ఇలియానా.. మజాకా!!

అంటున్నారు ఇప్పుడు బాలీవుడ్ జనం. ఎందుకని ఆలోచిస్తున్నారా? అదే మరి తొందరంటే...! టాలీవుడ్ చిత్రాల్లో ఓ మెరుపు మెరిసి బాలీవుడ్‌కు పయనమైన ఈ బక్క పల్చని తార కరీనా-ప్రియాంక చోప్రాల మాజీ ప్రియుడు షాహిద్‌కపూర్‌తో చెట్టా పట్టాలేసుకుని తెగతిరుగుతోందిట. వీరిద్దరూ కలిసి ఇప్పుడు ‘్ఫటా పోస్టర్ నిక్లా హీరో’ అనే చిత్రంలో జంటగా నటిస్తున్న విషయం తెలిసిందే. షూటింగుల్లో ఎవరికీ చెప్పకుండా సెట్స్‌నుంచి మాయమైపోతున్నారట. దాంతో దర్శక, నిర్మాతల పాట్లు అంతా ఇంతా కాదట. బాలీవుడ్‌లో అడుగుపెట్టిన ఇలియానా అప్పుడే ఇలాంటి వేషాలు వేస్తే ఎంతో కాలం ఉండలేదనే విమర్శలు దర్శక, నిర్మాతల్లో వ్యక్తమవుతున్నాయట. అదీ...సంగతీ!!
.........................

తగ్గుతున్న అవకాశాలు!
తెలుగు, తమిళ చిత్రాల్లో ఓ వెలుగు వెలిగిన తర్వాత బాలీవుడ్‌కు మకాం మార్చిన భామ అసిన్‌కు ఇప్పుడు అక్కడ కూడా భారీ కాంపిటీషన్ ఎదురవుతోందిట. అమ్మనాన్న తమిళ అమ్మాయి, శివమణి, లక్ష్మీనరసింహ, గజిని చిత్రాల్లో తన అద్భుతమైన నటనతో అన్ని వర్గాల ప్రేక్షకుల్ని అలరించిన ఈ ముద్దుగుమ్మకు బాలీవుడ్ అవకాశం వెతుక్కుంటూ వచ్చింది. అదీ.. అమీర్‌ఖాన్ సరసన ‘గజిని’. దాంతో ఆమెకు బాలీవుడ్‌లో తిరుగే లేకుండా పోయింది. అయితే ఇది గతం. ఇప్పుడు ఆమె పరిస్థితి అందుకు భిన్నంగా వుంది. ఆమె ఊహించిన స్టార్‌డమ్ ఇంకా దరిచేరలేదు కదా..అవకాశాలు కూడా చెప్పుకోతగ్గ స్థాయిలో లేవు. ప్రస్తుతం అసిన్, అక్షయ్‌కుమార్ జంటగా నటించిన ‘కిలాడి 786’ చిత్రం విడుదలకు సిద్ధంగా వుంది. ఈ చిత్రం ప్రమోషన్‌లో భాగంగా ఇటీవల హైదరాబాద్‌కు వచ్చిన ఈ జంట అందరి దృష్టిని ఆకర్షించింది. ఈ చిత్రం మంచి కలెక్షన్లు రాబట్టుకుంటేనే అసిన్ బాలీవుడ్‌లో మరిన్ని అవకాశాలు వస్తాయని ఆమె సన్నిహితులు చెబుతున్నారు. టాలీవుడ్ నుంచి వెళ్లిన తారలు ఇప్పుడు అక్కడ అసిన్‌కు పోటీగా నిలుస్తున్నారట. దాంతో అసిన్‌వైపు బాలీవుడ్ నిర్మాతలు కనె్నత్తి చూడడం లేదని విమర్శకులు సెలవిస్తున్నారు. ‘ఏది ఏమైనా నా అవకాశాలు నాకున్నాయి. నాకు ఎవరూ పోటీ కాదు’ అంటోంది అసిన్. చూద్దాం...ఇంకెంత కాలం ఇలా నెట్టుకొస్తుందో...?
................................

టాలీవుడ్ చూపు... సోనాక్షి వైపు!

సోయకళ్ల సొగసరి సోనాక్షి సిన్హా వైపు ఇప్పుడు టాలీవుడ్ ఆసక్తిగా ఎదురుచూస్తోంది. శత్రఘ్నసిన్హా తనయగా బాలీవుడ్‌పై అడుగుపెట్టిన సోనాక్షి తొలి చిత్రంతోనే అందరి దృష్టిని ఆకర్షించింది. దబాంగ్, రౌడీరాథోడ్, సన్నాఫ్ సర్దార్ చిత్రాలలో ఆమె నటనను చూసిన టాలీవుడ్ దర్శక, నిర్మాతలు సోనాక్షిని తమ చిత్రాల్లో నటింపజేయాలనుకుంటున్నారు. అందులో భాగంగానే ప్రిన్స్ మహేష్‌బాబు సరసన క్రిష్ దర్శకత్వంలో వై జయంతీ సినిమా పతాకంపై సి.అశ్వనీదత్ నిర్మించే ‘శివం’ అనే చిత్రంలో నటించేందుకు సోనాక్షి అగ్రిమెంటు కుదుర్చుకున్నట్లు తెలిసింది. టాలీవుడ్ భామలంతా బాలీవుడ్ వైపు దృష్టి సారిస్తున్న ఈ తరుణంలో బాలీవుడ్ బ్యూటీ సోనాక్షి టాలీవుడ్‌పై ఆసక్తి కనబర్చడం విశేషమేనంటున్నారు సినీజనం. చూద్దాం..సోనాక్షి టాలీవుడ్‌పై ఎలాంటి మెరుపులు మెరిపిస్తుందో...!!