చోడవరం, జూన్ 30: వ్యవసాయ పెట్టుబడులు పెరిగి అప్పుల పాలవుతున్నామని చెరకు రైతులు మరోప్రజాప్రస్థానం పాదయాత్ర చేస్తున్న వైఎస్ జగన్‌సోదరి షర్మిల ముందు వాపోయారు. ఆదివారం చోడవరం బస నుండి తొమ్మిది గంటలకు షర్మిల తిరిగి పాదయాత్రను ప్రారంభించారు. యాత్ర విజ్జపుసోమేశ్వరరావు బంగ్లా, గజపతినగరం, గోవాడ, అంభేరుపురం, వెంకన్నపాలెం, నర్సాపురం వరకు సాగింది. అనంతరం విశ్రాంతికి ఉపక్రమించారు. ఈ పాదయాత్రలో స్థానిక పెద్దమదుం వద్ద పొలాల్లో పనిచేసుకుంటున్న రైతులు చెరకు గడలను తెచ్చి ఆమెకు చూపుతూ గిట్టుబాటు ధరలు లేక చెరకు రైతులు చితికిపోయామంటూ చూపించారు. దీంతో మీకు టన్ను చెరకుకు ఎంత ఇస్తే గిట్టుబాటు అవుతుందని షర్మిల రైతులను అడిగారు. టన్నుకు 2500 ఇస్తే గిట్టుబాటు కాదా అని రైతులను ప్రశ్నించారు. అదీలేదు టన్ను చెరకును పెంచుతామని చెప్పడమే తప్ప ప్రభుత్వం చేసిందేమీ లేదని రైతులు వాపోయారు. మన ప్రభుత్వం వస్తుంది కష్టాలు తీరుతాయంటూ ఆమె చెరకు రైతులకు భరోసా ఇచ్చారు. అనంతరం గోవాడ సుగర్స్ మెయిన్ గేటు వద్ద ఫ్యాక్టరీ కోజనరేషన్ విస్తరణ కోసం దివంగత ముఖ్యమంత్రి రాజశేఖర రెడ్డి విస్తరణ కోసం ప్రారంభించిన శిలాఫలకాన్ని నియోజకవర్గ సమన్వయకర్త బలిరెడ్డి సత్యారావుషర్మిలమ్మకు చూపుతూ కిరణ్‌కుమార్ రెడ్డి ఈ అభివృద్ధి పనులకోసం పట్టించుకోవడం లేదని తెలిపారు. దీంతో త్వరలో తప్పక మనందరికీ మంచిరోజులొస్తాయని, ఆగిపోయిన అభివృద్ధి పనులు జరుగుతాయని ఆమె బలిరెడ్డికి తెలిపారు. అంతకుముందు చోడవరం శివారు బసవద్ద నుండి ప్రారంభించిన పాదయాత్రలో గజపతినగరం, అంభేరుపురం, వెంకన్నపాలెం, నర్సాపురం, ఆర్‌ఆర్ పేట, సీమునాపల్లి తదితర గ్రామాల్లో వైఎస్‌ఆర్ విగ్రహాలకు ఆమె పూలమాలలు వేసి ఘనంగా నివాళ్లు అర్పించారు. ఆదివారం సాయంత్రం విశ్రమం అనంతరం సీమునాపల్లి, రాయపురాజుపేట మీదుగా కోటపాడుకు పాదయాత్ర సాగింది. ఈకార్యక్రమంలో ఆమె వెంట ఆ పార్టీనాయకులు బలిరెడ్డి సత్యారావు, అన్నంరెడ్డి అదీప్‌రాజు, అప్పికొండ లింగబాబు, మళ్ల శ్రీనివాసరావు, అల్లం రామఅప్పారావు, బివిఎస్ రాజు తదితరులు పాల్గొన్నారు.
