సునీల్ కథానాయకుడుగా నటించిన ‘మిస్టర్ పెళ్లికొడుకు’ మొదటి సగం పూర్తి హాస్య భరితంగా, రెండో సగం కుటుంబ ప్రేక్షకులకు నచ్చే భావోద్వేగం సమాహారంలా ఉండడంతో తొలి రోజునుండి ప్రేక్షకుల ఆదరణ బావుందని చిత్ర నిర్మాత పారస్‌జైన్ తెలిపారు. దేవీప్రసాద్ దర్శకత్వంలో సునీల్, ఇషాచావ్లా జంటగా సూపర్ గుడ్ ప్రై.లిమిటెడ్ పతాకంపై నిర్మించిన ‘మిస్టర్ పెళ్లికొడుకు’ విడుదలైన సంగతి తెలిసిందే! చిత్రానికి పెరుగుతున్న ఆదరణ దృష్ట్యా హైదరాబాద్ సంస్థ కార్యాలయంలో విజయోత్సవ వేడుక నిర్వహించారు. ఈ సందర్భంగా నిర్మాత మాట్లాడుతూ- సునీల్ నటన, డాన్స్‌లతో విజయవంతమైన చిత్రంగా ముద్రపడిందనీ, తమిళనాడులో కూడా విడుదలైన అన్నీ థియేటర్లలో అపురూపమైన ఆదరణ లభిస్తోందనీ అన్నారు. సునీల్ కామెడీ హీరోగా కాకుండా ఫుల్‌ప్లెడ్జ్‌డ్ హీరోగా కనిపించారనీ, యువతకు మొదటి సగం, కుటుంబ ప్రేక్షకులకు రెండో సగం నచ్చుతుందని ఆయన వివరించారు. పాత్రల మధ్య సున్నితమైన భావోద్వేగాలు అద్భుతంగా పండాయనీ, సునీల్ డాన్స్‌లకే ఫస్ట్‌మార్కులు పడుతున్నాయనీ, ఆదరిస్తున్న ప్రేక్షకులకు ధన్యవాదాలని దర్శకుడు దేవీప్రసాద్ తెలిపారు.
తాను ఈ సంస్థలో రెండో చిత్రంగా నటించాననీ, అలాగే దర్శకుడు దేవీప్రసాద్‌తో కూడా రెండో చిత్రమని హీరో సునీల్ అన్నారు. షూటింగ్‌లో సరదాగా యూనిట్ పనిచేసిందనీ, రెండో సగంలో కూడా కామెడీ చేస్తే తానే చిత్రానికి విలన్ అవుతానని దర్శకుడు చెప్పడంతో కథకు ప్రాధాన్యత ఇచ్చామనీ ఆయన తెలిపారు. ఊహించని విధంగా కలెక్షన్లు వస్తున్నందుకు ఆనందంగా ఉందనీ, ‘సినీ పెళ్లికొడుకు’ను చూసాక అందరూ ఆనందంగా వెళతారనీ ఆయన ప్రేక్షకులకు ధన్యవాదాలు తెలిపారు. కార్యక్రమంలో అలీ, వాకాడ అప్పారావు, ఎస్.రాజ్‌కుమార్, కాదంబరి కిరణ్‌కుమార్, అంబటి శ్రీను, ఎల్బీశ్రీరామ్, పంపిణీదారులు పాల్గొన్నారు.
సునీల్ కథానాయకుడుగా నటించిన ‘మిస్టర్ పెళ్లికొడుకు’
english title:
sunil
Date:
Wednesday, March 6, 2013