కుబిక్కుమంటూ కాలం గడిపాం. వందలాది వాహనాలు ఎక్కడికక్కడే నిలిచి పోయాయి. అందరూ వృద్ధులే.. ఎలా తిరిగి రావాలో తెలియలేదు. అయిన వారికి దూరంగా కొండ ప్రాంతాల్లో ఉన్న మమ్మలిని పలకరించే వారే లేరు. సైన్యం సహాయ చర్యలు చేపడుతున్న ఫలితం శూన్యం. ఏమి కొనాలన్నా అత్యధిక ధరలు. అయినా దొరకడం గగనం. 18మంది బృందం ఒక్కచోట ఉండి బియ్యం కొనుగోలు చేసుకుని వంట చేసుకుని జీవనం సాగించాం. ఐదు రోజుల పాటు జానికీ చెట్టు వద్ద, మూడు రోజులు పాటు హనుమాన్ చెట్లు వద్ద కాలం గడిపాం. చార్‌ధామ్ యాత్రలో చిక్కుకున్నామని విజయనగరంలో ఉన్న మా బంధువులంతా వెంటనే పార్లమెంట్ సభ్యురాలు బొత్స ఝాన్సీ వద్దకు వెళ్లారు. ఆమె వెంటనే డెహ్రడూన్ కలెక్టర్ పురుషోత్తంకు సమాచారం అందించారు. మా ఫోన్ నెంబర్లను ఆయనకు అందించడం జరిగింది. దీనిపై కలెక్టర్ పురుషోత్తం మా క్షేమ సమాచారాన్ని తెలుసుకున్నారు. ఎనిమిది రోజుల తరువాత కలెక్టర్ పురుషోత్తం సూచన మేరకు 18మంది బృందాన్ని మిలటరీ వాహనంలో ఈ నెల 25న డెహ్రడూన్‌కు తరలించారు. అక్కడ నుండి బుధవారం రాత్రి ప్రభుత్వం ఏర్పాటు చేసిన ప్రత్యేక విమానంలో హైదరాబాద్‌కు బుధవారం హైదరాబాద్‌కు, అక్కడి నుంచి ప్రత్యేక బస్సులో గురువారం విశాఖపట్నం చేరుకున్నాం. 9వ తేదీన విశాఖపట్నం నుండి రైలులో బయలుదేరి ఉత్తరాఖండ్ చేరుకున్నాం. అక్కడ నుండి ఈ నెల 13వ తేదీన హరిద్వార్ చేరుకుని అక్కడ నుండి 14వ తేదీన యమనోత్రి వెళ్లడం జరిగింది. 15వ తేదీన యమనోత్రిలో దర్శనం చేసుకున్న తిరిగి వస్తున్న సమయంలో భారీ వర్షాలు పట్టుకున్నాయి. కొండ చరియలు విరిగి పడడంతో పాటు రహదారులు తెగి పోయాయని వారు తెలియజేశారు. యమనోత్రి సమీపంలో గల హనుమాన్ చెట్టు వద్ద గల ఆశ్రమంలో తలదాసుకున్నట్లు భక్తులు తెలియజేశారు. విజయనగరం, విశాఖపట్నం ప్రాంతానికి చెందిన 16మంది భక్తుల బృందం గురువారం మధ్యాహ్నం విశాఖకు చేరుకున్నారు. నలుగురు భక్తులు విశాఖపట్నం ప్రాంతానికి చెందిన వారు కాగా, మిగిలిన 14మంది భక్తులు విజయనగరం జిల్లా లక్కవరపుకోట ప్రాంతానికి చెందిన వారు. అత్యధిక మంది వృద్ధులే. ఒక 10 ఏళ్ల చిన్నారి ఉంది. 18మంది బృందంగా ఏర్పడి చార్‌ధామ్ యాత్రకు వెళ్ళారు. 18మందిలో ఇద్దరు భక్తులు హైదరాబాద్‌లో ఉండి పోయారు. మిగిలిన 16మంది విశాఖపట్నం చేరుకున్నారు. వారిలో విశాఖపట్నం సమీపంలో మర్రిపాలెం ప్రాంతానికి చెందిన జ్యోతీష్యుడు హరికృష్ణమాచార్యులు, ఎస్‌టిపి శ్రీనివాసాచార్యులు కలిసి చార్‌ధామ్ యాత్రకు బయలదేరి వెళ్లగా వీరు శ్రీనగర్‌లో నిలిచి పోయారు. అనంతరం వారిని తిరిగి పంపడం జరిగింది. విజయనగరానికి చెందిన ఎల్.సన్యాసిరావు, సూర్యకళ, కుమారి, నరసింహులు, వి.కేశవరావు, అన్నపూర్ణ, కె.రామదేవ్, విశాల, వి.రామకృష్ణ, వి.లక్ష్మి, వివిఆర్‌జె శర్మ, సుందరి, చిన్నారి శశిప్రభ, హరికిశోర్ శర్మలతో పాటు విశాఖపట్నం ప్రాంతానికి చెందిన ఎస్.పెంటయ్య, వరలక్ష్మిలు గురువారం సొంత గ్రామాలకు చేరుకున్నారు. విజయనగరం ప్రాంతానికి చెందిన భక్తులు ఎన్‌ఎడి కొత్త రోడ్డులో బస్సు దిగి ఇంటికి చేరుకున్నారు. చార్‌ధామ్ యాత్రకు వెళ్లి యమనోత్రి వద్ద వద్ద చిక్కుకు పోయిన విజయనగరం, విశాఖపట్నం ప్రాంతానికి చెందిన 18మంది భక్తులకు ప్రభుత్వం అన్ని ఏర్పాట్లు చేసింది. దారి ఖర్చులు కింద ఉత్తరాఖండ్ ప్రభుత్వం రెండువేల రూపాయలు, ఆంధ్రప్రదేశ్ ప్రభుత్వం 5వేల రూపాయలను అందించందని భక్తులు తెలియజేశారు. హైదరాబాద్ విమానాశ్రయం నుండి 27 మంది భక్తులతో గరుడ ప్రత్యేక బస్సు విశాఖపట్నం బయలుదేరిందని విశాఖ రూరల్ డివిఎం జీవన్‌ప్రసాద్ తెలిపారు. వీరిలో 11 మంది భక్తులు కాకినాడలో దిగిరారన్నారు. వారంతో రావులపాలెం, కాకినాడ ప్రాంతానికి చెందిన వారు అన్నారు. మిగిలిన 16 మంది విశాఖపట్నం చేరుకున్నారు. ‘విద్యార్థులకు అంటువ్యాధులపై అవగాహన అవసరం’ విజయనగరం, జూన్ 27: విద్యార్థులకు అంటువ్యాధులపై అవగాహన కల్పించాలని డిఎంహెచ్‌ఒ డాక్టర్ స్వరాజ్యలక్ష్మి చెప్పారు. గురువారం ఆమె తన కార్యాలయంలో వైద్యాధికారులు, ఆషా సిబ్బందితో మాట్లాడుతూ మలేరియా, డయేరియా, డెంగ్యూ వంటి వ్యాధులపై విద్యార్థులకు అవగాహన కల్పించడం ద్వారా వాటిని నియంత్రించగలమన్నారు. కాగా, జిల్లా కేంద్రంలో డెంగ్యూ నిర్థారణ కేంద్రం ఏర్పాటు చేసినట్టు చెప్పారు. డెంగ్యూ నిర్థారణ కేంద్రం ఉన్నందున ఎవరైనా డెంగ్యూ లక్షణాలతో ఉన్నట్టయితే ఇక్కడ పరీక్షించుకోవచ్చని తెలిపారు. కాగా, అంటువ్యాధులు ప్రబలకుండా ఉండేందుకు ప్రతి గ్రామంలో కీటక జనిత వ్యాధుల నిర్మూలనకు స్ప్రేయింగ్ చేపట్టినట్టు తెలిపారు. ఇప్పటి వరకు జిల్లాలో 1029 గ్రామాలకుగాను 645 గ్రామాల్లో వీటిని పూర్తి చేశారని చెప్పారు. కాగా, హై రిస్క్ ప్రాంతాల్లో మలేరియా వ్యాధి నివారణకు చర్యలు చేపట్టినట్టు తెలిపారు. కాగా, జిల్లాలో పిహెచ్‌సిలు, కమ్యూనిటీ హెల్త్ సెంటర్ల పనితీరుపై ఆకస్మిక తనిఖీలు చేశామన్నారు. ఆసుపత్రుల్లో అత్యవసర మందుల కొనుగోలు నిమిత్తం నిధులు మంజూరు చేసినట్టు తెలిపారు. వైద్యులు ఉదయం 9 గంటల నుంచి సాయంత్రం 4 గంటల వరకు ఆసుపత్రుల్లో అందుబాటులో ఉండాలని ఆమె ఆదేశించారు. పాఠ్యాంశాల ద్వారా ప్రభుత్వ పథకాల ప్రచారం విజయనగరం, జూన్ 27: ఈ ఏడాది పాఠ్య పుస్తకాల్లో సమాజంలో మనపాత్ర, ప్రభుత్వ పథకాలు, చట్టాలపై అవగాహన, నైతిక విలువలు పెంపొందించడం తదితర విషయాలను పొందుపరుస్తూ పాఠ్యాంశాలు రూపొందించారు. ఈ ఏడాది 4, 5, 8, 9 తరగతులకు కొత్త పాఠ్య పుస్తకాలను సరఫరా చేశారు. కార్పొరేట్ పుస్తకాల మాదిరిగా ఆకర్షణీయమైన రంగుల్లో బొమ్మలతో రూపొందించారు. విద్యార్థులు సులువుగా అర్థం చేసుకునేలా పాఠ్యాంశాలను చేర్చారు. కాగా ప్రభుత్వం అమలు చేస్తున్న సంక్షేమ పథకాలను పాఠ్యాంశాలలో చేర్చారు. ఎనిమిదో తరగతిలో ఉపాధి హామీ పథకం అమలు, సామాజిక తనిఖీ, పనుల ఎంపిక గురించి వివరించారు. అలాగే ప్రజా పంపిణీ వ్యవస్థ, అంత్యోదయ, అన్నపూర్ణ రేషన్ కార్డులు వల్ల కలిగే లబ్ధి గురించి పేర్కొన్నారు. 104, 108 వాహనాల సేవలు, ఆరోగ్య శ్రీ పథకం గురించి వాటిలో చేర్చారు. అలాగే తొమ్మిదో తరగతి సాంఘిక శాస్త్రంలో వివిధ చట్టాల గురించి పాఠ్యాంశాలలో చేర్చారు. విద్యా హక్కు చట్టం, సమాచార హక్కు చట్టం, వరకట్న నిషేధం, గృహహింస చట్టం, బాల్య వివాహాలు, విపత్తుల్లో తీసుకోవాల్సిన జాగ్రత్తలు, హైదరాబాద్, ముంబైలలో తీవ్రవాదుల దాడుల గురించి పేర్కొన్నారు. ఈ విధంగా తొలిసారిగా పాఠశాల విద్యార్థులకు చట్టాలు, ప్రభుత్వ సంక్షేమ పథకాలపై అవగాహన కల్పించనున్నారు. ‘అధికారులు సమన్వయంతో పని చేయాలి’ దత్తిరాజేరు, జూన్ 27 : మండల స్థాయి అధికారులు సమన్వయంతో పని చేసిన ప్రజలకు సక్రమంగా సేవలు అందించాలని కలెక్టర్ కాంతిలాల్‌దండే సూచించారు. గురువారం సాయంత్రం స్థానిక మండల పరిషత్ సమాశ మందిరంలో వివిద శాఖల అధికారులతో సమీక్షించారు. రానున్నది వర్షాకాలం కావడంతో వ్యాధులు ప్రబలే అవకాశం ఉందని అధికారులు అప్రమత్తంగా ఉండాలని కలెక్టర్ సూచించారు. గ్రామాల్లో మంచినీరు కలుషితం కాకుండా ఎప్పటి కప్పుడు క్లోరినేషన్ చేయాలని సూచించారు. గ్రామాల్లో కాలువల్లో పూడికలు తీయించాలని అధికారులను అదేశించారు. బడిబయట ఉన్న పిల్లలను బడిలో చేర్పించేందుకు కృషి చేయాలని ఎంఇఓ సూర్యనారాయణను ఆదేశించారు. అంగన్‌వాడీ సిడిపిఓ అంగన్‌వాడీ కేంద్రాల్లో ఐదేళ్లలోపు చేర్పించి పౌష్టికాహారం అందేలా కృషి చేయాలని కోరారు. ప్రస్తుతం ఖరీఫ్ సీజన్ మొదలైనందున రైతులకు అసరమైన ఎరువులు విత్తనాలు సక్రమంగా అందించేందుకు చర్యలు తీసుకోవాలని వ్యవసాయాధికారి లచ్చన్నను ఆదేశించారు. అలాగే మండలంలో పక్కా గృహాన్ని ఎన్ని మంజూరయ్యాయని వాటిని పూర్తి చేసేందుకు కృషి చేయాలని హౌసింగ్ ఎఇ ఆచారికి సూచించారు. అలాగే ప్రతి గ్రామంలో వ్యక్తిగత మరుగుదొడ్లు నిర్మించేందుకు లబ్ధిదారుల నుంచి దరఖాస్తులు స్వీకరించి వాటి మంజూరుకు కృషి చేయాలని ఎపిఓ భానును ఆదేశించారు. అనంతరం స్థానిక జిల్లా పరిషత్ హైస్కూల్‌లో విద్యాపక్షోత్సవాలు సందర్భంగా పలువురు విద్యార్ధులకు ప్రతిభా అవార్డులను పంపిణీ చేశారు. ఆర్డీవో రాజకుమారి, మండల ప్రత్యేక అధికారి కుమార్, తహశీల్దార్ అప్పలనర్సయ్య, ఐకెపి కోఆర్డినేటర్ రాజేశ్వరి, వివిద శాఖలు మాజీ సర్పంచ్ లక్ష్మి తదితరులు పాల్గొన్నారు. క్వెస్ట్ పుస్తకాల పంపిణీ తీరు పరిశీలన పార్వతీపురం, జూన్ 27: గిరిజన విద్యార్థులకు క్వాలిటీ ఎడ్యుకేషన్ అందించడానికి తయారు చేసిన క్వెస్ట్ పుస్తకాలను గురువారం గిరిజన సంక్షేమశాఖ కమిషనరేట్ నుండి వచ్చిన డిప్యూటీ డైరక్టర్ రత్నమాల పరిశీలించారు. స్థానిక గిరిజన సంక్షేమ ఆశ్రమ ఉన్నత పాఠశాల (ఇంగ్లీషు మీడియం) నుండి సరఫరాచేస్తున్న ఈ పుస్తకాల పంపిణీ కార్యక్రమాన్ని ఆమె పరిశీలించారు. అలాగే గిరిజన సంక్షేమ పాఠశాలలోని సైన్సు ఎక్విప్‌మెంట్ పరిశీలించారు. అదేవిధంగా వసతి గృహం నిర్వహణ పరిశీలించారు.ఈ సందర్భంగా ఆమె మాట్లాడుతూ విద్యా పక్షోత్సవాల సందర్భంగా గిరిజన సంక్షేమ పలు గిరిజన సంక్షేమ పాఠశాలలను పరిశీలిస్తున్నామన్నారు. కొత్తగా రాష్ట్రంలోని 269 గిరిజన సంక్షేమ వసతి గృహాలు మంజూరయ్యాయన్నారు. అలాగే 230 ఉపాధ్యాయ పోస్టులు భర్తీకి చర్యలు తీసుకుంటున్నట్టు తెలిపారు. అలాగే పక్షోత్సవాల్లో భాగంగా రాష్ట్రంలోని పలు గిరిజన సంక్షేమ పాఠశాలల్లో అదనపువసతులు కల్పన కోసం 650 కోట్ల రూపాయలు వ్యయం చేయనున్నట్టు ఆమె తెలిపారు. గిరిజనాభివృద్ధికి చర్యలు తీసుకుంటున్నామని తెలిపారు. ఈకార్యక్రమంలో జిల్లా గిరిజన సంక్షేమశాఖ డిడి సి ఎ మణికుమార్‌తో పాటు పి ఎం ఆర్ సి ప్రతినిధి ఎస్ ఎ ఆర్ సుబ్రహ్మణ్యం పాల్గొన్నారు. ‘ఖరీఫ్‌లో లక్ష ఎకరాలకు సాగునీరు’ బొబ్బిలి, జూన్ 27: ఖరీఫ్ సీజన్‌లో జిల్లాలో ఉన్న అన్ని ప్రాజెక్టుల పరిధిలో లక్ష ఎకరాలకు సాగునీరు అందించేందుకు లక్ష్యంగా నిర్ణయించామని ఇరిగేషన్ ఎస్. ఇ. పి.శ్రీనివాసరావు తెలిపారు. స్థానిక ఇరిగేషన్ కార్యాలయంలో గురువారం ఏర్పాటు చేసిన విలేఖర్ల సమావేశంలో ఆయన మాట్లాడుతూ వి.ఆర్.ఎస్, ఆండ్ర, తాడిపూడి, తోటపల్లి, తదితర ప్రాజెక్టుల ద్వారా జూలై నుంచి సాగునీరు అందిస్తామని తెలిపారు. అలాగే తోటపల్లి పరిధిలో ఉన్న కాలువల ద్వారా 39,574 ఎకరాలకు సాగునీరందించేందుకు లక్ష్యంగా నిర్ణయించామన్నారు. ఇందులో విజయనగరం జిల్లాకు 7,836, శ్రీకాకుళం జిల్లాకు 31,704 ఎకరాలకు అందిస్తామన్నారు. ఇరిగేషన్, పంచాయతీరాజ్ పరిధిలో 9వేల చెరువులున్నాయని, వీటి ద్వారా 2లక్షల 6వేల ఎకరాలకు సాగునీరు అందిస్తున్నామన్నారు. నీలం తుఫాన్ కారణంగా దెబ్బతిన్న రెండు జిల్లాలలో 20కోట్ల రూపాయలతో పనులు చేయించామన్నారు. ఇందులో శ్రీకాకుళం జిల్లాలో 404పనులకు 12కోట్లు, విజయనగరం జిల్లాలో 407పనులకు 9కోట్లు వ్యయం చేశామన్నారు. అలాగే వెంగళరాయసాగర్, వట్టిగెడ్డ, తాడిపూడి రిజర్వాయర్‌లో ఆధునీకరణకు 100కోట్ల రూపాయల జపాన్ నిధులకు ప్రతిపాదనలు పంపించామన్నారు. అలాగే ఖరీఫ్‌లో తోటపల్లి,నారాయణపురం,మడ్డువలస ప్రాజెక్టుల ద్వారా జూలై 10వ తేదీనుంచి నీటిని విడుదల చేస్తామన్నారు. నిరుపయోగంగా ‘పచ్చతోరణం’ మొక్కలు పార్వతీపురం, జూన్ 27: పచ్చతోరణాల కార్యక్రమాన్ని ప్రభుత్వం ఎంతో ప్రతిష్ఠాత్మకంగా తీసుకున్నప్పటికీ దానిని అమలు ఆశించిన స్థాయిలో జరిగడం లేదని పలువురు అంటున్నారు. నిరుపేదలకు అట్టడుగు వర్గాలకు చెందిన రైతాంగం ద్వారా చెరువుగట్లు మీద పచ్చతోరణాల కింద మొక్కల పెంపకం బాధ్యత అప్పగిస్తున్నారు. అయితే వాటి ద్వారా వచ్చే ప్రతిఫలం మీద మాత్రమే హక్కు కల్పించడానికి ఈ పథకం ముఖ్య ఉద్దేశం. అయినప్పటికీ ఈ పథకం ఇంకా ఫలాలు అందిండం మాట అటు ఉంచితే మొక్కలు నాటే కార్యక్రమం ఎలా ఉంటుందోనని పలువురు అనుమానాలు వ్యక్తం చేస్తున్నారు. పలు చోట్ల పచ్చతోరణాల కోసం వేసిన మొక్కలు నిరుపయోగంగా పడి ఉండటం విమర్శలకు గురి అవుతోంది. ‘పౌష్టికాహారం సక్రమంగా అందేలా చూడాలి’ మెంటాడ, జూన్ 27 : మైదాన ప్రాంతాలతోపాటు గిరిజన ప్రాంతాలలో పౌష్టికాహర లోపంతో భాద పడుతున్న చిన్నారి బాలలకు పోషకాహారం అందజేయాలని జిల్లా కలెక్టర్ కాంతిలా దండే అన్నారు. గురువారం జిల్లా కలక్టర్ తన పర్యటనలో భాగంగా మండల పరిషత్ సమావేశ భవనంలో మండల అధికారులతో సమీక్ష నిర్వహించారు. శాఖల వారీగా సమీక్ష నిర్వహించారు. మండల ప్రగతి గురించి ఆరా తీసారు. గజపతినగరం, ఐసిడిఎస్ ప్రాజెక్టు పరిధిలోగల మండలంల9 120 మంది పౌష్టికాహారలోపం వలన తక్కువ బరువు కల్గివున్నారని పిఓ అనురాధ చెప్పడంతో అంగన్‌వాడీ కేంద్రాలు ఉండేది అందుకేనని, కేంద్రాల ద్వారా సక్రమం పౌష్టికాహరం అందేటట్లు చర్యలు తీసుకోవాలని కలెక్టర్ సూచించారు. వ్యవసాయాధికారి కె.గోవిందమ్మ మాట్లాడుతూ రైతులకు సరిపడా వరి విత్తనాలు సరఫరా కాలేదన్నారు. విత్తనాలు కొరతగా వుందని 650 టన్నులకు ప్రతిపాదనలు పంపించామని 1500 క్వింటాళ్లు మాత్రమే వచ్చాయన్నారు. విత్తనాల కొరత లేకుండా పంపిస్తామని అందరికీ విత్తనాలు అందే విధంగా చూడాలని ఆమెకు కలెక్టర్ తెలిపారు. అలాగే త్రాగునీరు, పారిశుద్ధ్యం, వైద్య, విద్య, తదితర శాఖల అధికారులతో సమీక్షించారు. ఈ కార్యక్రమంలో ఆర్డీఓ రాజకుమారి, డిఎర్‌ఓ బి.మోహన్‌రావు, గ్రమీణ నీటి పారుదల ఇఇ ఎన్ మోహన్‌రావు, ఇరిగేషన్, డిఇ శ్రీనివాసరావు, మండల ప్రత్యేక అధికారి ఎపిఓ జి.సుందరరావు, ఎపిఎం కె.శ్రీనివాసరావు, తదితరులు పాల్గొన్నారు.

