‘ప్రేమిస్తే’ ‘నాన్న’ ‘షాపింగ్ మాల్’ లాంటి చిత్రాల నెన్నింటినో అందించిన సురేష్ కొండేటి తాజాగా మరో చిత్రాన్ని తెలుగు తెరకు అందించనున్నారు. తెలుగు, తమిళ భాషల్లో రూపొందుతున్న ఈ చిత్రాన్ని అక్కడి నిర్మాతలు, తెలుగు చిత్రాన్ని సురేష్ కొండేటి నిర్మిస్తున్నారు. తమిళ వర్షన్‌కి ‘యారుడా మహేష్’ అన్న టైటిల్‌ని ఖరారు చేసినప్పటికీ, తెలుగులో పేరు ఇంకా నిర్ణయించలేదు. ఇటీవలే ఈ చిత్రం షూటింగ్ పూర్తి చేసుకుని నిర్మాణానంతర కార్యక్రమాలు జరుపుకుంటున్న సందర్భంగా చిత్ర విశేషాలను నిర్మాత తెలుపుతూ- సందీప్ కిషన్ అంటే ‘స్నేహగీతం’ ‘ప్రస్థానం’ ‘రొటీన్ లవ్‌స్టోరీ’ చిత్రాలు గుర్తొస్తాయి. ‘గుండెల్లో గోదారి’ చిత్రం విడుదలకు సిద్ధంగా ఉంది. గత చిత్రాల్లోలానే సందీప్ ఈ చిత్రంలో మంచి రోల్ చేశారు. ఆర్.మదన్‌కుమార్ దర్శకత్వంలో రూపొందిన ఈ చిత్రం ‘యూత్‌ఫుల్ మూవీ’ అవుతుందన్న నమ్మకం ఉందని’ తెలిపారు. నిర్మాతల్లో ఒకరైన సమన్యరెడ్డి మాట్లాడుతూ- యూత్‌ఫుల్ చిత్రాలకు ఎప్పుడూ ఆదరణ ఉంటుంది. రొటీన్‌కి భిన్నంగా నిర్మిస్తున్న ఈ చిత్రంలోని పాత్రలతో యువతీ యువకులు ఎక్కడో ఓ చోట తమని తాము పోల్చుకుంటారు. అలాగే పెద్దవారిని కూడా ఫ్లాష్‌బ్యాక్‌లోకి తీసుకెళ్లే కథ ఇది’ అంటూ తెలిపారు.
డింపుల్ చోపడే కథానాయికగా నటిస్తున్న ఈ చిత్రానికి సంగీతం: గోపీసుందర్, నిర్మాత: సురేష్ కొండేటి, దర్శకత్వం: ఆర్.మదన్ కుమార్.