‘తెలిసి తెలియక’కు సెన్సార్ ప్రశంసలు

‘ఐ మీడియా’ సమర్పణలో గీతానంద్, మైధిలి, కృష్ణ, హాసిని, సుధీర్ నాయికా నాయకులతో అమ్మ ఆర్ట్ క్రియేషన్స్ పతాకంపై తెరకెక్కిన సినిమా ‘తెలిసి తెలియక’. ఈ సినిమాకు కుమార్‌బాబు, నవీన్ యండ్ల నిర్మాతలు. ఈ చిత్రానికి జయప్రకాష్.కె దర్శకత్వం వహిస్తున్నారు. ఈ నెల 22న సినిమా విడుదల కానున్న సందర్భంగా నిర్మాతల్లో ఒకరైన కుమార్‌బాబు మాట్లాడుతూ- ప్రస్తుత యువతరం మెచ్చే కథాంశంతో రూపొందిన చిత్రమన్నారు. ‘పూర్తిగా యువత మనోభావాలకు అద్దంపడుతుంది. తెలిసీ తెలియని వయసులో ఉన్న యువతీ యువకుల ప్రేమ కథ ఇది. నేటి సినిమాల్లో ట్రెండ్ సెట్టర్ అవుతుందన్న నమ్మకం ఉంది. కొత్త నటీనటులు, సాంకేతిక నిపుణులను ప్రోత్సహిస్తే గొప్ప ప్రతిభ వెలికివస్తుందని, అందుకే నవతరాన్ని ప్రోత్సహిస్తూ, కొత్తవాళ్లతో ఈ సినిమా చేశామ’ని అన్నారు. ఇటీవల ‘మ్యాంగోమ్యూజిక్’ ద్వారా రిలీజైన ఆడియోకి శ్రోతల నుంచి విశేష స్పందన వస్తోందన్నారు. ఆరు వైవిధ్యమైన పాటలకి కార్తీక్ అద్భుతమైన సంగీతం అందించారన్నారు. సెన్సార్ సభ్యుల ప్రశంసలు అందుకున్న ఈ సినిమా ఈనెల 22న విడుదలవుతుంది. కార్యక్రమంలో నవీన్, జయప్రకాష్ పాల్గొన్నారు. ఈ చిత్రానికి కెమెరా:ఆనంద్ డోల, రీరికార్డింగ్:చిన్నా, ఎడిటింగ్: మార్తాండ్ కె.వెంకటేష్, రచన, దర్శకత్వం: జయప్రకాష్.కె.