రంజిత్ మూవీస్ పతాకంపై ఇంద్రగంటి మోహనకృష్ణ దర్శకత్వంలో సుమంత్ అశ్విన్, ఇషా జంటగా నటిస్తున్న చిత్రం ‘అంతకుముందు.. ఆ తరువాత’. దాము నిర్మిస్తున్న ఈ చిత్రం పూర్తికావస్తోంది. ఈ సందర్భంగా సంస్థ కార్యాలయంలో ఏర్పాటుచేసిన పాత్రికేయుల సమావేశంలో దర్శకుడు మాట్లాడుతూ తన దర్శకత్వంలో నిర్మిస్తున్న ఐదవ చిత్రం ఇదని, ప్రేమకు ముందు, ప్రేమలో పడిన తరువాత ప్రేమికుల మనోభావాలు ఎలా ఉంటాయి, వారి భావావేశం ఎటువైపు ఆలోచిస్తుంది అన్న అంశంతో ఈ చిత్రాన్ని నిర్మించామని, అందరికీ నచ్చుతుందని తెలిపారు. తమ సంస్థలో 14వ చిత్రంగా నిర్మించిన ఈ సినిమా మే మొదటి వారంలో పాటలను, నెలాఖరున సినిమాను విడుదల చేయడానికి సన్నాహాలు చేస్తున్నామని, వినోదంతో కూడిన రొమాంటిక్ ఎంటర్‌టైనర్‌గా నిర్మించామని నిర్మాత దాము తెలిపారు. ఈ చిత్రంలో పనిచేసినందువల్ల తానెంతో నేర్చుకున్నానని, తప్పకుండా ఈ చిత్రం తనకు గుర్తింపు తెస్తుందని కథానాయకుడు సుమంత్ అశ్విన్ తెలిపారు. తన తొలి చిత్రంతోనే ఓ మంచి సంస్థలో నటించడం సంతోషంగా వుందని కథానాయిక ఇషా తెలిపారు. కార్యక్రమంలో కళ్యాణి కోడూరి తదితరులు పాల్గొన్నారు. రోహిణి, మధుబాల, ప్రగతి, రవిబాబు, రావురమేష్, అవసరాల శ్రీనివాస్, తా.రమేష్, ఝాన్సీ, సుదీప, మాధవి, పమ్మిసాయి, అర్చన తదితరులు నటిస్తున్న ఈ సినిమాకి పాటలు: సిరివెనె్నల సీతారామశాస్ర్తీ, అనంత్ శ్రీరామ్, ఎడిటింగ్: మార్తాండ్ కె.వెంకటేష్, కెమెరా: పి.జి.విందా, సంగీతం: కళ్యాణి కోడూరి, నిర్మాత: దామోదర్ ప్రసాద్, కథ, మాటలు, స్క్రీన్‌ప్లే, దర్శకత్వం: ఇంద్రగంటి మోహనకృష్ణ.