కొవ్వూరు, జూన్ 27: గోదావరి నది పరీవాహక ప్రాంతాలలో గత మూడు రోజులుగా కురుస్తున్న భారీ వర్షాలకు గోదావరి నదికి వరద ఉధృతి పెరుగుతోంది. అదిలాబాద్, మధ్యప్రదేశ్ తదితర ప్రాంతాలలో కురిసిన భారీ వర్షాలకు గోదావరి ఉప నదులు పెన్‌గంగ, ప్రాణహిత, శబరి నదులు పొంగటంతో గోదావరి నదికి వరద ఉధృతి పెరుగుతోంది. గోదావరి హెడ్ వర్క్స్ అధికారులు గురువారం సాయంత్రం అందించిన వివరాల ప్రకారం..గురువారం సాయంత్రం 6గంటలకు బ్యారేజ్ నుండి 3.84 లక్షల క్యూసెక్కుల నీటిని సముద్రంలోనికి వదిలినట్టు చెప్పారు. అదే విధంగా తూర్పు డెల్టాకు 2,800, పశ్చిమ డెల్టాకు 4,300, మధ్య డెల్టాకు 1800 కూసెక్కుల నీటిని కాలువల ద్వారా వదిలినట్లు అధికారులు తెలిపారు. పంచాయతీల రిజర్వేషన్లు ఖరారు గెజిట్ విడుదల చేసిన కలెక్టరు ఏలూరు, జూన్ 27: గ్రామపంచాయతీలు, వార్డుల రిజర్వేషన్లపై ఎట్టకేలకు స్పష్టత వచ్చింది. జిల్లా కలెక్టరు డాక్టరు జి వాణిమోహన్ గురువారం రాత్రి పంచాయితీలు, వార్డుల రిజర్వేషన్లను ప్రకటించారు. ఆర్డీవోల నుంచి వచ్చిన రిజర్వేషన్ల జాబితాల్లో చివరి నిముషంలో కొన్ని మార్పులు జరిగినట్లు తెలుస్తోంది. దీంతో జాబితాలు ప్రకటించడంలో జాప్యం జరిగింది. జంగారెడ్డిగూడెం డివిజన్ పరిధిలోని పంచాయితీల రిజర్వేషన్ల ఖరారు విషయంలో కొంత ఆలస్యం జరిగినట్లు సమాచారం. రెండురోజుల క్రితమే ఆర్డీవోల నుంచి జాబితాలు డిపిఓ కార్యాలయానికి చేరుకున్నాయి. అయితే జాబితాలను కూలంకషంగా పరిశీలించిన తర్వాతే విడుదల చేయాలని కలెక్టరు ఆదేశించటంతో మంగళ, బుధవారాల్లో స్ధానిక కలెక్టరేట్‌లో డిఆర్వో ఎం మోహనరాజు, డిపిఓ నాగరాజువర్మ, జడ్పీ సిఇఓ నాగార్జునసాగర్, వివిధ మండలాల ఎంపిడిఓలు రిజర్వేషన్లపై కసరత్తు జరిపారు. కొన్ని పంచాయితీల విషయంలో తలెత్తిన సాంకేతిక ఇబ్బందులను రాష్ట్ర స్దాయి అధికారుల దృష్టికి తీసుకువెళ్లి అక్కడ నుంచి ఆదేశాలు రావటంతో వాటికనుగుణంగా రిజర్వేషన్ల ప్రక్రియను పూర్తి చేశారు. గురువారం ఉదయం నుంచి సాయంత్రం వరకు మరోసారి జాబితాలను పరిశీలించిన అనంతరం రాత్రికి విడుదల చేశారు. జిల్లాలో 884 పంచాయితీలుండగా వీటిలో 129 ఎస్టీలకు, 259 ఎస్సీలకు, 248 బిసిలకు, 316 జనరల్‌కు కేటాయించారు. వీటి ఆధారంగా అయా మండలాల పరిధిలోని పంచాయితీల రిజర్వేషన్ల ప్రక్రియను పూర్తి చేశారు. అలాగే 9684 వార్డులకు సంబంధించిన రిజర్వేషన్లను కూడా ప్రకటించారు. జిల్లాలో పంచాయితీ రిజర్వేషన్లను పూర్తి పారదర్శకంగా నిర్వహించినట్లు జిల్లా కలెక్టరు డాక్టరు జి వాణిమోహన్, డిపిఓ నాగరాజు వర్మ తెలిపారు. నిబంధనలను ఖచ్చితంగా పాటించామని, అందుకు సంబంధించి అధికారులతో ధృవీకరణ కూడా నిర్వహించామన్నారు. కన్నుల పండుగగా మావుళ్లమ్మ జ్యేష్ఠమాస జాతర జాతరలో ఆకట్టుకున్న శక్తివేషాలు భీమవరం, జూన్ 27: భీమవరం ఇలవేల్పు శ్రీశ్రీశ్రీ మావుళ్ళమ్మ అమ్మవారి జ్యేష్ఠమాస విశేష జాతరమహోత్సవం గురువారం రాత్రి ఘనంగా నిర్వహించారు. బ్యాండ్‌మేళాలు, డప్పు వాయిద్యాలు, గరగ నృత్యాలు, శక్తివేషాలు, కోలాటం, తప్పిటగుళ్ళు, కోబ్రాడ్యాన్స్‌లు తదితర వాటితో ఈ ఉత్సవం అత్యంత వైభవంగా సాగింది. తొలుత ఎమ్మెల్యే రామాంజనేయులు ఉత్సవ విగ్రహానికి హరతులు ఇచ్చి జాతర నిర్వహించారు. తదుపరి గ్రామోత్సవం నిర్వహించారు. అనంతరం మావుళ్ళమ్మ అమ్మవారి దేవస్థానం ప్రాంగణంలో డేలైట్లు, వివిధ రకాల విద్యుత్ దీపాలకాంతులతో అమ్మవారి విశేష జాతర మహోత్సవం ఘనంగా నిర్వహించారు. పలివెల శివపార్వతీ గరగ నాట్యబృందంచే గరగ నృత్యం, విజయవాడ ఆలమూరుకొండ బృందంచే శక్తివేషాలు, నవగహ్రాల నృత్యం, భీమవరం గోపి మ్యూజికల్ బ్యాండ్ మేళం, విజయనగరం జిల్లా చిన్నతాడివారిచే తప్పిటగుళ్ళ ప్రదర్శన, విశాఖపట్నం భీమవరం దుర్గా ఆర్కెస్ట్రా సిస్టమ్‌తో ఆఫ్రికాన్ సఫారీ కోబ్రాడ్యాన్స్ పలువురిని ఆకట్టుకున్నాయి. అలాగే కరీంనగర్ రాజస్ధాన్ తీన్‌మార్ నాసిక్‌డోల్ పార్టీ బృందంచే రీసౌండ్ డప్పుల వాయిద్యం, తిరుమల తిరుపతి దేవస్థానం దాససాహిత్య అండ్ చిన్నకేశవస్వామి భజన మండలి హరేశ్రీనివాసం, ఉప్పులూరి వారిచే మురళీ కోలాటాలు, ఏలూరు వారిచే గ్రాడ్జిల్లా, విజయవాడ వారిచే పొడుగుమనిషి, కోతిప్రదర్శన, భారీ మందుగుండు, బాణా సంచాకాల్పుల మధ్య అత్యంతరంగరంగ వైభవంగా జాతర నిర్వహించారు. శక్తివేషాల నృత్యాలు జాతరకే ప్రత్యేక ఆకర్షణగా నిలిచాయి. ఈ జాతర తిలకించడానికి అధిక సంఖ్యలోప్రజలు చుట్టూ పక్కలా గ్రామాల నుంచి తరలివచ్చారు. జాతర నిర్వహకులు మాట్లాడుతూ సుమారు రూ.7లక్షలతో అమ్మవారి రాత్రి జాతర నిర్వహిస్తున్నట్లు తెలిపారు. ఉత్కంఠ భరితంగా రీ కౌంటింగ్ *టిఎన్‌టియుసికి ఆధిక్యం*జూట్‌మిల్లు ఎన్నికల్లో మలుపు ఏలూరు, జూన్ 27 : ఏలూరులోని శ్రీ కృష్ణా జూట్‌మిల్లు గుర్తింపు సంఘం ఎన్నికల్లో గురువారం ఆసక్తికరమైన మలుపు చోటు చేసుకుంది. ఇంతకుముందు ఈ నెల 18న గుర్తింపు సంఘం ఎన్నికలు జరగగా ఆ సమయంలో ఇఫ్టూ టిఎన్‌టియుసిపై రెండు ఓట్ల మెజార్టీని సాధించినట్లు వెలుగు చూసింది. అయితే దీనిపై ఎన్నికల్లో పాల్గొన్న సంఘాలన్నీ అభ్యంతరం తెలపడం, అనంతరం గురువారం రీ కౌంటింగ్ నిర్వహించడం జరిగింది. గురువారం నాటి రీ కౌంటింగ్‌లో మార్పులు చోటు చేసుకుని టి ఎన్‌టియుసి నాలుగు ఓట్ల మెజార్టీని సాధించినట్లు తేలడంతో ఆ సంఘం విజయం సాధించినట్లు కార్మిక శాఖాధికారులు ప్రకటించారు. అయితే ఈ రీ కౌంటింగ్ ప్రక్రియను ఇఫ్టూ బహిష్కరించింది. గురువారం ఉదయం నుంచి జూట్‌మిల్లులో రీ కౌంటింగ్ ప్రక్రియకు భారీ ఎత్తున పోలీసు బందోబస్తును ఏర్పాటు చేశారు. జూట్‌మిల్లుకు సంబంధించి గుర్తింపు సంఘం ఎన్నికల్లో ఇటువంటి పరిణామం గతంలో చోటు చేసుకున్న దాఖలాలు లేకపోవడం ఇఫ్టూ, టి ఎన్‌టియుసిల మధ్య పోరు పోటాపోటీగా సాగడంతో కార్మికులు, కార్మిక వర్గాల నాయకుల్లో రీ కౌంటింగ్ ఫలితంపై తీవ్ర ఉత్కంఠ నెలకొంది. వాస్తవానికి ఇంతకుముందు జరిగిన ఎన్నికల ఫలితాలను పరిశీలిస్తే అప్పుడు మొత్తం 3926 ఓట్లకు గాను 3600 ఓట్లు పోలు కాగా వాటిలో 16 ఓట్లు చెల్లలేదు. మిగిలిన ఓట్లలో ఇఫ్టూకు 1685, టి ఎన్‌టియుసికి 1683, ఐ ఎన్‌టియుసికి 96, సి ఐటియుకు 88, జూట్ కార్మిక సమాఖ్యకు 32 ఓట్లు వచ్చాయి. కేవలం రెండు ఓట్ల ఆధిక్యాన్ని ఇఫ్టూ సాధించిన నేపధ్యంలో రీ కౌంటింగ్ నిర్వహించాలని అన్ని సంఘాలు డిమాండ్ చేశాయి. అయితే దీన్ని ఇఫ్టూ పూర్తిగా వ్యతిరేకించింది. దీనిపై న్యాయస్థానాన్ని కూడా ఆశ్రయించడం, అనంతరం న్యాయస్థానం ఇఫ్టూ విజ్ఞప్తిని తిరస్కరించడంతో గురువారం కార్మిక శాఖాధికారులు రీ కౌంటింగ్ ప్రక్రియను చేపట్టారు. ఈ రీకౌంటింగ్ ఫలితాల్లో టి ఎన్‌టియుసి 4 ఓట్ల ఆధిక్యంతో విజయం సాధించినట్లు తేలింది. తాజా రీ కౌంటింగ్ ఫలితాలను పరిశీలిస్తే టి ఎన్‌టియుసికి 1687, ఇఫ్టూకు 1683, ఐ ఎన్‌టియుసికి 97, సి ఐటియుకు 85, జూట్ కార్మిక సమాఖ్యకు 32 ఓట్లు వచ్చినట్లు తేలింది. గతంలో మాదిరిగానే చెల్లని ఓట్లు 16 గానే వున్నాయి. రీ కౌంటింగ్‌లో విజయం సాధించడంతో టి ఎన్‌టియుసి అధ్యక్షులు బి కరుణకుమార్ ఆధ్వర్యంలో గురువారం సాయంత్రం విజయోత్సవాలను నిర్వహించారు. స్థానిక పవర్‌పేటలోని అంబికా ప్రజా కార్యాలయంలో సమావేశాన్ని కూడా నిర్వహించారు. ఇదిలా ఉంటే రీ కౌంటింగ్ ప్రక్రియ పట్ల ఇఫ్టూ పూర్తి వ్యతిరేకత వ్యక్తం చేసింది. బ్యాలెట్ బాక్సుల్లో జరిగిన మోసానికి ఈ రీకౌంటింగ్ అద్ధం పట్టిందని ఇఫ్టూ రాష్ట్ర ప్రధాన కార్యదర్శి పి ప్రసాద్ ఆరోపించారు. ఇఫ్టూ కార్యాలయంలో జరిగిన కార్యకర్తల సమావేశంలో ఆయన మాట్లాడుతూ అయిదు యూనియన్ల కౌంటింగ్ ఏజెంట్ల ఆమోదంతో ఎన్నికల ఫలితాలను రిటర్నింగ్ అధికారి ఈ నెల 18న వెల్లడించిన తరువాత చట్టప్రకారం ఆయనకే రీ కౌంటింగ్ చేసే అధికారం ఉండదని స్పష్టం చేశారు. ప్రజాస్వామ్యం పట్ల విశ్వాసం ఉంటే మళ్లీ ఎన్నికలు నిర్వహించాలని డిమాండ్ చేశారు. దీన్ని తిరస్కరించడం వెనుక బ్యాలెట్ బాక్సుల మోసం దాగి వుందని ఆయన ఆరోపించారు. తమకు పడ్డ ఓట్లు రెండు ఎలా తగ్గాయని, టి ఎన్‌టియుసికి నాలుగు ఓట్లు అధికంగా ఎలా వచ్చాయని ఆయన ప్రశ్నించారు. సమావేశంలో యు వెంకటేశ్వరరావు మాట్లాడుతూ బోగస్ రీ కౌంటింగ్ ఫలితంపై ఇఫ్టూ న్యాయపోరాటాన్ని కొనసాగిస్తుందని చెప్పారు. కన్నుల పండువగా సామూహిక అక్షరాభ్యాసం ద్వారకాతిరుమల, జూన్ 27: ప్రముఖ పుణ్యక్షేత్రమైన ద్వారకాతిరుమల శ్రీ వెంకటేశ్వర స్వామివారి ఆలయంలో చిన్నారులకు సామూహిక అక్షరాభ్యాస కార్యక్రమాన్ని గురువారం కన్నుల పండువగా నిర్వహించారు. దేవాదాయ శాఖ, హిందూ ధర్మపరిషత్, స్థానిక దేవస్థానం సంయుక్త ఆధ్వర్యంలో ఈ కార్యక్రమాన్ని తలపెట్టారు. ఇందుకు ఆలయ తూర్పు రాజగోపుర ప్రాంతం వేదికైంది. అక్షరాభ్యాస కార్యక్రమాన్ని పురస్కరించుకుని తూర్పు రాజ గోపుర ప్రాంతాన్ని సుందరీకరించారు. ఈ సందర్భంగా అక్కడ వేదికను ఏర్పాటుచేసి, దానిపై సరస్వతీ దేవి విగ్రహాన్ని ఉంచి పుష్పమాలికలతో అలంకరించారు. అక్షరాభ్యాసం చేయించుకునే చిన్నారులు, వారి తల్లిదండ్రులు వేదిక ఎదురుగా కూర్చోగా వేదికపై ఉండే ఆలయ అర్చకులు, పండితులు ఈ అక్షరాభ్యాస కార్యక్రమ తంతును ప్రారంభించారు. ఆయల ఇఒ వేండ్ర త్రినాధరావు ఏర్పాట్లను పర్యవేక్షించారు. సుమూహుర్త సమయమైన ఉదయం 9.26గంటలకు చిన్నారులతో అక్షరాలను దిద్దించారు. ఈ సందర్భంగా గణపవరానికి చెందిన సుబ్బరాజు విద్యార్థులకు 306 పుస్తకాలు, 306 పెన్నులను పంపిణీ చేయగా, కీర్తి పబ్లిక్ స్కూలు యాజమాన్యం వంద పలకలు, బలపాలను అందజేశారు. ఈ కార్యక్రమంలో దేవస్థానం సంస్కృతోన్నత పాఠశాల హెచ్‌ఎం ఎస్‌వి వేణునాథ్ పాల్గొన్నారు. కావూరికి ఘన స్వాగతం పలకాలి ఎఎంసి ఛైర్మన్ గురునాధరావు జంగారెడ్డిగూడెం, జూన్ 27: కేంద్ర జౌళి శాఖా మంత్రిగా పదవీ బాధ్యతలు చేపట్టి తొలిసారిగి జూలై 2వ తేదీన జిల్లాకు వస్తున్న కావూరి సాంబశివరావుకు కాంగ్రెస్ కార్యకర్తలు ఘనంగా స్వాగతం పలకాలని పోలవరం వ్యవసాయ మార్కెట్ కమిటి ఛైర్మన్ జెట్టి గురునాధరావు పిలుపునిచ్చారు. గురువారం పాతబస్టాండ్ వద్ద మాజీ ఎంపిపి కొండపల్లి కేశుబాబు అధ్యక్షతన జరిగిన మండల కాంగ్రెస్ పార్టీ కార్యకర్తల సమావేశంలో ఆయన ప్రసంగించారు. కావూరికి ఘనస్వాగతం పలికేందుకు జిల్లా కాంగ్రెస్ కమిటి ఆధ్వర్యంలో భారీ ఏర్పాట్లు చేస్తున్నట్టు చెప్పారు. చింతలపూడి, పోలవరం నియోజకవర్గాల నుండి భారీగా తరలి వెళ్ళి కావూరికి ఘన స్వాగతం పలికేందుకు ఇప్పటి నుండే కార్యకర్తలు పెద్దఎత్తున ఏర్పాట్లు చేసుకోవాలని కోరారు. ఇదే సమావేశంలో శ్రీనివాసపురం, పేరంపేట గ్రామాల నుండి వంద మంది యువకులు కాంగ్రెస్ పార్టీలో చేరారు. పార్టీలో చేరిన వారికి గురునాధరావు కాంగ్రెస్ కండువాలు కప్పి పార్టీలోకి స్వాగతించారు. పార్టీలో చేరడమే కాకుండా పార్టీ పురోభివృద్దికి పాటు పడాలని, ప్రభుత్వ సంక్షేమ పథకాలు ప్రతి ఒక్క అర్హునికి అందేలా చూడాలని కోరారు. ఈ కార్యక్రమంలో పట్టణ కాంగ్రెస్ అధ్యక్షుడు చిన్ని రామసత్యనారాయణ, మండల కాంగ్రెస్ అధ్యక్షుడు వామిశెట్టి నాగేశ్వరరావు, కాంగ్రెస్ నేతలు ముప్పిడి శ్రీనివాసరావు, బల్లే రాజారావు, పోల్నాటి ప్రభాకరరావు, అచ్యుత శ్రీనివాసరావు, గౌతు సత్యేంద్రబాబు, విజ్జు వెంకటస్వామి నాయుడు, సత్రం లక్ష్మణరావు, ఎలికే తాతారావు, ఆలపాటి సత్యనారాయణ, బుద్దాల సత్యనారాయణ, కఠారి వీర్రాజు, తిరుమలశెట్టి సత్యనారాయణ, కుక్కల ధర్మరాజు, పోల్నాటి ప్రసాద్, ఓరుగంటి నాగేంద్ర తదితరులు పాల్గొన్నారు. 30 పడకల ఇఎస్‌ఐ ఆసుపత్రి నిర్మించాలని ధర్నా భీమవరం, జూన్ 27: భీమవరంలో 30 పడకల ఇఎస్‌ఐ ఆసుపత్రి నిర్మించి కార్మికులందరికీ వైద్యసదుపాయం కల్పించాలని సిఐటియు డివిజన్ ప్రధానకార్యదర్శి బి వాసుదేవరావు ప్రభుత్వాన్ని డిమాండ్ చేశారు. గురువారం స్థానిక ఇఎస్‌ఐ లేబర్ కార్యాలయం వద్ద సిఐటియు ఆధ్వర్యంలో ధర్నా నిర్వహించారు. ఈ సందర్భంగా వాసుదేవరావు మాట్లాడుతూ భీమవరం ప్రాంతం పారిశ్రామిక ప్రాంతమని, వేలాదిమంది కార్మికులు ఇఎస్‌ఐలో సభ్యులుగా ఉన్నారని, వారికి సరైన వైద్యసదుపాయాలు లేవని విమర్శించారు. చట్టప్రకారం 8 గంటలు పని ఎక్కడా అమలు కావడం లేదని, అధికారులు నిమ్మకు నీరెత్తినట్లు వ్యవహరిస్తున్నారన్నారు. అధికారులు ఇప్పటికైనా 8 గంటల పని అమలు చేయాలని కోరారు. ఇఎస్‌ఐ భీమవరం ఎస్సై రెండు సంవత్సరాల నుండి కనిపించడం లేదని, ఆసుపత్రిలో రోగులకు సరిపడా మందులు కూడా ఇవ్వడం లేదని, పూర్తిగా అన్నిరకాల మందులు ఇవ్వాలని, లేకుంటే ఆందోళన ఉధృతం చేస్తామన్నారు.

