కృష్ణా వర్సిటీ ఖోఖో చాంప్ ‘సిద్ధార్థ’

విజయవాడ , నవంబర్ 16: కృష్ణా విశ్వవిద్యాలయం అంతర కళాశాలల ఖోఖో మహిళల చాంపియన్‌షిప్‌ను శ్రీ దుర్గా మల్లేశ్వర సిద్ధార్థ మహిళా కళాశాల జట్టు దక్కించుకుంది. శుక్రవారం జరిగిన ఫైనల్ లీగ్ మ్యాచ్‌లో కెబిఎన్ కళాశాలపై 3-1 స్కోర్ తేడాతో శ్రీ దుర్గా మల్లేశ్వర సిద్ధార్థ మహిళా కళాశాల జట్టు విజయం సాధించింది. నగరంలోని శ్రీ దుర్గా మల్లేశ్వర సిద్ధార్థ మహిళా కళాశాలలో జరుగుతున్న కృష్ణా విశ్వవిద్యాలయం అంతర కళాశాలల ఖోఖో మహిళల చాంపియన్‌షిప్ పోటీలు శుక్రవారంతో ముగిశాయి. సిద్ధార్థ కళాశాల ప్రథమ స్థానం, కెబిఎన్ కళాశాల ద్వితీయ స్థానం, విఎస్‌ఆర్ కళాశాల తృతీయ స్థానం దక్కించుకోగా ఆంధ్ర లయోలా కళాశాల నాలుగో స్థానంలో నిలిచింది. శుక్రవారం జరిగిన లీగ్ మ్యాచ్‌ల ఫలితాలు ఈ విధంగా ఉన్నాయి. విఎస్‌ఆర్ ప్రభుత్వ కళాశాలపై 4-2 తేడాతో శ్రీ దుర్గామల్లేశ్వర సిద్ధార్థ మహిళా కళాశాల, ఆంధ్రా లయోల కళాశాలపై 15-3 తేడాతో కెబిఎన్ కళాశాల, ఆంధ్రా లయోల కళాశాలపై 5-0 తేడాతో విఎన్‌ఆర్ ప్రభుత్వ కళాశాల, కెబిఎన్ కళాశాలపై 3-1 తేడాతో శ్రీ దుర్గా మల్లేశ్వర సిద్ధార్థ మహిళా కళాశాల జట్లు విజయం సాధించాయి. అనంతరం జరిగిన బహుమతి ప్రదానోత్సవ కార్యక్రమానికి ముఖ్య అతిథులుగా కళాశాల ప్రిన్సిపాల్ టోర్నీ చైర్మన్ డాక్టర్ టి విజయలక్ష్మి, ఆంధ్రా ఖోఖో సంఘ కార్యదర్శి టిఎస్‌ఆర్‌కె ప్రసాద్ పాల్గొని విజేతలకు ట్రోపీలను అందజేశారు. ఈ కార్యక్రమంలో కృష్ణా వర్సిటీ స్పోర్ట్స్ బోర్డు కార్యదర్శి డాక్టర్ ఎన్ శ్రీనివాసరావు, సిద్ధార్థ కళాశాల వ్యాయామ విద్య సంచాలకులు, టోర్నీ కార్యనిర్వాహక కార్యదర్శి డాక్టర్ జి వనజాకుమారి, వివిధ కళాశాలల వ్యాయామ విద్యా సంచాలకులు పాల్గొన్నారు.