‘కాంగ్రెస్‌లోనే యాదవులకు సముచిత స్థానం’
కశింకోట, జూన్ 30: కాంగ్రెస్ ప్రభుత్వ హయాంలోనే యాదవులకు సుముచిత స్థానం కలుగుతుందని జిల్లా మంత్రి గంటా శ్రీనివాసరావు పేర్కొన్నారు. స్థానిక కోదండసీతారామ కళ్యాణ మండపంలో ఆదివారం మండల యాదవసంఘం అధ్యక్షులు పంచదార్ల సూరిబాబు కాంగ్రెస్‌పార్టీలో చేరిన సందర్భంగా మంత్రి మాట్లాడుతూ యాదవులకు కాంగ్రెస్ ప్రభు త్వం అన్నివిధాలుగా సముచిత స్థానం కల్పిస్తుందని, విద్యాశాఖా మంత్రి పార్ధసారధి, రెవెన్యూశాఖా మంత్రి ఎన్ రఘువీరారెడ్డి, శాసనమండలి చైర్మన్ చక్రవర్తి వంటివారుకి కాంగ్రెస్‌పార్టీ సరైన గుర్తింపు ఇచ్చిందన్నారు. పార్టీలో చేరిన పంచదార్ల సూరిబాబు మాట్లాడుతూ జిల్లా మంత్రి గంటా మండలం చేస్తున్న అభివృద్ధి పనులు అలాగే ముఖ్యమంత్రి కిరణ్‌కుమార్‌రెడ్డి ప్రవేశపెడుతున్న ఆకర్షణీయమైన పథకాలను చూసి పార్టీలో కాంగ్రెస్‌పార్టీలో చేరుతున్నట్లు స్పష్టం చేసారు. అయితే యాదవులకు ఏ పార్టీ న్యాయం చేయలేదని, కాంగ్రెస్‌పార్టీయే న్యాయం చేయగలదనే నమ్మకంతో తామంతా పార్టీలో చేరుతున్నట్లు సూరిబాబు తెలిపారు. తమకు ఇళ్లస్థలాలులేవని, హౌసింగ్ స్కీంలు, ప్రభుత్వ పథకాలు తమకు అందడం లేదని మంత్రి గంటా ఎదుట ఆవేదన వ్యక్తం చేసారు. హౌసింగ్ స్కీంలు, నిరుపేదలైన వార్కి ఇళ్లస్థలాలు మంజూరు చేస్తామని మంత్రి ఈ సందర్బంగా హామీ ఇచ్చారు. యాదవసంఘం నాయకులు పంచదార్లసూరిబాబుకు మంత్రి పూలమాల, పార్టీ కండువా వేసి పార్టీలోకి ఆహ్వానించారు. మహిళాయాదవ్ మంత్రి గంటాకు మేక పిల్లను బహుకరించారు. ఈ కార్యక్రమంలో మండలపార్టీ అధ్యక్షులు కాయల మురళీధర్, తిరుశోళ్లరామకృష్ణ, బుదిరెడ్డి చిన్నా, డిసిసిబి డైరక్టర్ శిదిరెడ్డి శ్రీనివాసరావు, గొంతిన అప్పలనాయుడు, శిష్టి అప్పారావు, ద్వారపురెడ్డి పరమేశ్వరరావుతదితరులు పాల్గొన్నారు.
వౌలిక సదుపాయాలు, విద్యకు ప్రాధాన్యం
పాడేరు, జూన్ 30: గిరిజన గ్రామాల్లో వౌలిక సదుపాయాల కల్పనతో పాటు విద్యకు ప్రాధాన్యత ఇస్తున్నట్టు గిరిజన సంక్షేమ శాఖ మంత్రి పసుపులేటి బాలరాజు అన్నారు. ఆదివారం పాడేరు, జి.మాడుగుల మండలాలలో పర్యటించిన ఆయన ముందుగా పాడేరు మండలంలోని కోట్లగరువు గ్రామాన్ని సందర్శించిన ఆయన గ్రామస్థుల మాట్లాడారు. ఈ సందర్భంగా గ్రామంలో పాఠశాల, సి.సి.రోడ్లు, గ్రావిటీ పథకం, మినీ అంగన్ వాడీ కేంద్రాలను ఏర్పాటు చేయాలని గ్రామస్తులు కోరగా మంజూరు చేస్తున్నట్టు ప్రకటించారు. అదే విదంగా ఆర్.డబ్ల్యు. ఎస్.