వరంగల్, జూన్ 27: దివంగత మాజీ ప్రధాని పివి.నరసింహరావుకు చాలా సంవత్సరాల తరువాత జిల్లాయంత్రాంగం తగిన గౌరవం, గుర్తింపు కల్పించింది. శుక్రవారం పివి.నరసింహరావు 92వ జయంతి ఉత్సవాలు జరుగుతున్న నేపథ్యంలో జిల్లా మంత్రి పొన్నాల లక్ష్మయ్య సూచనల మేరకు వరంగల్ నగరంలోని నిట్ కళాశాల నుంచి కాకతీయ యూనివర్సిటీ క్రాస్‌రోడ్డు వరకు ఉన్న 100్ఫట్ల రోడ్డుకు పివి మార్గ్‌గా నామకరణం చేస్తూ కలెక్టర్ రాహుల్ బొజ్జా గురువారం ఆదేశాలు జారీ చేశారు. అదేవిధంగా హన్మకొండలోని ఇండోర్ స్టేడియానికి పివి స్మారక స్టేడియంగా పేరు పెడుతూ ఉత్తర్వులు జారీ చేశారు. విస్తృతంగా ‘మీ-సేవ’ జూలై ఒకటి నుంచి ప్రజలకు మరో 150 సేవలు * మంత్రి పొన్నాల వెల్లడి వరంగల్, జూన్ 27: రాష్ట్ర ప్రజలకు మీసేవ ద్వారా విస్తృతమైన సేవలను అందిస్తున్నామని రాష్ట్ర ఐటి శాఖ మంత్రి పొన్నాల లక్ష్మయ్య తెలిపారు. మీసేవ కార్యక్రమం ప్రారంభించి ఏడాది పూర్తయిన సందర్భంగా గురువారం కలెక్టరేట్ కాన్ఫ్‌రెన్స్ హాల్‌లో మీసేవ వార్షికోత్సవాన్ని నిర్వహించారు. ఈ కార్యక్రమానికి ముఖ్యఅతిథిగా హాజరైన మంత్రి పొన్నాల లక్ష్మయ్య మాట్లాడుతూ మీసేవ ద్వారా ప్రస్తుతం 135 సదుపాయాలను అందిస్తున్నామని, జూలై ఒకటవ తేదీ నుండి మరో 150 సేవలను, అక్టోబర్ నుండి మరో 300 సేవలను అందిస్తారని చెప్పారు. ఉత్తర మండల విద్యుత్ పంపిణీ సంస్థకు సంబంధించి 12 విద్యుత్ సేవలను మీసేవ ద్వారా ఐదు జిల్లాలలో అందిస్తున్నామని తెలిపారు. ఈ సేవలను రాష్టమ్రంతట విస్తరిస్తామని చెప్పారు. మీసేవ ద్వారా బ్యాంకింగ్ సేవలను అనుసంధానం చేసి ఐదు బిపిఎల్ సెంటర్ల ద్వారా బ్యాంకింగ్ లావాదేవిలను నిర్వహిస్తున్నారని అన్నారు. మీసేవ ద్వారా ఒక సంవత్సరంలో అత్యధికంగా 1223750 లావాదేవీలు నిర్వహించి రాష్ట్రంలో జిల్లా ప్రథమస్థానం సాధించిందని చెప్పారు. దీనికి కారణం కియోస్క్ ఆపరేటర్లు, ప్రభుత్వ అధికారులు కలసికట్టుగా పనిచేయడమని అన్నారు. ఆధునిక సాంకేతిక పరిజ్ఞానాన్ని ప్రభుత్వ పథకాలకు అనుసంధానం చేయడంతో ప్రజలకు పారదర్శకమైన సేవలు అవినీతికి అస్కారం లేకుండా లభిస్తున్నాయని అన్నారు. ప్రజలకు అందిస్తున్న సేవల విషయంలో ఇతర రాష్ట్రాలు మన రాష్ట్రాన్ని ఆదర్శంగా తీసుకుంటున్నాయని తెలిపారు. మీసేవ వలన ప్రజలకు పారదర్శకమైన సేవలు అందటమేకాకుండా నిరుద్యోగులకు ఉపాధి లభిస్తుందని అన్నారు. జిల్లా జాయింట్ కలెక్టర్ ప్రద్యుమ్న మాట్లాడుతూ గత ఏడాది జూన్ 25వ తేదీన మొదటిసారిగా మీసేవ కేంద్రాన్ని రాష్ట్ర ఐటిశాఖ మంత్రి జిల్లాలో ప్రారంభించారని తెలిపారు. సంవత్సరకాలంలో అత్యధిక లావాదేవీలు 1223750 చేసినందుకు రాష్ట్రప్రభుత్వం జిల్లాకు అవార్డు కూడా ఇచ్చిందని తెలిపారు. మీసేవ ద్వారా అందిన దరఖాస్తులను నిర్ణీత గడువులో అత్యధికంగా పరిష్కరించిన ఘనత జిల్లాకు దక్కిందని అన్నారు. మీసేవ సదుపాయం గ్రామీణ ప్రాంతాలలో ముఖ్యంగా ఏజెన్సీ ప్రాంత ప్రజలకు ఉపయోగపడుతున్నాయని చెప్పారు. మీసేవ ద్వారా మధ్య దళారులను నివారించి నేరుగా ప్రజలకు సేవలను అందిస్తున్నామని అన్నారు. జిల్లాలో మీసేవ సెంటర్ల పనితీరు బాగుందని తెలిపారు. మీసేవపై ప్రత్యేక సంచిక మీసేవపై ప్రత్యేక సంచికను రాష్ట్ర ఐటి శాఖ మంత్రి పొన్నాల లక్ష్మయ్య గురువారం కలెక్టరేట్ కాన్ఫ్‌రెన్స్ హాల్‌లో ఆవిష్కరించారు. మీసేవ కేంద్రాలలో విశేష సేవలు చేసిన పలువురు ఆపరేటర్లు, ఉద్యోగులకు మంత్రి ప్రశంసాపత్రాలను అందజేశారు. మీసేవలను ప్రారంభించిన మొదటి 100సెంటర్లకు 10వేల రూపాయల చొప్పున గ్రాంట్‌ను రాష్ట్ర ఐటిశాఖ మంజూరు చేసింది. నిర్వాహక కేంద్రాలకు ఈ మొత్తాన్ని పంపిణీ చేశారు. ఈ కార్యక్రమంలో జిల్లా రెవెన్యూ అధికారి డాక్టర్ శేషాద్రి, జిల్లా పౌరసంబంధాల అధికారి కె.వెంకటరమణ పాల్గొన్నారు. నీతి, నిజాయితీలతోనే గౌరవం * పోలీసు సిబ్బందికి అర్బన్ ఎస్పీ వెంకటేశ్వర్‌రావు పిలుపు వరంగల్, జూన్ 27: నీతి, నిజాయితీతో విధులు నిర్వహిస్తే ప్రజలు పోలీసులను గౌరవిస్తారని వరంగల్ అర్బన్ ఎస్పీ ఎ.వెంకటేశ్వర్‌రావు అన్నారు. గురువారం భీమారంలోని ఎస్‌విఎస్ కళాశాలలో హన్మకొండ, మామునూరు, కాజీపేట పోలీస్ సబ్ డివిజనల్ పరిధిలోని పోలీసు అధికారులకు వృత్తినైపుణ్యతపై రెండురోజుల శిక్షణ తరగతులను అర్బన్ ఎస్పీ ప్రారంభించారు. పోలీసు సిబ్బందికి రెండురోజుల శిక్షణ తరగతులలో పోలీసులకు, ప్రజలకు మధ్య సన్నిహిత సంబంధాలు, బాధితుడు స్టేషన్‌కు వచ్చిన సమయంలో బాధితుడు మనస్తత్వాన్ని గుర్తించి పోలీసులు ఏ విధంగా ప్రవర్తించాలి, పోలీస్‌స్టేషన్‌లో ఏర్పాటు చేసిన రిసెప్షన్ కౌంటర్లు, ఆ విభాగంలో పనిచేసే సిబ్బంది వ్యవహరించే పద్ధతిపై వివరిస్తారు. ముఖ్యంగా స్ర్తిలు, పిల్లలు, బలహీనవర్గాల ప్రజలతో పోలీసులు వ్యవహరించవలసిన తీరు, ప్రజల చేత ఆదర్శ పోలీసుగా గుర్తించే విధంగా పోలీసుల పనితీరులో తీసుకురావలసిన మార్పులతోపాటు శారీరక ధృడత్వం మొదలైన అంశాలపై సంబంధిత విభాగాల్లో నిపుణులతో శిక్షణ ఇస్తారు. శిక్షణ ప్రారంభ కార్యక్రమంలో ఎస్పీ మాట్లాడుతూ ఇటీవలకాలంలో ప్రజలతో సన్నిహిత సంబంధాల కోసం పోలీసులు అనేక కార్యక్రమాలు నిర్వహిస్తున్నారని, ప్రజలతో సన్నిహిత సంబంధాలను ఏర్పాటు చేసుకోవడం ప్రతి పోలీసు బాధ్యత అని చెప్పారు. పోలీసులు ప్రజలు కోరుకునే విధంగా వ్యవహరిస్తూ, ప్రజల సమస్యలను పరిష్కరించే విధంగా పనిచేస్తే ప్రజలు పోలీసులను ఆదరిస్తారని అన్నారు. ప్రజల సహకారం లేకుంటే శాంతిభద్రతలు, ఆర్థిక నేరాలు అదుపు చేయడం సాధ్యంకాదని తెలిపారు. ప్రజలు పోలీసుల నుండి చట్టపరిధిలో సేవలు కోరుకుంటున్నారని, ప్రజలకు సేవలు అందించినప్పుడే ప్రజలు పోలీసులకు సహకరిస్తారని చెప్పారు. పేద, బలహీనవర్గాల ప్రజలకు సకాలంలో న్యాయం చేయడం పోలీసుల బాధ్యతగా గుర్తించాలని, ప్రజల్లో వస్తున్న మార్పును దృష్టిలో పెట్టుకుని పోలీసుల ప్రవర్తనలో మార్పు తప్పనిసరి అని ఎస్పీ తెలిపారు. ఈ కార్యక్రమంలో కాజీపేట ఎఎస్పీ కోయ ప్రవీణ్, హన్మకొండ, మామునూరు డిఎస్పీలు శరత్‌బాబు, సురేష్, ఉమెన్ అండ్ చైల్డ్ వెల్ఫేర్ చైర్‌పర్సన్ డాక్టర్ మమతా రఘువీర్, మానసిక వైద్య నిపుణులు డాక్టర్ శ్రీ్ధర్, కెయుసి సిఐ దేవేందర్‌రెడ్డి, అర్బన్ డిసిఆర్‌బి సిఐ జనార్థన్‌రెడ్డి, కెయుసి ఎస్సై శ్రీనివాస్ పాల్గొన్నారు. ఉత్తరకాశీలో సహాయ చర్యలు వేగవంతం: మంత్రి బలరాం మహబూబాబాద్, జూన్ 27: ఉత్తరకాశీలో వరదల్లో చిక్కుకున్నవారిని క్షేమంగా తరలించే సహాయ చర్యలు వేగంగా కొనసాగుతున్నాయని కేంద్ర సామాజిక న్యాయశాఖ సహాయ మంత్రి పోరిక బలరాంనాయక్ తెలిపారు. డెహ్రాడూన్‌లో మకాం వేసిన ఆయన గురువారం సాయంత్రం టెలిఫోన్‌లో ఆంధ్రభూమితో మాట్లాడారు. ముఖ్యమంత్రి కిరణ్‌కుమార్‌రెడ్డి చొరవ తీసుకుని రాష్ట్రంనుండి ప్రత్యేకంగా పంపించిన విమానాల్లో యాత్రికులను సురక్షితంగా పంపిస్తున్నామని చెప్పారు. బుధ, గురువారాల్లో ఇలా వెయ్యమందికి పైగా యాత్రికులను రాష్ట్రానికి పంపించగలిగామని వివరించారు. దీనికి అదనంగా ప్రత్యేకంగా టూరిస్టు బస్సులను ఢిల్లీనుండి తెప్పించి యాత్రికులను తరలిస్తున్నామని తెలిపారు. రాష్ట్రానికి చెందిన మంత్రి శ్రీ్ధర్‌బాబు, తాను కలసి యాత్రికులకు కావలసిన సహాయాన్ని పర్యవేక్షిస్తున్నామని అన్నారు. డెహ్రాడూన్‌లో సహాయ శిబిరాలు ఏర్పాటుచేశామని తెలిపారు. వరదల్లో చిక్కిన వారికి ఉచితంగా భోజన వసతి, వైద్య సదుపాయం కల్పిస్తున్నామని వివరించారు. తమవారి ఆచూకీ తెలియడంలేదని ఆందోళన పడవద్దని, ఎక్కడ చిక్కిపోయినట్లు సమాచారం అందినా స్థానిక ప్రభుత్వ అధికారులకు తెలియచేయాలని కోరారు. సహకరించండి వరదల్లో చిక్కుపడిన వారిని ఆదుకునేందుకు కేంద్ర, రాష్ట్ర ప్రభుత్వాలు చేస్తున్న సహాయ చర్యలకు తోడుగా ప్రజలు, స్వచ్ఛంద సంస్థలు, దాతలు విరివిగా ప్రధానమంత్రి, ముఖ్యమంత్రి సహాయనిధిలకు విరాళాలు ఇవ్వాలని బలరాంనాయక్ విజ్ఞప్తి చేశారు. 29న కెయు డిగ్రీ ఇన్‌స్టంట్ పరీక్ష వరంగల్, జూన్ 29: కాకతీయ యూనివర్సిటీ డిగ్రీ ఇన్‌స్టంట్ పరీక్ష ఈనెల 29వ తేదీన నిర్వహిస్తున్నామని పరీక్షల నియంత్రణాధికారులు ప్రొఫెసర్ ఎం.వి.రంగారావు, డాక్టర్ బి.వెంకట్రాంరెడ్డి గురువారం తెలిపారు. 29వ తేదీ శనివారం మధ్యాహ్నం రెండుగంటల నుండి ఐదుగంటల వరకు ఈ పరీక్ష జరుగుతుందని, 6901మంది విద్యార్థులు పరీక్షకు హాజరవుతారని చెప్పారు. ఆదిలాబాద్, ఖమ్మం జిల్లాలో మూడు సెంటర్ల చొప్పున, వరంగల్‌లో నాలుగు సెంటర్లు, కరీంనగర్‌లో రెండు సెంటర్లు ఏర్పాటు చేసినట్లు తెలిపారు. ఎం.కాం కోర్సులో ప్రవేశాలకు కౌనె్సలింగ్ ప్రారంభం కాకతీయ, శాతవాహన యూనివర్సిటీల పరిధిలోని ఆయా పిజి కళాశాలల్లో ఎం.కాం కోర్సులో ప్రవేశాలకు గురువారం ఉదయం కాకతీయ యూనివర్సిటీ హ్యుమానిటీస్ భవనంలో కౌన్సిలింగ్ ప్రారంభమయింది. 72 కళాశాలలో 2780 సీట్లకు కౌన్సిలింగ్ నిర్వహిస్తున్నామని యూనివర్సిటీ అడ్మిషన్ల విభాగం డైరెక్టర్ ప్రొఫెసర్ పి.సాంబయ్య తెలిపారు. ఎం.కాం కౌన్సిలింగ్ జూలై ఐదవ తేదీ వరకు జరుగుతుంది. ఎం.కాం ప్రవేశపరీక్షలో 80మార్కులతో మొదటి ర్యాంక్ సాధించిన జమ్మికుంటకు చెందిన ఎ.అర్చనకు యూనివర్సిటీ కామర్స్ కళాశాల ఇన్‌చార్జ్ ప్రిన్సిపాల్ ప్రొఫెసర్ కె.ఓంప్రకాశ్, కామర్స్ విభాగం డీన్ ప్రొఫెసర్ కృష్ణమాచారి అడ్మిషన్ పత్రాలు అందజేశారు. కౌన్సిలింగ్‌లో జాయింట్ డైరెక్టర్ డాక్టర్ నర్సింహచారి, ప్రొఫెసర్ గడ్డం భాస్కర్, డాక్టర్ హరిప్రసాద్, డాక్టర్ రాజేందర్ పాల్గొన్నారు. ఉద్ధృతంగా జీడివాగు ఏటూరునాగారం, జూన్ 27: మండలంలోని రాంనగర్ వంతెనపై జీడివాగు ఉద్ధృతంగా ప్రవహిస్తోంది. ఇటీవల కురిసిన భారీ వర్షాలకు జీడివాగు ఉద్ధృతి పెరిగి రాంనగర్ వంతెనపై నుండి ప్రవహిస్తోంది. అలాగే, గోదావరి నీరు క్రమంగా పెరగడంతో జీడివాగు పోటెత్తింది. దీంతో రాంనగర్, లంబాడీతండా, కోయగూడ ఎల్లాపురం గ్రామాలకు రాకపోకలు స్తంభించాయి. గత ఏడాది వరద ఉద్ధృతితో వారం రోజులపాటు పైగ్రామాలు జలదిగ్భంధంలో చిక్కుకుపోయాయి. ప్రస్తుత వర్షాకాలంలో వర్షాలు సమృద్ధిగా కురిస్తే గత ఏడాది జరిగిన అనుభవాలే మళ్లీ పునరావృతం కానున్నాయని ప్రజలు, రైతులు బిక్కుబిక్కుమంటూ గడుపుతున్నారు. వరద ఉద్ధృతి పెరిగినప్పటికీ అధికారులు ఎలాంటి చర్యలు తీసుకోకపోవడం గమనార్హం. చదువుకునే విద్యార్థులు వంతెన దాటలాంటే భయంతో వణికిపోతున్నారు. ఇప్పటికైనా సంబంధిత అధికారులు స్పందించి నాటుపడవను ఏర్పాటుచేసి రాకపోకలకు అంతరాయం కలగకుండా చూడాలని పైగ్రామాల ప్రజలు అధికారులను కోరుతున్నారు. అడ్డుపడే పార్టీలను తరిమివేయాలి జఫర్‌గడ్, జూన్ 27: ప్రత్యేక తెలంగాణ రాష్ట్ర ఏర్పాటుకు అడ్డుపడుతున్న పార్టీలను గ్రామాలలోకి రాకుండా తరిమికొట్టాలని మాజీ మంత్రి, టిఆర్‌ఎస్ పార్టీ పొలిట్‌బ్యూరో సభ్యుడు కడియం శ్రీహరి అన్నారు. గురువారం మండలకేంద్రంలోని వాసవి కల్యాణ మండపంలో టిఆర్‌ఎస్ పార్టీ కార్యకర్తల విస్తృతస్థాయి సమావేశం నిర్వహించారు. ఈ సమావేశానికి ముఖ్యఅతిథిగా హాజరైన కడియం శ్రీహరి మాట్లాడుతూ ప్రత్యేక తెలంగాణ రాష్ట్ర ఏర్పాటుకోసం గత 50సంవత్సరాలుగా ఎన్నో ఉద్యమాలు చేస్తున్నారని తెలిపారు. అప్పటి నుండి నేటి వరకు ఎంతోమంది తెలంగాణ రాష్ట్ర ఏర్పాటుకోసం బలిదానాలు చేసుకున్నారని చెప్పారు. ఎన్నికల ముందు కాంగ్రెస్ తెలంగాణ రాష్ట్ర ఏర్పాటుకు అనుకూలమని చెప్పి గెలిచిన తరువాత పూర్తిగా మరచిపోయిందని పేర్కొన్నారు. తెలంగాణకు అడ్డుపడుతున్నది కాంగ్రెస్ పార్టీనేనని అన్నారు. చంద్రబాబు వచ్చిన తెలంగాణను అడ్డుకున్నది నిజం కాదా అని ప్రశ్నించారు. ఎస్టీఓ కార్యాలయంలో అవినీతి చేప జనగామ, జూన్ 27: జనగామ ఎస్టీఓ కార్యాలయంలో ఎసిబి అధికారులు గురువారం దాడులు జరిపారు. ఎస్టీఓ కార్యాలయంలో సీనియర్ అసిస్టెంట్‌గా పని చేస్తున్న తిరుపతి రెడ్డి బాధితుని నుండి రూ. 5వేల లంచం తీసుకుంటూ రెడ్‌హ్యాండ్‌గా పట్టుబడ్డాడు. ఎసిబి డిఎస్పీ సాయిబాబా కథనం ప్రకారం.. జనగామ ఫైర్‌స్టేషన్‌లో కానిస్టేబుల్‌గా పనిచేస్తున్న రంగు రవీందర్ అతనికి రావాల్సిన రూ. 1.34 లక్షల మెడికల్ బిల్లు, పిఆర్ బిల్లుల కోసం ఎస్టీవో కార్యాలయానికి వెళ్లాడు. ఎస్టీఓ కార్యాలయంలో పనిచేసే సీనియర్ అసిస్టెంట్ తిరుపతి రెడ్డి ముందుగా రెండు విడతలుగా బిల్లులు చెల్లించి మరో విడత బిల్లు చెల్లించేందుకు పర్సంటేజ్ ఇస్తేనే బిల్లు మంజూరు అవుతుందని చెప్పారు. అందుకు రూ. 8వేలు ఇవ్వాలని డిమాండ్ చేయడంతో బాధితుడు రవీందర్ అడ్వాన్స్‌గా రూ. 5వేలు ఇచ్చేందుకు ఒప్పుకొని ఎసిబి అధికారులను ఆశ్రయించాడు. ఎసిబి అధికారుల సూచన మేరకు రూ. 5వేలు తీసుకొని తిరుపతిరెడ్డికి ఇస్తుండగా మాటువేసిన ఎసిబి అధికారులు రంగంలోకి దిగి సీనియర్ అసిస్టెంట్ తిరుపతి రెడ్డిని రెడ్‌హ్యాండెడ్‌గా పట్టుకున్నారు. రూ.5వేలు నగదు స్వాధీనం చేసుకొని అతన్ని అరెస్టు చేసి హైద్రాబాద్ కార్యాలయానికి తరలించారు. వివాహిత ఆత్మహత్య రాయపర్తి, జూన్ 27: ఆర్థిక ఇబ్బందులను తాళలేక ఒంటిపై కిరోసిన్ పోసుకుని వివాహిత ఆత్మహత్య చేసుకున్న సంఘటన మండలంలోని మైలారం గ్రామంలో గురువారం జరిగింది. మృతురాలి బంధువులు, పోలీసుల కథనం ప్రకారం.. గౌరి హైమావతి (34), శ్రీనివాస్ దంపతులకు 15సంవత్సరాల క్రితం వివాహం జరిగింది. వీరికి ఇద్దరు కూతుర్లు, ఒక కుమారుడు కలిగారు. కుటుంబం ఆర్థిక ఇబ్బందుల్లో ఉండటంతో తరచు భార్యాభర్తల మధ్య గొడవలు జరుగుతుండేవి. ఈ క్రమంలో శ్రీనివాస్ తల్లి ఎనిమిదిరోజుల క్రితం మృతిచెందింది. ఆమె మృతికి శనివారం దశదినకర్మ చేయవలసి ఉండగా దానికి కావలసిన ఖర్చుల గురించి భార్యాభర్తల మధ్య బుధవారం రాత్రి గొడవ జరిగింది. ఈ క్రమంలో గురువారం తెల్లవారుజామున హైమావతి క్షణికావేశంలో ఒంటిపై కిరోసిన్ పోసుకుని ఆత్మహత్యకు పాల్పడింది. కుటుంబసభ్యులు వెంటనే వరంగల్ ఎంజిఎం ఆసుపత్రికి తరలించగా చికిత్స పొందుతూ మృతిచెందినట్లు తెలిపారు. కేసు నమోదు చేసుకుని దర్యాప్తు చేస్తున్నట్లు రాయపర్తి పోలీసులు తెలిపారు. పిపిజి దళ సభ్యుడు లొంగుబాటు వరంగల్, జూన్ 27: ప్రజాప్రతిఘటన మోహనన్న దళం సభ్యుడు మాడిపెద్ది బాలయ్య అలియాస్ అంజన్న గురువారం అర్బన్ ఎస్పీ ఎ.వెంకటేశ్వర్‌రావు ఎదుట లొంగిపోయారు. కొత్తగూడ మండలం పెగడపల్లి గ్రామానికి చెందిన బాలయ్య వ్యవసాయం చేసేవాడు. 1984లో అప్పటి ప్రజాపంథ పార్టీతో పరిచయం ఏర్పడి కొంతకాలం కొరియర్‌గా పనిచేశాడు. 1990 సంవత్సరం వరకు వరంగల్, ఖమ్మం ప్రాంతాలలో దళసభ్యునిగా పనిచేశాడు. అనంతరం అదే సంవత్సరం ప్రజాపంథ పార్టీతో విభేదించి ప్రజాప్రతిఘటన చలమన్న గ్రూపులో చేరి దళసభ్యునిగా 10సంవత్సరాలు చలమన్న, సుబ్బన్న, మంగన్న, మోహనన్న నాయకత్వంలో పనిచేశాడు. పార్టీ ఆదేశాల మేరకు దళసభ్యురాలు లక్ష్మిని వివాహం చేసుకున్నాడు. వివాహం జరిగిన ఐదునెలలకే భార్యాభర్తలు ఇరువురు 2000 సంవత్సరంలో అప్పటి ఎస్పీ వినాయక్ ప్రభాకర్ ఆప్టే ఎదుట లొంగిపోయి హైదరాబాద్‌లో కూలీ పనులు చేసుకుంటూ జీవనం గడిపారు. 2005 సంవత్సరంలో ఎఎల్‌టి విప్లవ గ్రూపునకు సహకరిస్తున్నారనే ఆరోపణతో హైదరాబాద్ పోలీసులు బాలయ్యను అరెస్టు చేసి వరంగల్ సెంట్రల్‌జైలుకు తరలించారు. రెండు సంవత్సరాలు జైలుశిక్ష అనుభవించిన బాలయ్య తిరిగి తన భార్యతో కలసి హైదరాబాద్ వెళ్లి సెక్యూరిటీగార్డుగా 2012 సంవత్సరం వరకు పనిచేశాడు. తనకున్న రెండు ఎకరాల పొలం సాగు చేసుకునేందుకు బాలయ్య తిరిగి తన గ్రామానికి చేరుకోగా అప్పటికే తన వ్యవసాయ పొలాన్ని కబ్జా చేసినట్లు గ్రహించి గ్రామపెద్దల ముందు పంచాయితీ పెట్టారు. కానీ తనకు న్యాయం జరగలేదనే అభిప్రాయంతో బాలయ్య ప్రజాప్రతిఘటన రాష్ట్ర కార్యదర్శి మోహనన్నను కలుసుకుని తన పొలం తగాదాను తీర్చమని కోరాడు. మోహనన్న పార్టీలో పనిచేయమని చెప్పడంతో బాలయ్య గత ఏడాది డిసెంబర్‌లో పార్టీలో చేరాడు. ఇప్పటి వరకు తనకు పొలం సమస్యను మోహనన్న తీర్చకపోవడంతో మనస్తాపం చెందిన బాలయ్య అర్బన్ స్పెషల్ బ్రాంచ్ సిఐ రాజరత్నంకు సమాచారం అందించి గురువారం అర్బన్ ఎస్పీ ఎ.వెంకటేశ్వర్‌రావు ఎదుట లొంగిపోయాడు. పలు ప్రాంతాలలో జరిగిన ఎన్‌కౌంటర్ల సందర్భంగా పోలీసులపై కాల్పులు జరిపిన సంఘటనల్లో బాలయ్యపై కేసులు నమోదై ఉన్నాయి.

