డ్రాకులా..సినీ తెరపై హర్రర్ నేపథ్యంలో సంచలనం సృష్టించిన పేరు. ఈ డ్రాకులా పేరుతో రకరకాల చిత్రాలొచ్చాయి. తాజాగా డ్రాకులాను కొత్తగా ప్రజెంట్ చేస్తూ రూపొందిన చిత్రం సెయింట్స్ డ్రాకులా. 3డి వెర్షన్‌లో రూపొందిన ఈ భారీ చిత్రం డ్రాకులాకు, క్రైస్తవ మత సన్యాసికి మధ్య జరిగే సంఘటనలతో రూపొందింది. రూపేష్‌పాల్ దర్శకత్వంలో బిజ్‌టివి నెట్‌వర్క్ సమర్పణలో ఓమ్ స్వస్తిక్ మూవీస్ ద్వారా రూపొందుతున్న ఈ చిత్రం అన్ని కార్యక్రమాలు పూర్తిచేసుకొని మేలో విడుదలకు సిద్ధమైంది. ఈ సందర్భంగా చిత్ర నిర్మాత అభిని సోహాన్ చిత్ర విశేషాలు తెలియజేస్తూ-‘‘హాలీవుడ్‌లో భారీ ప్రతిష్టాత్మకంగా రూపొందించిన చిత్రమిది. డ్రాకులాపై ఎన్నో చిత్రాలు వచ్చి వుంటాయి. మరో కొత్త కోణాన్ని సృష్టిస్తూ తెరకెక్కించారు. 15వ శతాబ్దపు వాలాబియా చక్రవర్తి విలాడ్-3 క్యారెక్టర్‌తో ఈ చిత్ర కథ ఉంటుంది. నటీనటులుగా మిట్చ్‌పావెల్, పాట్రిసియా దువారైలునుంటారు. హర్రర్ నేపథ్యంగా చూసే ప్రేక్షకులకు థ్రిల్లింగ్ కలిగించే అంశాలతోపాటు హీరోహీరోయిన్‌ల మధ్య సాగే రొమాంటిక్ సన్నివేశాలు ప్రేక్షకులను ఆకట్టుకుంటాయి. ప్రస్తుతం ఈ చిత్రానికి సంబంధించిన అన్ని కార్యక్రమాలు పూర్తయ్యాయి. సెన్సార్ కూడా పూర్తయింది. మే నెలలో తెలుగు, హిందీ, ఇంగ్లీషు భాషల్లో ఈ చిత్రాన్ని విడుదల చేస్తాం. నైజాంలో ఎస్వీసి ఫిలింస్ ద్వారా విడుదల కానుంది’’ అన్నారు.