Clik here to view.
భద్రాచలంలోని శ్రీసీతారామచంద్ర స్వామి ఆలయంలో ‘రామనవమి బ్రహ్మోత్సవం’ వేడుకలు ఘనంగా ప్రారంభమయ్యాయి. అంగరంగ వైభవంగా తొమ్మిది రోజులపాటు జరిగే ఉత్సవాల్లో తొలిరోజు బుధవారం అగ్నిప్రతిష్ఠ, ధ్వజారోహణం నిర్వహించారు. రెండోరోజు ‘ఎదుర్కోలు’ వేడుక సంప్రదాయబద్ధంగా జరిగింది. నవమి రోజున శ్రీ సీతారామ కల్యాణం కన్నుల పండువగా నిర్వహించేందుకు సన్నాహాలు పూర్తయ్యాయి. కల్యాణోత్సవాన్ని తిలకించేందుకు వివిధ ప్రాంతాల నుంచి భారీ సంఖ్యలో భక్తులు భద్రాద్రికి తరలివచ్చారు. ఈ నెల 20న ‘పుష్కర సామ్రాజ్య పట్ట్భాషేకం’, 21న ‘హంసవాహన సేవ’, 22న ‘తెప్పోత్సవం’, 23న ‘ఊంజల సేవ’, ‘సింహవాహన సేవ’, 24న ‘వసంతోత్సవం’ జరుగుతాయి. 25న ‘పూర్ణాహుతి’తో బ్రహ్మోత్సవాలు ముగుస్తాయి.
అయోధ్య (ఉత్తరప్రదేశ్), సీతామర్హి (బీహార్), రామేశ్వరం (తమిళనాడు)ల్లో రామనవమి వేడుకలు జరుగుతున్నా, మన రాష్ట్రంలోని భద్రాచలం ఆలయంలో జరిగే వేడుకలనే ప్రధాన ఉత్సవంగా భక్తులు పరిగణిస్తారు. వివిధ ప్రాంతాల నుంచి వచ్చే భక్తజనుల కోసం ఆలయ అధికారులు విస్తృత ఏర్పాట్లు చేశారు.