విశాఖపట్నం, జూన్ 28: విశాల ప్రయోజనాల దృష్ట్యా రాష్ట్రాన్ని సమైక్యంగానే ఉంచాలి. అలాగే కేంద్ర ప్రభుత్వం సమైక్యాంధ్రపై స్పష్టమైన ప్రకటన చేయాలని సమైక్యాంధ్ర జేఎసి డిమాండ్ చేసింది. రాష్ట్ర విభజనను అడ్డుకునే అంశంలో సీమాంధ్ర ప్రజా ప్రతినిధులకు చిత్తశుద్ధి లేదని జెఎసి ఆరోపించింది. సమైక్యాంధ్రను కోరుతూ సీమాంధ్రకు చెందిన 14 యూనివర్శిటీల జెఎసి ప్రతినిధులు శుక్రవారం నాడిక్కడ ఆంధ్రాయూనివర్శిటీలో సమావేశమై సమైక్యాంధ్ర సాధనకు తీసుకోవాల్సిన కార్యాచరణపై చర్చించారు. ఈసందర్భంగా సమైక్యాంధ్ర విద్యార్థి జెఎసి ప్రతినిధులు లగుడు గోవిందరావు, ఎ మహేష్ తదితరులు మాట్లాడుతూ రాష్ట్ర విభజనకు వ్యతిరేకంగా సీమాంధ్ర ప్రజాప్రతినిధులు తమ పదవులను త్యాగం చేసి ఉద్యమంలో పాల్గొనాలని డిమాండ్ చేశారు. సీమాంధ్ర ప్రతినిధులు కేవలం మాటలకే పరిమితం అవుతున్నారని ఆరోపించారు. ఈనెల 30 విశాఖ వస్తున్న కాంగ్రెస్ పార్టీ రాష్ట్ర వ్యవహారాల ఇన్‌ఛార్జ్ దిగ్విజయ్‌సింగ్‌ను కలసి సమైక్యాంధ్రపై స్పష్టమైన ప్రకటన చేయాలని కోరనున్నట్టు తెలిపారు. దేశానికి రెండో రాజధానిగా హైదరాబాద్ నగరాన్ని అభివృద్ధి చేయాలని, వెనుకబడిన ప్రాంతాలకు ప్రత్యేక ప్యాకేజీలను అమలు చేయాలని డిమాండ్ చేశారు. అలాగే వెనుబడిన ఉత్తరాంధ్రకు సంబంధించి విశాఖపట్నంలో సెంట్రల్ యూనివర్శిటీ, విజయనగరంలో ఐఐఎం, శ్రీకాకుళంలో ఐఐటి నెలకొల్పి ఈప్రాంతంలో విద్యాభివృద్ధికి చర్యలు తీసుకోవాలని కోరారు. సమైక్యాంధ్రకు అనుకూలంగా జూలై 3న విజయవాడలో సీమాంధ్ర ప్రతినిధులతో రాజకీయ సమావేశం, జూలై మొదటి వారంలో ఎయులో భారీ బహిరంగ సభను నిర్వహించనున్నట్టు తెలిపారు. అలాగే సమైక్యాంధ్ర వాణిని విన్పిస్తూ విశాఖ నుంచి రథయాత్రను చేపట్టనున్నట్టు వెల్లడించారు. ప్రజాప్రతినిధులపై ఆగ్రహం సమైక్యాంధ్రను కోరుతూ విద్యార్థి జెఎసి తలపెట్టిన సీమాంధ్ర సదస్సుకు ప్రజాప్రతినిధులు గైర్హాజరు కావడం పట్ల జెఎసి ప్రతినిధులు మండిపడ్డారు. కేంద్ర, రాష్ట్ర మంత్రులు, పార్లమెంట్ సభ్యులు, ఎమ్మెల్యేలు సదస్సుకు ఆహ్వానించనా హాజరుకాకపోవడం పట్ల ఆగ్రహం వ్యక్తం చేశారు. నగరంలో ఉండికూడా ఎమ్మెల్యేలు వ్యక్తిగత కారణాలు, కుంటి సాకులు చెప్పి తప్పించుకోవడం బాధాకరమన్నారు. వీరికి ప్రజలే తగిన గుణపాఠం చెపుతారని అన్నారు. సమావేశంలో పొలిటికల్ జెఎసి ప్రతినిధి జెటి రామారావు, సీమాంధ్రకు చెందిన 14 యూనివర్శిటీల నుంచి విద్యార్థి జెఎసి ప్రతినిధులు హాజరయ్యారు.

విశాఖపట్నం, జూన్ 28: నగర పరిధిలో యుజిడి పనులు జరుగుతుండగా ముగ్గురు వ్యక్తులు మృత్యువాత పడిన ఘటనపై జాతీయ మానవహక్కుల కమిషన్ ఫిర్యాదు నమోదు చేసింది. ఈమేరకు జరిగిన ఘటనపై పూర్తి నివేదికను కోరుతూ కమిషన్ జివిఎంసిని కోరింది. దీనిపై ఇప్పటికే శాఖా పరంగా దర్యాప్తు జరిపి ఒక సూపరింటిండెంట్ ఇంజనీర్, మరో ఎగ్జిక్యుటివ్ ఇంజనీర్, మరో సహాయ ఇంజనీర్‌లపై చర్యలకు సిఫార్సు చేసినట్టు కమిషనర్ ఎంవి సత్యనారాయణ శుక్రవారం తనను కలిసిన విలేఖరులకు తెలిపారు. ఇప్పటికే జివిఎంసి ఈ సంఘటనపై పూర్తిస్థాయి విచారణ జరిపిందని, హక్కుల కమిషన్‌కు నివేదిక పంపనున్నట్టు తెలిపారు. మరో రెండు మూడు రోజుల్లో ఆశీల్‌మెట్ట ఫ్లైఓవర్ ట్రయల్ రన్ నిర్వహించనున్నట్టు తెలిపారు. జివిఎంసి ప్రస్తుత ఆదాయం 160 కోట్ల రూపాయలుండగా, దీన్ని 300 కోట్ల రూపాయలకు పెంచేందుకు చర్యలు తీసుకుంటున్నట్టు వివరించారు. ప్రాజెక్టుల బాధ్యతలు జానకికి విశాఖపట్నం, జూన్ 28: జివిఎంసిలో అదనపు కమిషనర్‌గా చేరిన ఐఎఎస్ అధికారిణి జానకికి ప్రాజెక్టు నిర్వాహణ బాధ్యతలు అప్పగించారు. ఈమేరకు కమిషనర్ ఎంవి సత్యనారాయణ ఆమెకు వివరించారు. ఇప్పటి వరకూ ప్రాజెక్ట్సు బాధ్యతలను చూస్తున్న నాగేంద్రకుమార్‌కు రెవెన్యూ విభాగాన్ని అప్పగించారు. అలాగే జోన్ 6 జెడ్సీగా పనిచేస్తూ శెలవుపై వెళ్లిన సాయిశ్రీకాంత్ స్థానంలో జివిఎంసి కార్యదర్శి సన్యాసి నాయుడుకు బాధ్యతలు అప్పగించారు.

విశాఖపట్నం, జూన్ 28: షెడ్యూల్డు కులాల వారికి అమలు చేస్తున్న సంక్షేమ కార్యక్రమాలు, రూల్ ఆఫ్ రిజర్వేషన్ కార్యక్రమాలను మరింత మెరుగ్గా అమలుపర్చేందుకు చర్యలు చేపట్టాలని ఎస్సీ సంక్షేమ కమిటి చైర్మన్ లబ్బి వెంకటస్వామి అధికారులను ఆదేశించారు. శుక్రవారం సింహాచలంలో సమావేశం అనంతరం అక్కడ నుంచి బయలుదేరి నేరుగా ఇక్కడి ప్రభుత్వ అతిథిగృహానికి చేరుకున్నారు. దళిత సంఘాల నాయకులు, ప్రతినిధులు, ఉద్యోగులు, విద్యార్థుల నుండి దరఖాస్తులు స్వీకరించారు. ఈ సందర్భంగా ఆయన మాట్లాడుతూ ఎస్సీ,ఎస్టీ సబ్‌ప్లాన్‌కు చట్టబద్ధత కల్పించడం రాష్ట్ర ప్రభుత్వం తీసుకున్న చరిత్రాత్మక నిర్ణయంగా చెప్పారు. ఈ కారణంగా దళితులకు, గిరిజనులకు మరింత మేలు చేకూరిందన్నారు. ప్రభుత్వపరంగా వివిధ శాఖల ద్వారా షెడ్యూల్డు కులాలకు అమలు జరుగుతున్న సంక్షేమ పథకాలు, 52 ప్రభుత్వ శాఖల్లో ఎస్సీ అభ్యర్థుల నియామకాలు, పదోన్నతులపై సమీక్షిస్తామన్నారు. వీటి అమల్లో ఏమైనా అభ్యంతరాలు, ఫిర్యాదులు లేదా మరింత మెరుగ్గా అమలు చేసేందుకు తగిన సలహాలు సూచనలు తెలియజేయాల్సిందిగా కోరారు. వీటన్నింటిని క్రోడీకరించి ప్రభుత్వానికి నివేదిక సమర్పిస్తామన్నారు. ఆరోగ్యం, విద్య, గృహనిర్మాణం, ఐకెపి, ఉపాధిహామీ, పారిశుద్ధ్యం, తాగునీరు, సాంఘిక సంక్షేమశాఖ ద్వారా అమలు చేస్తున్న వసతి గృహాలు, అస్పృశ్యత, అత్యాచార నివారణ చర్యలు, ఎస్సీ కార్పొరేషన్ ద్వారా అ మలు చేస్తున్న రుణ సౌకర్యం, శిక్షణా కార్యక్రమాలను గురించి దళిత సంఘాలు తమ అభిప్రాయాలను తెలియజేయాలన్నారు. కార్యక్రమాలన్నీ పారదర్శకంగా అమలు కావాలన్నారు. రెల్లి కులస్తులు, సఫాయి కర్మచారీస్ సమస్యలపై జిల్లా మోనటిరింగ్ కమిటి, మాలమహానాడు ప్రాంతీయ అధ్యక్షులు ఎస్‌సిల వర్గీకరణ, స్కాలర్‌షిప్‌లు, బ్యాంకు రుణాలు తదితర సమస్యల గురించి, ఆంధ్రవిశ్వవిద్యాలయ విద్యార్థులు ఉపకార వేతనాల కోసం దరఖాస్తులు, ఫిర్యాదులు సమర్పించారు. ఈ సమావేశంలో కమిటి సభ్యులు హనుమంత్, షిండే, పంచకర్ల రమేష్‌బాబు, విశాఖపట్నం రెవెన్యూ డివిజనల్ అధికారి సిహెచ్.రంగయ్య, సాంఘిక సంక్షేమ శాఖ ఉప సంచాలకులు శ్రీనివాసన్ తదితరులు పాల్గొన్నారు.

