సందీప్ కిషన్ హీరోగా ఎస్.కె. పిక్చర్స్ బ్యానర్‌పై సురేష్ కొండేటి ‘మహేష్’ అనే చిత్రాన్ని నిర్మిస్తున్నారు. గతంలో ఆయన ప్రేమిస్తే, నాన్న, షాపింగ్‌మాల్, జర్నీ తాజా గా పిజ్జా లాంటి విజయవంతమై చిత్రాలను అందించిన విషయం తెలిసిందే. ‘ఈరోజుల్లో, బస్‌స్టాప్’ లాంటి విజయవంతమైన చిత్రాలకు దర్శకత్వం వహించిన మారుతి ఈ ‘మహేష్’ చిత్రానికి సమర్పకుడిగా వ్యవహరించడం విశేషం. ‘పిజ్జా’కి సహ నిర్మాతగా వ్యవహరించిన సమన్యరెడ్డి ఈ చిత్రానికి కూడా ఆ బాధ్యతను నిర్వర్తిస్తున్నారు. తెలుగు, తమిళ భాషల్లో రూపొందుతున్న ఈ చిత్రానికి ఆర్.మదన్‌కుమార్ దర్శకుడు. ఇందులో సందీప్ సరసన డింపుల్ చోపడే కథానాయికగా నటిస్తోంది. ప్రస్తుతం ఈ చిత్రానికి సంబంధించిన అనువాద కార్యక్రమాలు జరుగుతున్నాయి. ‘సంతోషం స్టూడియోస్’లోని డబ్బింగ్ థియేటర్‌లో ఈ డబ్బింగ్ కార్యక్రమాలు జరుపుతున్నారు. ఈ సందర్భంగా సురేష్ కొండేటి మాట్లాడుతూ-‘‘ఇది రొమాంటిక్ కామెడీ మూవీ. యువతీ యువకులు ఎక్కడో ఒకచోట ఈ చిత్రంలోని పాత్రలతో తమనితాము పోల్చుకుంటారు. అలాగే పెద్ద వారిని ఓసారి ఫ్లాష్‌బ్యాక్‌లోకి తీసుకెళ్లే కథ ఇది. పాత రోజులను గుర్తుచేసుకుని ఆనందపడే విధం గా ఈ చిత్రం ఉంటుంది. కథ కథనాలు ఒక హైలెట్ కాగా, సందీప్ కిషన్ నటన ఈ చిత్రానికి ఓ ఎస్సెట్ అవుతుంది. ఈనెలాఖరున ఈ చిత్రాన్ని విడుదల చేయాలనుకుంటు న్నాం’’ అని చెప్పారు. ఈ చిత్రానికి సంగీతం: గోపీసుందర్, కెమెరా: రానా, కథ, స్క్రీన్‌ప్లే, దర్శకత్వం: ఆర్.మదన్‌కుమార్.