పొరలు

డాక్టర్ కంటి పొరను
తొలగించాడు గాని
మనసు పొరను
ఎవరు తొలగించాలో!?
ముదరనివ్వండి అన్నాడు
సన్నటి పొర
ఉండనివ్వదూ ఊడిపోదు

దృశ్యాలను వడబోసీ వడబోసీ
కళ్ళు అలిసిపోతున్నాయి
ఇంతకూ నేను చూసిందెంత?
పసిపిల్లల ఇంట్లోంచి
బయటికి పరుగులు తీసినట్లు
కనుల లోగిళ్ళను
కనువిందు చేసే వెలుతురు చిత్రాలు
చిత్రాలను చదవడానికి
జీవితం సరిపోదు
కాంతి ఆహార్యంతో ఉన్న
చీకటి మాత్రం
మెల్లగా మనసులోనికి దిగుతుంది
పరిమాణం తెలియని
అపారమైన పారావారం మనసు
ఆరాటానికీ
అలలతో పోరాటానికీ
అంతు ఉండదు

కళ్ళు మూసుకుంటేనే మనస్సు
తెరిస్తే తెరలేపే ఉషస్సు
చీకటి ఉండదని కాదు
ఉషస్సు ఆధిపత్యం ముందు
అది కనిపించని తమస్సు!
అందుకే
మనసు పొరను కూడా తొలగిస్తే
అతీతమైన
ఓ కాంతిపుంజం సాక్షాత్కరిస్తుంది