విశాఖపట్నం, జూన్ 28: ఉత్తరాఖండ్ ఛార్‌దామ్ వరదల్లో చిక్కుకొని క్షేమంగా ఇళ్ళకు చేరుకుంటున్న వారి సంఖ్య రోజురోజుకీ పెరుగుతోంది. అయితే దీనికి సంబంధించి విశాఖ జిల్లా నుంచి బయలుదేరి వెళ్ళిన యాత్రికుల సంఖ్యలో స్పష్టత లేనేలేదు. జిల్లా యంత్రాంగం మాత్రం 211 మంది వెళ్ళినట్టుగా స్పష్టమైన ప్రకటన చేసేసింది. ఇందులో 150 మంది యాత్రికులు ఇప్పటికే తమ ఇళ్ళకు చేరుకోగా, మరో 45 మంది వేర్వేరు పుణ్యక్షేత్రాల సందర్శనలో ఉన్నారని, ఈ జిల్లాకు సంబంధించి కేవలం ఆరుగురు మాత్రమే మృతి చెందారని పేర్కొంది. మరో పది మంది తప్పిపోగా, నలుగురు ఆచూకీ లభించినట్టు తెలిపింది. ఇది జరిగి మూడు రోజులు కావస్తుంది. అయినా ఇంకా వస్తూనే ఉన్నారు. అయితే అనేక మార్గాల్లో విశాఖకు చేరుకున్న వారి సంఖ్య దీనికి మించిపోయింది. గత వారం రోజుల నుంచి ప్రతిరోజు 50 మందికి తగ్గకుండా విశాఖ నగరానికి చేరుకుంటునే ఉన్నారు. వీరిలో కొంతమంది పాయకరావుపేట, యలమంచిలి, అనకాపల్లి, నర్సీపట్నం తదితర ప్రాంతాల వద్ద దిగి తమ ఇళ్ళకు వెళ్తున్నారు. తొలిసారిగా ఆర్టీసీ విశాఖ రీజియన్ ఆధ్వర్యంలో వాల్వో బస్సు ద్వారా శుక్రవారం ఒక్కరోజే 50మందికి పైగా విశాఖ నగరానికి చేరుకోగలిగారు. ఇందులో విమానం ద్వారా 30 మంది, ఆర్టీసీ వాల్వోలో 16 మంది, సమత ఎక్స్‌ప్రెస్ రైలులో ఇంకో 16 మంది ఇక్కడకు చేరుకున్నారు. హైదరాబాద్ నుంచి వాల్వో ద్వారా ఇక్కడకు చేరుకున్న యాత్రికల్లో 16 మంది విజయనగరం జిల్లా ఎస్.కోటకు చెందినవారే. తెలుగుదేశం పార్టీ ఏర్పాటు చేసిన ప్రత్యేక విమానంలో మరో 30 మంది ఇక్కడకు చేరుకోగలిగారు. నిజాముద్ధీన్-విశాఖపట్నం (సమత) ఎక్స్‌ప్రెస్ ద్వారా శుక్రవారం రాత్రి 6.30 గంటలకు 16మంది వరకు చేరుకున్నట్టు రైల్వే పోలీసులు తెలిపారు. ఢిల్లీ-విశాఖపట్నం మధ్య దక్షిణమధ్య రైల్వే నిర్వహించిన ప్రత్యేక రైలులో ఈ నెల 24వ తేదీన మధ్యాహ్నాం మూడు గంటలకు 20 మంది యాత్రికులు ఇక్కడకు చేరుకున్నారు. ఇందులో ఇద్దరు విజయవాడలో దిగిపోగా, మిగిలిన 18 మంది దీనిలో వచ్చారు. ఇందులో 15 మంది ఒకే కుటుంబం కాగా, మరో ముగ్గురు నగరంలో వేర్వేరు ప్రాంతాలకు చెందిన వారే. అయితే అంతా ఒకేసారి కలిసికట్టుగా బయలుదేరి వెళ్ళి తిరుగు ప్రయాణంలోను కలిసే వచ్చారు. అదేరోజు అనకాపల్లి, యలమంచిలి, తుని, పాయకరావుపేట తదితర రైల్వేస్టేషన్లలో నలుగురేసి వంతు దిగిపోయారు. అలాగే ఈమధ్య వరుసగా మూడు రోజులపాటు తెలుగుదేశంపార్టీ నడిపిన ప్రత్యేక విమానంలో 30 నుంచి 50 మంది వరకు ఇక్కడకు రాగలిగారు. ఈ నెల 22న నిజాముద్ధీన్-విశాఖపట్నం (సమత) ఎక్స్‌ప్రెస్‌లో ఒకే కుటుంబానికి చెందిన ఏడుగురు ఇక్కడకు చేరుకున్నారు. వీరితోపాటు మరికొంతమంది ఇందులో రాగలిగారు. ఈ నెల 21న సీతమ్మధార బాలయ్యశాస్ర్తీ ప్రాంతానికి చెందిన ఆరుగురు ఛారదామ్ వరదల్లో మృతిచెందినట్టు సంబంధిత కుటుంబీకులు తెలుసుకున్నారు. డిల్లీ నుంచి విశాఖపట్నంనకు ప్రతిరోజు సమత, స్వర్ణజయంతి, లింక్ ఎక్స్‌ప్రెస్‌లు నడుస్తున్నాయి. వీటి ద్వారా రోజుకీ కనీసం 10 నుం 20 మంది వస్తున్నట్టు తెలిసింది. గత వారం రోజులుగా వీటి ద్వారా వస్తున్న బాధితులు దాదాపు 60మంది అయినా ఉండవచ్చు. రైళ్ళు, విమానాలు, ఆర్టీసీ బస్సుల ద్వారా ఒక్క విశాఖ నగరానికి చేరుకున్న వారే దాదాపు 300 మంది ఉంటుండగా, మార్గ మధ్యలో కనీసం 50 వరకు దిగి ఉండవచ్చనేది స్పష్టమవుతోంది. గత ఆరు రోజులుగా అనేక మార్గాల ద్వారా విశాఖకు చేరుకున్న వారి సంఖ్యకు, జిల్లా యంత్రాంగం చేసిన అధికారిక ప్రకటనకు ఎటువంటి సంబంధం లేకుండా పోయింది. మరో నాలుగు రోజుల వరకు మరికొంతమంది వేర్వేరు మార్గాల్లో వచ్చే అవకాశాలున్నాయి. కొత్త రైల్వే టైంటేబుల్ వచ్చేసింది... * ఒకటవ తేదీ నుంచి అమలు * పట్టాలెక్కనున్న 12 కొత్త రైళ్ళు * మరికొన్ని రైళ్ళ ఫ్రీక్వెన్సీ పెంపు విశాఖపట్నం, జూన్ 28: కొత్త రైల్వే టైంటేబుల్ వచ్చేసింది. వచ్చేనెల ఒకటవ తేదీ నుంచి ఇది అమల్లోకి వస్తుంది. పలు రైళ్ళ ఫ్రీక్వెన్సీ పెరిగింది. ప్రధానంగా 12 కొత్త రైళ్ళు పట్టాలెక్కనున్నాయి. భువనేశ్వర్-తిరుపతి (వీక్లీ ఎక్స్‌ప్రెస్), విశాఖపట్నం-గాంధీగామ్, విశాఖపట్నం-జోద్‌పూర్ (వీక్లీ ఎక్స్‌ప్రెస్), విశాఖపట్నం-కొల్లాం (వీక్లీ ఎక్స్‌ప్రెస్), విశాఖపట్నం-టాటా (సూపర్‌ఫాస్ట్, వీక్లీ ఎక్స్‌ప్రెస్), కామాక్య-యశ్వంత్‌పూర్ (వీక్లీ ఎక్స్‌ప్రెస్) హటియా-యశ్వంత్‌పూర్ (వీక్లీ ఎక్స్‌ప్రెస్, విశాఖపట్నం-రాయగడ (పాసింజర్)కొత్తగా పట్టాలెక్కుతున్నాయి. ఇవి కాకుండా ఈస్ట్‌కోస్ట్ రైల్వే జోన్ పరిధిలో మరికొన్ని రైళ్ళు కొత్తగా పట్టాలెక్కనున్నాయి. వీటిలో భువనేశ్వర్-న్యూఢిల్లీ (వీక్లీ ఎక్స్‌ప్రెస్) ఉంది. ఇది అంగుల్, సంబల్‌పూర్, జార్స్‌గుడల మీదుగా నడుస్తుంది. అలాగే పూరి-సాయినగర్ సంబల్‌పూర్, టిట్లాఘర్, రాయిపూర్‌ల మీదుగా నడుపుతారు. ఛంత్రగాఛీ-చెన్నై బై వీక్లీ ఏసి సూపర్‌పాస్ట్ ఎక్స్‌ప్రెస్ కెందుఝర్‌ఘర్‌ల మీదుగా నడుస్తుంది. ఛంత్రగాఛీ-చెన్నై బై వీక్లీ ఎక్స్‌ప్రెస్ కటక్, భువనేశ్వర్‌ల మీదుగా నడువనుంది. వీటితోపాటు పూరి-అజమర్ వీక్లీక్స్‌అపెస్ సంబల్‌పూర్, టిట్లాఘర్, రాయిపూర్‌ల మీదుగా నడుస్తుంది. * ఇక విశాఖ-ముంబై రోజూ ఇక నుంచి విశాఖ-ముంబై మధ్య నడిచే (లోక్‌మాన్య తిలక్ టెర్మినల్) ప్రతిరోజ నడుస్తుంది. ఇది ఇంతవరకు రెండు రోజులు మాత్రమే నడిచేది. దీనిని ఇపుడు వారంలో ప్రతిరోజు నడపాలని నిర్ణయించింది. ఇంతవరకు దీనికి ఉన్న 22819/20నెంబర్‌ను ఇక నుంచి 18519/18520నెంబర్లగా మార్పు చేసింది. * మరికొన్నింటి రైళ్ళకు ఫ్రీక్వెన్సీ (రోజులు) పెంపు మరికొన్న ముఖ్యమైన రైళ్ళకు సంబంధించిన రోజులు ఇక నుంచి పెరగనున్నాయి. సంబల్-నాందేడ్ (18309/18310) బై వీక్మీ ఎక్స్‌ప్రెస్, విశాఖపట్నం-నాందేడ్ (18509/18510) బై వీక్లీ ఎక్స్‌ప్రెస్ ఇక నుంచి మూడు రోజులు నడుస్తుంది. సంబల్‌పూర్-నాందేడ్ ఎక్స్‌ప్రెస్ ప్రతి ఆది,సోమ,శుక్రవారాల్లో సంబల్‌పూర్ నుంచి, ప్రతి సోమ,మంగళ, శనివారాల్లో నాందేడ్ నుంచి ఇది బయలుదేరుతుంది. అలాగే విశాఖపట్నం-నాందేడ్ ఎక్స్‌ప్రెస్ ప్రతి మంగళ, బుధ, శనివారాల్లో విశాఖపట్నం నుంచి, ప్రతి బుధ, గురు, ఆదివారాల్లో నాందేడ్ నుంచి బయలుదేరనుంది. అలాగే రోజు నడిచే ఎల్‌టిటి రైలు ఎప్పటి నుంచి ఏ సమయాల్లో నడుస్తుందనేది త్వరలోనే ప్రకటించనుంది. * మరికొన్ని పొడిగింపు భువనేశ్వర్-్భవానీపాట్నా ఎక్స్‌ప్రెస్ (18437/18438) ఎక్స్‌ప్రెస్‌ను జునాఘర్ వరకు పొడిగించింది. అలాగే పూరి-దిబ్రుగర్ వీక్లీ ఎక్స్‌ప్రెస్ (18419/18420) జయ్‌నగర్ వరకు పొడిగించారు. వీటితోపాటు భువనేశ్వర్-లోక్‌మాన్య తిలక్ టెర్మినల్ ఎక్స్‌ప్రెస్ (12145/12146) పూరి వరకు పొడిగించబడింది. అయితే ఇది ఏ రోజు నుంచి సమయంలో బయలుదేరింది అధికారికంగా ప్రకటించనున్నట్టు ఈస్ట్‌కోస్ట్ రైల్వే జోన్ అధికారులు తెలిపారు. అదేవిధంగా రూర్కెలా-్భవనేశ్వర్ (ఇంటర్‌సిటీ) రూర్కెలా నుంచి ఝార్స్‌గుడ, సంబల్‌పూర్ సిటీ, అంగుల్ మీదుగా భువనేశ్వర్‌కు చేరుకుంటుంది. రూర్కెలా-కోరాపుట్ (18107) ఇంటర్‌సిటీ ఎక్స్‌ప్రెస్ రూర్కెలా, ఝార్స్‌గూడ, సంబల్‌పూర్, బాలాంగీర్, టిట్లాగర్, రాయగడ, మీదుగా కోరాపుట్‌కు వెళ్తుంది. సంబల్‌పూర్-పూరి ఇంటర్ సిటీ ఎక్స్‌ప్రెస్ (18303) సంబల్‌పూర్, అంగుల్, భువనేశ్వర్ మీదుగా పూరికి వెళ్తుంది. టిట్లాఘర్-హౌరా ఎక్స్‌ప్రెస్ ( 18272) ఝార్స్‌గుడ, సంబల్‌పూర్, సంబల్‌పూర్, బోలంగీర్, టిట్లాగర్ వరకు నడువనుంది. రాయగడ-టిట్లాగర్ ఇంటర్ సిటీ (18302) ఎక్స్‌ప్రెస్ సంబల్‌పూర్, బోలంగీర్ మీదుగా టిట్లాగర్‌కు చేరుకుంది. దుర్గ్-జగదల్‌పూర్ ఎక్స్‌ప్రెస్ (18221) టిట్లాగర్, రాయగడ, కోరాపుట్, కంటాబంజి మీదుగా రాయపూర్‌కు వెళ్తుంది. సంబల్‌పూర్-వారణాసి ఎక్స్‌ప్రెస్ (18311) జార్స్‌గుడ, సంబల్‌పూర్ మీదుగా నడువగా, సంబల్‌పూర్-రాయగడ (18301) ఇంటర్ సిటీ ఎక్స్‌ప్రెస్ సంబల్‌పూర్, సంబల్‌పూర్, బోలంగీర్, టిట్లాగర్ మీదుగా రాయగడగు చేరుకుటుంది. అలాగే విశాఖపట్నం-సికింద్రాబాద్ (12805) విశాఖపట్నం నుంచి బయలుదేరుతుంది. పూరి-కోకా ఎక్స్‌ప్రెస్ (18401) పూరి, ఖుర్దారోడ్డు, బ్రహ్మపూర్, పలాస, విజయనగరం, పలాస మీదుగా నడుస్తుంది. మళ్ళీ పెట్రో భారం విశాఖపట్నం, జూన్ 28: పెట్రోల్ ధర మళ్ళీ పెరిగింది. గడచిన పక్షంలో ఇది రెండవసారి పెరిగినట్టు. పెరిగిద ధరలు శుక్రవారం అర్ధరాత్రి నుంచి అమల్లోకి వస్తాయి. ఈ ఏడాదిలో వరుసగా నాలుగుసార్లు పెట్రోల్ ధరలను పెంచిన కేంద్ర ప్రభుత్వం వాహన చోదకులను లక్ష్యంగా చేరుకుంటుంది. ఈసారి లీటర్ పెట్రోల్‌కు రూ.1.82లు పెంచగా, దీనికి పన్నులు కలుపుకుంటే రూ.2.32 వరకు ఉండవచ్చని వాహనచోదకులు భావిస్తున్నారు. పెరిగిన ధరతో వినియోగదారులు రోజుకీ దాదాపు నాలుగు లక్షల వరకు భారం మోయాల్సి ఉంటుంది. దశలవారీగా పెట్రోల్ ధరలను పెంచుతూ సాధారణ వినియోగదారులపై పెనుభారాన్ని మోపుతుండటంపట్ల సర్వత్రా తీవ్ర నిరసన వ్యక్తమవుతోంది. విశాఖ జిల్లా మొత్తంపై వందకు పైగానే పెట్రోల్ బంక్‌లుండగా, ఇందులో ఒక్క విశాఖ నగరంలోనే 69 పెట్రోల్ బంక్‌లున్నాయి. వీటి ద్వారా రోజుకి దాదాపు రెండున్నర లక్షల లీటర్ల పెట్రోల్ అమ్మకాలు సాగుతున్నాయి. పెరిగిన పెట్రోల్ ధర ప్రభావం రవాణాపై తీవ్ర ప్రభావాన్ని చూపనుంది. పెట్రోల్‌తోనే నడిచే ఆటోలు, ఆర్టీసీ, మరికొన్ని వాహనాలపై పెనుభారం పడనుంది. అనేకసార్లు పెరిగిన పెట్రోల్ ధరలపై పలు పార్టీలకు చెందిన నాయకులు, కార్యకర్తలు పెద్దఎత్తున ఆందోళన చేపట్టనున్నాయి. దేవస్థానం ఉద్యోగాల్లో మా వాటా మాకివ్వాల్సిందే! ఎస్సీ శాసనసభా సంఘం చైర్మన్ వెంకటస్వామి స్పష్టీకరణ సింహాచలం, జూన్ 28: శ్రీ వరాహలక్ష్మీనృసింహస్వామి వారి దేవస్థానంలో రూల్ ఆఫ్ రిజర్వేషన్‌లను అనుసరించి 30 ఉద్యోగ నియామకాలు, పద్నోతుల్లో ఎస్సీలకు రావాల్సిన వాటా ఇవ్వాల్సిందేనని ఎస్సీ శాసనసభా సంఘం చైర్మన్ లబ్బి వెంకటస్వామి స్పష్టం చేశారు. శుక్రవారం కొండపై ఎస్సీ సభాసంఘ సమావేశం జరిగింది. ముందు ఎస్సీ ఉద్యోగుల నుండి వచ్చిన ఫిర్యాదులను, వినతులను చైర్మన్ స్వీకరించారు. కీలకమైన స్థానాల్లో విధులు నిర్వహిస్తున్నారా లేక అధికారులు వివక్ష చూపిస్తున్నారా అంటూ వారిని ఆరా తీసారు. వారితో మాట్లాడుతున్న సమయంలో ఇఓతో సహా ఎవరూ ఉండరాదని ఆయన ఆదేశించారు. అదే విధంగా మహిళా ఉద్యోగులను అధికారుల నుండి మీకేమైనా వేధింపులు, సమస్యలున్నాయా అంటూ ప్రశ్నించారు. ఒక వేళ చెప్పడానికి అభ్యంతరమైతే లిఖిత పూర్వకంగా ఇవ్వమని చైర్మన్ సూచించారు. వారి విధుల పట్ల ఆయన సంతృప్తి వ్యక్తం చేశారు. అప్పారావు, బెనర్జీదేశాయ్ అ ఉద్యోగుల పదోన్నతి విషయంలో కమిటీ అసంతృప్తి వ్యక్తం చేసింది. తక్షణమే వీరిరువురికి పదోన్నతి కల్పించాలంటూ అధికారులను చైర్మన్ ఆదేశించారు. అదే విధంగా దేవస్థానం ఖర్చుల విషయమై సభాసంఘం అధికారులను అడిగి తెలుసుకున్నారు. అంతేకాకుండా పర్మినెంట్, ఔట్‌సోర్సింగ్ ఉద్యోగుల వివరాలపై ఆరా తీసారు. ఔట్‌సోర్సింగ్ నియామకాల్లో రిజర్వేషన్ అమలుతీరును ప్రశ్నించారు. ఖచ్చితమైన సమాచారం అందించడంలో అధికారులు తడబడ్డారు. దేవస్థానం భూసమస్య అంశాన్ని కూడా సభాసంఘం అపశ్నించింది. పెందుర్తి శాసనసభ్యుడు పంచకర్ల తన పరిధిలోని కొంత సమాచారాన్ని చైర్మన్‌కు వివరించారు. దేవాలయ సాంప్రదాయ సేవల్లో కూడా ఆసక్తి ఉన్న వారికి అవకాశం కల్పించాలని సభాసంఘం అధికారులను ఆదేశించారు. ఎస్సీలందరికీ పట్టాలిచ్చే విధంగా ప్రభుత్వానికి సిఫార్సు చేస్తామని చైర్మన్ చెప్పారు. ఔట్‌సోర్సింగ్ ఉద్యోగుల జీతాల్లో పిఎఫ్, ఇఎస్‌ఐ, గ్రాట్యుటీ మినహాయించాలని దేవస్థానం వాటిని సంబంధిత శాఖలకు చెల్లించేలా చర్యలు తీసుకోవాలని చైర్మన్ ఆదేశించారు. ఇప్పటి వరకూ వచ్చిన ఏ సభాసంఘాలు ఈ తరహాలో సమీక్ష నిర్వహించలేదు. ఈ నేపథ్యంలో ఎస్సీ సభాసంఘం వస్తూనే ఇఓ మినహా ఎస్సీ ఉద్యోగులందరినీ సమావేశపరిచి సమస్యలు అడిగి తెలుసుకోవడం ప్రతి అంశాన్ని లోతుగా పరిశీలించడం సమస్యలకు అక్కడికక్కడే పరిష్కారాలు చూపారు. ఎస్సీ సంఘం నేత, దేవస్థానం ఉద్యోగుల సంఘం ఉపాధ్యక్షుడు పి.మోహన్‌రావు సభా సంఘానికి సమస్యలపై స్పందించిన ఇఓ రామచంద్రమోహన్‌కి కృతజ్ఞలు తెలిపారు. రానున్నది రాజన్న రాజ్యమే.. బుచ్చెయ్యపేట, జూన్ 28: రానున్నది మళ్లీ రాజన్న రాజ్యమేనని, ప్రజలు భయపడాల్సిన అవసరంలేదని దివంగత ముఖ్యమంత్రి వైఎస్ రాజశేఖరరెడ్డి కుమార్తె షర్మిల ప్రజలకు భరోసా ఇచ్చారు. జిల్లాలో షర్మిల నిర్వహిస్తున్న మరో మహాప్రస్థానం పాదయాత్ర శుక్రవారం మండలంలోకి ప్రవేశించింది. శుక్రవారం సాయం త్రం ఆరు గంటలకు మండలంలోని కొమ్మళ్లపూడి గ్రామంలో పాదయా త్ర ప్రవేశించింది. కొమ్మళ్లపూడి, బుదిరెడ్ల పాలెం, కొండెంపూడి జంక్షన్, పొట్టిదొరపాలెం, ఎల్.సింగవరం గ్రామాల మీదుగా సాగిన యాత్ర శుక్రవారం లోపూడి గ్రామానికి చేరుకుంది. మార్గమధ్యలో జనం ఆమెకు ఘనస్వాగతం పలికారు. ఈ సందర్భంగా ఆమె ప్రజలను పలకరిస్తూ, వారి కష్టాలను తెలుసుకుంటూ ముందుకు సాగింది. పలుచోట్ల పెద్ద సంఖ్యలో జనం ఆమెను చూడటానికి ఎగబడినా, సెక్యూరిటీ సిబ్బంది, రోప్ పార్టీ వారిని దూరంగా నెట్టివేశారు. పొట్టిదొరపాలెంవద్ద ఏర్పాటుచేసిన వైఎస్సార్ విగ్రహాన్ని ఆమె శుక్రవా రం రాత్రి ప్రారంభించారు. ఈ సందర్భంగా వైఎస్ విగ్రహానికి పూలమాల వేసి ఘనంగా నివాళులు అర్పించారు. గొంతు బాగుండక పోవటంతో ఆమె పెద్దగా మాట్లాడకుండా, ప్రజలను పలకరిస్తూ, వారితో కరచాలనం చేస్తూ ముందుకు సాగింది. శుక్రవారం రాత్రి లోపూడిలో బస చేశారు. ఈ కార్యక్రమంలో షర్మిల వెంట వైఎస్సార్‌సిపి సమన్వయ కమిటీ కన్వీనర్ కొణతాల రామకృష్ణ, పార్టీ నియోజకవర్గ కన్వీనర్ బలిరెడ్డి సత్యారావు, విఎస్‌ఎన్ రాజు, మండల కన్వీనర్ తమరాన రామకోటి, యువజన నాయకుడు బోయిన నారాయణమూర్తి పాల్గొన్నారు. స్థానిక సంస్థల ఎన్నికల్లో కాంగ్రెస్ పార్టీకి పట్టంకట్టండి * మంత్రి బాలరాజు గూడెంకొత్తవీధి, జూన్ 28: రాబోయే స్థానిక సంస్థల ఎన్నికల్లో కాంగ్రెస్ పార్టీ బలపర్చిన అభ్యర్థుల గెలుపునకు అందరూ కృషి చేయాలని గిరిజన సంక్షేమ శాఖామంత్రి పసుపులేటి బాలరాజు పిలుపునిచ్చారు. శుక్రవారం గూడెంకొత్తవీధిలో 70లక్షల రూపాయలతో నిర్మించిన సబ్‌స్టేషన్‌ను ఆయన ప్రారంభించారు. ఈ సందర్భంగా ఆయన మాట్లాడుతూ గిరిజన ప్రాంత అభివృద్ధికి కాంగ్రెస్ ప్రభుత్వం ఎన్నో కార్యక్రమాలు చేపడుతుందని, ఇది మన అదృష్టమని మంత్రి అన్నారు. మారుమూల గ్రామాలకు రహదారులు వేసి గిరిజనుల సంక్షేమానికి కృషి చేస్తున్నది కాంగ్రెస్ ప్రభుత్వమేనని మంత్రి బాలరాజు పేర్కొన్నారు. 1987లో మండల ప్రెసిడెంట్‌గా ఎన్నికైన తాను విద్యుత్ సదుపాయం లేని గ్రామాలకు కరెంట్ సదుపాయం కల్పించామన్నారు. ఈ విద్యా సంవత్సరంలో గూడెంలో బాలికల డిగ్రీ కళాశాల ఏర్పాటుకు, మోడల్ స్కూల్ నిర్మాణానికి అన్ని అనుమతులు వచ్చాయని ఆయన గుర్తు చేశారు. ప్రతి మండల కేంద్రంలో ఎ.టి.డబ్ల్యు. ఓ.లకు కార్యాలయ నిర్మాణం 13 వేల మంది పి.టి.జి.లకు ప్రభుత్వపరంగా ప్రత్యేక అభివృద్ధి నిధులు విడుదల అయ్యాయని ఆయన తెలిపారు. ఏజెన్సీలో ఉన్న శ్రీలంక కాందిశీకులకు ఎ.పి.ఎఫ్.డి.సి.లో నిత్యం పనిఉండేలా అధికారులతో మాట్లాడినట్లు తెలిపారు. ఎ.పి.ఎఫ్.డి.సి. అధికారులు నివాస గృహాల ఆధునీకరణ చేసే ఆలోచన ఉందని, పి.కొత్తూరులో జి.సి.సి. డిపో ఏర్పాటుకు సన్నాహాలు చేస్తున్నట్లు మంత్రి బాలరాజు తెలిపారు. కుంకుంపూడి రహదారికి ఆరు కోట్ల నిధులు మంజూరు అయ్యాయని, అలాగే నిర్మాణానికి నిధులు మంజూరయ్యేలా కృషి చేస్తానని గిరిజన మంత్రి బాలరాజు పేర్కొన్నారు. ఇదిలా ఉండగా అభివృద్ధి కార్యక్రమాలు చేపడుతున్న కాంగ్రెస్ ప్రభుత్వానికి రాబోయే స్థానిక సంస్థల ఎన్నికల్లో విజయానికి కృషి చేయాలని పిలుపునిచ్చారు. ఈ కార్యక్రమంలో ఎం.పి.డి. ఓ. ప్రేమాకర్, ఎం.ఇ.ఓ.నూకరాజు, ప్రధానాచార్యులు సన్యాసిరావు, కాంగ్రెస్ నాయకులు మత్స్యరాజు, రామకృష్ణ, రామారావు, వీరన్నపడాల్ పాల్గొన్నారు. సరిహద్దుల్లో మావోయిస్టుల సమావేశం? గూడెంకొత్తవీధి, జూన్ 28: గూడెంకొత్తవీధి- కొ య్యూరు మండలాల సరిహద్దు ప్రాంతంలో సి.పి.ఐ. మావోయిస్టు పార్టీ ఆయా ప్రాంత గిరిజనులతో ప్రత్యే క సమావేశం ఏర్పాటు చేసినట్లు తెలిసింది. ఈ కార్యక్రమంలో ఇద్దరు కార్యదర్శు లు, ఒక మండల స్థాయి అధికారిపై గిరిజనులు మావోయిస్టులకు ఫిర్యాదు చేసినట్లు సమాచారం. విశ్వసనీయ సమాచారం మేరకు వివరాల్లోకి వెళితే . గత కొంతకాలంగా అడపాదడపా విధ్వంసాలకు పాల్పడిన మావోయిస్టులు కొద్దిరోజులుగా తమ కదలికలను సరిహద్దు ప్రాంతంలో పెంచుకున్నారు. మారుమూల గ్రామాల్లో ప్రత్యేక సమావేశాలు ఏర్పాటుచేసి వారివద్ద నుండి సమస్యలు అడిగి తెలుసుకుంటున్నారు. గత రెండు రోజుల క్రితం రెండు మండలాల సరిహద్దు అటవీ ప్రాంతంలో మావోయిస్టులు సమావేశమయ్యారు. ఈ కార్యక్రమానికి చుట్టుపక్కల గ్రామాల నుండి అధికసంఖ్య గిరిజనులు హాజరయ్యారు. మండల కేంద్రానికి వచ్చినప్పుడు తాము ఎదుర్కొంటున్న సమస్యలను మావోయిస్టులకు ఫిర్యాదు చేసినట్లు సమాచారం. వీరి కోసం మావోయిస్టులు పలువురు గిరిజనులను పిలిపించుకుని వారి స్థితిగతులను చర్చించినట్లు సమాచారం. మారుమూల గ్రామాల్లో మొబైల్‌ఫోన్లు వాడే గిరిజనుల వివరాలు అడిగి తెలుసుకున్నారు. మండల కేంద్రాలకు వెళ్ళేటప్పుడు కమిటీలకు తెలియకుండా వెళితే తీవ్ర పరిణామాలు తప్పవని హెచ్చరించినట్లు సమాచారం. మావోయిస్టు పార్టీలో అధిక శాతం గిరిజనులు చేరి పార్టీ బలోపేతానికి కృషి చేయాలని మావోయిస్టులు పిలుపునిచ్చినట్లు తెలిసింది. మావోయిస్టులు కదలికలు ఎక్కువగా ఉన్నాయని తెలుసుకున్న పోలీస్ యంత్రాంగం చింతపల్లి, గూడెంకొత్తవీధి మండలంలో నాలుగు బెటాలియన్ల గ్రేహౌండ్స్ బలగాలు విస్తృతంగా గాలింపు చర్యలు చేపడుతున్నారు. దీంతో ఎప్పుడు ఏం జరుగుతుందోనని గిరిజనులు భయాందోళనలు చెందుతున్నారు.