అధికారులకు గ్రావిటీ పథకం నిర్మాణానికి అంచనాలు రూపొందించాలని అదేశించారు. గ్రామంలో ఫించనుకు అర్హులైన వారికి ఫించన్లు అందించే ఏర్పాట్లు చేయాలని అదేశాలు జారీ చేశారు. అనంతరం స్ధానిక తలారీ సింగ్ వద్ద 15 లక్షల రూపాయలతో సబ్ ప్లాన్ నిధులతో నిర్మించిన సహాయ గిరిజన సంక్షేమ శాఖ అధికారి కార్యాలయానికి శంకుస్ధాపన గావించిన అయన మద్దుల బంద గ్రామంలో తొమ్మిది లక్షల రూపాయల జాతీయ గ్రామీణ ఆరోగ్య మిషన్ నిధులతో నిర్మించనున్న ఆరోగ్య ఉపకేంద్రానికి, బొక్కెళ్లు గ్రామంలో 15 లక్షల రూపాయలతో నిర్మించనున్న తాగునీటి పథకానికి శంకుస్ధాపనలు గావించారు. ఈ సందర్భంగా ఆయన మాట్లాడుతూ కేంద్ర, రాష్ట్ర ప్రభుత్వాలు విద్యకు ప్రాధాన్యతను ఇస్తున్నట్టు తెలిపారు. అదే విదంగా గిరిజన గ్రామాల్లో వౌళిక వసతులు కల్పనతో పాటు గ్రామాల్లో ఎటువంటి సమస్యలు లేకుండా సమాన ప్రాధాన్యతతో అభివృద్ధి సంక్షేమ పథకాలు అమలు చేస్తున్నట్టు చెప్పారు. అన్ని మండల కేంద్రాల్లో సహాయ గిరిజన సంక్షేమ శాఖ అధికారుల కార్యాలయాలు అన్ని సౌకర్యాలతో నిర్మించనున్నట్టు ఆయన తెలిపారు. సహాయ గిరిజన సంక్షేమ శాఖ అధికారుల కార్యాలయం రాష్ట్రంలోనే మొట్టమొదటిగా పాడేరులో నిర్మిస్తున్నట్టు బాలరాజు తెలిపారు. ఈ కార్యక్రమంలో ప్రాధమిక వ్యవసాయ పరపతి సంఘం డైరెక్టర్ బోదనారాయణ, సతీష్ వర్మ, ఆర్.డి.ఒ. ఎం.గణపతిరావు, ఐ.టి.డి.ఎ.సహాయ ప్రాజెక్టు అధికారి పి.వి.ఎస్.నాయుడు, గిరిజన సంక్షేమ శాఖ ఉపసంచాలకులు బి.మల్లిఖార్జున రెడ్డి, గిరిజన సంక్షేమ శాఖ, పంచాయతీ రాజ్ శాఖల కార్య నిర్వాహక ఇంజనీర్లు ఎం.ఆర్.జి. నాయుడు, బి.అప్పలనాయుడు, గిరిజన సంక్షేమ శాఖ సహాయ కార్యనిర్వాహక ఇంజనీర్ డి.వి.ఆర్. ఎం.రాజు, తహశీల్ధార్ రామలింగ స్వామి, జి.సి.సి. డివిజనల్ మేనేజర్ ప్రతాపరెడ్డి తదితరులు పాల్గొన్నారు.
క్షత్రియులు ఐక్యం కావాలి
విశాఖపట్నం, జూన్ 30: క్షత్రియులు దేశంలో ఉన్నత స్థాయిలో ఉన్నారని కాంగ్రెస్ పార్టీ రాష్ట్ర వ్యవహారాల ఇన్‌చార్జ్ దిగ్విజయ్‌సింగ్ అన్నా రు. స్థానిక సీతమ్మధారలో క్షత్రి సం క్షేమ సమితి కొత్తగా నిర్మించిన భవనా న్ని ఆదివారం ఆయన ప్రారంభించారు. ఈ సందర్భంగా జరిగిన సభలో ఆయన మాట్లాడుతూ క్షత్రియుల కో సం ఇటువంటి భవనాన్ని నిర్మించడం ముదావహమని అన్నారు. 2008లో విశాఖలో జరిగిన క్షత్రియ సమ్మేళనానికి వచ్చానని, ఆ తరువాత మళ్లీ ఇప్పు డు వచ్చానని అన్నారు. కేంద్ర ప్రభు త్వం అన్ని వర్గాల వారికీ అనేక సంక్షేమ పథకాలను అమలు చేస్తోందని అన్నా రు. అలాగే క్షత్రియుల్లో పేదలకు కేం ద్రం సహాయం అందించాలని అన్నా రు. ఈ కార్యక్రమంలో కేంద్ర మంత్రి పురంధ్రీశ్వరి, ఎంపి సుబ్బరామిరెడ్డి, టిటిడి చైర్మన్ కనుమూరి బాపిరాజు, క్షత్రియ సంక్షేమ సమితి అధ్యక్షుడు వెంకటపతిరాజు, కార్యదర్శి రాఘవరాజు, భవన నిర్మాణానికి ఆర్థిక సహా యం అందించిన అల్లూరి సీతారామరాజు, ఎమ్మెల్యేలు తైనాల విజయకుమార్, మళ్ల విజయప్రసాద్ తదితరులు పాల్గొన్నారు.
