మెల్బోర్న్, జనవరి 21: ఆస్ట్రేలియా గ్రాండ్‌శ్లామ్ టెన్నిస్ టోర్నమెంట్‌లో ప్రపంచ నంబర్‌వన్ క్రీడాకారిణి విక్టోరియా అజరెంకా దూసుకెళుతోంది. సోమవారం జరిగిన మహిళల సింగిల్స్ నాలుగో రౌండ్ మ్యాచ్‌లో ఆమె ఎలెనా వెస్నినాను 6-1, 6-1 తేడాతో చిత్తుచేసింది. టైటిల్ కైవసం చేసుకునే అవకాశాలు తనకే ఎక్కువగా ఉన్నాయని నిరూపించే విధంగా విజృంభించిన అజరెంకాకు వెస్నినా కళ్లెం వేయలేకపోయింది. మరో మ్యాచ్‌లో స్వెత్లానా కుజ్నెత్సొవా 6-2, 2-6, 7-5 తేడాతో ప్రపంచ మాజీ నంబర్‌వన్ కరొలిన్ వొజ్నియాకిపై సంచలన విజయాన్ని నమోదు చేసింది. ఒక సెట్‌ను గెల్చుకొని, చివరి ఎట్‌లో తీవ్రంగా ప్రతిఘటించినప్పటికీ పదో సీడ్ వొజ్నియాకి ఓటమిని తప్పించుకోలేకపోయింది. వింబుల్డన్ చాంపియన్, మూడోసీడ్ సెరెనా విలియమ్స్ కూడా క్వార్టర్ ఫైనల్స్‌లో అడుగుపెట్టింది. నాలుగో రౌండ్‌లో ఆమె మరియా కిరిలెంకోను 6-2, 6-0 తేడాతో ఓడించింది. ఈ మ్యాచ్ కూడా దాదాపు ఏక పక్షంగా సాగింది. స్లొయేన్ స్టెఫెన్స్ 6-1, 3-6, 7-5 స్కోరుతో బొజనా జొవానొవ్‌స్కీని ఓడించింది.