ఏలూరు, జూన్ 28: మళ్లీ పెట్రోల్ ధర భగ్గుమంది. గత కొద్దిరోజులుగా పడిపోతున్న రూపాయి విలువ ప్రభావం ఇప్పుడు పెట్రోల్‌పై కూడా పడింది. దిగుమతులకు చెల్లిస్తున్న మొత్తాలు పెరిగిపోవటంతో ఆయిల్ కంపెనీలు ధర పెంపు దిశగానే కదలటం దానికి కేంద్రం ఆమోదముద్ర వేయటంతో ఈ పరిస్దితి తలెత్తింది. శుక్రవారం సాయంత్రం ధర పెంచాలని కేంద్రప్రభుత్వం నిర్ణయం తీసుకుంది. ఈ ధర అర్ధరాత్రి నుంచి అమలుచేస్తున్నట్లు ప్రకటించారు. పన్నులు మినహాయించకుండా లీటరుకు రూ. 1.82 చొప్పున పెట్రోల్ ధర పెంచారు. గత నెల 31న లీటరుకు 75 పైసలు చొప్పున పెంచిన ప్రభుత్వం సరిగ్గా గత శనివారం ఏకంగా లీటరుకు రెండురూపాయల చొప్పున పెంచుతూ నిర్ణయం తీసుకుంది. తిరిగి వారం గడవకుండానే మరోసారి పెట్రోల్ ధర పెంచటంతో వినియోగదారులు తీవ్ర ఆగ్రహం వ్యక్తం చేస్తున్నారు. వ్యాట్‌ను కూడా కలుపుకుంటే లీటరుకు 2.32 రూపాయలు వినియోగదారులపై తాజా పెంపు భారం పడనుంది. జిల్లాలో పరిస్దితిని పరిశీలిస్తే ఐఓసి, హెచ్‌పిసి, బిపిసి, రిలయెన్స్ సంస్ధలకు చెందిన 210 పెట్రోల్ బంకులున్నాయి. వీటిద్వారా రోజుకు 2.30లక్షల లీటర్ల వరకు పెట్రోల్ అమ్మకాలు జరుగుతున్నాయి. ఈలెక్కన చూస్తే రోజుకు జిల్లాలోని వినియోగదారులపై 5.33లక్షల రూపాయలు, నెలకు కోటి 60లక్షల రూపాయల వరకు భారం పడనుంది.

ఏలూరు, జూన్ 28 : తెలంగాణ దస్త్రం కదులుతోందా? ఇప్పుడు ఇదే అనుమానం, దీనిపైనే చర్చ అన్ని వర్గాల్లోనూ కనిపిస్తోంది. గతంలో సమైక్యాంధ్ర ఉద్యమానికి పశ్చిమ నుంచే పునాది పడిన సంగతి గుర్తుండే వుంటుంది. అప్పట్లో వస్తుందా? అన్న అనుమానంతోనే పెద్ద ఎత్తున ఉద్యమాలకు శ్రీకారం చుట్టగా తాజా పరిణామాలు చూస్తే మళ్లీ అవే పరిస్థితులు కనిపిస్తున్నాయన్న అనుమానాలకు తావిస్తోంది. గత కొద్ది రోజుల నుంచి అటు ఛానళ్లలోనూ, ఇటు పత్రికల్లోనూ కూడా తెలంగాణ దస్త్రం కదులుతోందని, ఏదో ఒక నిర్ణయం తీసుకునే దిశగా కాంగ్రెస్ పార్టీ అధిష్టానం పావులు కదుపుతోందన్న వార్తలే కనిపిస్తున్నాయి. ఈ నేపధ్యం సీమాంధ్రలోనూ కొంత కలవరాన్ని కలిగిస్తోంది. సహజంగానే పార్టీల్లోనూ ఇది చర్చకు తావిస్తోంది. మరోవైపు సమైక్యాంధ్ర ఉద్యమాన్ని భుజాన వేసుకుని నడిపించిన సంఘాల్లో ఇప్పుడు మళ్లీ కదలిక కనిపిస్తోంది. ఏది ఏమైనా హస్తిన పరిణామాలు తెలంగాణ విభజన దిశగా కదులుతున్నాయా? అన్న అనుమానాలకు తావిస్తోంది. ప్రధానంగా కేంద్ర మంత్రిగా బాధ్యతలు స్వీకరించిన ఏలూరు ఎంపి కావూరి సాంబశివరావు శుక్రవారం నాటి వ్యాఖ్యలను పరిశీలిస్తే ఈ అనుమానాలకు మరింత బలం చేకూరుతోందని పార్టీల నాయకులు వ్యాఖ్యానిస్తున్నారు. వాస్తవానికి గత కొద్దిరోజుల పరిణామాలను పరిశీలిస్తే గతంలో సమైక్యాంధ్ర ఉద్యమాన్ని దాదాపు భుజాన వేసుకుని నడిపించిన వారిలో ఏలూరు ఎంపి కావూరి సాంబశివరావు ప్రధమ స్థానంలో నిలుస్తారనే చెప్పుకోవాలి. అప్పట్లో రాష్ట్ర విభజన అంశాన్ని పరిశీలనలోకి తీసుకుంటేనే ఉద్యమాలు ఉవ్వెత్తున లేస్తాయని సీమాంధ్ర ప్రజానీకం భగ్గున మండుతుందని కూడా కావూరి పలు సందర్భాల్లో వ్యాఖ్యలు చేసిన విషయం తెలిసిందే. అయితే శుక్రవారం మాత్రం ఆయన చేసిన వ్యాఖ్యలు సీమాంధ్ర ప్రజానీకాన్ని ఒక రకంగా ఆశ్చర్యంలోనూ, మరో విధంగా నిరాశలోనూ ముంచేశాయనే చెప్పుకోవాలి. తెలంగాణ అంశంపై కేంద్ర మంత్రిగా వున్న కావూరి సాంబశివరావు శుక్రవారం మాట్లాడుతూ కొన్ని సందర్భాల్లో రాజీ పడక తప్పదని అధిష్టానం నిర్ణయమే శిరోధార్యమని స్పష్టం చేయడం, అదే సమయంలో పొరపొచ్చాలు వచ్చిన సందర్భాల్లో కుటుంబ సభ్యులు కూర్చుని మాట్లాడుకోవడం ఏదో ఒక పరిష్కారానికి రావడం సహజమేనని వ్యాఖ్యలు చేయడం పట్ల సీమాంధ్ర ప్రాంతంలో కొంత వ్యతిరేకత వ్యక్తమవుతోంది. ఇప్పటికే కొన్ని ప్రాంతాల్లో కావూరి వ్యాఖ్యల పట్ల సమైక్యాంధ్ర జె ఎసిలు నిప్పులు కక్కాయి. జిల్లాలోనూ అదే పరిస్థితి కనిపిస్తుందని చెబుతున్నారు. ఏది ఏమైనా ఈ పరిణామాలు మాత్రం రాష్ట్ర విభజన దిశగానే కేంద్రం కదులుతోందా? అన్న అనుమానాలకు మరింత బలాన్ని చేకూరుస్తున్నాయనే చెప్పుకోవాలి. వాస్తవానికి కాంగ్రెస్ పార్టీలో కీలక నిర్ణాయక మండలిగా వున్న సిడబ్ల్యుసిలో శాశ్వత ఆహ్వానితునిగా కావూరి సాంబశివరావును నియమించడం ఆ తరువాత రోజే ఆయనకు కేంద్ర మంత్రి పదవి కట్టబెట్టడం తెలిసిందే. అయితే గురువారం సిడబ్ల్యుసి పదవికి కావూరి రాజీనామా సమర్పించి శుక్రవారం ఈ తరహా వ్యాఖ్యలు చేయడం వెనుక వ్యూహాత్మకంగానే ఆయన ఈ విధంగా వ్యవహరించినట్లు చెబుతున్నారు. తెలంగాణ విభజన విషయమే తెరపైకి వచ్చి దానిపై నిర్ణయం తీసుకునే పరిస్థితి వుంటే ఆ నిర్ణయం తప్పనిసరిగా సిడబ్ల్యుసిలో ముందుగా ఖరారవుతుంది. అలాంటి నిర్ణయం తీసుకునే సమయంలో దానిలో భాగస్వామిగా వుండటం మంచిది కాదన్న వ్యూహంతోనే కావూరి రాజీనామా సమర్పించారని ప్రచారం జరుగుతోంది. అందువల్లే తరువాత రోజే సమైక్యాంధ్ర విషయంలో కావూరి భిన్నమైన ప్రకటనలు చేయడం విశేషంగా కనిపిస్తుంది. ఏది ఏమైనా ఈ పరిస్థితులు మాత్రం హస్తినలో తెలంగాణ విషయంలో ఏదో జరుగుతోందని మాత్రం స్పష్టం చేస్తున్నాయి. దీనిపై సమైక్యాంధ్ర సంఘాలు కూడా ఇప్పుడు సమాయత్తమవుతూ ఈ సమయంలో తగిన విధంగా తమ వాణి వినిపించకుంటే భవిష్యత్తు పరిణామాలు ఆందోళనకరంగా మారే అవకాశముందని భావిస్తున్నాయి.

