అవినాష్, వౌనిక జంటగా ఎం.ఎన్.రెడ్డి దర్శకత్వంలో అంజయ్య ఒర్సు నిర్మిస్తున్న చిత్రం మెట్రో ప్రొడక్షన్స్ పతాకం హైదరాబాద్‌లో ప్రారంభమైంది. రామానాయుడు స్టూడియోలో హీరోహీరోయిన్లపై ముహూర్తపు సన్నివేశానికి రాజ్యసభ సభ్యుడు శ్రీనాధ్‌రెడ్డి క్లాప్ ఇవ్వగా వి.సాగర్ కెమెరా స్విచ్చాన్ చేశారు. ఈ సందర్భంగా ఏర్పాటుచేసిన పాత్రికేయుల సమావేశంలో చిత్ర దర్శకుడు ఎం.ఎన్.రెడ్డి మాట్లాడుతూ- ఓ ప్రాంతంలో విచిత్రమైన సంఘటనలు జరుగుతున్న నేపథ్యంలో నాయికా నాయకులు ఆ సమస్యలను ఎలా పరిష్కరించారు అన్న కధతో సస్పెన్స్ థ్రిల్లర్‌గా ఈ చిత్రాన్ని నిర్మిస్తున్నామని, ఏప్రిల్ 2 నుండి రెగ్యులర్ షూటింగ్ ప్రారంభిస్తున్నామని అన్నారు. మూడు షెడ్యూల్స్‌లో షూటింగ్ పూర్తిచేసే ఈ చిత్రం హైదారాబాద్, భద్రాచలం, వైజాగ్ అరకు ప్రాంతాలలో చిత్రీకరిస్తామని, జూలైలో సినిమాను విడుదల చేయడానికి సన్నాహాలు చేస్తున్నామని ఆయన వివరించారు. సరికొత్త కథ, కథనాలతో తెరకెక్కుతున్న సస్పెన్స్ థ్రిల్లర్ ఎంటర్‌టైనర్‌గా ఉండే ఈ చిత్రం తెలుగు ప్రేక్షకులకు సరికొత్త అనుభూతిని అందిస్తుందని నిర్మాత అంజయ్య ఒర్సు అన్నారు. కార్యక్రమంలో అవినాష్, వౌనిక, చిత్ర విశేషాలు వివరించారు. వైజాగ్ శివ, గబ్బర్‌సింగ్ ఆంజనేయులు, బంటి, వెంకట్ భగవాన్, చందు, ఆశీర్వాద్ శర్మ తదితరులు నటిస్తున్న ఈ చిత్రానికి కెమెరా:మహీచార్ల, సహ నిర్మాతలు: వైజాగ్ శివ, దాసరి చందు, ఆశీర్వాద్ శర్మ, నిర్మాత:అంజయ్య ఒర్సు.