కిప్సాంగ్, గలిమొవాలకు మారథాన్ టైటిళ్లు

హొనలులూ (హవాయ్), డిసెంబర్ 10: కెన్యా రన్నర్ విల్సన్ కిప్సాంగ్, రష్యా అథ్లెట్ వలెంటినా గలిమొవా ఇక్కడ జరిగిన హొనలులూ మారథాన్‌లో వరుసగా పురుషులు, మహిళల విభాగాల్లో టైటిళ్లు సాధించారు. కిప్సాంగ్ 2 గంటలా, 12.31 నిమిషాల్లో లక్ష్యాన్ని చేరాడు. మార్కొస్ గెనెటీ (ఇథియోపియా), కిప్లిమో కిముతాయ్ (కెన్యా) తీవ్రంగా పోటీపడినప్పటికీ కిప్సాంగ్‌ను అధిగమించలేకపోయారు. మహిళల విభాగంలో గలిమొవా 2 గంటల, 21.23 నిమిషాల్లో గమ్యాన్ని చేరి స్వర్ణ పతకం కైవసం చేసుకుంది. ఈమెకు ఇథియోపికా అథ్లెట్ వొయినిషెట్ గిర్మా చివరి వరకూ గట్టిపోటీనిచ్చింది.