ఏలూరు, జూన్ 28: జిల్లా రెవిన్యూ అధికారిగా కె ప్రభాకరరావును నియమిస్తూ రాష్ట్రప్రభుత్వం ఉత్తర్వులు జారీ చేసింది. ప్రస్తుతం ఆయన హైదరాబాద్‌లోని సెక్రటేరియట్‌లో అసిస్టెంటు సెక్రటరీ(అసైన్‌మెంట్స్)గా పనిచేస్తున్నారు. గతంలో తూర్పుగోదావరి జిల్లా పెద్దాపురం, విశాఖపట్నం ఆర్డీవోగా పనిచేసిన ప్రభాకరరావు అనంతరం పదోన్నతిపై సెక్రటేరియట్‌కు బదిలీ అయ్యారు. జూలై 3వ తేదీన ఆయన ఇక్కడ డిఆర్వోగా బాధ్యతలు స్వీకరించనున్నారు. కాగా ప్రస్తుతం డిఆర్వోగా ఉన్న ఎం మోహనరాజు ఈనెలాఖరున ఉద్యోగ విరమణ చేయనున్నారు. మూడేళ్ల క్రితం డిఆర్వోగా బాధ్యతలు స్వీకరించిన మోహనరాజు సమర్ధుడైన అధికారిగా పేరుపొందారు. పలు కీలకాంశాల్లో కలెక్టరు, జాయింట్ కలెక్టరుకు అవసరమైన సహాయసహకారాలు అందిస్తూ వారి మన్ననలు కూడా అందుకున్నారు. ఈనెల 30వ తేదీ ఆదివారం స్ధానిక ఎన్‌ఎన్‌ఆర్ కళ్యాణమండపంలో వివిధ ప్రభుత్వశాఖల అధికారులు, ఉద్యోగ సంఘాల ఆధ్వర్యంలో ఏలూరులో మోహనరాజుకు వీడ్కోలు సభ ఏర్పాటుచేశారు.

ఏలూరు, జూన్ 28: ఒక అడుగు ముందుకు...రెండు అడుగులు వెనక్కి అన్న చందంగా తయారైన పోలవరం ప్రాజెక్టు నిర్మాణ పనులను శరవేగంగా ముందుకు తీసుకువెళ్లాలని ప్రభుత్వం నిర్ణయించింది. ఎన్నో వివాదాల్లో చిక్కుకుపోయిన పోలవరం ప్రాజెక్టును ఎట్టి పరిస్దితుల్లోనూ నిర్మించితీరుతామని ఇప్పటికే రాష్ట్ర ముఖ్యమంత్రి ఎన్ కిరణ్‌కుమార్‌రెడ్డి పలుమార్లు ప్రకటించారు. దానికనుగుణంగానే రాజధానిలో ఇటీవల ప్రత్యేక సమావేశం నిర్వహించి ప్రాజెక్టు నిర్మాణ పనులను ముందుకు తీసుకువెళ్లటంతోపాటు నిర్వాసితులను ఆదుకునేందుకు పెద్దఎత్తున ప్యాకేజీలు అమలుచేయాలని కూడా ఆదేశాలు జారీ చేశారు. దీనిలోభాగంగానే జిల్లా కలెక్టరు డాక్టరు జి వాణిమోహన్, జిల్లా జాయింట్ కలెక్టరు డాక్టరు టి బాబూరావునాయుడు గత కొద్దినెలలుగా పోలవరం ప్రాజెక్టు నిర్మాణపనులపై ప్రత్యేక శ్రద్ద కనపరుస్తూ వస్తున్నారు. వారానికి రెండు,మూడుసార్లు పోలవరం ప్రాజెక్టు నిర్మాణ ప్రాంతాన్ని సందర్శించి పనులు వేగవంతం చేసేందుకు తగు సలహాలు, సూచనలు అందించటంతోపాటు ఆర్‌అండ్‌ఆర్ ప్యాకేజీ అమలును వేగవంతం చేయాలని అధికారులను ఆదేశిస్తూ వస్తున్నారు. గురువారం కూడా కలెక్టరు ఆ ప్రాంతాన్ని సందర్శించి బాధితులతో మాట్లాడటం కూడా జరిగింది. అలాగే ప్రాజెక్టు పనుల పురోగతిని కూడా సమీక్షించారు. కాగా పోలవరం ప్రాజెక్టు పనుల పురోగతి, మరింత వేగవంతం చేసేందుకు తీసుకోవాల్సిన చర్యలపై రాష్ట్ర సాంఘిక సంక్షేమశాఖ మంత్రి పితాని సత్యనారాయణ శనివారం ఉదయం 11గంటలకు స్ధానిక కలెక్టరేట్‌లో అధికారులతో సమీక్షించనున్నారు.

కొవ్వూరు, జూన్ 28: గోదావరి నదీ పరివాహక ప్రాంతాల్లో కురుస్తున్న భారీ వర్షాల వల్ల గోదావరి వరద ఉద్ధృతి కొనసాగుతోంది. నీటి పారుదల శాఖ అధికారులు అందించిన వివరాల ప్రకారం శుక్రవారం సాయంత్రం 3.53 లక్షల క్యూసెక్కుల నీటిని విజ్జేశ్వరం బ్యారేజి వద్ద విడుదల చేసినట్టు తెలిపారు. అంతేకాకుండా తూర్పు డెల్టాకు మూడు వేలు, మధ్య డెల్టాకు రెండు వేలు, పశ్చిమ డెల్టాకు 4800 క్యూసెక్కుల నీటిని కాలువల ద్వారా విడుదల చేసినట్టు చెప్పారు. భద్రాచలం వద్ద 32.5 అడుగుల నీటి మట్టం వుండగా ధవళేశ్వరం వద్ద 7.10 అడుగులున్నట్టు అధికారులు చెప్పారు.

ఏలూరు, జూన్ 28 : మున్సిపల్ ఎన్నికలకు సంబంధించి ఎస్సీ, ఎస్టీ మహిళా ఓటర్ల లెక్కింపు కోసం జూలై నెల 5వ తేదీ వరకూ నిర్వహించే ఇంటింటా సర్వే ఖచ్చితంగా ఉండాలని జిల్లా కలెక్టర్ డాక్టర్ జి వాణిమోహన్ చెప్పారు. స్థానిక కలెక్టరేట్ సమావేశ మందిరంలో శుక్రవారం ఎస్సీ, ఎస్టీ, మహిళా ఓటర్ల గుర్తింపు సర్వే విషయంపై మున్సిపల్ కమిషనర్లు, గుర్తింపు పొందిన రాజకీయ పార్టీల ప్రతినిధులతో కలెక్టర్ ప్రత్యేక సమావేశం నిర్వహించారు. ఈ సందర్భంగా జిల్లా కలెక్టర్ డాక్టర్ జి వాణిమోహన్ మాట్లాడుతూ ఈ ప్రక్రియ సజావుగా, పారదర్శకంగా నిర్వహించడంలో రాజకీయ పక్షాల ప్రతినిధులు కూడా తమ సహకారాన్ని అందించాలన్నారు. ఈ విషయంపై తరచూ రాజకీయ పక్షాల ప్రతినిధులతో సమావేశాలు నిర్వహించాలని మున్సిపల్ కమిషనర్లను కలెక్టర్ ఆదేశించారు. ఈ కార్యక్రమాన్ని మున్సిపల్ కమిషనర్లు అతి జాగ్రత్తగా ఎటువంటి పొరపాట్లకు తావు లేకుండా నిర్వహించాలన్నారు. ప్రభుత్వ నిబంధనలను అనుసరిస్తూ జాగ్రత్తగా కుల ప్రాతిపదికపై ఓటర్ల సర్వేను నిర్వహించాలన్నారు. అవసరమైతే ఐసిడి ఎస్, వైద్య విభాగం సిబ్బందిని వినియోగించుకోవాలన్నారు. ఇంటింటా సర్వేపై ప్రజల్లో అవగాహన కలిగించేందుకు కరపత్రాలను ముద్రించడంతోపాటు స్థానిక సిటీకేబుల్ ఛానల్స్‌లో ప్రసారం చేసేలా చర్యలు తీసుకోవాలని మున్సిపల్ కమిషనర్లను కలెక్టర్ ఆదేశించారు. ఎస్సీ, ఎస్టీ, మహిళా ఓటర్ల నిర్ధారణపై ఎక్కడైనా ఫిర్యాదులొస్తే తక్షణమే స్పందించి పరిష్కరించాలన్నారు. ఇందుకోసం అన్ని మున్సిపాల్టీలలో ప్రత్యేక హెల్ప్‌డెస్క్‌ను ఏర్పాటు చేయాలన్నారు. సర్వే నిర్వహణలో ఎవరికీ భయపడనవసరం లేదని, నిబంధనలు ప్రకారం నిర్వహించాలన్నారు. ఎక్కడైనా ఫిర్యాదులొస్తే అక్కడ వేరే బృందంతో పరిశీలింపచేయాలన్నారు. ప్రభుత్వం నిర్వహిస్తున్న బిసి ఓటర్ల సర్వే మాదిరిగా దీనికి అవసరమైన మున్సిపాల్టీలు, కార్పొరేషన్ల చట్టాల సరవణ ద్వారా ఎస్సీ, ఎస్టీ, మహిళలకు రిజర్వు కాబడిన ఆ మున్సిపాల్టీలు, కార్పొరేషన్ల లోపల నిర్ధుష్ఠమైన వార్డుల రిజర్వేషన్ నిమిత్తం ఓటర్ల లిస్టు ఆధారంగా ఇంటింటి సర్వే చేసి వారి శాతాన్ని గణించాలన్నారు. ఎంపిహెచ్ ఎస్ డేటా లేదా ఆధార్ కార్డు ఆధారంగా కూడా ఈ ఓటర్ల గుర్తింపు సర్వే నిర్వహించవచ్చన్నారు. డోర్ టు డోర్ సర్వే ఈ నెల 26వ తేదీ నుండి జూలై 5వ తేదీ వరకూ నిర్వహించాలని, ఎస్టీ ఓటర్లను గ్రీన్ బాల్ పాయింట్ పెన్ను, ఎస్‌సి ఓటర్లను రెడ్ బాల్ పాయింట్ పెన్‌తో మార్క్ చేయాలని, మహిళా ఓటర్లను బ్లాక్ బాల్ పాయింట్ పెన్నుతో రౌండ్ మార్కు చేయాలన్నారు. జూలై 8వ తేదీన కమిషనర్, ఆర్‌డివో, ఎంపిడివో ఆఫీసుల్లో డ్రాఫ్ట్ ఓటర్ల ముసాయిదాను ఉంచడం జరుగుతుందన్నారు. ఇందులో అభ్యంతరాలు ఉంటే జూలై 9వ తేదీ నుండి 12వ తేదీ లోపు క్లెయిమ్‌లు, అభ్యంతరాలు తెలియజేయవచ్చన్నారు. వీటిని జూలై 10వ తేదీ నుండి 15వ తేదీ లోపు పరిశీలించి పరిష్కరించాలన్నారు. జిల్లా రెవిన్యూ అధికారి ఎం మోహనరాజు మాట్లాడుతూ ఎస్సీ, ఎస్టీ, మహిళా ఓటర్ల కుల నిర్ధారణ కార్యక్రమానికి రాజకీయ పక్షాలు తమ వంతు సహకారాన్ని అందించాలన్నారు. 2013 జనవరి 1 ప్రాతిపదికగా 18 సంవత్సరాలు నిండిన వారు ఓటరుగా నమోదు అవ్వవచ్చునని చెప్పారు. ఈ ప్రక్రియ నిరంతరం జరుగుతుందని, ఆన్‌లైన్‌లో కూడా తమ పేరు నమోదు చేసుకోవచ్చునన్నారు. బూత్ లెవెల్ ఏజెంట్లను నియమించి వారి వివరాలు అందజేయాలని రాజకీయ పక్షాల ప్రతినిధులను ఆయన కోరారు. సిటీ కాంగ్రెస్ అధ్యక్షులు కత్తి రాము మాట్లాడుతూ బిసి ఓటర్ల నిర్ధారణ మాదిరిగానే ఎస్‌సి, ఎస్‌టి, మహిళా ఓటర్ల నిర్ధారణ పారదర్శకంగా చేయాలన్నారు. వై ఎస్ ఆర్ పార్టీ నాయకులు జాన్ గురునాధ్ మాట్లాడుతూ ఈ సర్వే సమయంలో సంబంధిత కులాల ఉపకులాలను కూడా పేర్కొనాలని సూచించారు. సిపి ఎం పార్టీ కార్యదర్శి సోమయ్య మాట్లాడుతూ కన్వర్టెడ్ క్రిస్టియన్స్ విషయంలో సరైన రీతిలో కులాల నిర్ధారణ చేయాలన్నారు. సమావేశంలో నగర పాలక సంస్థ కమిషనర్ జి నాగరాజు, డిప్యూటీ కలెక్టర్ జయరామ్, కాంగ్రెస్ నాయకులు కారే బాబూరావు, టిడిపి నాయకులు కొల్లేపల్లి రాజు, వై ఎస్ ఆర్ కాంగ్రెస్ పార్టీ నాయకులు జి శ్రీనివాస్, గుడిదేశి శ్రీనివాస్ తదితరులు ప్రసంగించారు. సమావేశంలో టిడిపి నాయకులు పాలి ప్రసాద్, ఎస్‌కె ముస్త్ఫా, నరసాపురం ఇన్‌ఛార్జి కమిషనర్ వి కరుణాకర్, అసిస్టెంట్ సిటీ ప్లానర్ సత్యనారాయణమూర్తి తదితరులు పాల్గొన్నారు. వైఎస్సార్ కాంగ్రెస్ విజయానికి కృషి చేయాలి -ఎమ్మెల్సీ బొడ్డు భాస్కర రామారావు దేవరపల్లి, జూన్ 28: రానున్న స్థానిక సంస్థల ఎన్నికల్లో వైఎస్సార్ కాంగ్రెస్ పార్టీ ప్రతి పంచాయతీలో జెండా ఎగురవేయాలని రాజమండ్రి పార్లమెంటరీ నియోజకవర్గ వైఎస్సార్ కాంగ్రెస్ పార్టీ కన్వీనర్, ఎమ్మెల్సీ బొడ్డు భాస్కర రామారావు కోరారు. గోపాలపురం నియోజకవర్గ వైఎస్సార్ కాంగ్రెస్ పార్టీ నాయకులు, కార్యకర్తల సమావేశం యర్నగూడెంలో శుక్రవారం మాజీ ఎమ్మెల్యే తానేటి వనిత స్వగృహం వద్ద జరిగింది. ఈ సమావేశంలో గోపాలపురం నియోజకవర్గంలో గల గోపాలపురం, దేవరపల్లి, నల్లజర్ల, ద్వారకాతిరుమల, మండలాలకు చెందిన మండల కన్వీనర్లు, పార్టీ నేతలతో ఆయన సమీక్ష నిర్వహించారు. శుక్రవారం మధ్యాహ్నం నుండి అన్ని మండలాలకు చెందిన నాయకులతో సమీక్షించి పంచాయతీల్లో పార్టీ బలాలపై అంచనాపై చర్చించారు. రాజమండ్రి పార్లమెంటరీ నియోజకవర్గంలో ఏడు అసెంబ్లీ నియోజకవర్గాల్లో సమీక్షలు పూర్తి చేసినట్టు ఆయన వెల్లడించారు. మాజీ ఎమ్మెల్యే వనిత, నియోజకవర్గ కన్వీనర్లు తలారి వెంకట్రావు, డి సువర్ణరాజు పార్టీ అభ్యర్థుల విజయాలపై మాట్లాడారు. ఈ కార్యక్రమంలో వైఎస్సార్ కాంగ్రెస్ పార్టీ నేతలు గెడా జగదీష్, గన్నమని జనార్థనరావు, పల్లి వెంకటరత్నారెడ్డి, మేడిబోయిన గంగరాజు, కాట్నం రాంబాబు, ముల్లంగి శ్రీనివాసరెడ్డి, గగ్గర శ్రీనివాస్, దూసనబోయిన సత్యనారాయణ, కొండపల్లి వీరభద్రరావు, పత్తిపాటి బేబి, సత్తి జగదీశ్వరరెడ్డి తదితరులు పాల్గొన్నారు. నిర్వాసితుల కోసం రెండు వేల ఎకరాల భూసేకరణ:జెసి జంగారెడ్డిగూడెం, జూన్ 28: ఇందిరా సాగర్ (పోలవరం) ప్రాజెక్ట్ నిర్వాసితులకు సహాయ పునరావాస ప్యాకేజి క్రింద భూమికి భూమి ఇవ్వడానికి ఇప్పటి వరకు రెండు వేల ఎకరాల భూమి సేకరించినట్టు జిల్లా జాయింట్ కలెక్టర్ డాక్టర్ టి.బాబూరావు నాయుడు చెప్పారు. స్థానిక రెవెన్యూ డివిజన్ కార్యాలయంలో శుక్రవారం ఏర్పాటు చేసిన రెవెన్యూ అధికార్ల సమావేశంలో జె.సి మాట్లాడుతూ పునరావాస ప్యాకేజి పనుల్లో భాగంగా భూసేకరణ వేగవంతం చేయాలని రెవెన్యూ అధికార్లను ఆదేశించారు. ఇప్పటి వరకు సేకరించిన రెండు వేల ఎకరాలను గిరిజన నిర్వాసితులకు భూమికి భూమి అప్పగించాలని ఆదేశించారు. సేకరించిన భూములు సర్వే చేసి, హద్దులు నిర్ణయించి, నిర్వాసితులకు పట్టాతో పాటు పట్టాదార్ పాస్‌పుస్తకం, డైటిల్ డీడ్ ఇవ్వాలని, వారి పేర్లు రెవెన్యూ రికార్డులలో నమోదు చేయాలని ఆదేశించారు. ఈ పనులు చేసేందుకు పది బృందాలను నియమించినట్టు తెలిపారు. సర్వేశాఖ డిప్యుటి ఇన్‌స్పెక్టర్ల ఆధ్వర్యంలో పని చేసే ఈ బృందాలు తక్షణమే విధుల్లోకి దిగాలని, సత్వరమే సర్వే పనులు పూర్తి చేయాలని ఆదేశించారు. ప్రతి ఒక్క నిర్వాసితునికి భూమికి భూమి అప్పగించే వరకు కార్యాచరణ కొనసాగుతుందన్నారు. విధి నిర్వహణలో అలసత్వం వహిస్తే సహించేది లేదన్నారు. ఈ కార్యక్రమంలో తహశీల్థార్లు, రెవెన్యూ ఇన్‌స్పెక్టర్లు, విఆర్‌ఒలు తమ విధులు సక్రమంగా నిర్వహించాలన్నారు. కాగా, నిర్వాసిత గ్రామాలలో గిరిజన భూముల్లో చెట్లకు 1.34 కోట్ల రూపాయల నష్టపరిహారం విడుదలైందని జె.సి చెప్పారు. ఈ నష్టపరిహారం త్వరలో చెట్లు కోల్పోయిన గిరిజనులకు పంపిణీ చేయనున్నట్టు చెప్పారు. పునరావాస కాలనిల నిర్మాణంపై గృహనిర్మాణ శాఖ దృష్టి సారించాలన్నారు. ఈ సమావేశంలో ఆర్డీఒ వి.నాన్‌రాజ్, సర్వే శాఖ అసిస్టెంట్ డైరెక్టర్ డిబిఎల్‌బి కుమార్, డిప్యుటి ఇన్‌స్పెక్టర్ కరాటం రామకృష్ణ, గృహనిర్మాణ శాఖ ఎగ్జిక్యూటివ్ ఇంజనీర్ సోములు, డివిజన్‌లోని తహశీల్థార్లు పాల్గొన్నారు. 100 కోట్లతో రక్షిత మంచినీటి పథకాల అమలుకు ప్రతిపాదనలు -కలెక్టర్ వాణీమోహన్ ఏలూరు, జూన్ 28 : జిల్లాలోని గ్రామీణ ప్రాంతాలలో రక్షిత మంచినీటి సరఫరా కోసం వంద కోట్ల రూపాయల వ్యయంతో 443 మంచినీటి పధకాలు అమలు చేయడానికి ప్రతిపాదనలు ప్రభుత్వానికి పంపినట్లు జిల్లా కలెక్టర్ డాక్టర్ జి వాణిమోహన్ చెప్పారు. స్థానిక కలెక్టరు ఛాంబరులో శుక్రవారం గ్రామీణ మంచినీటి సరఫరా పధకాల అమలు తీరుపై ఆర్‌డబ్ల్యు ఎస్ అధికారులతో కలెక్టర్ సమీక్షించారు. జిల్లాలో గ్రామీణ ప్రాంత ప్రజలకు సురక్షితమైన తాగునీటిని సమృద్ధిగా అందించాలనే లక్ష్యంతో ప్రతిపల్లెలోనూ మంచినీటి రిజర్వాయర్లను నిర్మిస్తామని కలెక్టర్ చెప్పారు. జిల్లాలో 443 పధకాలను రూపొందించి అందుకు వంద కోట్ల రూపాయల నిధులు విడుదల చేయాలని ప్రభుత్వానికి ప్రతిపాదనలు పంపడం జరిగిందని చెప్పారు. ప్రతీ సంవత్సరం వేసవిలో తాగునీటి సరఫరాకు ఇబ్బంది పడే గ్రామాలను ముందుగానే గుర్తించి శాశ్వత తాగునీరు అందించేందుకు ఈ పధకాలు ఎంతో దోహదపడతాయని చెప్పారు. జిల్లాలో పెరుగుతున్న జనాభా అవసరాలకు అనుగుణంగా పల్లె ప్రాంతాలలో అవసరమైన చోట్ల అదనపు మంచినీటి రిజర్వాయర్ల ఏర్పాటుకు కూడా చర్యలు తీసుకుంటామని కలెక్టర్ చెప్పారు. జిల్లాలో సత్యసాయి మంచినీటి సరఫరా పధకం కింద పెద్ద ఎత్తున తాగునీటిని అందించి ప్రజల దాహార్తిని తీర్చడం జరుగుతుందని ఈ పధకం వల్ల ఏజెన్సీ ఏరియాలో చాలా గిరిజన గ్రామాలు కూడా లబ్ధి చేకూర్చే విధంగా ఎప్పటికప్పుడు తగు నిర్ణయాలు తీసుకోవడం జరుగుతుందని చెప్పారు. సమావేశంలో ఆర్‌డబ్ల్యు ఎస్ ఎస్ ఇ రమణ, జె ఇ నారాయణరావు పాల్గొన్నారు. పాతరైలు వంతెన పాదచారుల వంతెనగా మార్చాలని మానవహారం కొవ్వూరు, జూన్ 28: గోదావరి నదిపై వున్న పాత రైలు వంతెనను పాదచారుల వంతెనగా మార్చాలని కేంద్ర రాష్ట్ర ప్రభుత్వాలను కోరుతూ పాత రైలు వంతెన పరిరక్షణ సమితి చేపట్టిన ప్రజా ఉద్యమానికి ప్రజల నుండి మంచి స్పందన వస్తోందని సమితి కన్వీనర్ పరిమి రాథాకృష్ణ వెల్లడించారు. పాత రైలు వంతెన పరిరక్షణ సమితి ఆధ్వర్యంలో శుక్రవారం స్థానిక విజయవిహార్ సెంటర్‌లో జరిగిన మానవహారానికి అనూహ్య స్పందన లభించింది. సమితి కో కన్వీనర్ వీరంశెట్టి రాజా వరప్రసాద్ మాట్లాడుతూ ఈ ఉద్యమంలో భాగంగా ఈ నెల 29వ తేదీ ఉదయం పది గంటలకు పట్టణంలోని మెరకవీధిలో వున్న వాటర్ ట్యాంకు సెంటర్‌లో రాస్తారోకో నిర్వహిస్తున్నట్టు తెలిపారు. ఈ కార్యక్రమంలో సీనియర్ కాంగ్రెస్ నాయకులు ఎండి రఫీయుల్లా బేగ్, జిల్లా ఐఎన్‌టియుసి ఉపాధ్యక్షుడు పాశం సాయిప్రతాప్, కాంగ్రెస్ నాయకులు ఇంటి వీర్రాజు, సీనియర్ సిటిజన్స్ వెల్ఫేర్ అసోసియేషన్ అధ్యక్షులు పి సత్యనారాయణ, అసోసియేషన్ సభ్యులు సింగులూరి బాపిరాజు, నున్న సాయి, మట్టె నారాయణమూర్తి, చలంకుర్తి బాబి, కె త్రిమూర్తులు, ఎస్ సందీప్‌కుమార్ పాల్గొన్నారు. తీర ప్రాంతాలకు సాగునీరు అందేలా చర్యలు మొగల్తూరు, జూన్ 28: తీర ప్రాంతాలకు సాగునీరు అందేలా అధికారులు చర్యలు తీసుకోవాలని నరసాపురం ఎమ్మెల్యే కొత్తపల్లి సుబ్బారాయుడు అన్నారు. శుక్రవారం మండలంలో 66 పనులకు సుమారు రూ.3కోట్లతో నిర్మించే రహదారులకు ఆయన శంకుస్థాపన చేశారు. అనంతరం విలేఖరుల సమావేశంలో ఆయన మాట్లాడుతూ ఇరిగేషన్ శాఖాధికారులు సాగునీరు సమస్య తలెత్తకుండా శివారు గ్రామాలలో చిట్టచివరి భూమికి కూడా సాగునీరు అందేలా తగు చర్యలు తీసుకోవాలని సూచించారు. మొదటి పంటకు నీరు ఆలస్యమైతే రెండవ పంటకు కూడా ఆలస్యమవుతుందన్నారు. స్థానిక సంస్థల ఎన్నికల్లో విజయం మాదే జిల్లాలో జరగబోయే గ్రామ పంచాయతీల ఎన్నికలలో కాంగ్రెస్ బలపరిచిన అభ్యర్థులే విజయం సాధించటం ఖాయమని ఎమ్మెల్యే కొత్తపల్లి ధీమా వ్యక్తం చేశారు. నియోజక వర్గంలో పార్టీ క్యాడర్ అంతా సమిష్టిగా తమ పార్టీ అభ్యర్థుల విజయానికి కృషి చేస్తారన్నారు. ఎమ్మెల్యే వెంట ఇరిగేషన్ డిఇలు నరసింహన్, విజయకుమార్, కృష్ణారెడ్డి, సొసైటీ అధ్యక్షుడు కందులపాటి ముత్యాలరావు, ఇందుకూరి శీనురాజు, మాజీ ఎంపిపి సత్తినేని మోహనరావు, డిసిసిబి డైరెక్టర్ మోటుపల్లి రామభాస్కరరావు, కాంగ్రెస్ మండల శాఖ అధ్యక్షుడు పాల రాంబాబు, అందె రాంబాబు, అడ్డాల సత్యనారాయణ, మేకల కుమార్ తదితరులు పాల్గొన్నారు. తెలుగు భాషాభివృద్ధికి కృషి చేయాలి మంత్రి పితాని పెనుమంట్ర, జూన్ 28: తెలుగు భాషాభివృద్ధికి, తెలుగుభాష ఔన్నత్యాన్ని కాపాడేందుకు తెలుగువారంతా కృషి చేయాలని సాంఘిక సంక్షేమ శాఖా మంత్రి పితాని సత్యనారాయణ పిలుపునిచ్చారు. శుక్రవారం సాయంత్రం మార్టేరు బిడి జడ్పీ ఉన్నత పాఠశాలలో విద్యా పక్షోత్సవాల్లో భాగంగా తెలుగు భాషా దినోత్సవం జరిగింది. ఈ సందర్భంగా జరిగిన కార్యక్రమంలో మంత్రి మాట్లాడుతూ తెలుగుభాష ప్రపంచవ్యాప్తంగా గుర్తింపు పొందిందన్నారు. తెలుగుభాషాభివృద్ధికి తమ ప్రభుత్వం కృషిచేస్తోందన్నారు. ప్రభుత్వ పాఠశాలల్లో నాణ్యమైన విద్యనందిస్తున్నామన్నారు. 9.7 గ్రేడు పాయింట్లతో ఈ పాఠశాల విద్యార్థిని ఉత్తీర్ణత సాధించడమే దీనికి నిదర్శనమన్నారు. గత సంవత్సరం ట్రిపుల్ ఐటిలో సీటు సాధించిన మాధవిని మంత్రి అభినందించారు. కొద్దిసేపు విద్యార్థినులతో మంత్రి ముచ్చటించారు. అనంతరం యూనిఫారం, పుస్తకాలు మంత్రి విద్యార్థినులకు పంపిణీ చేశారు. ఎంఇఒ షేక్ మీరాసాహెబ్ తదితరులు ఈ కార్యక్రమంలో పాల్గొన్నారు.

కావలసినవి రాజ్మా గింజలు ............................... 1/2 కప్పు ఉల్లిపాయ ........................................ 2 టమాటా ........................................... 2 పసుపు ............................................. 1/4 టీ.స్పూ. కారం పొడి ........................................ 1 టీ.స్పూ. అల్లం వెల్లుల్లి ముద్ద ......................... 1 టీ.స్పూ. ధనియాల పొడి ............................... 1 టీ.స్పూ. గరం మసాలా పొడి ........................ 1/4 టీ.స్పూ. కొబ్బరిపొడి ...................................... 2 టీ.స్పూ. ఉప్పు ............................................... తగినంత నూనె ................................................ 3 టీ.స్పూ. చేయండి ఇలా రాజ్మా గింజలను నీళ్లు పోసి నాలుగు గంటలు నానబెట్టాలి. తర్వాత కుక్కర్లో వేసి కాస్త పసుపు, ఉప్పువేసి ఉడికించి జల్లెట్లో వేసి ఉంచాలి. పాన్‌లో నూనె వేడి చేసి సన్నగా తరిగిన ఉల్లిపాయలు వేసి బంగారు రంగు వచ్చేవరకు వేయించాలి. ఇందులో పసుపు, అల్లంవెల్లుల్లి ముద్ద, కారం పొడి, సన్నగా తరిగిన టమాటా ముక్కలు వేసి అవి మెత్తబడేవరకు వేపాలి. తర్వాత రాజ్మా గింజలు వేసి కలిపి మూత పెట్టాలి. రెండు నిమిషాలు మగ్గిన తర్వాత కొబ్బరి పొడి, ధనియాల పొడి వేసి కలిపి ఉప్పు సరిచూసుకుని అరకప్పు నీళ్లు పోసి ఉడికించాలి. మసాలా కలిసి ఉడికి నూనె తేలుతున్నప్పుడు గరం మసాలా వేసి కలిపి దింపేయాలి. ఈ కూర చపాతీలకు బావుంటుంది. ఇందులో కొంచెం పెరుగు కూడా వేసుకుంటే మరింత రుచిగా ఉంటుంది.

కావలసినవి సేమ్యా ................................................. 1 కప్పు చిక్కటి పాలు ...................................... 5 కప్పులు నెయ్యి ................................................. 4 టీ.స్పూ. పంచదార ............................................ 1/2 కప్పు యాలకుల పొడి .................................. 1 టీ.స్పూ. జీడిపప్పు ............................................. 10 బాదం ................................................. 10 పిస్తా ...................................................... 5 కిస్‌మిస్ ................................................. 20 ఇలా చేద్దాం పాన్‌లో నెయ్యి వేడి చేసి జీడిపప్పు, బాదం, పిస్తా, కిస్మిస్ వేయించి తీసి పక్కన పెట్టుకోవాలి. అదే పాన్‌లో సేమ్యాను దోరగా లేత బంగారు రంగు వచ్చేవరకు వేయించి తీసి పక్కన పెట్టుకోవాలి. ఒక గినె్నలో పాలు పోసి రెండు కప్పులు అయ్యేవరకు మరిగించాలి. ఇందులో సేమ్యా వేసి ఉడికించాలి. తర్వాత వేయించిన జీడిపప్పు, బాదం, పిస్తా, కిస్‌మిస్, యాలకుల పొడి వేసి మరో రెండు నిమిషాలు ఉడికించి దింపేయాలి. ఇది పాయసంలా పల్చగా కాకుండా కాస్త చిక్కగానే ఉంటుంది. ఈ రబడీ వేడిగా లేదా చల్లగా సర్వ్ చేయొచ్చు.

కావలసినవి మటన్ కీమా - 250 గ్రా. బాస్మతి బియ్యం - 250 గ్రా. ఉల్లిపాయ - 2 పచ్చిమిర్చి - 3 కరివేపాకు - 2 రెబ్బలు అల్లం వెల్లుల్లి ముద్ద - 1 టీ.స్పూ. పసుపు - 1/4 టీ.స్పూ. కారం పొడి - 1 టీ.స్పూ. ధనియాల పొడి - 2 టీ.స్పూ. మిరియాల పొడి - 1/2 టీ.స్పూ. గరం మసాలాపొడి - 1/4 టీ.స్పూ. ఉప్పు - తగినంత నూనె - 3 టీ.స్పూ. ఇలా చేయాలి ముందుగా బాస్మతి బియ్యం కడిగి తగినన్ని నీళ్లు పోసి పది నిమిషాలు నాననివ్వాలి. కీమాని శు భ్రంగా కడిగి జల్లెట్లో వేయాలి. నానిన బాస్మతి బియ్యాన్ని పొడి పొడిగా ఉండేలా వండి వెడల్పాటి గినె్నలో వేసి చల్లారనివ్వాలి. బాణలి లేదా పాన్‌లో నూనె వేడి చేసి సన్నగా తరిగిన ఉల్లిపాయ వేసి బంగారు రంగు వచ్చేవరకు వేయించాలి. ఇందులో పసుపు, అల్లం వెల్లుల్లి ముద్ద, కరివేపాకు వేసి కొద్దిగా వేపి కీమా వేసి బాగా వేపాలి. ఇందులో కారం పొడి, దానికి తగినంత ఉప్పు, ధనియాల పొడి, మిరియాల పొడి వేసి కలిపి అరకప్పు నీళ్ళుపోసి మూత పెట్టి ఉడికించాలి. కీమా ఉడికి బాగా వేగిన తర్వాత గరం మసాలా పొడి వేసి కలిపి మరో రెండు నిమిషాల తరువాత అన్నం, తగినంత ఉప్పు వేసి కలుపుతూ ఐదు నిమిషాలు వేపి దింపేయాలి. ఈ కీమా ఫ్రైడ్ రైస్ పెరుగు పచ్చడి కుర్మాతో సర్వ్ చేయాలి.

కావలసినవి వంకాయలు ......................... 1/4 కిలో చింతపండు పులుసు ............. 1 కప్పు బెల్లం ................................... చిన్న ముక్క శనగపిండి ............................ 1 టీ.స్పూ. నూనె ................................... 3 టీ.స్పూ. పొడి చేసుకోవడానికి శనగపప్పు ........................... 3 టీ.స్పూ. మినప్పప్పు ........................... 2 టీ.స్పూ. ధనియాలు ........................... 1/2 టీ.స్పూ. ఎండుమిర్చి .......................... 4 నువ్వులు .............................. 2 టీ.స్పూ. జీలకర్ర ................................ 1/2 టీ.స్పూ. ఉప్పు ................................... తగినంత పోపునకు: నూనె ................................... 1 టీ.స్పూ. ఎండుమిర్చి .......................... 1 మినప్పప్పు ............................ 1/2 టీ.స్పూ. ఇంగువ ................................ చిటికెడు ఆవాలు, జీలకర్ర .................... 1/4 టీ.స్పూ. కరివేపాకు .............................. 2 రెబ్బలు వండండి ఇలా ముందుగా పెనం వేడి చేసి శనగపప్పు, మినప్పప్పు, ఎండుమిర్చి, ధనియాలు, నువ్వులు, జీలకర్ర విడివిడిగా వేయించాలి. చల్లారిన తర్వాత అన్నీ కలిపి ఉప్పు వేసి మెత్తగా పొడి చేసుకోవాలి. చిన్న వంకాయలైతే గుత్తులుగా నాలుగు భాగాలుగా కట్ చేసి (పెద్దవంకాయలైతే ముక్కలుగా కట్ చేసి ఉపయోగించుకోవాలి) ఈ పొడిని లోపల కూరాలి. మిగిలిన పొడి పక్కన పెట్టుకోవాలి. పాన్‌లో నూనె వేడి చేసి మసాలా పొడి కూరిన వంకాయలు వేసి కలిపి మూత పెట్టి మగ్గనివ్వాలి. వంకాయలు కొద్దిగా మగ్గిన తర్వాత పసుపు, పలుచటి చింతపండు పులుసు, కప్పుడు నీళ్ళు పోసి నిదానంగా ఉడికించాలి. వంకాయలు ఉడికి పులుసు చిక్కబడుతున్నప్పుడు శనగపిండి, మిగిలిన మసాలా పొడి, బెల్లం వేసి మరో రెండు నిమిషాలు మరిగించాలి. చిన్న గినె్నలో నూనె వేడి చేసి ఇంగువ వేయాలి. అది కరిగిన తర్వాత ఎండుమిర్చి, ఆవాలు, జీలకర్ర, మినప్పప్పు వేసి దోరగా వేగిన తర్వాత వంకాయ పులుసులో వేసి కలపాలి.

కావలసినవి పనీర్ .............................................................................. 200 గ్రా. ఉల్లిపాయ ....................................................................... 2 టమాటాలు ..................................................................... 2 కాప్సికమ్ ........................................................................ 1 పచ్చిమిర్చి ....................................................................... 3 క్యారట్ .............................................................................. 2 నిమ్మరసం ........................................................................ 2 టీ.స్పూ. జీలకర్ర ............................................................................. 1/4 టీ.స్పూ. పసుపు ............................................................................. చిటికెడు కారం పొడి ...................................................................... 1/4 టీ.స్పూ. మిరియాల పొడి .............................................................. 1/4 టీ.స్పూ. ఉప్పు ............................................................................... తగినంత నూనె ................................................................................ 3 టీ.స్పూ. ఇలా వండాలి ఉల్లిపాయ, టమాటా, క్యారెట్, కాప్సికంలను నిలువుగా ముక్కలుగా కట్ చేసుకోవాలి. పనీర్‌ని రెండు అంగుళాల పొడవుగా ముక్కలుగా కట్ చేసుకుని గోరువెచ్చని నీళ్లలో వేయాలి. ఐదు నిమిషాల తర్వాత తీసి ఆరనివ్వాలి. పనీర్ ముక్కలపై నిమ్మరసం, మిరియాల పొడి వేసి కలిపి అరగంట నాననివ్వాలి. పాన్‌లో నూనె వేడి చేసి జీలకర్ర వేసి చిటపటలాడాక ఉల్లిపాయ, నిలువుగా చీల్చిన పచ్చిమిర్చి వేసి మెత్తబడేవరకు వేపాలి. ఇందులో క్యారట్, కాప్సికం, టమాటా ముక్కలు వేసి కొద్దిగా మెత్తబడేవరకు వేయించాలి. తర్వాత పనీర్ ముక్కలు, పసుపు, కారం పొడి, తగినంత ఉప్పు వేసి కలుపుతూ వేయించాలి. తడి అంతా ఇగిరిపోయాక దింపేసి వేడి వేడిగా సర్వ్ చేయాలి.